1. Nakin lawkah eng rorêlna nge lo thleng ang?

 HUN pawimawh takah kan nung a! Nakin lawkah, Isua’n leia mi tinte chungah ro a rêl ang. Isua’n a hnungzuitute hnênah a lo kal lehna leh “khawvêl tâwpna chhinchhiahna” lo awm tûrte chu pein, chu rorêlna a lo thlen hun tûr chu a hrilhfiah a ni. (Mt. 24:3) Chu hrilh lâwkna chu Matthaia bung 24 leh 25, Marka bung 13 leh Luka bung 21-ah a chuang a ni.

2. He thuziakah hian eng nge kan sawiho vang a, engvângin nge chu chu kan hlâwkpui ang?

² Isua’n tehkhin thu pathum hmangin vaukhânna ṭangkai tak min pe a. Chûngte chu kêl leh berâm, nula thianghlim fing leh â te leh, talent tehkhin thute a ni. Tehkhin thu tinte chuan mi chu a thiltih azira a chungthu rêl a nih dân tûr hre thiam tûrin min ṭanpui a. Chûng tehkhin thute kan sawiho hunah kan zir tûrte leh kan nunpui theih dân tûrte chu hriat i lo tum ang u. A hmasa bera kan sawiho tûr chu kêl leh berâm tehkhin thu a ni.

KEL LEH BERAM

3. Engtikah nge Isua’n mite ro a rêlsak ang?

³ Kêl leh berâm tehkhin thuah chuan Isua’n chanchin ṭha chhâng lêt tûr leh a hriak thih unaute thlâwp tûra hun remchâng neite chunga ro a rêl dân tûr a hrilhfiah a. (Mt. 25:31-46) Armageddon thlen hma lawk, hrehawm nasa tak chhûngin chu chu a lo thleng ang. (Mt. 24:21) Berâm vêngtuin a berâmte chu kêlte laka a thliar hrang angin, hriak thih Isua hnungzuitute rinawm taka thlâwptute chu a thlâwp lotute lakah a thliar hrang ang.

4. Isaia 11:3, 4-a sawi angin, engvângin nge Isua’n mite chungah dik takin ro a rêl ang tih kan chian theih? (A kâwma en bawk rawh.)

 ⁴ Jehova ruat rorêltu a nih angin Isua chuan dik takin ro a rêl ang tih Bible-in a sawi lâwk a. (Isaia 11:3, 4 chhiar rawh.) Ani chuan a hriak thih unaute an cheibâwl dân pawh tiamin, mite nungchang, rilru put hmang leh, thusawite chu a chîk ang a. (Mt. 12:36, 37; 25:40) A hriak thih unaute leh an thiltih zawng zawng thlâwptute chu a hria ang. a Berâm ang mite’n Krista unaute an thlâwp dân kawng pawimawh tak pakhat chu thu hrilh rawngbâwlnaa an ṭanpuina hmangin a ni. Chutianga thlâwptute chu “mi fel” nia rorêlsak an ni ang a, he leiah chatuana nun theihna an nei bawk ang. (Mt. 25:46; Thup. 7:16, 17) Rinawmna vawng tlattute tân lâwmman ropui tak a va ni dawn êm! Hrehawm nasa tak chhûnga rinawm tlatte leh a hnua rinawmna vawng zêltute hming chu “nunna bua” chhinchhiah a ni ang.—Thup. 20:15.

5. Kêl leh berâm tehkhin thu aṭangin eng nge kan zir theih a, tute’n nge hlâwkpui ang?

⁵ Rinawmna lantîr rawh. Isua sawi kêl leh berâm tehkhin thu chu lei lam beiseina neite tân bîka sawi a ni a. Anni chuan thu hrilh rawngbâwlnaa Krista unaute an thlâwpna bâkah, Jehova thlan hriak thih unau pâwl tlêm te kaihhruaina chu rinawm taka zuina hmangin an rinna an lantîr a ni. (Mt. 24:45) Mahse, vân lam beiseina neite pawhin he tehkhin thua vaukhânna hi an ngaihven a ngai a ni. Engvângin nge? Isua’n an thiltih, rilru put hmang leh, thusawite chu a ngaihven reng vâng a ni. Anni pawh an rinawm tlat a ngai a. Dik takin, Isua’n hriak thihte tân bîka vaukhânna chiang tak telna tehkhin thu pahnih dang a sawi a ni. Chûng tehkhin thute chu Matthaia bung 25-ah kan hmu thei a. Tûnah chuan nula thianghlim fing leh â tehkhin thu hi i lo sawiho vang u.

NULA THIANGHLIM FING LEH A TE

6. Engtin nge nula thianghlim panga te chuan finna an lantîr? (Matthaia 25:6-10)

⁶ Nula thianghlim tehkhin thuah chuan, Isua’n mo neitu hmu tûra kal chhuak nula thianghlim sâwm chungchâng a sawi a. (Mt. 25:1-4) Mo neitu chu ruai chaw kîlpui an beisei a. Mi pangate chu “an fing” a, a dang pangate chu “an â” a ni. Nula thianghlim fingte chu an inbuatsaih ṭhain an harhvâng a. Mo neitu chu zân rei tak hnuah a lo thleng dâwn a nih pawhin, a ṭûl anga rei nghah an inhuam a ni. Chuvângin, zân thima an chhit ên tûr khâwnvâr an keng a. Mo neitu a tlai palh pawha an hman tûr khâwnvâr tui ken belhin, an khâwnvârte a alh reng theih nân ṭha takin an lo inbuatsaih lâwk a. (Matthaia 25: 6-10 chhiar rawh.) Mo neitu a lo thlen chuan inneih ruai kîlpui tûrin an zui a ni. Chutiang chiahin, Krista a lo kal leh thlenga harhvâng tak leh rinawm taka lo awm tlattu hriak thih Kristiante chu, Mo neitu Isua vân lam Lalrama tel ve theihna lâwmman pêk an ni ang. b (Thup. 7:1-3) A nih leh, nula thianghlim â pangate chungchâng chu eng nge ni ve?

7. Nula thianghlim â pangate chungah eng nge thleng a, engvângin nge?

⁷ Nula thianghlim fingte ang lo takin, a â pangate chu mo neitu a lo thlen chuan an lo inpeih lo va. Khâwnvâr tui an ken belh loh avângin, an khâwnvârte chu a mit mai dâwn a. Mo neitu a lo thleng dâwn tih an hriat chuan khâwnvâr tui lei tûra an chhuah a ngai a ni. Mo neitu a lo thlen pawhin an la rawn lêt  lo va; mahse, “a peihte chu amah nên lawi chaw eiin an lût a. . . kawng chu an khâr ta” a ni. (Mt. 25:10) A hnuah nula thianghlim âte an lo lêt chuan luh ve an duh a; mahse, mo neitu chuan: “Ka hre lo che u a ni,” tiin a lo chhâng a. (Mt. 25:11, 12) Chûng nula thianghlimte chu a ṭûl anga rei mo neitu nghâk tûrin an lo inbuatsaih lâwk lo a ni. Hriak thihte’n eng nge an zir theih?

8-9. Nula thianghlim tehkhin thu aṭangin hriak thihte’n eng nge an zir theih? (Milem en bawk rawh.)

⁸ Inpeih leh harhvâng rengin awm rawh. He tehkhin thuah hian Isua’n hriak thih pâwl pahnih—he khawvêl tâwp thleng nghâk tûra inpeih pâwl leh inpeih lo pâwl—an awm dâwn a tihna a ni lo va. Hriak thihte’n a tâwp thlenga rinawm taka tuar chhuak tûra an inbuatsaih loh chuan an chunga thil thleng theite a hrilhfiahna mai zâwk a ni. (Joh. 14:3, 4) Hei hi vaukhânna pawimawh tak a ni a. Kan beiseina chu vân lam emaw, lei lam emaw pawh ni se, kan vaiin nula thianghlim tehkhin thu aṭanga vaukhânna chu kan ngaih pawimawh a ngai a. Harhvâng tak leh a tâwp thlenga tuar chhuak tûra inpeih rengin kan awm ṭheuh tûr a ni.—Mt. 24:13.

⁹ Isua’n inpeih reng leh harhvâng taka awm reng a pawimawhzia sawi lan nâna nula thianghlim tehkhin thu a sawi hnuah, talent tehkhin thu a sawi leh a. Chu tehkhin thu chuan taimâk a pawimawhzia a târ lang a ni.

TALENT-TE

10. Engtin nge bâwih pahnihte chuan an rinawmzia an lantîr? (Matthaia 25:19-23)

¹⁰ Talent tehkhin thuah chuan, Isua’n an pu chunga rinawm bâwih pahnih leh bâwih rinawm lo pakhat chungchâng a sawi a. (Mt. 25:14-18) Bâwih pahnih chuan an pu sum kawltîr chu peipungin an rinawmzia an lantîr a. Ram danga a zin hmain an pu chuan talent—sum tam tak a kawltîr a. Bâwih rinawm pahnihte chu an taimain, sum chu fing thiam takin an hmang a ni. Eng nge a rah chhuah? An pu a rawn haw chuan a sum kâwltir chu a lêt hnihin an lo tipung a. An pu chuan a fak a—“[an]  pu lâwmnaah” an lût a ni. (Matthaia 25:19-23 chhiar rawh.) Mahse, bâwih pathumna chungchâng hi eng nge ni ve? A puin a kawltîr sum chu engtin nge a tih?

11. Bâwih “zawmthaw” chungah eng nge thleng a, engvângin nge?

¹¹ Bâwih pathumna chuan talent pakhat a dawng a; mahse, mi “zawmthaw” tak a ni. A pu chuan a talent kawltîr chu fing thiam taka a hman a beisei a. Mahse, talent chu leiah a phûm a. A pu a rawn haw chuan chu bâwih chuan talent khat chauh lo chu eng mah pêk belh tûr a nei lo. A rilru put hmang a dik lo va. A pu sum kawltîr a tihpun theih loh avânga ngaihdam dîl ahnêkin, a pu chu “mi ti kher kher” tiin a ko va ni. Chuvângin, a pu pawm a hlawh loh bâkah, a talent kawl sa chu lâksak niin a pu in aṭanga hnawh chhuah a ni ta a ni.—Mt. 25:24, 26-30.

12. Tûn laiah bâwih rinawm pahnihte chuan tute nge an entîr?

¹² Bâwih rinawm pahnihte chuan hriak thih Kristian rinawmte an entîr a. An pu, Isua chuan anni chu ‘an pu lâwmnaa lût’ tûrin a sâwm a. An vân lam lâwmman thawhlehna hmasa ber chu an chang dâwn a ni. (Mt. 25:21, 23; Thup. 20:5b) Kawng leh lamah chuan, bâwih zawmthaw entawn tûr ṭha lo tak chu hriak thihte tâna vaukhânna a ni. Engtin nge a nih theih?

13-14. Talent tehkhin thu aṭangin hriak thihte’n eng zîr tûr nge an neih? (Milem en bawk rawh.)

¹³ Taima leh thawk rim takin awm rawh. Nula thianghlim tehkhin thua mi ang bawkin, talent tehkhin thuah hian Isua’n hriak thihte chu an zawmthaw dâwn tih a hrilh lâwk a ni lo va. Chu aiin, an ṭhahnemngaihna an hloh huna an chunga thil thleng theite a hrilhfiahna mai a ni. Chutiang a nih chuan, ‘koh leh thlan an nihna chu an tinghet’ lo tihna a ni dâwn a, vân lam Lalramah luh phalsak an ni dâwn lo a ni.—2 Pet. 1:10.

¹⁴ Isua sawi nula thianghlim leh talent tehkhin thute chuan hriak thih Kristian zawng zawngte tân inpeih leh harhvâng tak, taima leh thawk rim taka an awm reng a pawimawhzia chiang takin a târ lang a. Mahse, Isua’n hriak thihte tân vaukhânna dang sawi  a nei em? Aw nei e! Matthaia 24:40, 41-a Isua thusawite chuan hriak thihte tâna rorêlna hnuhnûng ber chungchâng a hrilhfiah bawk a ni.

TUTE NGE “LAK” NI ANG?

15-16. Engtin nge Matthaia 24:40, 41-na chuan hriak thihte chu harhvâng taka an awm a pawimawhzia a sawi uar?

¹⁵ Chûng tehkhin thu pathumte a sawi hmain, Isua chuan hriak thihte thliar an nihna tûr rorêlna hnuhnûng ber chungchâng a sawifiah a. Lova hna thawk mi pahnih chungchâng leh buh râwt sawmnaa thawk hmeichhe pahnih chungchâng a sawi a ni. Lova hnathawkte chu an hnathawh a inang a. Buh râwt sawmnaa thawk hmeichhiate pawh an hnathawh a inang a ni. Mahse, Isua’n “pakhat lâk a ni ang a, pakhat hnutchhiah a ni ang,” tiin a sawi a. (Matthaia 24:40, 41 chhiar rawh.) Chuvângin, a hnungzuitute chu: “Chutichuan ngaihven rawh u, eng nîah nge in Lalpa a lo kal dâwn in hre si lo,” tiin a fuih a ni. (Mt. 24:42) Nula thianghlim tehkhin thu a sawi hnuah chumi nêna inang fuihna a sawi a. (Mt. 25:13) Chûng fuihna pahnihte chuan inzawmna an nei em? An nei niin a lang. Hriak thih dik tak leh rinawmte chauh Isua vân lam Lalramah “lâk” an ni ang.—Joh. 14:3.

¹⁶ Inring rengin awm rawh. Hriak thih tu pawh thlarau lama harhvâng taka awm lo chu “thlante” ruala lâk khâwm an ni lo vang. (Mt. 24:31) Hriak thihte chauh ni lovin, Pathian mi zawng zawngte chuan an beiseina chu eng pawh ni se, Isua thusawite chu inring reng leh rinawm taka awm tlat tûra vaukhânna angin an thlîr tûr a ni.

17. Tûn hnaiah Jehova’n mi ṭhenkhat chu a thlarau thianghlim hmanga hriak a thih chuan engvângin nge mak kan tih loh vang?

¹⁷ Jehova kan hriat chian avângin, a thiltih zawng zawng chu a felin a dik tih kan ring nghet a. Chuvângin, tûn hnaiah mi rinawm tu emaw chu hriak a thih pawhin mak kan ti lo. c Grape huan entîrnaa tlai lam dâr 5 vêla hnathawkte chungchâng Isua sawi kha kan ngaihtuah thei a. (Mt. 20:1-16) Grape huana tlai lama thawk ṭante hlawh leh zîng lama thawk ṭante hlawh chu a inang a. Chutiang chiah chuan, hriak thih hmasate leh a hnua hriak thihte chuan rinawm taka an awm tlat chuan an vân lam lâwmman chu an dawng dâwn a ni.

VAUKHANNATE CHU NGAIHVEN RAWH

18-19. Isua tehkhin thu pathumte aṭangin eng nge kan zir?

¹⁸ Eng nge kan sawiho tâk? Leia chatuana nung tûra beiseina neite tân kêl leh berâm tehkhin thu chuan, tûnah leh hrehawm nasa tak chhûngin Jehova chunga rinawm tlat a pawimawhzia chiang takin a târ lang a. Hrehawm nasa tak chhûngin Isua’n mi rinawmte chu “kum khaw nunna” dawng tlâk angin ro a rêlsak dâwn a ni.—Mt. 25:46.

¹⁹ Hriak thihte tâna vaukhânna tehkhin thu pahnihte pawh kan sawiho tawh a. Isua sawi nula thianghlim fing leh â tehkhin thuah chuan pangate chuan finna an lantîr a. A ṭûl anga rei mo neitu nghâk tûrin inpeih leh harhvâng takin an awm a ni. Mahse, nula thianghlim âte chu an inpeih lo va. Chuvângin, mo neitu chuan anni chu a ruai chaw kîlnaah an tel a phalsak lo a ni. Keini pawh Isua’n he khawvêl tâwpna a thlentîr thlenga a ṭûl anga rei nghâk tûrin kan inpeih tûr a ni. Isua talent tehkhin thuah taima tak leh thawk rim taka awm bâwih rinawm pahnih chungchâng kan sawiho tawh bawk a. An pu tân an thawk  rim a, a pawm an hlawh a ni. Mahse, bâwih zawmthaw chu hnâwlin a awm. Eng zir tûr nge kan neih? Jehova rawngbâwlnaah a tâwp thlengin kan buai reng tûr a ni. A tâwp berah, hriak thihte’n an vân lam lâwmman dawng tûra Isua “lâk” ni thei tûr chuan inring renga an awm tlat a pawimawhzia kan sawiho va. Anni chuan vâna Isua hnêna ‘lâk khâwm’ an nih hun tûr chu an nghâkhlel êm êm a. Armageddon indona zawhah Berâm No nupui neihnaah Isua mo an ni dâwn a ni.—2 Thes. 2:1; Thup. 19:9.

20. A vaukhânna ngaihventute chu Jehova’n eng nge a tihsak ang?

²⁰ Isua rorêl hun tûr chu a lo thleng thuai dâwn a. Mahse, kan hlauh a ngai lo. Rinawm taka kan awm tlat chuan “mihring Fapa hmaa ding tlâka ruat” kan nih theihna tûrin hmangaihna nei tak kan Pa vâna mi chuan ‘thiltihtheihna nasa tak’ min pe dâwn a ni. (2 Kor. 4:7; Lk. 21:36) Kan beiseina chu vân lam emaw, lei lam emaw pawh ni se, Isua tehkhin thu aṭanga vaukhânnate chu kan ngaihven a nih chuan kan Pa kan tilâwm ang a. Pathian Jehova khawngaihna nasa tak avângin kan hming chu nunna ‘lehkhabuah a chuang’ dâwn a ni.—Dan. 12:1; Thup. 3:5.