A Thiltih Ropui Takte Avângin Jehova Chu Fak Rawh U!
A Thiltih Ropui Takte Avângin Jehova Chu Fak Rawh U!
“Ka nun hian Lalpa a chawimawi e. . .Mi chak khân ka chungah thil ropui tak mi tihsak a.”—LUKA 1:46-49.
1. Eng thiltih ropui tak takte avângin nge Jehova chu kan fak?
JEHOVA chuan a thiltih ropui takte avângin fak a phû a ni. Zâwlnei Mosia’n Aigupta ram aṭanga Israel-te chhanchhuah an nih thu a sawi khân heti hian a sawi a: ‘In mit ngeia LALPAN thil ropui tak a tih zawng zawng hmutute in ni,’ tiin. (Deuteronomy 11:1-7) Chutiang bawkin, vântirhkoh Gabriela’n Isua pian tûr thu nula thianghlim Mari hnêna a sawi ṭum khân, Mari chuan: “Ka nun hian Lalpa a chawimawi e. . .Mi chak khân ka chungah thil ropui tak mi tihsak a,” tiin a sawi a ni. (Luka 1:46-49) Jehova Thuhretute kan nih angin, a thiltih ropui tak tak, Aigupta sal aṭanga Israel-te a chhuahtîr dân leh mak tak maia a Fapa duhtak a piantîr dân te avâng hian amah chu kan fak a ni.
2. (a) Pathian “chatuana remruat” chu mihring thuâwihte tân eng nge a awmzia? (b) Patmos thliarkârah Johana’n eng thil nge a tawn?
2 Jehova thiltih ropui takte zînga tam tak chu, Messia leh a Lalram inawpna hmanga mihring thuâwihte malsâwm tûra a “chatuana remruat” nên a inzawm tlat a. (Ephesi 3:8-13) Tirhkoh upa tawh tak Johana, inlârnaa vân kawngkhâr inhawng hmuhtîr a nih lai pawh khân, chu remruat chu a rawn hlawhtling chho zêl tawh a ni. Tawtawrâwt ri ang mai aw-in: “Hetah lo chho rawh, tichuan tûn hnua thil lo awm tûrte chu ka entîr ang che,” a tih ri a hria a. (Thu Puan 4:1) ‘Pathian thu avâng leh Isua hriattîrna thu avânga’ Rom sawrkârin Patmos thliarkâra a tântîr laiin Johana chuan “Isua Krista thu puan chhuah” hi a dawng a ni. Chu tirhkohvin a hmuh leh hriatte chuan Pathian chatuan remruat chungchâng tam tak a târ lang a, chutiang chuan Kristian dik takte tân thlarau lama hriat thiamna leh a hun taka fuihna a pe a ni.—Thu Puan 1:1, 9, 10.
3. Johana’n inlârnaa upa 24 a hmuhte khân tute nge an entîr?
3 Chu vân kawngkhâr inhawng aṭang chuan, upa 24, lallukhum khuma lalṭhutthlênga ṭhu Johana chuan a hmu a. Anni chuan Pathian hmaa bawkkhupin heti hian an sawi a ni: “Nang kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin. (Thu Puan 4:11) Chûng upate chuan, Pathianin a lo tiam tawh dinhmun sâng tak changa tholeh Kristian hriak thih zawng zawngte an awm lai an entîr a ni. Thilsiamte chunga a thiltih ropui tak takte chuan Jehova chu fak tûrin anni chu a chêttîr a. Keini pawhin Jehova “chatuan thiltihtheihna leh a Pathianzia chu” mak kan ti êm êm a ni. (Rom 1:20) Jehova chanchin kan hriat tam poh leh, a thiltih ropui takte avânga fakna tûr chhan kan ngah ting mai a ni.
Jehova Thiltih Fak Tlâkte Chu Puang Rawh U!
4, 5. Davida’n Jehova a fak dân entîrna ṭhenkhat han sawi teh.
4 Hla phuahtu Davida chuan Pathian chu A thiltih ropui takte avângin a fak a. Entîr nân, Davida chu heti hian a zai a ni: “LALPA, Ziona awm chu, fakin zai ula; mite zîngah chuan a thiltihte chu hril rawh u. Aw LALPA, mi khawngaih la; thihna kawngkhâr ata mi kai chhuak ṭhîntu, mi hawtute avânga ka manganna hi en teh; nangmah fakna zawng zawng chu ka hriattîr theihna tûrin; Zion fanu kawngkâahte chuan,” tiin. (Sâm 9:11, 13, 14) A fapa Solomona hnêna Pathian in sak dân tûr ruahmanna a hrilh hnuah, Davida chuan Pathian chu heti hian a fak a: “Aw LALPA, ropuina te, thiltihtheihna te, chawimawina te, hnehna te, lalna te hi i ta a ni a; . . . aw LALPA, ram chu i ta a ni a, mi zawng zawnga chungnung ber i ni. . . . Chutichuan kan Pathian, lâwm thu kan hrilh chia, i hming ropui hi kan fak e,” tiin.—1 Chronicles 29:10-13.
5 Pathian Lehkha Thu chuan Davida ang bawka Pathian fak ve tûrin min sâwm a, min tur a ni. Sâm bu-ah hian Pathian fakna ṭawngkauchheh tam tak a awm a, chûng zînga a zâtve vêl chu Davida sawi a ni. Ani chuan Jehova chu a fakin lâwm thu a hrilh âwl lo va. (Sâm 69:30) Chu bâkah, hmân lai aṭang tawhin, Pathian thlarauvin Davida leh mi dangte hla a lo phuahtîrho chu Jehova fak nân hman a la ni reng bawk a ni.
6. Thlarau ṭanpuia ziak Sâm thute hi kan tân eng angin nge an ṭangkai?
6 Sâm thute hi Jehova betute tân a va ṭangkai tak êm! Kan tâna a thiltih ropui zawng zawngte avânga Pathian hnêna lâwm thu sawi kan duh hunah pawh, Sâm thuziak mawi tak takte hi kan ngaihtuah thei a ni. Entîr nân, zîng kan thawh hunah pawh: “LALPA hnêna lâwm thu sawi leh, aw Chungnungber, i hming faka zai hi thil ṭha tak a ni a: . . . zînga i ngilneihna tihlan leh, zan tin i rinawmna tihlan hi thil ṭha tak a ni. LALPA, nang chuan i hnathawhin mi tilâwm si a: i kut thiltihte avângin hlimin ka zai ang,” tih ang thute hi sawi ve tûra chêttîr kan ni mai thei a. (Sâm 92:1-4) Tin, thlarau lama kan hmasâwnna kawng dâltu pakhat kan lo hneh a nih chuan, kan lâwmna leh hlimna chu fakna hla phuahtu-in: “Aw lo kal rawh u, LALPA chawimawiin hlim takin i zai ang u: kan inchhandamna lungpui chawimawiin hlim takin i au ang u. Lâwm thu sawiin a hmâah i kal ang u khai, fakna hla saa amah chawimawiin hlim takin aw i chhuah ang,” tia a sak ang hian au chhuahpui ve kan duh mai thei bawk.—Sâm 95:1, 2.
7. (a) Kristiante hla sak tam takah hian eng nge chhinchhiah tlâk tak awm? (b) Inkhâwmnaa thlen hma-na tûr chhan leh bân thlenga awmna tûr chhan pakhat eng nge ni?
7 Kohhran inkhâwmah te, assembly-ah te, leh inkhâwmpuiah te Jehova fakna hla sain kan aw-te kan chhuah ṭhîn a. Chûng hlate zînga tam tak chu thlarau ṭanpuia hla phuah, Sâm bu-a mi ṭanchhana phuah an ni hi a chhinchhiah tlâk khawp mai. Jehova fakna hla duhawm tak tak thlankhâwm, a hun nêna inmil zêla sak tûr kan nei hi kan lâwm tak meuh a ni! Pathian fakna hla sak hi kan inkhâwmnaa thlen hma-na tûr chhan leh bân thlenga awmna tûr chhan ṭha tak pakhat a ni a; chutiang chuan hla sa leh ṭawngṭaiin kan Pathian biakpuite nên Jehova kan fakho thei a ni.
“LALPA Chu Fak Rawh U!”
8. “Haleluia” tih thu mal hian eng nge a kawh a, engtin nge an lehlin ṭhin?
8 Hebrai tawng aṭanga “LALPA chu fak rawh u” tia lehlin ṭhin, “Haleluia” tih thu mal hian Jehova fakna a kâwk a. Entîr nân, Sâm 135:1-3-ah chuan: “LALPA chu fak rawh u. LALPA hming chu fak ula; Aw LALPA chhiahhlawh, LALPA ina dinga, kan Pathian in hung chhûng kawtlaia dingte u, Amah chu fak rawh u. LALPA chu fak rawh u; LALPA chu a ṭha si a: a hming fakin zai rawh u; a nuam si a,” tia uar taka sâwmna kan hmu a ni.
9. Jehova fak tûrin engin nge min chêttîr?
9 Pathian thilsiam ropui tak takte leh kan tâna a thiltih zawng zawngte kan chhûtin, thinlung taka ngaihhlutna chuan amah fak tûrin min chêttîr a ni. Hun kal tawha Jehova’n a mite tâna thil ropui tak tak a lo tih tawhte kan ngaihtuahin, kan thinlung chuan amah fak tûrin min chêttîr a. Tin, thil ropui tak tak a la tih tûr thutiamte kan chhûtin, fakna leh lâwmna lantîr dân tûr kawng kan zawng ṭhîn bawk a ni.
10, 11. Kan lo awm ve ringawt pawh hi engtin nge Pathian kan fakna tûr chhan ṭha tak a nih?
10 Kan lo awm ve ringawt pawh hi Jah-a fakna tûr chhan ṭha tak a ni. Davida chu heti hian a zai a: “I [Jehova] hnênah lâwm thu ka hrilh ang che; hlauhawm tak leh mak taka siam ka ni si a: i thiltihte hi mak tak a ni a; chu chu ka nunna hian a hre chiang hle a ni,” tiin. (Sâm 139:14) Ni e, “mak taka siam” kan ni a, khaw hmuh theihna te, ri hriat theihna te, leh ngaihtuah theihna thilpêk hlu takte kan nei a ni. Chuvângin, min Siamtu fak thei tûr zâwngin kan nung tûr a ni dâwn lâwm ni? Paula pawhin chutiang lam hawi chuan a lo ziak a ni: “Chutichuan in ei pawhin, in in pawhin, in tih apiangah pawh, Pathian ropuina tûr hlîrin ti rawh u,” tiin.—1 Korinth 10:31.
11 Jehova kan hmangaih tak tak a nih chuan a ropuina tûr hlîrin engkim kan ti ang. Isua’n thupêk hmasa ber chu heti hian a sawi: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tûr a ni,” tiin. (Marka 12:30; Deuteronomy 6:5) Jehova chu min Siamtu leh, “thilpêk ṭha leh thilpêk famkim zawng zawng” Petu a nih angin, kan hmangaihin kan fak ngei tûr a ni. (Jakoba 1:17; Isaia 51:13; Tirhkohte 17:28) Chutianga kan tih chu a inâwm êm êm a ni, a chhan chu thil kan chhût theihna te, thlarau lama kan theihna te, leh kan taksa chakna te—kan pianpui zia leh theihna zawng zawng te—hi Jehova hnên aṭanga kan dawn vek a nih vâng a ni. Min Siamtu a nih avângin kan hmangaih leh kan fak chu a phû êm êm a ni.
12. Jehova thiltih ropui tak takte leh, Sâm 40:5 thute hi eng angin nge i ngaih?
12 Jehova thiltih ropui tak takte hian amah hmangaihna tûr leh fakna tûr chhan tam tak min pe a. Davida chu hetiang hian a zai a ni: “Aw LALPA ka Pathian, nangin thilmak i tihte leh, keimahni lam i ngaihtuahnate hi a tam êm êm mai a, chûng chu i hmâa tihlan sên rual a ni lo va; hriattîrin hril dâwn ila, chhiar sên rual a ni lo vang,” tiin. (Sâm 40:5) Davida chuan Jehova thilmak tih zawng zawng chu a chhiar sêng lo va, keini pawhin kan chhiar sêng hek lo. Mahse, Pathian thilmak tih engpawh, kan ngaihtuah tûra sawi chhuah a nih apiangin, amah chu i fak zêl ang u.
Pathian Chatuan Remruat Nêna Inkûngkaih Thiltihte
13. Kan beiseina chu Pathian thiltih ropui tak takte nên engtin nge a inzawm tlat?
13 Hma lam hun tâna kan beiseina chu Pathian chatuan remruat nêna inkûngkaih, a thiltih ropui tak tak leh fak tlâkte nên a inzawm tlat a ni. Eden-a helna awm hnuah, Jehova chuan beisei tûr hlîra khat hrilh lâwkna hmasa ber chu a sawi a. Rûl chungah rorêlna thu puangin Pathian chuan heti hian a sawi: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tiin. (Genesis 3:15) Khawvêl sual nuai botu Tuilêtah Nova leh a chhûngte chhanhima Jehova’n thil ropui tak a tih hnuah pawh, mihring rinawmte thinlungah thutiam hmeichhe Thlaha beiseina chu a la nung reng a. (2 Petera 2:5) Rinna nei Abrahama leh Davida ang te hnêna hrilhlâwkna thutiamte hian, chu chi Thlah hmanga Jehova’n a la hlen chhuah tûr chungchâng chu hriat thiamna min pêk belhchhah a ni.—Genesis 22:15-18; 2 Samuela 7:12.
14. Jehova’n mihringte tâna thil ropui tak tak a tihte zîngah eng nge ropui ber?
14 Jehova chu mihringte tâna thil ropui tak tak titu a nihzia lan chhuahna ropui ber chu a Fapa mal neih chhun—thutiam chi Thlah, Isua Krista —tlanna inthawi nâna a pêk ṭum khân a ni a. (Johana 3:16; Tirhkohte 2:29-36) Tlanna chuan Pathian nêna inrem leh theih nân nghahchhan a rawn siam a ni. (Matthaia 20:28; Rom 5:11) Jehova chuan amah nêna inrem hmasate chu C.E. 33, Pentikost nî-a din, Kristian kohhranah a hruai khâwm a. Anni chuan thlarau thianghlim ṭanpuinain chanchin ṭha chu zau takin an puang darhin, vân Pathian Ram awpna hnuaia mihring thuâwihten chatuan malsâwmna an dawn theihna tûra Isua thihna leh thawhlehnain kawng a hawn dân te an hriattîr a ni.
15. Kan hun laiin engtin nge Jehova’n mak takin thil a tih?
15 Kan hun lai hian, hriak thih Kristian hnuhnûngte la khâwm tûrin Jehova chuan mak takin thil a ti a. Krista nêna vâna rorêl tûr, 1,44,000 zînga a la bângte chhinchhiah zawh vekna tûr hun a awm theih nân, tihboralna thlîte chu chelh din an la ni rih a ni. (Thu Puan 7:1-4; 20:6) Pathian chuan hriak thih Kristiante chu “Babulon Khaw Ropui,” khawvêl pum sakhaw dik lo laka thlarau lam saltâng an nihna aṭangin a chhan chhuak a. (Thu Puan 17:1-5) Kum 1919-a chu chhan chhuahna leh, a hnuah pawh Pathian vênhimna an neih zui zêl avângin, hriak thih la bângte chuan eng nge an tih theih phah? “Hrehawm nasa tak” lo thleng thuai tûra Jehova’n Setana kalhmang suaksual a tihboral hmain thuhrilna hnuhnûng ber chu an neih theih phah a ni.—Matthaia 24:21; Daniela 12:3; Thu Puan 7:14.
16. Tûna khawvêl pum puia Ram thuhril hna thawh a nih avângin eng nge thleng mêk?
16 Jehova hriak thih Thuhretute chuan khawvêl pum puia Ram thuhril hnaah taima takin hma an hruai a. Chuvâng chuan, “berâm dang” tam tak chu Jehova betu an lo ni ta a ni. (Johana 10:16) Jehova kan faknaa min rawn zawm ve theih nân, leia mi thuhnuairawlhte tâna hun remchâng a la inhawng reng hi a lâwmawm tak zet a ni. “Lo kal rawh” tia sâwmna chhângtu apiangte chu hrehawm nasa taka chhan chhuah tûr zînga mi an ni ang a, chatuana Jehova fak chu an hma bâk a ni ang.—Thu Puan 22:17.
Biakna Dikah Mi Sâng Tam Tak An Lût Khâwm
17. (a) Kan thuhril hna nêna inzawmin Jehova’n engtin nge thil ropui takte a tih? (b) Zakaria 8:23 hi engtin nge a famkim mêk?
17 Kan thuhrilna nêna inzawmin Jehova chuan thil ropui leh fak tlâk tak tak tûnah hian a ti mêk a ni. (Marka 13:10) Tûn hnai kum maiah pawh ‘kawngka zau tak leh sâwt tak’ chu a hawng a. (1 Korinth 16:9) He mi avâng hian tûn hmaa thutak dodâltute’n kawng an dâl ṭhinna hmunahte pawh zau takin thu a hrilh theih tawh a ni. Thlarau lam thima awm ṭhîn tam takte pawhin tûnah chuan Jehova be tûra sâwmna chu an chhâng lêt ve ta a. He hrilh lâwkna thu hi an tifamkim mêk a ni: “Sipaihote LALPA chuan heti hian a ti a ni: Chûng nîahte chuan heti hi a la ni ang a, mi sâwm, hnam ze tinrêng aṭanga lo chhuakte chuan Juda mi pakhat fênfualah an vuanin an chelh ang a, in hnênah Pathian a awm tih kan hriat avângin in hnênah kan kal ve dâwn e, an ti ang, a ti a,” tih hi. (Zakaria 8:23, NW.) “ ‘Mi sâwmte’n in hnênah” an tihate hi thlarau lam Juda mi, tûn laia hriak thih Kristian la bângte an ni a. Sâwm hian lei lamah famkimna a entîr avângin “mi sâwm” hian “mipui tam tak” an entîr a, anni hi “Pathian Israelte” nên “pâwl khat” ni tûra hruai khâwm an ni. (Thu Puan 7:9, 10; Galatia 6:16) Mipui tam takin Pathian Jehova biaa rawng an bâwlho han hmuh chu a va hlimawm êm!
18, 19. Thuhril hna hi Jehova’n mal a sâwm tih finfiahna eng nge awm?
18 Miten chanchin ṭha an pawm thei ngai dâwn lo emaw tih tûr khawpa sakhaw dik lovin a awp beh rama mi sîng tam tak—nuai tam tak—te pawhin biakna dik tak an rawn pawm ve ta hian min tiphûr takzet a ni. Jehova Thuhretute Yearbook hman lai mêk han en la, Ram thuchhuahtu 1,00,000 ni ṭhîn, tûna 10,00,000 deuhthaw rawn ni chho ta ramte chhinchhiah ang che. Hei hi Ram thuhril hna Jehova’n mal a sâwm tih fiahna chiang tak a ni.—Thufingte 10:22.
19 Jehova mite kan nih angin, vâna kan Pa chu nuna thil tum tak tak min pêk avâng te, rawngbâwlna manhla tak min pêk avâng te, leh hmabâk hlimawm tak min pêk avâng tein kan fak a, lâwm thu kan hrilh a ni. Pathian thutiam zawng zawng thlen famkimna tûr chu nghâkhlel takin kan thlîr a, ‘chatuan nunna neihtîrna khawp chu nghâk chungin, Pathian hmangaihnaah chuan invawn ṭhat’ kan tum tlat a ni. (Juda 20, 21) Pathian faktu mipui tam takte 60,00,000 vêl an rawn tling chho ta hi kan va lâwm tak êm! Jehova malsâwmnain, hriak thih la bângte leh an ṭhian berâm dangte chu ram 235-ah kohhran 91,000 vêl an awm tawh a. “Bawi rinawm, fing tak” chuan chau lovin thlarau lamah ṭha takin min châwm vek a ni. (Matthaia 24:45) Theocratic pâwl chuan Jehova Thuhretute branch office 110 aṭangin Ram thuhril hna hi hmangaihna nên a enkawl a. ‘An suma amah chawimawi’ tûra Jehova’n a mite thinlung a chêttîr avângin kan lâwm a ni. (Thufingte 3:9, 10) He mi avâng hian, khawvêl pum puia kan thuhril hna chu a la inchhunzawm zêl thei a, khâwl chhutna hmanrua te neiin, Bethel leh missionary home te, Kingdom Hall te, leh Assembly Hall te pawh mamawh dân azir zêlin sak belh a ni bawk.
20. Jehova thiltih ropui leh fak tlâk tak takte kan chhûtna chuan eng angin nge min nghawng ang?
20 Vâna kan Pa thiltih ropui leh fak tlâk tak takte chu kan tân sawi vek sên rual a ni lo. Mahse, thinlung dik pu tawh phawt chu, Jehova faktu mipuite zâwm lovin an awm thei dâwn em ni? Thei hauh lo vang! Chuvângin, Pathian hmangaihtu zawng zawng chu hlim takin heti hian au chhuak rawh se: “LALPA chu fak rawh u. Vân aṭangte khian LALPA chu fak ula: Chung lamahte khian amah chu fak rawh u. A vântirhkoh zawng zawngte u, amah chu fak ula: . . . Nula leh tlangvâlte, putar leh naupangte u, LALPA chu fak rawh u: Chûngho chuan LALPA hming chu fak rawh se; a hming chauh chu chawi sânin a awm si a: A ropuina chuan lei leh vân a khûm daih a,” tiin. (Sâm 148:1, 2, 12, 13) Ni e, tûnah leh chatuanin, a thiltih ropui takte avângin Jehova chu i fak ang u! (w01 5/15)
Engtin Nge I Chhân Ang?
• Jehova thiltih fak tlâk tak tak ṭhenkhat chu engte nge ni?
• Engvângin nge Jehova fak lo thei lo nia i inhriat?
• Kan beiseina leh Jehova thiltih ropui tak takte chu engtin nge an inzawm?
• Ram thuhril hna nêna inzawmin Jehova’n engtin nge fak tlâk taka thil a tih?
[Zirlai Atâna Zawhnate]
[Phêk 20-naa milem]
Jehova fakna hla sak chu thinlung zawng zawngin i zâwm ve em?