ZIR TUR THUZIAK 36
HLA 89 Ngaithlain A Thu Zâwm R’u
‘Thu Zâwmtute Lo Ni Zâwk Rawh U’
“Thu ngaithlatute mai ni lovin, zâwmtute lo ni zâwk rawh u.” —JAK. 1:22.
A TUM BER
He thuziak hian nî tina Pathian Thu chhiar mai ni lovin, kan thu chhiarte ngaihtuaha nunpui lehzual duhna nei tûrin min ṭanpui ang.
1-2. Pathian chhiahhlawhte chu engin nge hlimna pe? (Jakoba 1:22-25)
JEHOVA leh a Fapa duh tak chuan hlim tûrin min duh a. Sâm 119:2-na ziaktu chuan: “A thuhriattîrte zâwmtute chu an eng a thâwl e, thinlung zawng zawnga zawngtute chu,” tiin a sawi a ni. Chu bâkah, Isua chuan: “Pathian thu hriaa zâwmte hi mi hamṭha an ni zâwk e!” tiin a sawi bawk.—Lk. 11:28.
2 Jehova betute kan nih angin mi hlim thei tak kan ni a. Engvângin nge? A chhan tam tak a awm a. Chûng zînga pakhat chu, Pathian Thu chhiar ziahin, kan thu chhiarte chu nunpui kan tum tlat vâng a ni.—Jakoba 1:22-25 chhiar rawh.
3. Pathian Thua kan thu chhiarte nunpuina chu engtin nge kan hlâwkpui?
3 ‘Thu zâwmtute’ nih chu kawng tam takin kan hlâwkpui a. Kawng khatah chuan, Jehova tihlâwmna atâna thil pawimawh tak a ni tih kan hriat vâng a ni a. Chutianga tihna chuan hlimna min pe a ni. (Thur. 12:13) Pathian thâwk khum Thua kan thu chhiarte nunpuina chuan kan chhungkaw nunah hlimna a thlen lehzual a, kan Kristian unaute nên inlaichînna ṭha min neihtîr lehzual bawk a ni. Chutiang chu i nunah pawh a thleng dik tawh ngei ang. Chu bâkah, Jehova kawng zawh lotute chunga thleng harsatna tam tak chu kan pumpelh thei bawk a. Ni e, Lal Davida thusawi hi kan ṭâwmpui a ni. Jehova dânte, thupêkte leh, rorêlnate chungchâng hlaa a târ lan hnuah: “Chûng zawm chu lâwmman nasa tak neihna a ni ṭhîn,” tiin thu tâwp a siam a ni.—Sâm 19:7-11.
4. Engvângin nge Pathian Thu zâwmtute nih chu a awlsam loh?
4 Dik taka sawi chuan, Pathian Thu zâwmtu nih chu thil awlsam a ni reng lo va. Buai hle mah ila, Jehova’n ti tûra min duhte kan hriatthiam theihna tûrin Bible chhiar nân leh zir nân hun kan insiam tûr a ni. Chuvângin, Bible chhiar ziah tûra min ṭanpui thei thurâwn ṭhenkhat chu i lo en nawn ang u. Kan thu chhiarte ngaihtuah tûr leh kan thu zirte nunpui theih dân kawng hre tûra min ṭanpui theitu chungchâng pawh kan sawiho bawk ang.
PATHIAN THU CHHIAR NAN HUN INSIAM RAWH
5. Eng mawhphurhnate hlen nân nge hun tam tak kan pêk ngai?
5 Jehova betu a tam zâwkte chuan tih tûr kan ngah hle a. Bible pêk mawhphurhna chi hrang hrang hlen tûrin hun tam tak kan pe a ni. Entîr nân, a tam zâwk chuan mahni leh chhungkaw châwm nân hna an thawk a. (1 Tim. 5:8) Kristian tam tak chuan dam lo, a nih loh leh kum upa an chhûngte chu an enkawl a. Chu bâkah, kan zavai hian mahni hrisêlna ngaihsak kan mamawh vek bawk a, chûngte tih nân hun tam tak kan pêk a ngai ṭhîn a ni. Chûng mawhphurhnate bâkah, kohhranah chanvote kan nei bawk a. Mawhphurhna pawimawh tak dang pakhat chu thu hrilh rawngbâwlnaa ṭhahnemngai taka tel hi a ni. Chutiang mawhphurhna tam tak i nei a nih pawhin, engtin nge Bible chhiar ziah nân te, chhût ngun nân te leh, nunpui nântea hun i pêk theih ang?
6. Engtin nge Bible chhiarna chu thil pawimawh berah i dah theih? (Milem en bawk rawh.)
6 Kristiante tân Bible chhiar chu “thil pawimawh zâwkte” zînga a tel avângin kan ngaih pawimawh a ngai a. (Phil. 1:10, NWT.) Mi hlim thei tak chungchângah Sâm pakhatna chuan: “A lâwmna chu LALPA dânah a ni zâwk a; A dân thu chu a chhûn a zânin a ngaihtuah ṭhîn,” tiin a sawi a. (Sâm 1:1, 2) Chu chuan Bible chhiar nân hun kan pe tûr a ni tih chiang takin a târ lang a ni. Eng hun hi nge Bible chhiar nâna ṭha ber chu ni ang? Kan chhânna chu a inang lo ṭheuh thei a. A pawimawh ber chu Bible kan chhiar ziah theihna tûr hun kan thlan hi a ni. Unau Victor-a chuan: “Zîng kârah Bible ka chhiar ṭhîn a. Zîng thawh hma harsa ti mi ni mah ila, chu hun chu rilru la pêngtu a tlêm lai ber a ni. Ka rilru a harhvângin ka insâwr bing thei bawk a ni,” tiin a sawi. I tân pawh chutiang chu a ni mai thei a. Heti hian inzâwt ang che, ‘Bible chhiar nân eng hun hi nge ka tân ṭha ber ang?’ tiin.
Eng hun nge Bible chhiar nân ṭha ber ang? Eng hunah nge i chhiar ziah theih ang? (Paragraph 6-na en rawh)
I THU CHHIARTE CHU CHHUT NGUN RAWH
7-8. Engin nge kan thu chhiarte hlâwkpui pumhlûm thei lo tûra min dâl thei? Hrilhfiah rawh.
7 Thu tam tak chu ngaihtuah chiang lovin kan chhiar fo pawh a ni thei a. Thu eng emaw i chhiar zawh hnuah, i thu chhiarte chu i theihnghilh deuh vek mai ṭhîn em? Chutianga awm châng chu kan nei ṭheuh tawh ngei ang. Bible kan chhiar pawhin chutiang chu a ni thei a ni. Entîr nân, ni khata Bible bung chhiar tûr zât kan inbithliah pawh a ni thei a. Chu chu thil ṭha tak a ni. Thiltumte insiamin hlen kan tum tûr a ni. (1 Kor. 9:26) Mahse, Bible chhiarna chu bul ṭanna chauh a ni a. Pathian Thu chhiarna hlâwkpui pumhlûm tûr chuan chu aia tam kan tih a ngai a ni.
8 He entîrna hi han ngaihtuah teh: Thlaite chuan an ṭhan len theih nân ruah tui an mamawh a. Mahse, hun rei lo te chhûnga ruah tam tak a sûr a nih chuan lei chu a diak vek dâwn a. Ruah sûr zêl chuan hlâwkna a thlen lo vang. Lei chuan ruah tui hîp lut tûr leh thlai ṭhantîr tûrin hun a mamawh a ni. Chutiang bawkin kan thu chhiarte ngaihtuah thei lo a, hre reng thei lo leh, nunpui thei lo khawpa hmanhmawh taka Bible chhiar chu kan pumpelh tûr a ni.—Jak. 1:24.
Leiin ruah tui a hîp luh a, a hman ṭangkai theih nâna hun a mamawh ang bawkin, Pathian Thu chhût nguna nunpui nân hun kan mamawh (Paragraph 8-na en rawh)
9. Hmanhmawh takin Bible i chhiar ṭhîn a nih chuan eng nge i tih ngai?
9 Bible chu hmanhmawh taka chhiar châng i nei ṭhîn em? Eng nge i tih theih? Muangchângin chhiar rawh. I thil chhiar mêkte leh chhiar tawhte chu chhût ngun tum ang che. Chu chu thil harsa a ni lo. Chhût ngun tûra fuihna chu thil harsa tak anga i thlîr a nih chuan, i thu chhiar tawhte ngaihtuah tûr maia thurâwn angin i pawm thei a ni. I inzirnaah ngaihtuahna leh chhût ngunna i telh theih nân hun tam lehzual i hmang thei a. A nih loh leh, Bible châng tlêm tê chu chhiarin a bâk zawng chu i thu chhiarte chhût ngun nân i hmang thei a ni. Kan sawi tâk Victor-a chuan, “Bible chhiar nân hun tlêm tê ka hmang a, a châng chuan bung khat chauh te ka chhiar ṭhîn. Zîng kâra ka chhiar ṭhin avângin ka thu chhiarte chu nilêngin ka ngaihtuah chhunzawm thei,” tiin a sawi. I chhiar tûr zât chu i bithliah thei a. Mahse, a pawimawh ber chu muangchânga chhiar a, i thu chhiarte ngaihtuah nâna hun hman hi a ni.—Sâm 119:97; “ Ngaihtuah Tûr Zawhnate,” tih bâwm chu en rawh.
10. I thu chhiarte i nunpui theih dân tûr hrilhfiah rawh. (1 Thessalonika 5:17, 18)
10 Bible i chhiar hun emaw, i chhiar rei zâwng emaw chu eng pawh ni se, i thu chhiarte nunpui dân kawng zawng la. Pathian Thua eng emaw lai i chhiar hunah, ‘Engtin nge he thu hi tûnah, a nih loh leh nakinah ka nunpui theih ang?’ tiin inzâwt ang che. Entîr nân, 1 Thessalonika 5:17, 18 chu chhiar angin han inmitthla teh. (Chhiar rawh.) Chûng châng hnihte i chhiar zawh hnuah châwlin, i ṭawngṭai ngun dân leh thûk dân chu ngaihtuah ang che. Chu bâkah, i thil ngaihhlutte chu i ngaihtuah thei bawk a. Chûng zînga thil pathum atân Jehova hnênah lâwmthu sawi i duh pawh a ni thei a ni. Chutianga hun rei lo te chhûng rilru pe taka ngaihtuahna chuan, Pathian Thu ngaithlaa zâwmtu a nihtîr ang che. Nî tina Bible châng dang i chhiar hunah pawh chutianga tihna i hlâwkpui dân tûr chu han ngaihtuah teh. Ni e, Pathian Thu zâwmtu ṭha lehzual i rawn ni ang. Mahse, nunpui tûr tam tak a awm nia a lang a nih chuan, engtin nge ni ang?
THILTUM INAWM TAKTE INSIAM RAWH
11. Engvângin nge i thu chhiarte nunpui tûra hmalâk chu huphurh châng i neih mai theih? Entîrna pe rawh.
11 Bible i chhiar a, a kaihhruainate nunpui dân tûr kawng i zawn hian tih tûr tam tak nei angin i inhre thei a. He entîrna hi han ngaihtuah teh: Vawiina i Bible chhiarah thlei bîk neihna chungchânga vaukhânna a tel a. (Jak. 2:1-8) Mi dangte i cheibâwl dân chungchângah hma i sâwn theih dân tûr i hmu a ni. Chutianga tih chu i tum ta a. Thil ṭha tak a ni! Tichuan, a tûkah kan thusawia kan fîmkhur a pawimawhzia târ langtu Bible châng i chhiar a. (Jak. 3:1-12) A chângin mi dangte tilunghnual thei thu i sawi ṭhîn tih i hre chhuak ta a. Chuvângin, a ṭha zâwng leh mi dangte tichak zâwnga thusawi tam lehzual chu i tum ta a ni. Tichuan, a tûk leha i Bible chhiarah chuan khawvêl ṭhian ni lo tûra vaukhânna a tel a. (Jak. 4:4-12) Intihhlimna thlan dân chungchângah i fîmkhur a ngai tih chu i hre leh a. A ni linaah chuan i tih tûr zawng zawngte ngaihtuahin i huphurh hle pawh a ni thei a ni.
12. I Bible chhiarte aṭangin insiam ṭhatna tûr i hmu a nih pawhin, engvângin nge i lunghnual loh vang? (Footnote en bawk rawh.)
12 Inthlâk danglamna tûr emaw, hma sâwnna tûr emaw tam tak i nei a nih pawhin lunghnual mai lo la. Chu chuan thinlung ṭha tak pu mi i ni tih a târ lang a ni. Mi inngaitlâwm leh rilru dik tak putu chuan a insiam ṭhatna tûrte ngaihtuahin Bible a chhiar a. a Chutih rualin, ‘mihring thara’ inthuam chu thil tihchhunzawm zêl tûr a ni tih hre reng ang che. (Kol. 3:10) Engin nge Pathian Thu zâwmtu ni reng tûra ṭanpui ang che?
13. Engtin nge thiltum inâwm tak i insiam theih? (Milem en bawk rawh.)
13 Vawilehkhata i thu chhiarte nunpui tum vek ai chuan, thiltum inâwm takte insiam zâwk ang che. (Thuf. 11:2) Heti hian i ti chhin thei a ni. Hmasâwn i ngaihna laite chu ziak chhuak la; tichuan, chûng zînga pakhat emaw, pahnih emaw chu ti ṭan la, a dangte chu nakina tih atân dah ang che. Khawi aṭangin nge bul i ṭan ang?
Bible-a i thu chhiarte chu vawilehkhata nunpui vek tum lovin, engvângin nge thiltum inâwm takte i insiam zâwk loh vang? Thiltum pakhat emaw, pahnih emaw aṭangin bul i ṭan thei (Paragraph 13-14-na en rawh)
14. Eng thiltumte aṭangin nge bul i ṭan theih?
14 I tâna hlen awlsam tûr thiltumte aṭangin bul i ṭan thei a. A nih loh leh, hmasâwn i ngaihna lai ber nia i hriat aṭangin i ṭan thei bawk. Thiltum i insiam hnuah kan thu leh hla chhuahte aṭangin zir bingna nei ang che. Chumi atân chuan, Watch Tower Online Library emaw, Jehova Thuhretute Tâna Zir Bingna Hmanrua emaw chu hmang ang che. I thiltum i hlen theih nân, Jehova hnênah “tih tum tûr leh bei tûra” chakna pe tûr chein ṭawngṭaiin dîl la. (Phil. 2:13) Tichuan, i thil zir tawhte chu nunpui ang che. I thiltum hmasaah hmasâwnna i hmu a nih chuan, thiltum dangte ti tûrin phûrna i neih lehzual a rinawm. A nihna takah chuan i Kristian mizia emaw, Kristian nun kawngahte emaw hma i sâwn a nih chuan chutianga hmasâwnna neih zêl chu awlsam i ti lehzual ang.
PATHIAN THU CHU ‘I CHHUNGAH THAWHTIR RAWH’
15. Engtin nge Jehova mite chu Bible chhiartu mi tam takte laka an danglam? (1 Thessalonika 2:13)
15 Mi ṭhenkhat chuan Bible chu vawi tam tak chhiar chhuak tawh niin an inchhâl a. Mahse, Bible chu an ring tak zet em? Bible tehnate chu zâwmin an nunah inthlâk thlengnate chu an siam em? Lungchhiatthlâk takin, chutiang chuan mi tam takin an ti lo. Jehova mite nên an va inang lo tak êm! Kum zabi khatnaa Kristiante angin, Bible chu ‘Pathian thu pawmin kan pawm a.’ Chu bâkah, Bible kaihhruainate chu theih tâwpa zawm kan tum a ni.—1 Thessalonika 2:13 chhiar rawh.
16. Pathian Thu zâwmtute ni tûrin engin nge min ṭanpui thei?
16 Pathian Thu chhiara nunpui chu thil awlsam tak a ni reng lo. Bible chhiar nân hun kan nei lo pawh a ni thei a. A nih loh leh, hmanhmawh taka chhiarin kan thu chhiarte kan chhût ngun lo pawh a ni thei. Hma sâwn kan ngaihna laite ngaihtuahin kan huphurh hle pawh a ni thei bawk. I harsatna chu eng pawh ni se, hneh theih loh a ni lo. Jehova ṭanpuinain i hneh thei a ni. Chuvângin, a ṭanpuina pawmin, ngaithlaa theihnghilhtu ni mai lovin, a Thu zâwmtute nih i tum ṭheuh vang u. Pathian Thu kan chhiara kan nunpui tam poh leh hlimna min thlen lehzual ang tih chu rinhlelh rual a ni lo.—Jak. 1:25.
HLA 94 Pathian Thu Avânga Lâwmna
a Kan website jw.org aṭangin I ṭhiante Sawi Chu—Bible Chhiar Chungchângah tih video chu en rawh.
