Pathian Lalramin A Tih Tûr
Pathian Lalramin A Tih Tûr
“I ram lo thleng rawh se. I duhzâwng vâna an tih angin leia mi’n ti rawh se.”—MATTHAIA 6:10.
1. Pathian Lalram lo thleng tûrin eng nge a thlen dâwn?
ISUA’N Pathian Lalram dîl tûra a hnungzuite a zirtîr khân, chu Lalram lo thleng tûr chuan Pathian laka kum sâng tam tak inmihran tawh mihringte inawpna chu a titâwp dâwn tih a hria a ni. Chûng hun lai zawng chuan, he leiah hian Pathian duhzâwng tih a ni lo tlângpui a. (Sâm 147:19, 20) Mahse, vâna Lalram din a nih hnu chuan, Pathian duhzâwng chu hmun tina tih tûr a lo ni ta a. Pathian van lam Lalram rorêlnain mihringte rorêlna a thlâkna tûr hun pawimawh tak chu a hnai êm êm tawh a ni.
2. Pathian inawpnain Mihringte inawpna a thlâkna chu engin nge hril ang?
2 Chu inthlâkna hun chu Isua’n, “hrehawmna nasa tak . . . chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” a tih hian a hril ang. (Matthaia 24:21) A reizâwng tûr chu Bible-in a sawi lo; mahse, chu mi hun chhûnga hrehawmna lo thleng tûr chu khawvêla thil thleng tawh zawng zawng aiin a râpthlâk dâwn a ni. Hrehawmna nasa tak a inṭan hunah chuan he khawvêl mite mak tih êm êm tûr thil a thleng ang: sakhaw dik lote tihhchhiatna chu. Jehova Thuhretute tân erawh, hun rei tak chhûng an lo ngahhlelh tawh a nih avângin, a mak ve lo vang. (Thu Puan 17:1, 15-17; 18:1-24) Tichuan, hrehawmna nasa tak chu Pathian Lalramin Setana inawpna zawng zawng a tihchhiat hun Armageddon-ah a tâwp ang.—Daniela 2:44; Thu Puan 16:14, 16.
3. Jeremia’n thuâwi lote hmabâk chu engtin nge a sawi?
3 Hei hian “Pathian hre lo mi” leh Krista enkawlna hnuaia van lam Lalram “chanchin ṭha âwih lo” mite tân eng eng nge a thlen dâwn? (2 Thessalonika 1:6-10) Bible hrilh lâwk thu chuan hetiang hian min hrilh: “Ngai teh, thil ṭha lo chuan hnam tin a rawn hrût dâwn e, thlipui na tak mai lei hmun tâwp aṭangin a lo thawk dâwn. Chu mi nîa LALPA thahte chuan lei tâwp aṭangin lei tâwp thlengin an dâp ang a; sûn loh leh khâwm loh leh phûm lovin an awm ang a; lei chunga êkdûr mai an ni ang,” tiin.—Jeremia 25:32, 33.
Suahsualna Tâwpna
4. Engvângin nge Jehova’n he kalhmang suaksual a titâwp tûr chu thiamawm tak a nih?
4 Pathian Jehova chuan suahsualna chu kum sâng tam tak chhûng a lo dawh tawh a, chu chu mi thinlung ṭhate’n mihringte rorêlna ṭhat lohzia an hriat nân chuan a rei tâwk hle a ni. Entîr nân, lehkhabu pakhatin a sawi dân chuan kum zabi 20-na ri-ngawtah pawh mi maktaduai 150 aia tam chuan indonaah te, helnaah te, leh mipui buaina dang te avângin an nun an chân a ni. Mihring nunrâwnzia chu Khawvêl Indopui ll-na chhûng khân a lang chiang êm êm a, chu mi chhûng chuan, mi maktaduai 50 vêl an thi a, chûng zînga tam takte chu Nazi concentration camp-a râpthlâk taka thite an ni. Bible sawi lâwk ang chiahin, kan hunah hian ‘mi sual leh tihdertute chu mi bum leh buma awmin an sual zual deuh deuh,’ a ni. (2 Timothea 3:1-5, 13) Tûn laiah chuan nungchang bawlhhlawhna te, dân bawhchhiatna te, tharum thawhna te, ei rûk te, leh Pathian tehna hmuhsitna te a hluar êm êm a. Chuvângin, Jehova’n he kalhmang suaksual a titâwp tûr chu a thiamawm hliah hliah a ni.
5, 6. Hmân lai Kanaan rama suahsualna chungchâng kha han sawi teh.
5 Tûn lai dinhmun hi kum 3,500 vêl kaltaa Kanaan dinhmun nên a inang êm êm a ni. Bible chuan: “LALPA ngaiha thil tenawm tinrêng, a huat tak maite chu an ti ṭhîn a; an fapate, an fanute ngei pawh an pathiante tân an hâl ṭhîn a ni,” tiin a sawi a. (Deuteronomy 12:31) Jehova chuan Israel hnamte chu hetiang hian a hriattîr a ni: ‘hêng hnam sual avâng . . . hian LALPA in Pathianin anni chu a hnawhchhuahsak che u a ni zâwk,’ tiin. (Deuteronomy 9:5) Bible historian Henry H. Halley-a chuan: “Baal-a te, Astarothi te, leh Kanaan mite pathian dangte biaknaah chuan a hlei a hluaka intihhlimnaah an tel a, an biak inte chu sual rawngbâwlna hmun pui a ni,” tiin a sawi a ni.
6 Hmân lai chanchin zir mite’n “Baal-a hnêna hâlral thilhlana hlan tawh naupangte dahna bêl tam tak an hmuh chhuah” avângin, an suahsualna nasatzia chu Halley-a chuan heti hian a târ lang a ni. “Chu mi hmun zawng zawng chu nausênte thlân a ni ringawt mai a. . . . Kanaan mite chu an pathian hma ngeiah, bawlhhlawh takin an khawsa a, chu chu an sakhaw serh leh sâng angin an ngai a ni; tichuan, an fatîrte chu, chu mi pathian atân vêk an hâl hlum ṭhîn a. A ram pum pui chu Sodom leh Gomorra a ang hial a ni. . . . Chutiang nunphung tenawm tak leh tharum thawhnaa khat mite chuan, awm chhunzawm reng theihna tûrin dikna a nei em? . . . Kanaan khawpui chhia laichhuaktu Hmân laichanchin zir mite chuan Pathianin tûn aia hmaa a tichhe lo chu mak an hle a ni,” tiin.
Lei Rochunna
7, 8. Pathianin he lei hi engtin nge a thenfai ang?
7 Pathianin Kanaan ram a thenfai ang bawkin, a duhzâwng titute tân he lei pum pui hi a thianfai thuai dâwn a. “Mi tluangte chu leilungah hian an chêng ang a, ṭha famkimte chu chutah chuan an awm reng ang a. Mi suaksualte erawh chu leilung ata tihboral an ni ang.” (Thufingte 2:21, 22) Fakna hla phuahtu pawhin: “Rei lo tê achinah mi suaksualte chu a awm tawh dâwn si lo . . . Thuhnuairawlhte erawh chuan ram hi an luah ang a: Remna chênin an hmuingîl ang,” tiin a sawi a ni. (Sâm 37:10, 11) Tin, Setana pawh “kum sângkhat chu a vei hma loh chuan hnam tin a bum leh tawh lohna tûrin,” phuar a ni bawk ang. (Thu Puan 20:1-3) Ni e, “khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang.”—1 Johana 2:17.
8 He leia chatuana nun duhte tâna beisei tûr ropui tak sawiin Isua chuan: “Thuhnuaihrawlhte chu an eng a thâwl e; lei hi an la rochung dâwn si a,” a ti a. (Matthaia 5:5) “Mi felte chuan ram hi an luah ang a, a chhûngah hian kumkhuain an awm ang,” tia Sâm 37:29-a sawi lâwk kha a la chhuak a nih a rinawm. Mi felte he lei paradis-a chatuana nuntîr chu Jehova thiltum a ni tih Isua chuan a hria a ni. Jehova chuan: ‘Ka thiltihtheihna ropui takin lei te, mihring te leh lei chunga sa te ka siam vek a, pêk âwm ka tihte hnênah chuan ka pe a,’ tiin a sawi a ni.—Jeremia 27:5.
Khawvêl Thar Ropui Tak
9. Eng ang khawvêl nge Pathian Lalramin a lawm luh ang?
9 Armageddon zawhah chuan, Pathian Lalram chuan “lei thar” mak tak a chhûnga ‘felna awm’ chu a lâwmlût ang. (2 Petera 3:13) He thil kalhmang suaksualte ata zalen chu Armageddon-a dam khawchhuakte tân inchhâwk zângkhaina nasa tak a va ni dâwn êm! Van lam lalram inawpna hnuaia lei thar malsâwmna mak tak leh chatuan nun beiseina nêna an luh chuan an va hlim dâwn êm!—Thu Puan 7:9-17.
10. Lalram rorêlna hnuainah chuan eng thil ṭha lote nge bo hlen dâwn?
10 Mihringte chu indona te, dân bawhchhiatna te, ṭâmna te, leh sa hlauhawm te tihthlabârin an awm tawh lo vang. “Anmahni [ka mite] nêna remna thuthlung ka siam ang a, sakawlh te chu ram ata ka tibo vang . . . Tin, rama thing chuan rah a chhuah ang a, leiin a hlâwkna a chhuah ang a, an ramah chuan him takin an awm ang.” “Tin, an khandaihte chu leilehna hmâwr zumahte an chher ang a, an feite chu thei kûng ahchhumna chem kawmahte an chher ang: hnam dangin hnam dang chungah khandiah a lek tawh lo vang a, indo dân pawh an zir tawh hek lo vang. Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tuman an tihlau lo vang.”—Ezekiela 34:25-28; Mika 4:3, 4.
11. Taksa dam lohna zawng zawng a tâwp vêk dâwn tih engvângin nge kan rin ngheh theih?
11 Natna te, lungngaihna te, leh thihna hial pawh paihbo a ni tawh ang a: “Chu mi khuaa awm chuan ‘Ka dam lo ve,’ a ti lo vang a, a chhûnga mi awmte chu sual ngaihdamin an awm ang.” (Isaia 33:24) Pathianin, “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te, pawh a awm leh tawh hek lo vang; thil hmasate chu a ral ta. . . . Ngai teh, thil engkim ka siam thar e.” (Thu Puan 21:4, 5) He leia a awm lai khân, Isua’n Pathian pêk thiltihtheihna hmangin hêng zawng zawngte a tih theihzia a takin a lo lantîr tawh a. Thlarau thianghlim ṭanpuina nên, Isua chuan ram pum a fang chhuak a, ke baite a tidam a; tin, damlote a tidam bawk a ni.—Matthaia 15:30, 31.
12. Mitthite tân eng beiseina nge awm?
12 Isua chuan chu chang a ti lo. Mitthi pawh a kaitho a ni. Chu a thiltih chu mi inngaithlâwmte’n engtin nge an chhân lêt? Thleirâwl kum 12 mi a kaihthawh khân, a nu leh pate chuan “mak tih namênin mak an ti lo va” ni. (Marka 5:42) Hei hi Lalram rorêlna hnuaia Isua thil tih tûr dang entîrna a ni a, chutih hunah chuan, “mi felte leh fel lote thawhlehna a awm” ang. (Tirhkohte 24:15) Mitthite a ho tê têa an lo thawh leh hun leh an hmangaihte nêna an intawhkhâwm leh huna a hlimawm dân tûr chu han suangtuah teh! ‘Tuite hian tuifinriat a khuh reng angin, leilung hi LALPA hriatnaa a khah zawh vek’ theihna tûrin Lalram kaihhruaina hnuaiah chuan zirtîrnan hna ropui tak a awm ngei dâwn a ni.—Isaia 11:9.
Jehova Lalchungnunna Thiamchantîr A Ni
13. Pathian rorêlna dikzia chu engtin nge lantîr a nih dâwn?
13 Kum sângkhat chhûng Lalram rorêlna a tâwp chuan mihringte chu rilru leh taksa lamah an ṭha famkim tawh ang a. Lei pumpui chu Eden huan, paradis a ni tawh ang. Remna te, hlimna te, himna te, leh mihringte inhmangaihna a lo awm tawh bawk ang. Lalramin ro a rêl hmain hetiang dinhmun hi mihringte chanchinah a la thleng ngai lo. Kum sâng tam tak chhûnga mihringte rorêlna râpthlâk tak leh Pathian van lam Lalram kum sâng rorêlna ropui tak chu a va inthlau nasa dâwn êm! A Lalram hmanga Pathian rorêlna chu kawng engkimah a chungnung dâwn si a. Rorêl tûra Pathian dikna neih, a lalchungnunna chu thiam chantîr ṭhak a ni tawh ang.
14. Kum sângkhat a tâwp hunah hel hote chungah eng nge thleng ang?
14 Kum sâng khat tâwpah chuan, mihring ṭha famkimte chuan tu rawng nge an bâwl duh zâwk tih an thlan theih nân zalên taka duhthlan theihna an hman chu Jehova’n a phal ang a. “Setana chu a tânna ata chu chhuahin a awm ang,” tih Bible chuan a sawi a ni. Tichuan, mite chu bum a tum leh ang a, ṭhenkhat chuan Pathian laka inlâk hran chu an la thlang ang. ‘Phuba lâk nawn’ a ngaih loh nân, Jehova chuan Setana leh a ramhuaihote leh Jehova lalchungnuna laka hel zawng zawngte chu a tiboral phiar ang. Chutih hunah chuan mi tumahin chatuan atâna tihboralte chuan hun remchâng an neih loh vâng emaw, an famkim loh avânga kawng sual zawh emaw angah an sawi thei lo vang. Ṭha famkim Adama leh Evi ang, duh rêng vânga Jehova rorêlna laka hel thlang an ni dâwn si a.—Thu Puan 20:7-10; Nahuma 1:9.
15. Mi rinawm nghette chuan Jehova nên eng inlaichînna nge an neih ang?
15 A lehlamah thung chuan, mi tam zâwkte chuan Jehova lalchungnunna chawisân chu an thlang ang a. Hel hmang tihboral hnuah mi felte rinawm nghehna fiahnaah tlingin, Jehova hmaah an ding ang. Tichuan, chûng mi rinawm nghette chu Jehova fate anga pawm an ni ang a. Chuvângin, Adama leh Evi-te’n an hel hmaa Pathian nêna inlaichînna an neih ang kha an lo nei leh dâwn a ni. Tichuan, Rom 8:21 thu: “Thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tih hi a thleng famkim tawh ang. Zâwlnei Isaia pawhin: “[Pathianin] thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang,” tiin a hrilh lâwk a ni.—Isaia 25:8.
Chatuan Nun Beiseina
16. Chatuan nunna lâwmman beisei chu engvângin nge a sual loh?
16 Mi rinawmte chu Pathianin thlarau lam leh tisa lam thilin a vûr kumkhua dâwn tih hriat chu beisei tûr ropui tak a va ni êm! Fakna hla phuahtu chuan: “I kut i phar a, thil nung zawng zawng châkna [ṭha] chu i tihrehsak ṭhîn,” tiin a sawi a ni. (Sâm 145:16) Jehova chuan lei lam rochungtu tûrte chu Paradis-a nun beiseina chu an rinna pêng pakhat anga nei tûrin a fuih a ni. Jehova lalchungnunna chu thil pawimawh ber a ni chung pawhin, lâwmman beisei tûr nei lo va a rawng bâwl tûrin min ti lo. Bible pumpuiah hian, Pathian laka rinawm nghehna leh chatuan nun beiseina chu Kristianin Pathian a rinna pêng pawimawh tak angin ṭhen hran theih lohvin a inzawm tlat a ni. “Pathian hnêna lo kal chuanin, ani chu a awm tih leh zawngtute hnêna lâwmman pêk hmang a ni tih rin tûr a ni.”—Hebrai 11:6.
17. Beiseina tihchaka awm chu a ṭha a ni tih Isua’n engtin nge a târ lan?
17 Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” a ti a. (Johana 17:3) Ani chuan Pathian leh a thiltumte hriatna chu a lâwmman nên a kaihpawlh tlat a ni. Entîr nân, mi sual pakhatin a Lalram a thlen huna hre reng tûra Isua a ngen khân Isua chuan: “Ka hnênah Paradis-ah i la awm ve ang,” tiin a chhâng a ni. (Luka 23:43) Lâwmman a hmuh loh pawha rinna nei tûrin chu mi sualpa chu a fuih lo. Jehova chuan a chhiahhlawhte’n he khawvêla fiahna chi hrang hrang an tawh laia anmahni tichak tûrin, paradis-a chatuan nun beiseina an neih chu a duh tih a hria a ni. Chuvângin, lâwmman beisei chu Kristiante chhel nân a pawimawh hle a ni.
Lalram Hmabâk Chu
18, 19. Kum sâng Rorêl zawhah chuan Lal leh Lalram chungah eng nge thleng dâwn?
18 Lalram chu Jehova’n hmanrua anga a hman he lei leh a chhûnga chêngte ṭha famkima siam tûr leh amah nêna inzawmtîr leh tûra ṭanpuitu sawrkâr a nih avângin, kum sângkhat hnua Lal Isua Krista leh lal leh puithiam mi 1,44,000-te chanvo tûr chu eng nge ni dâwn? “Chu mi hnuah chuan a tâwp chu a lo la thleng ang; chu mi hnuah chuan rorêlna zawng zawngte leh, thuneihna leh thiltihtheihna zawng zawngte a tihbo hnuah, Pathian hnênah, Pa hnên ngeiah chuan ram chu a pe ang. A hmêlma zawng zawng a ke hnuaia a dah hma loh chuan ani chu lalah a awm tûr rêng a ni si a.”—1 Korinth 15:24, 25.
19 Isua’n Pathian kuta Lalram a hlan hunah chuan, a ramin tâwpintai a nei lo vang tia Pathian Lehkha Thuin a sawi chu eng anga hriat thiam tûr nge ni? Lalram thil hlenchhuahte chuan chatuan a daih ang. Jehova lalchungnunna thiam chantîrna tûra a thawhte avângin Isua chu kum khuaa chawimawi a ni ang. Mahse, sualna leh thihna chu tihbo vek a nih avâng leh mihringte chu chhandam tawh an nih avângin, Chhandamtu a nih a ngai tawh lo. Lalram kum sâng rorêlna chuan thil engkim a hlen chhuak ang a; chuvângin, Jehova leh thu awih mihringte inkârah aiawh sâwrkâr a awm reng a ngai tawh lo vang. Tichuan, “Pathian chu engkima engkim” a ni tawh ang.—1 Korinth 15:28.
20. Krista leh 1,44,000-te hmabâk chu engtin nge kan hriat theih ang?
20 Kum sâng rorêlna a zawh chuan, Krista leh a rorêlpuite’n eng chanvo nge an neih zêl dâwn? Bible chuan engmah a sawi lo. Mahse, Jehova chuan chanvo dang tam tak chatuanin a pêk belh ngei ang tih kan chiang thei a ni. Chuvângin, Lal leh puithiamte, leh vânlâwt ropui tak tâna Jehova thil tumte hmu chhuak thei tûra nakin hun thleng kan dam theih nân, tûnah ngei hian Jehova lalchungnunna chu chawisângin, chatuan nunna dawng tlâkin i awm ṭheuh ang u! (w00 10/15)
Ennawn Tûr Thu Pawimawhte
• Rorêlna chungchângah eng inthlâkthlengna nge kan hnaih êm êm?
• Pathianin engtin nge mi fel leh fel lote ro a rêlsak ang?
• Khawvêl tharah chuan eng dinhmun nge lo awm dâwn?
• Engtin nge Jehova lalchungnunna chu thiamchantîr a nih dâwn?
[Zirlai Atâna Zawhnate]
[Phêk 29-naa milemte]
‘Mi fel leh fel lote thawhlehna a awm ang’
[Phêk 30-naa milem]
Mi rinawm nghette chuan Jehova nêna inlaichînna ṭha an nei leh ang