“Hnam Tê Ber” Pawh “Hnam Ropui Tak” An Lo Ni Ta
“Hnam Tê Ber” Pawh “Hnam Ropui Tak” An Lo Ni Ta
“Hnam tê ber pawh hnam ropui tak an ni ang a, hnam tlêmte pawh hnam chak tak an ni ang.”—ISAIA 60:22
1, 2. (a) Engvângin nge thimin tûn lai khawvêl a khuh? (b) Engtin nge Jehova êng chu a mite chungah a ên zual deuh deuh?
“THIMIN leilung hi a khuh dâwn si a, thim chhah mupin mite a khuh bawk dâwn a ni: nimahsela LALPA chu i chungah a lo chhuak ang a, a ropuina chu i chungah a la lang ang.” (Isaia 60:2) Hêng thute hian kum 1919-a inṭan khawvêl dinhmun chu a sawi chiang hle a. Kristianna ram chuan lal anga Isua Krista lo awm lehna chhinchhiahna “khawvêl êntu” chu an hnâwl a ni. (Johana 8:12; Matthaia 24:3) “He thim chunga khawvêl rorêltute” hotu Setana chu a “thinrim êm êm” avângin, kum zabi 20-na chu mihringte chanchina kum zabi râwng ber leh hun chhe ber a ni. (Ephesi 6:12; Thu Puan 12:12) Mipui tam zâwkte chu thlarau lam thim hnuaiah an khawsa a ni.
2 Chutichung pawhin, tûn laiah chu êng chu a la êng reng a. Jehova chu a van lam “hmeichhia” aiawhtu he laia awm, hriak thih la bâng, a chhiahhlawhte chungah a ‘êng chhuak’ a ni. (Isaia 60:1) A bîk takin, kum 1919-a Babulon sal ata an chhuah aṭangin, hêng mite hian Pathian ropuina chu lanchhuahtîrin, an ‘êng chu mi mithmuhah an ên chhuahtîr’ a ni. (Matthaia 5:16) 1919 aṭanga 1931 chhûngin, hêng mite hian Babulon-ho ngaih dâna phuarna la châm bângte an paih bo va; Lalram êng chu a zual deuh deuh a ni. “Israel mi la awm chhunte chu ka hruai khâwm ngei ang; Bozra khaw berâm angin ka dah khâwm ang a: ran rual an hlobet hmuna awm ang maiin, mipui an nih avâng chuan an sa mur mur ang,” tih thutiam Jehova’n a tihlawhtlinin, sîng tam takin an lo pung a. (Mika 2:12) 1931-a Jehova Thuhretute tih hming an pawm khân a mite chunga Jehova ropuina chu a fiah lehzual a ni.—Isaia 43:10, 12.
3. Jehova êng chu hriak thihte bâkah mi dangte chungah pawh a êng ang tih engtin nge a lo lan?
3 Jehova êng chu ‘pâwl tlêm’ la châmbângte chungah chauh a eng chhuak dâwn em ni? (Luka 12:32) Dâwn lo ve. Vênnainsâng September 1, 1931 (English) chhuak chuan pâwl dang chungchâng a sawi a. Ezekiela 9:1-11 hrilhfiahna ṭha takah chuan, chu mi chânga a sawi, mi pakhat lehkhatui bûr pai chuan hriak thih la bângte a entîr tih a târ lang a. Chu ‘mi pakhatin’ an chala a chhinchhiahte chu tute nge ni? He lei paradis-a chatuan nun beiseina neitu “berâm dang” te an ni. (Johana 10:16; Sâm 37:29) 1935 chuan, he “berâm dang” pâwlte hi tirhkoh Johana’n inlârnaa a hmuh “mipui tam tak . . . hnam tin zînga mi” an ni tih hriat chhuah a ni. (Thu Puan 7:9-14) 1935 aṭanga tûn thlengin, mipui tam tak lâkkhâwmna chu nasa taka ngaihtuah a ni.
4. Isaia 60:3-a a sawi “lalte” leh “hnamte” hi tute nge ni?
4 “Hnam tin i êng lamah an lo kal ang a, lalte pawh i lo chhuah ênna lamah an lo kal bawk ang,” tih Isaia hrilh lâwkna hian he sengkhâwm rawngbâwlna hi a sawi thawi a ni. (Isaia 60:3) Heta “lalte” hian tunge a kawh? 1,44,000 la châm bâng—Isua Krista ruala van lam Lalram ro luah tûr, thuhrilhna kawnga hma hruaitute a kâwk a ni. (Rom 8:17; Thu Puan 12:17; 14:1) Tûn laiah, hriak thih la bâng sâng tlêm tête chu, anmahni kaihruai tûra Jehova pantu leh mi dangte pawh Jehova lam pan tûra sâwmtu, lei lam beiseina nei, “hnamte” chuan an chiahpiah hneh hle a ni.—Isaia 2:3.
Jehova Chhiahhlawh Ṭhahnemngaite
5. (a) Jehova mite ṭhahnemngaihna chu a tâwp lo tih eng thil dikin nge lantîr? (b) 1999 kum chhûngin khawi ramin nge punna chhinchhiah tlâk tak tawng? (Phêk 13 aṭanga 16-na chart hi en ang che.)
5 Tûn kum zabi 20-na chhûnga Jehova Thuhretute chuan ṭhahnem an va ngai êm! Nêksâwrna a pung zêl chung pawhin, kum 2000 a rawn thleng a, an ṭhahnemngaihna chu a reh chuang lo. Anni chuan Isua thupêk: “Hnam tina mi zirtîrahte siam ula,” tih hi an la urhsûn reng a ni. (Matthaia 28:19, 20) Kum zabi 20-naa rawngbâwlna kum hnuhnûng berah chuan chanchin ṭha thuchhuahtute tam lai berin 5,912,492 a thleng pha a ni. Anni chuan Pathian leh a thiltum chungchâng mi dangte an hrilhnaah chhinchhiah tlâk takin dârkâr 1,144,566,849 lai an hmang ral a. Tuina nei mi 4,20,047,796 tlawhkîrna an neiin, mi 4,433,884 lai chu in lama a thlâwna Bible zirna an neihpui bawk a ni. Ṭhahnemngai taka rawngbâwlna ropui tak chu a va ni êm!
6. Hmatâwngte tân eng remruatna thar nge siam a nih a, eng chhân lêtna nge awm?
6 Nikum January thla khân, Governing Body chuan hmatâwngte tâna dârkâr phût zât siamremna an puang a. Mi tam takte chuan hei hi hmatâwng emaw, hmatâwng puibâwmtu emaw thawhve nân remchângah an la a ni. Entîr nân, 1999-a thla hmasa pali chhûngin Netherland branch office chuan kum hmasa chûng thla vêka hmatâwng thawh dîlna a dawn zât lêt li-a tam a dawng a. Ghana chuan: “Hmatâwng tâna dârkâr phût zât thar hman a nih aṭangin, kan hmatâwng thawk zât pawh a pung tial tial a ni,” tih report a pe bawk. 1999 rawngbâwlna kumah chuan, khawvêl pumah hmatâwng 7,38,343 a awm a ni—‘thil ṭha tiha ṭhahnemngaihna’ lanchhuahtîrna mak tak mai chu.—Tita 2:14.
7. Engtin nge Jehova’n a chhiahhlawh ṭhahnemngaite rawngbâwlna mal a sâwm?
7 Jehova chuan ṭhahnemngai taka rawngbâwlna chu mal a sâwm em? Sâwm e. Isaia hmangin ani chuan hetiang hian a sawi a: “Dâk la, i mit lên vêl la, en rawh: an zain an inkhâwm a, i hnênah an lo kal a nih hi: i fapate chu hla tak aṭangin an lo kal ang a, i fanute chu an rawn pawm ang,” tiin. (Isaia 60:4) Seng khâwma awm, hriak thih “fapate” leh “fanute” chuan ṭhahnemngai takin Pathian rawng an la bâwl reng a ni. Tûnah chuan, ram leh thlirkâr 234-ah Jehova hriak thih “fapate” leh “fanute” lamah chuan Isua berâm dangte chu lâk khâwm an ni tawh bawk.
“Hnathawh Ṭha Tinrêng”
8. Eng ‘hnathawh ṭhaah’ nge Jehova Thuhretute chu an phûr êm êm?
8 Kristiante chuan Lalram chanchin ṭha hrilh leh tuina neite zirtîr ni tûra ṭanpui tûrin mawhphurhna an nei a. Mahse, anni chu ‘hna ṭha tinrêng thawk tûra inthuam’ an ni. (2 Timothea 3:17) Chuvângin, an chhûngkuate chu hmangaih takin an enkawl a, khual chhawn thiamna an lantîr bawk a, dam lote an kan bawk ṭhîn. (1 Timothea 5:8; Hebrai 13:16) Tin, hna thawk tûra inpumpêkte chu hna chi hrang hrang, Kingdom Hall sakna angahte pawh an tel a ni—thuhriattîrna pe thei hnaah chuan. Tongo rama hall pakhat an sak zawh chuan, vêng chhûnga charismatic kohhran thuneitu pakhat chuan an kohhranin in sak an tumin hlawhfa rawih a ngaih laiin, Jehova Thuhretute’n anmahni in tûr anmahni ngeiin an sak theih chhan chu hriat a duh tlat mai a ni! Tongo rama Kingdom Hall ṭha tak sakna chuan a chhehvêlah nghawng ṭha tak mai a nei a; chuvângin, ṭhenkhat chuan Kingdom Hall sak tumna hnaivaia in sak emaw, luah emaw an tum a ni tih Tongo ram chuan report a pe a ni.
9. Chhiatna râpthlâk tak a thlenin, engtin nge Jehova Thuhretute’n hma an lâk?
9 Engemaw châng chuan hnathawh ṭha dang a ṭûl ṭhîn a. Rawngbâwlna kum kaltaah khân ram tam takah vânduaina râpthlâk tak a thleng a, chuta ṭanpuina pe hmasatute chu Jehova Thuhretute an ni fo ṭhîn. Entîr nân, Honduras ram chhûng hmun tam tak chu Hurricane Mitch thlipuiin a nuai chhe vek a. Branch chuan rîkrum thil thleng ngaihtuahtu pâwlte chu ṭanpuina pe tûrin an din nghâl a. Honduras ram leh ram dang tam taka Thuhretute chuan thuamhnaw te, ei tûr te, damdawi te, leh thil dang mamawh zualpuite an pe a. Regional Building Committee chuan an thiamna chu in sak thar nân an hmang bawk a. Rei lo têah, kan unaute chhiatna râpthlâk tak tuartute chu an hna pangngai thawk leh thei tûra ṭanpui an ni. Ecuador ramah chuan, tuilian nasa takin in ṭhenkhat a tihchhiatin Jehova Thuhretute chu an unaute ṭanpui tûrin an lo kal a. Sawrkâr mi pakhat, an hnathawh dân lo hmutu chuan: “He pâwl hi nei ila chuan, thil mak ka ti thei ngei ang! Nangni ang mite hi khawvêl hmun tina awm tûr in nih hi,” a ti a. Chutiang hnathawh ṭhate chuan Pathian Jehova a fak a; tin, kan “Pathian ngaihsakna hi . . . kawng tinrêngah a sâwt” a ni tih tihchianna a ni bawk.—1 Timothea 4:8.
‘Chhûm Angin An Thlâwk’
10. Hriak thihte chu tlêm tawlh tawlh mah se, engvângin nge Jehova hming chu tûn hma zawng aia tlângzarh a nih?
10 Tûnah chuan, Jehova chuan: “Chhûm anga thlâwkte leh, ṭhuro anmahni tukverh pana thlâwk noh noh anga thlâwkte saw tute nge ni? . . .I fapate an tangka leh rangkachak nên hla tak aṭanga hruai tûrin matheilovin thliarkârte chuan mi nghâk ang a, Tarsis lawng liante chuan hmasak ber an chuh ang. Tin, ram dang mite chuan i kulh bangte chu an rem chho leh ang a, an lalte pawhin i rawng an bâwl tawh ang,” tiin, a sawi a ni. (Isaia 60:8-10) Jehova ‘êng chhuak’ dawng hmasa ber tûr te chu a “fapate,” hriak thih Kristiante an ni. Chutah, “ram dang mite”—an unau hriak thihte hnêna rinawm taka rawng bâwl a, chanchin ṭha hrilhnaa zuitu mipui nasa takte an ni leh a. Chuvângin, hriak thihte chu tlêm tawlh tawlh mah se, Jehova hming chu tûn hma zawng aiin khawvêl hmun tinah tlângzarh nasat zâwk a ni.
11. (a) Eng nge chhunzawm reng a nih a, chu chuan 1999 kum-ah eng rah nge a chhuah? (b) 1999 chhûngin khawi ramin nge pabtisma chang chhinchhiah tlâk roport pe? (Phêk 13-16-a chart hi en ang che.)
11 Chuvângin, mi maktaduai tam takte chuan “ṭhuro anmahni tukverh pana thlâwk noh noh,” angin, Kristian kohhran chhûngah humhimna an zawng a ni. Kum tinin, maktaduai tam takin an pung zêl a, mi tam zâwkte tân kawng a la inhawng cheu bawk. Isaia chuan: ‘I kawngkhârte pawh hawnin a awm reng ang a; achhûn azânin an khâr lo vang; miten hnam tin sum chu i hnênah an rawn lâk theih nân’ a ti a. (Isaia 60:11) Nikumah chuan, mi 3,23,439-te chuan Jehova hnêna an inpumpêkna lantîr nân baptisma an chang a; mahse, kawngka chu khâr a la ni chuang lo. ‘Hnam tinrêng thil duhzâwng,’ mipui tam takte chu anmahni kal tlangin an pung reng a ni. (Hagaia 2:7) Thim kalsan duh apiang chu an pêng bo tawh lo. Chutiang mi zawng zawngte chuan êng an ngainatna chu hlauh ngai suh se!
Dodâlna Ngam Khawpa Huaisen
12. Engtin nge thim ngainatute’n êng chu tihthih an tum?
12 Thim ngainatute chuan Jehova êng chu an haw ṭhîn a. (Johana 3:19) Ṭhenkhat phei chuan chu êng chu tihthih an tum hial a ni. Hei hi beisei loh thil a ni lo. “Eng tak mi tin tiêng ṭhîn,” Isua ngei pawh nuihzatbûr, dodâl, leh a tâwpah phei chuan a chipuite thahin a awm hial a. (Johana 1:9) Kum zabi 20-na tluan chhuakah, Jehova Thuhretute pawh nuihsawh, lung ina tântîr, khuahkhirh, leh Jehova êng rinawm taka an lantîr avânga thah hial an ni. Tûn hnai mai kumahte chuan, dodâltute chuan, Pathian êng lantîrtute chungchânga dâwt thu thehdarh nân chanchin pêk chhuahna chi hrang hrang an hmang fo va. Mi ṭhenkhat chuan Jehova Thuhretute chu mi hlauhawm an ni a, khuahkhirh tûr emaw, khap tûr emawa mipuite ngaih dân neihtîr chu an duh a ni. Chutiang dodâltute chu an hlawhtling em?
13. Kan rawngbâwlna chungchâng chanchin thehdarhnaa fing taka thu dik sawi chhuahna chuan eng rah nge a chhuah?
13 Hlawhtling lo. A inâwmna hmunah chuan, Jehova Thuhretute chuan chanchin thehdarhna chu thudik hrilhfiah nân an hmang a. Chuvângin, Jehova hming chu chanchinbu leh magazine te, radio leh television-ah te a lan tam phah zâwk a ni. Hei hian thuhrilh rawngbâwlnaah rah ṭha a chhuah a. Entîr nân, Denmark ramah chuan, national TV-a program chuan “Denmark mite rinna a tlâkhniam chhan” tih chungchâng a sawi a. Chutah chuan mi dangte rualin Jehova Thuhretute pawh kawm an ni. Chu mi hnu chuan, chu program lo thlîrtu nu pakhat chuan: “Pathian thlarau neitu chu a lang khawp mai,” tiin a sawi a ni. Chu nu chu, Bible zirna neihpui ṭan a ni.
14. Rilru hah takin, dodâltute chu rei lo têah eng nge pawmtîr luih an nih dâwn?
14 Jehova Thuhretute chuan he khawvêla mi tam takte’n an dodâl ang tih an hria a. (Johana 17:14) Chuti chung pawh chuan: “Nangmah tiretheituteho fapate chu kûnin i hnênah an lo kal ang a; nangmah hmusittute zawng zawng chu chibai bûkin i kephah hnuaiah an kûn ang; nang chu ‘LALPA khawpui,’ ‘Israel-ho Mi Thianghlim Zion,’ an ti ang che,” tih Isaia hrilh lâwkna thua tihchakin an awm reng a ni. (Isaia 60:14) Rilru hah takin, dodâltute chuan Pathian ngei an do a ni tih an pawm a ngai thuai ang. Chutiang indona chu tuin nge hneh thei ang?
15. Engtin nge Jehova Thuhretute’n ‘hnam tin hnutetui an fawh’ a; tin, hei hi engtin nge an zirtîrna leh an thuhril rawngbâwlnaah târ lan a nih?
15 Jehova chuan: “Kumkhaw chhuan ber, chhuan tam tak lâwmnaah ka siam ang che. . . . Hnam tin hnutetui i fâwp ang a, lalho hnutê pawh i hne ang: Kei LALPA hi nangmah chhandamtu leh nangmah tlantu, . . . ka ni tih i la hre bawk ang,” tiin thu a tiam belh bawk a. (Isaia 60:15, 16) Ni e, Jehova chu a mite Chhandamtu a ni. Amaha an innghah chuan ‘kumkhuain’ an awm ang a, biakna dik ṭhanchhoh nâna thil hlu hmuh theih chi hrang hrangte hmangin “hnam tin hnutetui [an] fâwp” ang. Entîr nân, khâwl thil computer leh inbiakpawhna te chuan Vênnainsâng chu ṭawng 121 leh Harh Rawh! ṭawng 62-in a rualin a chhuahtîr thei a. Computer software program bîk pakhat chu New World Translation ṭawng thara lehlinnaa ṭanpui nân duan a ni a, chûng lehlinna chuan hlimna nasa tak a thlen a ni. Kum 1999-a Kristian Grik Pathian lehkha thu Croatia ṭawnga tlângzarh a nihin, mi sâng tam takin lâwmna mittui an sêng a ni. Unaupa upa tawh tak pakhat chuan: “He Bible hi rei tak ka lo nghâk tawh a. Tûnah chuan thlamuang takin ka thi thei tawh e!” a ti a. New World Translation a bu pum emaw, a ṭhenkhat emaw chu ṭawng chi hrang hrang 34-in maktaduai 100 aia tam semdarh a ni.
Nungchang Tehna Sâng Tak
16, 17. (a) Thil harsa a ni nachungin, engvângin nge Jehova tehna sâng tak chu vawn a pawimawh? (b) Ṭhalaite’n khawvêl tihbawlhhlawhna an pumpelh thei tih eng thiltawnin nge târ lang?
16 Isua chuan: “Tupawh thil tisual apiangin êng an haw ṭhîn,” tiin a sawi a. (Johana 3:20) Kawng leh lamah chuan, ênga awmte chuan Jehova tehna sâng tak chu an ngaina ṭhîn a ni. Jehova chuan, Isaia kaltlangin: “I mite pawh an zain mi fel an ni ang,” tiin a sawi a. (Isaia 60.21a) Mipat hmeichhiatna hman khawlohna te, dâwt sawina te, duhâmna te, leh chapona te hluar êm êmna khawvêlah hian tehna fel vawn chu chona a ni thei. Entîr nân, ram ṭhenkhatah chuan, sumdâwnnate chu vawi leh khatah a lian thut a, hausakna lam ringawt ûma kalpên chu a awlsam êm êm a ni. Nimahsela, Paula chuan: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn,” tiin min vaukhân a ni. (1 Timothea 6:9) Miin sumdâwnna thila a luh thûk lutuk avânga hêng thil pawimawh ber mai Kristian inkawmkhâwm te, rawngbâwlna thianghlim te, nungchang ṭha thu bul te, leh chhûngkaw mawhphurhna ang chite a ngaihthah hi lungchhiat thlâk tak a va ni êm!
17 An ṭhian tam takte chu damdawi hman dik lohna leh nungchang bawlhhlawhna thilah an inhnamhnawih avângin, ṭhalaite tân nungchang ṭha tehna fel vawn chu a harsa bîk thei a. Suriname ramah chuan, hmeichhe tleirâwl kum 14 mi chu school-a râwlthar hmêlṭha tak mai chuan mutpui atân a sâwm a. Chu hmeichhia chuan inneihna pâwna chutiang tih chu Bible-in a khap thu hrilhin a lo hnial a ni. Hmeichhe tleirâwl dangte chuan an lo nuihsawh a, a rilru thlâktîr an tum a; chutiang râwlthar chu mi tinin an mutpui châk thu an hrilh a ni. Chuti chung pawh chuan, chu hmeichhe tleirâwl chu a ṭang nghet tlat a. Chu mi hnu chawlhkâr rei lo têah chuan, chu râwlthar chuan HIV hrik a vei tih hriatchhuah a ni a, a lo chak lo ta êm êm mai a ni. ‘Inngaihna lak aṭanga fihlim’ tûra Jehova thu pêk a zawm avâng chuan chu hmeichhe tleirâwl chu a hlim hle a ni. (Tirhkohte 15:28, 29) Jehova Thuhretute chuan an zînga thleirâwl, dikna atâna nghet taka dingtute chu an chhuang hle a. An rinna leh an nu leh pate rinna chuan Pathian Jehova hming chawimawina a thlen a, a hming a ‘timawi’ a ni.—Isaia 60:21b.
Jehova’n A Puntîr
18. (a) Eng thil ropui tak nge Jehova’n a mite tân a tih? (b) A la pung zêl ang tih fiahna eng nge awm a, ênga awmte chu eng beiseina ropui takin nge nghâk?
18 A ni, Jehova chuan a mite chungah êng a chhuah a, mal a sâwm a; tin, a mite chu a thuam chak bawk a ni. Anni chuan kum zabi 20-na chhûngin Isaia thu: “In zînga hnam tê ber pawh hnam ropui tak an ni ang a, hnam tlêmte pawh hnam chak tak an ni ang: kei LALPA hian a hun hunah chuan ka thlentîr thuai ang,” tih thlenfamkimna hi an hmu a ni. (Isaia 60:22) 1919-a mi tlêmtê aṭangin, “hnam tê ber” chu “hnam ropui tak” an lo ni ta. Chutianga punna chu a la tâwp mai lo! Nikum khân mi 14,088,751-te chu Isua thih Hriatrengna hun serhah an tel a ni. Hêng zînga tam takte hi Thuhretu phusa tak an ni lo. Chutiang hun serh pawimawha an lo tel avâng chuan kan hlim êm êm a, êng lam pan zêl tûrin anni chu kan sâwm bawk a ni. Jehova chu a mite chungah nasa takin a la êng reng a. A inawpna pâwl kawngka chu a la inhawng reng bawk. Chuti chuan, kan zain Jehova ênga awm chu i tum ruh tlat ang u. Chu chuan kan tân tûnah malsâwmna a va thlen nasa êm! Nakina thil siam zawng zawngte’n Jehova an fak hun leh a ropuina nasa taka an lâwm hun chuan, chu chuan hlima nasa tak a va thlen dâwn êm!—Thu Puan 5:13, 14.
I Hrilhfiah Thei Em?
• Tûn ni hnuhnûngah hian tute’n nge Jehova êng lantîr?
• Jehova mite ṭhahnemngaihna chu a tâwp lo tih engin nge lantîr?
• Eng hnathawh ṭha ṭhenkhatah nge Jehova Thuhretute an buai?
• Dodâlna nasa tak awm mah se, engah nge rinngamna kan neih?
[Zirlai Atâna Zawhnate]
[Phêk 12-naa milemte]
Mite chu Jehova inawpna pâwlah an la kal khâwm reng
[Phêk 13-naa milem]
Eng ngainatute tân Jehova’n kawngka zau taka a hawn avângin kan hlim