“Ngaihven Rawh U”
“Ngaihven Rawh U”
“Chutichuan ngaihven rawh u, eng niah nge in Lalpa a lo kal dâwn in hre si lo.”—MATTHAIA 24:42.
1. Hun rei tak Jehova chhiahhlawh lo ni tawhte’n kum tam tak inpumpêka an rawngbâwlna chu engtin nge an ngaih? Entîrna pakhat pe rawh.
HUN rei tak chhûng Jehova chhiahhlawh lo ni tawh, mi rinawm tam takte chuan an tleirâwl lai aṭangin thutak an zir a. Tuikep lung hlu tak hmu a, chu mi a lei theih nâna a neih zawng zawng hralhtu sum dâwngtu ang khân, chûng Bible zirlai thatho takte chuan mahni inphatin an nun chu Jehova hnênah an pumpêk a ni. (Matthaia 13:45, 46; Marka 8:34) Leia Pathian thiltum thleng famkimna hmu tûra an beisei aia rei nghah ngai chu engtin nge an ngaih? Inchhîrna an nei lo rêng rêng! Anni chuan kum 60 dâwn lai inpumpêka rawngbâwlna hun a hman hnua: “Ka rinna vawn reng chu tûn hma zawng aiin ka tum ruh a ni. Chu chuan ka tân nun hi a tihlu a, nakin hun chu hlau lo va hmachhawn tûrin min ṭanpui reng a ni,” titu, unaupa A. H. Macmillan-a thusawi chu an pawmpui a ni.
2. (a) Isua’n a hun taka zilhna eng nge a hnung zuitute a pêk? (b) He thu ziakah hian eng zawhna nge kan ngaihtuah ho dâwn?
2 Eng nge i ngaih ve dân? I kum chu eng pawh ni se, Isua thu sawi: “Chutichuan ngaihven rawh u, eng niah nge in Lalpa a lo kal dâwn in hre si lo,” tih chu ngaihtuah ang che. (Matthaia 24:42) He thusawi tluang mâwl tak hian thutak a fûn ril hle a ni. Lalpa chu he kal hmang suaksual chunga rorêlna thlen tûra a lo kal hun tûr chu kan hre si lo va, kan hriat pawh a ṭûl bawk hek lo. Mahse, Lalpa lo kal huna inchhîrna nei lo tûr zâwnga kan nun a ṭûl a ni. He mi chungchângah hian, ngaihven tûra min ṭanpui thei tûr entîrna engte nge Bible-ah kan hmuh? He mamawh hi Isua’n engtin nge a tehkhin? Tin, tûn lai hian he Pathian ngaihsak lohna khawvêl ni hnuhnûngahte kan awm a ni tih tifiahtu eng nge kan neih?
Vaukhânna Târ Lan
3. Engtin nge tûn laia mi tam takte chu Nova hun laia mite nên an inan?
3 Kawng tam takah, tûn lai mite hi Tuilêt hma Nova hun laia awmte ang an ni a. Chutih hun lai chuan lei chu pâwngnêkna-in a khat a, an rilru suangtuahna rêng rêng chu “sual hlîr” a ni. (Genesis 6:5) A tam zâwkte chu nî tin nunah an buai pumhlûm ṭhak a ni. Mahse, Tuilêt a thlentîr hmain Jehova chuan mite chu inlamlêtna hun remchâng a pe a. Ani chuan Nova chu thu hrilh tûrin thu a pe a; tin, Nova chuan a âwih a ni—kum 40 emaw, 50 emaw, a aia tam emaw “felna thu hriltu” anga rawngbâwlna chu. Mahse, mite chuan Nova vaukhânna thuchah chu an ngaihthah a, an harhvâng lo a ni. Chuvângin, a tâwpah chuan, Jehova rorêlnaah Nova leh a chhûngte chauh an dam khawchhuak ta a ni.—Matthaia 24:37-39.
4. Eng kawngin nge Nova rawngbâwlna kha hlawhtling tih theih a nih a, engtin nge i rawngbâwlna pawh chutiang bawkin a sawi theih?
4 Nova rawngbâwlna chu a hlawhtling em? A dawngsawngtu an tlêm avângin hlawhchhamah ngai mai suh. Mite dawnsawn dân chu engpawh ni se, Nova thu hrilna chuan a tum chu a hlen famkim tak zet a ni. Engvâng nge? Mite’n Jehova rawng an bâwl dâwn nge dâwn lo tih chungchângah duh thlan theihna hun ṭha tâwk tak a pêk avângin. I thuhrilhna bial chungchâng chu eng nge ni ve? A ṭha zâwnga chhân lêtna chu tlêm hle mah se, hlawhtlinna nasa tak i nei a ni. Engvâng maw? Thuhrilhna hmangin, Pathian vaukhânna i tlângaupui a; tichuan, Isua’n a hnungzuitute a pêk hna chu i hlen avângin.—Matthaia 24:14; 28:19, 20.
Pathian Zâwlneite Ngaihthahna
5. (a) Habakuka hun lai khân Juda ramah eng dinhmun nge hluar a, engtin nge mite’n a hrilh lâwk thuchah chu an chhân lêt? (b) Engtin nge Juda mipuite khân Jehova zâwlneite chungah huatna an lantîr?
5 Tuilêt hnu kum zabi engemaw zâtah chuan, Juda lalram dinhmun chu a chhe hle a. Milem biakna, dik lohna, inrahbehna, leh tualthahnate thlengin a hluar êm êm a ni. Jehova chuan mite chu an inlamlêt loh chuan, Kaldai mite, a nih loh leh Babulon mite kut ata chhiatna nasa tak an tawng ang tih vaukhân tûrin zâwlnei Habakuka chu a awmtîr a. (Habakuka 1:5-7) Mahse, mite chuan an ngaithla duh chuang lo. ‘Kum za chuang kalta khân, zâwlnei Isaia chuan chutiang bawk vaukhânna chu a tlângaupui tawh a; mahse, engmah a lo thleng chuang hlei nêm!’ tiin, an ngaihtuah a ni ngei ang. (Isaia 39:6, 7) Juda hotu tam takte chuan thuchah chu an ngaihsak lo mai pawh ni lovin, thuchah puangtute pawh chu an ngaithei lo a ni. Ṭûm khat pawh, Jeremia chu thah an tum a, Ahikama chu inrawlh lo sela chuan an hlawhtling ngei ang. Pathian thâwk khum thuchah dang avânga thinurin, Lal Jehoiakima chuan zâwlnei Uria chu a tihlum a ni.—Jeremia 26:21-24.
6. Engtin nge Jehova’n Habakuka a thuam chak?
6 Habakuka thuchah chu, Judai ram kum 70 chhûng tihchhiata a awm tûr thu lo hrilh lâwktu Jeremia thuchah ang bawkin a dangdai a, a rum lo bîk lo. (Jeremia 25:8-11) Chuvângin: “Aw LALPA, eng chen nge ka au vang a, min ngaihtlâk lo vang? Inpâwngnêkna thu i hnênah ka au chhuahpui a, nangin i chhanhim si lo va,” tia Habakuka auh chhuah chhan a lungngaihna chu kan hre thiam thei a ni. (Habakuka 1:2) Jehova chuan hêng rinna tichak thei tak thute nên hian zahngai takin Habakuka chu a chhâng a ni: “Inlârna hi hun ruat chhûng atân mai a ni nghe nghe si a, a kin nî chu a hnai tial tial a, a thlâwn lo vang. Rei deuh mah se, nghâk rawh; a lo thlen ngei dâwn avângin a tlai chuang lo vang,” tiin. (Habakuka 2:3) Tichuan, Jehova chuan dik lohna leh inrahbehnate tihtâwpna tûr “hun ruat” a nei a ni. Rei deuh angin lang mah se, Habakuka chu a lunghnual tûr a ni lo va, a rawngbâwlnaah a inthlahdah tûr a ni hek lo. Ani chuan nî tin hmanhmawhna thlarau nên a “nghâk” reng zâwk tûr a ni. Jehova nî chu a tlai dâwn si lo va!
7. Engvângin nge C.E. kum zabi pakhatnaah Jerusalem chu tihchhiat tûra dem leh a nih?
7 Jehova’n Habakuka a biak aṭanga kum 20 vêl hnûah Juda khawpui, Jerusalem chu tihchhiat a ni. A hnûah sak ṭhat leh a ni a, Habakuka tilungngai ṭhîn thil dik lo tam takte chu tih dik a ni. Amaherawhchu, kum zabi pakhatnaah chuan, a chhûnga mi awmte rinawmlohna avângin tihchhiat tûra dem a ni leh a. Jehova chuan mi ṭhate dam khawchhuah nân zahngai takin ruahmanna a siam a ni. Tûn ṭumah chuan, thuchah keng tûrin zâwlnei ropui ber Isua Krista a hmang a ni. C.E. 33-ah Isua chuan: “Sipaihoten Jerusalem khua an hual in hmuh hunah, a boral dâwn tih hria ang che u. Chutih hunah chuan Judai rama awmte chu tlângahte tlân bo rawh se,” tiin a hnungzuitute chu a hrilh a ni.—Luka 21:20, 21.
8. (a) Isua thih hnua kum tam tak a ralin, Kristian ṭhenkhatte chungah eng nge thleng thei? (b) Jerusalem chungchânga Isua hrilh lâwk thute chu engtin nge a thlen famkim?
8 Kumte a ral a, Jerusalema awm Kristian ṭhenkhatte chuan Isua hrilh lâwkna a lo thlen famkim hun tûr chu an ngaihtuah ngei ang. Engpawhnise, ringhlel hauh lo va mi ṭhenkhatte inpêkna chu ngaihtuah teh. Ngaihven reng an tum tlat avângin sumdâwnna duhawm tak takte an hnâwl pawh a ni thei a. Hun a liam zêlin, anni chu an lungngai em? Isua hrilh lâwkna chu an chhuanah ni lo, chhuan lo awm tûrte tân ni-ah ngaiin, an hun chu khawhral mai mai ni-ah an inngai em? C.E. 66-a Rom sipaite’n Jerusalem an hual khân, Isua hrilh lâwkna chu a thleng famkim ṭan a. Ngaihventute chuan chhinchhiahna chu hria-in khawpui chu an chhuahsan a, Jerusalem chhiatna ata zuahin an awm ta a ni.
Inring Renga Awm a Pawimawhzia Tehkhinna
9, 10. (a) Isua tehkhin thu, an pu inneihna aṭanga a lo kîr hun nghâktu bâwite chungchâng hi engtin nge i khâikhâwm ang? (b) Bâwite tân engvângin nge an pu nghah chu thil harsa tak a nih theih? (c) Bâwite tân dawhtheihna chu engvângin nge ṭangkai tak a nih?
9 Inring renga awm a pawimawhzia sawi uar nân, Isua’n a zirtîrte chu an pu inneihna aṭanga lo kîr hun nghâktu bâwite angin a tehkhin a. Anni chuan a lo haw zân tûr an hria a—mahse, eng hunah nge? Zân tirah nge? Zan laiah nge? Thawh hunah? tih an hre hek lo. Isua chuan: “Zan laiah emaw, thawh hunah emaw [pu chu] a lo kal a, chutianga a rawn hmuh chuan chu [inring reng] bâwihte chu an eng a thâwl ang,” tiin a sawi a ni. (Luka 12:35-38) Hêng bawite lo inrin dân tûr chu han ngaihtuah teh. Thâwm tin leh hlimthla tin maite chuan: ‘Kan pu a ni thei ang em?’ tiin an beiseina a tisosâng zual ṭhîn ngei ang.
10 Pu chu, zan lai, dâr kua aṭanga zan lai inkâr vêlah lo thleng ta se, engtin nge ni ang? Zîng aṭanga hah taka thawkte pawh tiamin, bâwi zawng zawngte chu amah lâwm tûrin an inring dâwn nge, an muthlu dâwn? Pu chu tlai tak—zân lai aṭanga zîng lam dâr thum inkâr vêlah lo kîr chauh se la, engtin nge ni ang? An pu khawtlaina chuan bawi ṭhenkhatte chu a tilunghnual emaw, a tihrilhhai emaw ang em? * Pu a lo thlen huna harhvâng taka awm bâwite chauh chu an eng a thâwl ang. An tân chuan Thufingte 13:12 thu: “Beiseina tihkhawtlai hian thinlung a tinâ a, Duhthusâm lo thleng erawh chu nunna thing a ni,” tih hi hman a ni ngei ang.
11. Engtin nge ṭawngṭaina chuan ngaihven tûrin min ṭanpui?
11 Tlai anga a lan chhûnga ngaihven renga awm tûrin engin nge Isua zuitute chu ṭanpui ang? Man a nih hma lawka Gethsemani huana an awm lai khân Isua chuan a tirhkoh pathumte hnênah: “Thlêmnaa in luh loh nân inring rengin ṭawngṭai rawh u,” a ti a. (Matthaia 26:41) Kum engemaw zât hnu chuan, chutih laia awm ve Petera chuan, chu fuihna thu ngai bawk chu a Kristian puite fuih nân a hmang a ni. Ani chuan: “Thil zawng zawng tâwpna chu a hnai tawh a, chuvângin in ṭawngṭai theih nân rilru fel tak puin fîmkhur rawh u,” tiin a ziak a ni. (1 Petera 4:7) Ṭhahnemngai taka ṭawngṭai chu, kan Kristian hun duanah a tel ngei tûr a ni a. Ngaihven reng tûra min ṭanpui tûrin Jehova ngênin kan ṭawngṭai reng tûr a ni tak zet a ni.—Rom 12:12; 1 Thessalonika 5:17.
12. Chhût leh ngaihven danglamna chu eng nge ni?
12 Petera pawhin: “Thil zawng zawng tâwpna chu a hnai tawh a” a ti bawk tih chhinchhiah ang che. Engti fakauva hnai nge? Mihringte tân a nî leh dârkâr chiah chiah hriat ngaihna a awm lo. (Matthaia 24:36) Amaherawhchu, Bible-in a fuih loh a hun chhûtnaa inchiahpiah rengna leh Bible-in ti tûra a fuih, tâwpna hun beisei rengna chu a in ang lo. (2 Timothea 4:3, 4; Tita 3:9 khaikhin rawh.) Tâwpna kan beisei reng theihna kawng khat chu eng nge ni? Tâwpna hun a hnai tih fiahnaa kan ngaihsakna tak tak pêkna chu a ni. Chuvângin, Pathian ngaihsak lo ni hnuhnûngah kan awm a ni tih tichiangtu fiahna kawng rukte chu i lo ennawn ang u.
Tihfiahna Mi Hmin Thei Tak Kawng Rukte
13. 2 Timothea bung 3-a chhinchhiah, Paula hrilh lâwkna hian engtin nge “ni hnuhnûngahte” kan awm tih a âwihtîr che?
13 A hmasa berah chuan, ‘ni hnuhnûng’ chungchânga tirhkoh Paula hrilh lâwkna thlen famkimna chu chiang takin kan hmu. Paula chuan: “Ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, thianghlim lo te, hmangaihna pianpui nei lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, thuhnudâwn lo te, inngaihlu te, Pathian hmangaih aia mahni lâwmna mai hmangaih zâwktu te an ni dâwn si; Pathian ngaihsak anna an nei ang a, nimahsela a thiltihtheihna chu an âwih lo vang; chûng ang chu hawisan rawh. Mi sual leh tihdertute erawh chu mi bum leh buma awmin an sual zual deuh deuh ang,” a ti a. (2 Timothea 3:1-5, 13) He hrilh lâwkna hi kan hunah a famkim tih kan hmu lo vem ni? Thu dik ngaihthahtute chauhvin an phat thei ang! *
14. Thu Puan 12:9-a Diabola chungchâng thu hi tûn laiah engtin nge a famkim a, rei lo têah a chungah eng nge thleng dâwn?
14 Pahnihnaah chuan, Thu Puan 12:9-na thlen famkimna, Setana leh a hote vân aṭanga paih chhuahna nghawng chu kan hmu. Chutah chuan tihian kan chhiar a: “Drakon lian pui, rûlpui tar Diabola leh Setana an tih, khawvêl zawng zawng bumtu chu an paih thla ta a; leiah an paih a, a tirhkohte pawh an paih thla tel ve a,” tiin. Hei hian leiah chungpikna nasa tak a hring a ni. A bîk takin, 1914 aṭangin mihringte tân chungpikna a tam zual a ni. Mahse, Thu Puan-a hrilh lâwkna chuan Diabola chu leia paih thlâk a nihin, “hun tlêm tê chauh a nei,” tih a hriat thu a sawi zawm a. (Thu Puan 12:12) He hun chhûng hian, Setana chuan Krista hnungzuitu hriak thihte chu a do va. (Thu Puan 12:17) Kan hunah, he beihna rah chhuahte hi kan hmu ngei a ni. * Nimahsela, “hnam tin a bum leh tawh lohna tûrin” Setana chu leilâwtah paih a ni thuai ang.—Thup. 20:1-3.
15. Thu Puan 17:9-11 hian tâwpna hunah kan awm a ni tih chianna engtin nge a pêk?
15 Pathumnaah chuan, Thu Puan 17:9-11-a chhinchhiah hrilh lâwknaa “lal” pariatna leh a hnuhnûng ber ni bawk hunah kan awm. Hetah hian Tirhkoh Johana chuan khawvêl thuneihna pasarih—Aigupta, Assuria, Babulon, Medo-Persia, Grik, Rom, leh Anglo-American thuneihna inṭâwmte—entîr lal pasarih chungchâng a sawi a ni. Tin, “[lal] pariatna, pasarihte zînga mi” chu a hmu bawk a. He lal pariatna—Johana inlârnaa a hnuhnûng ber—hian United Nations a entîr a. Johana chuan he lal pariatna hi “boralnaah a la kal ang,” a ti a, chu mi hnu chuan lei lam lalte chungchâng engmah sawi zui a ni tawh lo. *
16. Nebukadnezzara mumanga milim thlen famkimna thudik chuan ni hnuhnûngah kan awm a ni tih engtin nge a târ lan?
16 Palinaah chuan, Nebukadnezzara’n a mumanga a hmuh milim ke-in a entîr hun chhûngah kan awm. Zâwlnei Daniela chuan he mumang mak tak mihring ang milim hrawl tak hi a hrilhfiah a. (Daniela 2:36-43) Milima thîr chi-lîte chuan khawvêl thuneihna chi hrang hrang a entîr a, a lû (Babulon Lalram) aṭanga inṭanin, a kephah leh ke zungṭang (tûn laia rorêl mêk sawrkârte) thlengin entîr nei a ni. Milimin a ai a awh, khawvêl thuneitute chuan anmahni lan dân tûr an siam ṭheuh tawh a. Tûnah hian, milim kephahin a entîr hun chhûngah kan awm mêk a ni. Thuneihna dang lo awm tûr chungchâng sawina rêng a awm lo. *
17. Kan Lalram thuhrilh rawngbâwlna chuan tâwpna hunah kan awm a ni tih fiahna chiang zâwk engtin nge a pêk?
17 Panganaah chuan, Isua’n he kalhmang tâwp hmaa lo thleng tûra a sawi khawvêl puma thuhrilh rawngbâwlna chu hlen a ni tih kan hmu. Isua chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi a. (Matthaia 24:14) Tûn laiah, he hrilh lâwkna hi tûn hma zawng aia nasain a thleng famkim mêk a ni. Bial la khawih loh ṭhenkhat chu awm ngei mah se, Jehova’n hun a tih hunah chuan, rawngbâwlna nasa tak thlen theihna hun remchâng a inhawng ngei ang. (1 Korinth 16:9) Amaherawhchu, Bible chuan Jehova’n leia mi zawng zawngte’n mi mal taka hriattîrna an dawn vek a nghâk ang tih a sawi lo. Chanchin ṭha chu Jehova lungawi thlenga hrilh tûr a ni mah zâwk a; tichuan, tâwpna chu a lo thleng ang.—Matthaia 10:23 khaikhin rawh.
18. Chiang takin, hrehawmna nasa tak a inṭan huna hriak thih ṭhenkhatte chungchâng eng nge kan sawi theih a, hei hi engvânga rinngheh theih nge ni?
18 Paruknaah chuan, Isua Krista hriak thih zirtîr dik tak ṭhenkhatte chu hrehawmna nasa tak inṭan thlenga leia awm tûr ni mah se, an tlêm tawlh tawlh zêl. Hriak thih la bâng tam takte chu an upa tawh hle a, kum engemaw zât kalta aṭangin, hriak thih dik takte chu an tlêm tial tial a ni. Chutichung pawh chuan, hrehawmna nasa tak chungchâng chu sawiin, Isua chuan: “Chûng nîte chu tihtawi ni suh sela mihring rêng rêng damin an chhuak lo vang; nimahsela, thlante avâng chuan chûng nîte chu tihtawi a ni ang,” tiin a sawi a ni. (Matthaia 24:21, 22) Chuvângin, Krista “thlante” zînga ṭhenkhatte chu hrehawm nasa tak inṭan thlengin he leiah hian an la awm ngei ang. *
Hma Lamah Eng Nge Awm?
19, 20. Engvângin nge tûn hi hun dang zawng aia harhvân hun leh ngaihven hun a nih?
19 Nakin hunah kan tân eng nge awm? Hun phûrawm tak a lo la thleng ang. Paula chuan “[Jehova] Nî chu zânah rûkru angin a lo thleng dâwn,” tiin a vaukhân a. Khawvêl thila fing âwm taka langte chungchâng sawiin, ani chuan: “‘Muanna leh himna,’ tia an sawi lai takin . . . chawp leh chilha boralna an chungah a thleng ang,” tiin a sawi a ni. Chuvângin, Paula chuan a thu chhiartute chu: “Mi dangte angin i muhîl suh ang u khai, i mengin i ngaihven zâwk ang u,” tiin a fuih a ni. (1 Thessalonika 5:2, 3, 6) Dik takin, muanna leh himna thlen tûra mihring pâwlte beiseitu chuan thudik an ngaihthah a ni. Chutiang mite chu an va muhîl rang êm!
20 He thil kalhmangte tihchhiatna chu a rawn thleng thut ang. Chuvângin, Jehova nî chu beisei reng rawh. Pathian ngei chuan Habakuka hnênah: ‘A tlai lo vang’ tiin a hrilh tawh a ni! Kan tân ngaihven aia hmanmawh thlâk thil dang rêng a awm lo tak zet a ni. (w00 1/15)
[Footnote-te]
^ par. 10 Pu chuan a bâwite nên intiamna a nei lo va. Chuvângin, a bâwite hnênah a thiltih engkim a hrilh vek a ngai lo va, tlai anga a lan chhan hrilhfiah a ba hek lo.
^ par. 13 He hrilh lâwkna kimchang taka sawihona hre tûr chuan, Watchtower Bible and Tract Society of New York, Inc., chhuah Chatuan Nunnaa Hruaitu Hriatna bu bung 11-na en rawh.
^ par. 14 Hriatzau nân, Watchtower Bible and Tract Society of New York, Inc., chhuah Thu Puan—A Vâwrtâwp Ropui a Hnai! (English) tih lehkhabu phêk 180-6-na en rawh.
^ par. 15 Thu Puan—A Vâwrtâwp Ropui a Hnai!, (English) tih phêk 251-4 en rawh.
^ par. 16 Watchtower Bible and Tract Society of New York, Inc., chhuah Daniela Hrilh Lâwkna Ngaihsak Rawh! (English) tih lehkhabu bung 4-na en rawh.
^ par. 18 Kêl leh berâm tehkhin thu-ah chuan, mihring Fapa chu hrehawm nasa tak chhûngin a ropuina nên a lo thleng ang a; tin, rorêlna lalṭhutthlêngah a ṭhu ang. Mite chu Krista hriak thih unaute an ṭanpui dân azirin ro a rêlsak ang. Krista hriak thih unau zawng zawngte’n he lei an chhuahsan hnu daihah rorêlna hun neih ni sela chuan, he rorêlna tehfung hian awmzia a nei lo vang.—Matthaia 25:31-46.
I Hre Chhuak Em?
• Pathian Lehkha Thu-a entîr siam eng berin nge ngaihven tûrin min ṭanpui thei?
• Engtin nge Isua’n ngaihven a ṭûlzia a tehkhin?
• Eng chhan parukin nge ni hnuhnûngah kan awm a ni tih tichiang?
[Zirlai Atâna Zawhnate]
[Phêk 18-naa milemte]
A. H. Macmillan-a chuan kum 60 dâwn rinawm takin Jehova rawng a lo bâwl tawh
[Phêk 19-naa milem]
Isua chuan a zirtîrte chu bâwi inring reng nên a tehkhin