Hmuh Theih Loh Pathian Chu I Hnaih Thei Em?
Hmuh Theih Loh Pathian Chu I Hnaih Thei Em?
‘Ka hmuh theih loh te nên chuan engtin nge inlaichînna bul tak ka siam theih ang?’ tiin i zâwt a ni thei. Chu chu thil ni âwm tak angin a lang thei a ni. Mahse, hei hi ngaihtuah teh:
INLAICHINNA tluantling leh duhawm neih nân chuan inhmuh hi engti fakauvin nge a pawimawh? Hmuh theih loh thilte chu a pawimawh zâwk lo a nih pawhin, a pawimawh dân a intluk reng tho lo vem ni? Teh rêng mai! Chuvâng tak chuan alâwm, mi ṭhenkhatte chuan lehkha thawn hmangin mi dangte nêna inlaichînna bul tak an siam ṭhin ni. An lehkhaah chuan an thil duhzâwng te, duh loh zâwng te, thiltum te, rilru tlângpui te, fiamthu te, leh pianken zia te emaw, an tuizâwngte emaw chu an ziak lang ṭhîn a ni.
Mitdelte pawhin mi dangte nêna inlaichînna bul siam nân inhmuh a pawimawh ber lo tih an lantîr a ni. Entîr nân, mitdel nupa Edward-a leh Gwen-i te chungchâng hi lo ngaihtuah teh. * Edward-a chuan Gwen-i chu mitdel school-a, lehkha a zirnaah a tawng a. Gwen-i nungchang, a bîk takin ṭawngkam leh thiltiha a rinawmnate, leh a hna chungchânga a rilru put hmang ṭha tak maite chu a ngaisâng êm êm a ni. Tin, Gwen-i pawh chuan Edward-a chu a duh hle a, a chhan chu “enkawl seilen ka nih laia mize pawimawh tak nia ka hriat zawng zawngte a neih vâng a ni’ tiin a sawi. Tichuan, an inngaizâwng ṭan a; kum thum hnuah an innei ta a ni.
“Inneih hnuah chuan khawhmuh lohna hian inlaichînna siamna a dang chuang lo. Mit tak tak a del pawhin rilru mit a del chuang lo,” tiin Edward-a chuan a sawi a ni. A hnu kum 57, tûn hun thleng pawh hian an inhmangaihna chu a la nghet reng a ni. Inlaichînna ṭha tak an neih chhan chu: (1) Mi dang mize hriatna (2) Chûng miziate ngaihtuah leh chûngte hîpa awmna (3) Ṭha taka inbiakpawh rengna, leh (4) Thil tih dun te vâng a ni tih an hrilhfiah a ni.
Hêng thu pawimawh palite hi ṭhian inkâr a ni emaw, nupa inkâr a ni emaw, chu aia pawimawh Pathian leh mihringte inkârah a ni emaw pawh ni se, inlaichînna ṭha neih nân a pawimawh a ni. Thuziak dawt lehah chuan, hêng thu pawimawhte’n hmuh theih loh Pathian nêna inlaichînna ṭha nei tûra min ṭanpui theih dân kan hria ang. * (w00 10/15)
[Footnote-te]
^ par. 4 Hming dik tak hman a ni lo.
^ par. 6 Mihring leh mihring inkâra inlaichînna ang lo takin, Pathian nêna inlaichînna chu, a awm a ni tih rinnaah a innghat a ni. (Hebrai 11:6) Pathiana rinna nghet tak neih theihna tûra chipchiar taka sawikhâwmna chu Is There a Creator Who Cares About You? tih lehkhabu, Watchtower Bible and Tract Society of New York, Inc., chhuah chu khawngaihin en ang che.