Pathian I Hnaih Theih Dân

“Pathian hnaih rawh u, tichuan anin a hnaih ang che u,” tiin, Jakoba 4:8 chuan a sawi a. Pathian Jehova chuan mihringte nêna inlaichînna ṭha neih a duhzia chu kan tâna a Fapa pe-in a lantîr a ni.

CHU hmangaihna chu chhâng lêtin, tirhkoh Paula chuan: “Amahin min hmangaih hmasak avângin kan hmangaih a ni,” tiin a ziak a. (1 Johana 4:19) Mahse, Pathian hnaih tûr chuan hma kan lâk a ngai a ni. Chûngte chu thuziak hmasaa kan sawi tâk, kan mihringpuite hnaih nâna ṭûl kawng chi lite nên a inang a ni. Chûngte chu tûnah lo chhût ta ila.

Pathian Mize Ropui Takte Thlîr Rawh

Pathian chuan mize ropui tak tak a nei thluah a, chûng zînga a langsâr zualte chu hmangaihna te, finna te, dikna te, leh thiltihtheihna te a ni. A finna leh a thiltihtheihna chu vânlâwt leh kan chhehvêla thil awmte, atom te tak tê tê aṭanga arsi hlâwmkhâwm ropui takte hian a târ lang a ni. Chuvângin fakna hla phuahtu chuan: “Vânte khian Pathian ropuizia chu a hriattîr a; boruak zau tak khian a kut chhuak chu a lantîr ṭhîn,” tiin a lo ziak a ni.​—⁠Sâm 19:1; Rom 1:⁠20.

Thilsiamte chuan Pathian hmangaihna an lantîr bawk. Entîr nân, min siam dân aṭang hian Pathianin nun chên tûrin min duh tih a lang a. Rawng hmuh theihna te, rim leh thil tui dân hriat theina te, rimawi hlimpui theihna te, nuih theihna te, thil nalh hmuh nuam tih theihna te, leh thil dang tam tak tih theihna leh hriat theihna nunna atâna thil pawimawh ber ni lêm lote pawh min pe a ni. Ni e, Pathian chu mi thilphal tak, ngilneihna leh hmangaihna ngah a ni tak zet a ni​—⁠chûng chu “Pathian hlim” nihtîrtu miziate a ni.​—⁠1 Timothea 1:​11; Tirhkohte 20:⁠35.

Jehova chuan a lalchungnunna chu hmangaihnain a hmang a, a thil siamte’n chu a lalchungnunna chu hmangaihna avângin an thlâwp bawk a, chu chu ani chuan a chhuang hle a ni. (1 Johana 4:⁠8) Ni e, Jehova chu lei leh vâna Lalchungnungber a ni a; mahse, mihringte, a bîk takin a chhiahhlawh rinawmte phei chu hmangaihna ngah tak pain a fate a cheibâwl ang chiahin a cheibâwl a ni. (Matthaia 5:45) An ṭhatna tûr a nih phawt chuan a kut a sûm ngai lo. (Rom 8:​38, 39) Sawi tawh angin, a Fapa mal neih chhun nunna meuh pawh a ui lo. A ni, Pathian hmangaihna avânga nung leh chatuan nunna beisei thei kan ni.​—⁠Johana 3:⁠16.

Kawng enkimah a Pa a entawn vek avângin, Isua chuan Pathian mizia hriatna thûk tak min pe a ni. (Johana 14:​9-11) Mahni hma a sial lo va, mite a ngaihtuah a, a ngaihsak a ni. Ṭum khat chu, Isua’n bengngawng, ṭawng pawh ṭawng fiah thei lo a tawng a. Chu pa chuan mipui zînga awm hrehawm a tih dân tûr chu i ngaihruat thei ngei ang. Chu chu hre thiam takin Isua chuan mipui zîng ata hruaichhuakin a tidam a ni. (Marka 7:​32-35) I ngaihtuahna hre thiam êm êm mai leh ṭha taka cheibâwltu che chu i ngaisâng em? Chutiang mi i ngaisâng a nih chuan, Jehova leh Isua lamah hîpin i awm ang; an chanchin i zir tam ang a, chutiang mi an ni tih i hre dâwn si a.

Pathian Miziate Ngaihtuah Rawh

Ṭhenkhat chuan mize ṭha tak tak an nei thei a; mahse, chu a miziate hîpa awm tûr chuan a chungchâng ngaihtuah a ngai a ni. Jehova chungchângah pawh chutiang bawk chu a ni. A miziate chhûtna chu amah hnaih theih nâna kawng pawimawh rahbi pahnihna a ni. Lal Davida Jehova hmangaih tak zettu leh “[Jehova] thinlung ang pu” chuan ti hian a sawi a ni: “Hmasâng nîte chu ka hre reng ṭhîn a; i thiltih zawng zawngte chu ka ngaihtuah ṭhîn a: i kut hnathawhte chu ka chhût ṭhîn,” tiin.​—⁠Tirhkohte 13:22; Sâm 143:⁠5.

 Pathian thilsiam mak takte i thlîr châng emaw, Pathian Thu, Bible, i chhiar châng emawin, i thil hmuhte leh chhiarte chu Davida ang bawkin i chhût ngun ṭhîn em? A pa hmangaih êm êmtu fapain a pa lehkha thawn dawng hlim hlawl han ngaihtuah teh. Chu lehkha chu engtin nge a ngaih ang? A chhiar thuak thuak hnuah pawhdawhah chuan a dah nghâl mai hauh lo vang. A thu tlar tin mai chu ngun takin a chhiar zâwk ang. Pathian Thu pawh kan tân chutiang khawpa hlu a ni tûr a ni, “aw, i dân hi ka va ngaina êm! nilênga ka ngaihtuah ṭhîn a ni,” tia fakna hla phuahtuin a hlut angin.​—⁠Sâm 119:⁠97.

Ṭha Taka Inbiakpawh Rengna

Inbiakpawhna ṭha chu inlaichînna engpawh tân a pawimawh ber a. Chu chuan ṭawng leh ngaihthlâk​—⁠rilru mai ni lo, thinlung tak taka ngaihthlâkna​—⁠a huam tel a ni. Pathian nêna tlang taka inbiakna, ṭawngṭaina hmangin Siamtu kan bia a. Jehova chuan amah hmangaihtu leh a rawngbâwltu, leh Isua Krista chu A aiawhtu anga pawmtute ṭawngṭaina chu a lâwm a ni.​—⁠Sâm 65:2; Johana 14:​6, 14.

Hmân lai hunah chuan Pathianin mihringte chu kawng tam tak, inlârna te, mumang te, leh vântirhkohte hmangin a be ṭhîn a. Mahse, tûnah chuan, a Thu, Holy Bible hmangin min be thung a ni. (2 Timothea 3:16) A Thu ziakte chuan ṭangkaina tam tak a nei a. Engtik lai pawhin a râwn theih reng a ni. Lehkha thawn ang chiahin a chhiar nawn theih a. Tin, chu chu ṭawngkaa thu sawi chhâwn angin tih danglam a ni lo. Tichuan, Bible chu i hmangaih, i Pa, vâna mi lehkha thawn angah ngai la, chu mi hmang chuan nî tinin i Pa chu bia ang che.​—⁠Matthaia 4:⁠4.

Entîr nân, Bible chuan Jehova ngaiha dik leh dik lote a târ lang a. Mihring leh he lei tâna a thiltumte a sawifiah bawk a. Tin, mi tin leh hnam tin te, amah betu rinawmte aṭanga a hmêlma sual ber thlenga a dâwr dân pawh a târ lang bawk a ni. Mihringte nêna a indâwr dân lo chhinchhiahin, Jehova chuan a mizia chipchiar takin min hrilh a ni. A hmangaihna te, hlimna te, lungngaihna te, lunghnualna te, thinurna te, zahngaihna te, ngaihsak zâwng te​—⁠a ni, a ngaihtuahna leh a vei zâwngte, leh a vei chhante pawh​—⁠chu mihringte hriat thiam theih zâwngin a lantîr a ni.​—⁠Sâm 78:​3-7.

Pathian Thu châng i chhiar zawhin, engtin nge chûng i chhiarte chu i hlâwkpui theih ang? Tin, a bîk takin, engtin nge Pathian i hnaih theih ang? A hmasa berin, Pathian chungchâng i chhiarte ngaihtuah la, ani chu mi pakhat angin hmu rawh. Chu chu i thinlung thlentîr ang che. Tichuan, i thil chhiar chanchin leh hman ṭangkai i tum dân, i ngaihtuahna leh i rilru chhungril vei zâwngte chu ṭawngṭaiin Jehova hriattîr rawh. Chu chu inbiakpawhna a ni. Tin, thil dang vei zâwng i neih chuan, chûng pawh chu i ṭawngṭainaah chham tel theih a ni.

 Pathian Nên Thil Tidûn Rawh

Bible chuan hmân lai mi rinawm Pathian nêna lêng dun, a nih loh leh a mithmuha awm ṭhenkhat chungchâng a sawi a. (Genesis 6:9; 1 Lalte 8:​25) Chu chu eng tihna nge ni? Anmahni zînga awm tak tak ang maiin nî tinin an nung tihna a ni. Sual nei mihring chu an ni ngei mai. Mahse, Pathian dân leh a thu bulte an hmangaih a, Pathian thiltum nêna inmilin an nung a ni. Jehova chuan chutiang mite lam a hnaih a, anmahni a ngaihsak a ni, Sâm 32:​8-a: “Fing taka awmtîr chein i kalna tûr kawng chu ka entîr ang chia: Ka mita en reng chung chein rem ka ruatsak zêl ang che,” a tih angin.

Nang pawhin Jehova chu ṭhian bul takah i siam thei a ni​—⁠nangmah nêna lêng dûn a, ngaihtuah che a, pa anga kaihhruaina pe ṭhîn tûr chein. Zâwlnei Isaia chuan Jehova chu “in ṭhatna tûra nangmahni zirtîrtu, in kalna tûr kawnga hruaitu,” angin a sawi a ni. (Isaia 48:17) A zirtîrnate kan ṭhatpui hian, Davida angin, Jehova chu “[kan] ding lama” a awmzia kan hre thei ang.​—⁠Sâm 16:⁠8.

Pathian Hming​—⁠A Nihna Târ Langtu

Sakhaw tam tak leh Bible lehlin tam takah hian Pathian hming bil hi an hmang lo tial tial a. (Sâm 83:18) Mahse, atîra Hebrai Pathian lehkha thu-ah a hming​—⁠Jehova​—⁠chu vawi 7,000 lai a lang a ni! (Inrualkhai lo takin, Pathian hming thianghlim an  paihbo laiin, Bible letlingtu tam takte chuan atîra Pathian lehkha thu-a lang pathian lem hming tam tak, Baal te, Bel te, Merodak te leh Setana hmingte meuh pawh an paihbo hauh lo!)

Mi ṭhenkhat chuan Pathian hming telh loh chu thil pawi thamah an ngai lo. Mahse, hming nei lo nêna inlaichînna bul leh duhawm siam chu a awl zâwk nge a har zâwk? tih han ngaihtuah teh. Pathian tih leh Lalpa tih ang chi nihnate (hêng hi pathian lem sawi nân pawh hman a ni) chuan Jehova thiltihtheihna te, thuneihna te, a nih loh leh dinhmun te chu a kâwk mai thei a; mahse, a nihna tak chu a hming bil chuahvin a tifiah a ni. (Exodus 3:15; 1 Korinth 8:⁠5, 6) Pathian dik hming bil chuan a mizia leh a nungchangte ai a awh a ni. Theologian Walter Lowrie-a chuan: “Pathian hming hre lo chuan tunge a nih a hre tak tak lo,” tiin a lo sawi dik hle a ni.

Australia rama Katholic mi rilru ṭha tak Maria-i thiltawn chanchin hi ngaihtuah teh. Jehova Thuhretute’n an tlawh hmasak ber ṭum chuan, Bible-a chuang Pathian hming chu an hmuhtîr a. Engtin nge a chhân lêt? “Bible-a Pathian hming ka hmuh hmasak ber ṭum chuan ka ṭap hial a. Pathian hming bil ka hriatna leh ka hman theihna chuan mi a hneh êm êm a ni,” tiin a sawi. Maria-i chuan a Bible zir chu a chhunzawm zêl a, Jehova chu mi tak tak a ni tih hriain, amah nêna inlaichînna tluantling a siam thei ta a ni.

A dik a ni. Kan hring mitin hmu thei lo mah ila, ‘Pathian kan hnaih’ thei a ni. A mize mawi duhawm tak chu kan rilru leh thinlungin kan “hmu” thei a, chu chuan amah kan hmangaihna chu a tipung thei a ni. Chu hmangaihna chu “phuar famkimna” a ni.​—⁠Kolossa 3:⁠14. (w00 10/15)

[Phêk 6-naa bâwm/milem]

Jehova’n Amah I Hmangaihna A Chhânglêt Ṭhîn

INLAICHINNA chu mi pahnih emaw, a aia tam emaw inkâra thil awm a ni. Pathian kan hnaih chuan, ani pawhin min hnaih ve ang. Bible-a an chanchin târ lan hlawh, mi upa tawh tak pahnih Sumeona leh Anni chungchânga Pathian rilru put dân hi han ngaihtuah teh. Chanchin Ṭha ziaktu Luka chuan, Sumeona chu mi “fel tak leh Pathian ngaihsak tak,” Messia nghâk rengtu a ni tih min hrilh a ni. Jehova chuan Sumeona mize ṭhate chu a hmu a; chuvângin, “Lalpa Krista chu a hmuh hma loh chuan a thi lo vang” tih hrilhin a hmangaihna a lantîr a ni. Tichuan, Jehova chuan a thutiam chu a vawng reng a. Jerusalem biak ina A nu leh pa rawn hruai nausên Isua hnênah Sumeona chu a hruai ta a ni. Phûr tak leh lawm takin, Sumeona chuan nausên chu a pawm a, hetiang hian a ṭawngṭai a: “Lalpa, tûnah, i thu ang zêlin i bawi hi thlamuang takin i kaltîr dâwn a; i chhandamna mi tin hmuha i siam kha ka mitin a hmu ta e,” tiin.​—⁠Luka 2:​25-35.

“Chu mi lai tak chuan” Jehova chuan kum 84-a upa Anni a hmangaihna pawh chu Isua hnêna amah rawn hruai thlenna hmangin a lantîr ve bawk a. He hmeithai duhawm tak mai hian Pathian biak in kalsan lovin “Pathian a be ṭhîn,” tih Bible chuan min hrilh a ni. Sumeona ang bawkin, lâwmnaa khatin, Jehova zahngaihna nasa tak chu a fak a; tin, chu mi hnuah “Jerusalem khaw tlan beisei apiangte hnênah chuan” naupang chanchin chu a hrilh bawk a ni.​—⁠Luka 2:​36-38.

A ni, Jehova chuan Sumeona leh Anni te Pathian hmangaihna nasa tak leh an ṭihna te, a thil tumte hlenchhuah dân an ngaihvenzia te chu a hria a ni. Chutiang Bible thuziakte chuan Jehova hnênah a hîp lo che em ni?

A Pa ang bawkin, Isua pawhin mite rilru chhûngril a en zâwk a. Biak ina a zirtîr laiin, “hmeithai rethei tê,” pakhat hian “dâr tangka dere pahnih” a thlâk lai a hmu a. Mi dangte ngaihah chuan beitham tak a ni ngei ang; mahse, Isua tân erawh a ni ve lo. Chu hmeichhia chuan a neih zawng zawng a pêk avângin a fak zâwk a ni. (Luka 21:​1-4) Chuvângin, kan thilthlâwmpêkte chu a ropui emaw, a ropui lo emaw pawh ni se, kan theih tâwk kan pêk phawt chuan Jehova leh Isua’n an hlut tih kan ring ngam thei a ni.

Amah hmangaihtute avângin Pathian chu hlim viau mah se, mite’n an pênsan a, kawng ṭha lo an zawh chuan a rilru a na êm êm a ni. Genesis 6:6 chuan Nova hun lai Tuilêt hmaa mite sualna avângin Jehova chu ‘a rilru a nâ’ tih min hrilh a. Chu mi hnua Israel mi luhlulte chuan “Pathian an fiah” chhên a, “Israel-ho Mi Thianghlim chu an tivui ṭhîn” tiin Sâm 78:41 chuan a sawi bawk. Ni e, Pathian chu rilru vei zâwng nei lo a ni lo. Ani chu mi tak tak a ni a, a rilru chu keimahni rilru anga nghet lo leh famkim lohnaa tih-âtin a awm ve lo.