Jehova Rawngbâwlnaah Lâwm Reng Rawh
Jehova Rawngbâwlnaah Lâwm Reng Rawh
“Lalpaah chuan lâwm fo rawh u: ka ti leh pek ṭhîn ang, lâwm rawh u.”—PHILIPPI 4:4.
1, 2. Engtin nge unaupa pakhat leh a chhûngte chuan an neih zawng zawng an chân vek chung pawhin lâwmna an neih reng theih?
KRISTIAN pakhat kum 70-a upa, James-a Sierra Leone-a chêng chu a thawk rim êm êm reng mai a. A tâwp a tâwpa pindan pali nei room nuam tak man a khâwl daih tâk hnua a lâwm dân tûr chu han ngaihtuah teh. Mahsela, James-a a chhûngte’n chu in an luah hnu hun engemawti lekah chuan chu ramah chuan tualchhûng buaina a chhuak ta hlauh mai a, an in zawng zawng mai chu tihchhiat a ni ta vek mai a ni. An in an hlauh nâ a, an lâwmna erawh an hlauh chuang lo. Engvâng nge?
2 James-a leh a chhûngte chuan an thil hlauhvah ni lo, a chhe bângahte chuan an rilru an pe zâwk a. Amah James-a ngeiin heti hian a sawi: “Hun râpthlâk tak kan tawrh chhûng pawhin kan inkhâwm a, Bible kan chhiar a, kan ṭawngṭaihova, kan thil neih chhe têtête chu mi dangte kan sem ve ṭhîn. Jehova nêna inlaichînna ropui tak kan neihah chuan kan rilru kan nghah tlat avângin kan lâwm reng thei a ni,” a ti. An malsâwmna dawnte—chûng zînga ropui ber Jehova nêna mi mal inlaichînna hnai tak neih—chu ngaihtuahin, hêng Kristian mi rinawmte hi “lâwm takin” an awm thei a ni. (2 Korinth 13:11) An dinhmun lungchhiat thlâk tak tawrh chhuah chu a awlai lo ngei mai. Mahse, Jehovaa an lâwmna chu a reh chuang lo.
3. Hmân lai Kristian ṭhenkhahte kha engtin nge an lâwm reng theih?
3 Kristian hmasate chuan James-a leh a chhûngte tawh ang fiahnate an tâwk a. Chutichung pawh chuan, tihrkoh Paula chuan: “[In] sum lâksakte pawh lâwm takin in lo tuar ta bawk si a,” tiin Hebrai Kristiante hnênah a ziak a. (Hebrai 10:34) Chu mi hnuah Paula chuan Hebrai Kristiante lâwmna chhan bul ber chu hetiang hian a sawifiah leh a ni. “Sum ṭha zâwk, awm hlen bawk tûr chu mahniin in nei tih hriain,” tiin. Ni e, chûng kum zabi pakhatnaa Kristiante chuan beiseina nasa tak an nei a. Thil engemaw lak bo ve theih loh, Pathian van lam Lalrama “nunna lallukhum” vuai thei lo chu ngaih ngam takin an nghâk a ni. (Thu Puan 2:10) Tûn laiah pawh, kan Kristian beiseina—vân lam beiseina emaw, lei lam beiseina emaw—chuan dodâlna kan tawh pawha lâwm reng thei tûrin min ṭanpui thei a ni.
“Beiseina Kawngah Chuan Lâwm Ula”
4, 5. (a) Engvângin nge “beiseina kawngah chuan lâwm” tûra Paula fuihna chu Rom mite tân a hun taka fuihna nih? (b) Engin nge Kristiante chu he beiseina hi theihnghilhtîr thei?
4 Tirhkoh Paula chuan a Rome khuaa a rinpuite chu “beiseina kawngah chuan lâwm” tûrin a fuih a. (Rom 12:12) Chu chu Rom mite tân chuan a hun taka fuihna a ni. Paula’n anmahni lehkha a thawn hnu kum sâwm pawh tling lovah chuan tihduhdahna râpthlâk tak an tuar a; ṭhenkhat phei chu Lal Nero thupêk anga nghaisak hlum hial an ni. Pathianin nunna lallukhum chuai thei lo a pêk tûr thutiam an rinna chuan an hrehawm lai ber pawhin anmahni chu a chhawmdâwl tih a chiang hle a ni. Keini hi eng nge kan an ve le?
5 Keini pawh Kristian kan ni a, tihduhdahna kan beisei ve a ni. (2 Timothea 3:12) Chubâkah, “hun leh khawrêl” chu kan zaa chungah a thleng ṭhei tih kan hre bawk. (Thuhriltu 9:11) Chêtsualna chuan kan mi hmangaih tak nun a la thei a. Tin, natnate chuan nu leh pate emaw, kan ṭhian hnaite an tihlum thei bawk. Chuvângin, Lalram beiseina nghet tak kan neih loh chuan, chutiang fiahnate chu a lo thlen hunah kan thlarau lam nun a hlauhthâwnawm thei a ni. ‘ “Beiseina kawngah chuan ka lâwm” em? Chu beiseina chu engtia zingin nge ka chhût ṭhin? Paradis lo la awm tûr chu ka tân a tak tak zet em? Chuta awm angah chuan ka inchhût em? Thutak ka zir ṭan tirha he khawvêl kalhmangte tâwpna lo thleng tûr chungchâng ka phûr ang khân ka la phur reng em?’ tihte hi kan inzâwt tûr a ni. He zawhna tâwp ber hi a pawimawh êm êm mai. Engvâng nge? A chhan chu hrisêlna ṭha kan neih a, nuam taka kan khawsak a, indona te, ṭâm tlâkna te, leh leilung chhiatnte’n a khawih buai ve vak lohna hmuna chêng kan nih chuan, Pathian khawvêl thar lo thlen a nghahhlehawm êm êmna chhan ber kan theihnghil thei tlat atin ni.
6. (a) Paula leh Silate’n hrehawm an tawrh lai khân, engah nge an ngaihtuahna an dah? (b) Paula leh Sila te entawn tûr siam chu engtin nge tûn laiah min fuihtu a nih theih?
6 Paula chuan Rom mite chu “hrehawm tuarna kawnga chhel” tûrin a fuih bawk a. (Rom 12:12) Paula chu tihduhdahna la tuar ngai lo a ni hauh lo. Ṭum khat chu Jehova chungchâng mite zirtîr tûra ‘Makedonia rama lo kai’ kai tûra sâwmtu mi pakhat hi inlârnaah a hmu a. (Tirhkohte 16:9) Chu veleh Paula, Luka, Sila, leh Timothea te chu Europe ramah chuan lawngin an zin ta nghâl vat a ni. Chûng missionary ṭhahnemngai takte chu engin nge lo hmuak le? Tiduhdahna-in maw le! Makedonia khawpui Philippi-a thu an hrih zawhah Paula leh sila chu nasa taka vuak a, lung ina khung an ni ta a ni. Chiang takin, Philippi khua leh tui ṭhenkhatte chuan Lalram thuchah chu an duh lo mai ni lovin, an dodâl nasa êm êm a ni. Hêng thilte hian missionary ṭhahnemngai takte lâwmna chu a hlohtîr em? Teuh lo mai. Vuak leh lung ina khung an nih hnuah, “zan laiah Paula leh Sila chuan Pathian hnênah an ṭawngṭai a, hla an sa a [Pathian an fak a, Nw.].” (Tirhkohte 16:25, 26) Vuakna te avânga natna chuan paula leh Sila chu lâwmna a thlen hauh lo; mahse, chu chu hêng missionary pahnihte ngaihtuah a ni lo. An ngaihtuahna chu Jehova leh a malsâwm tûr kawngah chauh an dah a ni. Lâwm taka ‘hrehawm tuarin,’ Paula leh Sila chuan philippi leh hmun danga an unaute tân entawn tûr ṭha tak an siam a ni.
7. Engvângin nge kan ṭawngṭainaah lâwmthu sawina kan telh ang?
7 Paula chuan: “Ṭawngṭaina kawngah chuan ṭawngṭai fan fan ula,” tiin a ziak bawk a. (Rom 12:12) Thil lungkham i neih chângte’n i ṭawngṭai ṭhîn em? Eng chungchângah nge i ṭawngṭai ṭhin? I harsatnate sawi chhuakin Jehova ṭanpuina i dîl ṭhin ngei a rinawm. Chu mai bâkah, malsâwmna i dawn zawng zawngte avânga i lâwm thu pawh i telh thei asin. Harsatna te a lo thlen hunin, keimahni min dâwr dân chungchânga Jehova ṭhatzia ngaihtuahna chuan “beiseina kawngah chuan lâwm” tûrin min ṭanpui thei a ni. Buaina tinrêngin a tlâkbuak reng mai Davida chuan heti hian a ziak a: “Aw LALPA ka Pathian, nangin thilmak i tihte leh, keimahni lam i ngaihtuahnate hi a tam êm êm mai a, chûng chu i hmâa tihlân sên rual a ni lo va; hriattîrin hril dâwn ila, chhiar sên rual a ni lo vang,” tiin. (Sâm 40:5) Keini pawh Davida ang bawka Jehova malsâwmna kan dawnte kan ngaihtuah reng chuan, kan lâwm lo thei lo vang.
A Ṭha Zâwng Rilru Puthmang Nei Rawh
8. Tihduhdahna a tawh hun pawha lâwm reng tûrin Kristian chu engin nge ṭanpui?
8 Isua chuan a zirtîrte chu fiahna chi hrang hrang an tawh hunah a ṭha zâwnga rilru puthmang nei tûrin a fuih a. Hetiang hian a sawi: “Miin keimah avânga an hau che u a, dâwta sual tinrênga an hêk hunah che u, in eng a la thâwl a ng,” tiin. (Matthaia 5:11) lâwmna tûr chhan eng nge kan neih le? Dodâlna kan tawnte laka ding nghet thei tûra kan theihna chu Pathian thlarau kan chungah a awm a ni tih hriatchianna a ni. Tirhkoh Petera chuan a hun laia a Kristian puite hnênah: “Krista hming avânga hau in nih chuan ineng a thâwl e; Thlarau ropui tak, Pathian Thlarau chu in chungah a awm si a,” a ti a. (1 Petera 4:13, 14) Tin, lâwm reng thei tûra chhel tûrin Jehova chuan a thlarau thianglâwm hmangin min ṭanpui bawk a ni.
9. An rinna avânga lung ina khung an nih lai pawha lâwm reng tûrin unau ṭhenkhatte chu engin nge ṭanpui?
9 Dinhmun râpthlâk tâwpkhâwkah pawh lâwmna tûr chhan kan hmu thei tho a ni. Kristian pakhat Adolf chuan chutiang chu a tawng a. Ani chu Jehova Thuhretute hna hun rei tak chhûng an khapna hmunah a chêng a. Adolf-a leh a ṭhiante chu an Bible ṭanchhan rinna chu bânsan duh loh avângin man an ni a, hun rei tak chhûng lung ina tâng tûra tih an ni. Lung ina nun chu thil hahthlâk tak a ni; mahse, Paula leh sila te angin, Adolf-a leh a ṭhiante chuan Pathian hnêna lâwmthu sawina tûr chhan an nei tho a ni. An lung in tânna chuan an rinna a tichakin, Kristian nungchang hlu tak, thil phalna te, mite khawngaihna te, leh unau inngainatnate an neih zual phah tih anni chuan an sawi. Entîr nân, lung in tâng chuan in lam aṭanga thil fun a dawn rêng rêngin, a chhûnga thil awmte chu a rinpuite a sem ve zêl ṭhîn a; tin, hêng châwmnate hi “thilpêk ṭha leh thilpêk famkim zawng zawng” lo chhuahna hnâr Jehova hnên aṭanga lo kal angin a ngai a ni. Chutiang zahngaihna chuan a petu leh a dawngtute lâwmna a thlen a ni. Tichuan, an rinna tihbosak tuma lung ina an dahna chuan thlarau lamah a tichak sauh ta zâwk a nih chu!—Jakoba 1:17; Tirhkohte 20:35.
10, 11. Entin nge unaunu pakhat chuan zawhna tam tak zawh luih leh hun rei tak chhûng lung in tânna chu a hma chhawn?
10 Lalram hna hun rei tak chhûng khapna hmuna chêng bawk Ella-i pawh hi a Kristian beiseina mi dangte a hrilh avângin man a ni a. Thla riat chhûng chu zawhna nasa taka zawh a ni a. A tâwpa thubuai sawinaa hruai a nih chuan, Jehova betute pakhat mah awm lohna hmun, lung ina kum 10 chhûng tâng tûra tih a ni ta a ni. Chutih lai chuan Ella-i chu kum 24 chauh a la ni.
11 Ella-i chuan a ṭhat lai hun tam zâwklung ina hman zawh chu a châk hauh lo. Mahse, a dinhmun chu a tihdanglam theih si loh a vângin, a thil thlîr dân chu tihdanglam a tum ta a. Tichuan, lungin chu a thuhrilhna bial angah a thlîr ṭan ta a ni. “Thu hrilh tûr a tam êm êm a, kum khat chu rei lo têah a ral thuai mai,” a ti. Kum nga aia tam a liam chuan, Ella-i chu zawhna zawh leh a ni a. Lung ina a tânna chuan a rinna a tikiam lo tih an hriat chuan thu zâwttute chuan: “I la inthlâkdanglam chuan loh avângin kan chhuah thei lo che,” an ti a. “Ka inthlâk danglam asin!” tih chu Ella-i chhânna a ni. “Lung ina ka luh tirh aiin tûnah chuan rilru puthmang ṭha zâwk ka nei tawh a, ka rinna pawh tûn hma zawng aiin a chak tawh zâwk daih asin! Min chhuah duh lo a nih chuan, Jehova’n ka chhuah hun a tih thleng ka nghâk mai ang,” tiin a sawi belh a. Kum nga leh a chanve chhûng hremna chuan Ella-i lâwmna chu a tibo chuang lo! Eng dinhmun pawh tawng se, lungawi a zir zâwk a ni. He a entawn tûr siam aṭang hian engemaw zir tûr i hria em?—Hebrai 13:5.
12. Kristianin dinhmun harsatna a tawn huanah engin nge rilru thlamuanna thlen thei?
12 Chutiang chonate hmachhawntîr theitu thilpêk dang lam tak Ella-i chuan a nei a nih ring hauh suh. Amah hremna tûr a hriat hmaa thla riat chhûnga zawhna tam tak an zawh lui chhûng sawiin, Ella-i chuan: “Ka kha inkhâwng dawt dawtte kha ka la theihnghilh thei lo, sava tetak tê râlṭi êm êm hi ka inchan ber mai,” a ti. Nimahsela, Ella-i chuan Jehova rinna nghet tak a nei a. Amaha innghah a zir a ni. (Thufingte 3:5-7) Chu chuan Pathian chu tûn hma zawng aiin a tân a taktîr ta zâwk a ni. Heti hian a sawi: “Zawhna zawhna room-ka luh apiangin thlamuanna ka chungah lo thleng ṭhînin ka hria . . . ka dinhmun chu a hlauhawm poh leh thlamuanna chu a nasa mai a ni,” tiin. Chu thlamuanna hnâr chu Jehova a ni. Tirhkoh Paula chuan tihian a sawifiah a: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.”—Philippi 4:6, 7.
13. Tihduhdahna kan tawn hunin, chhel tûrin chakna kan nei ang tih engin nge min tiam?
13 Tûna chhuah ni ta Ella-i chuan harsatna kârah pawh a lâwmna chu a vawng reng a. Chu chu ama chakna ni lovin, Jehova pêk chaknaa a tih a ni. Hei hi tirhkoh Paula chungah pawh a thleng dik chiah a, hetiang hian a ziak: “Chutichuan, Krista thiltihtheihna chu ka chunga a awm theih nân lâwm êm êmin ka chaklohnate hi ka chhuang tawh zâwk ang . . . ka chak loh apiangin a ni ka chak ṭhin ni,” tiin.—2 Korinth 12:9, 10.
14. Kristianin fiahna dinhmun a ṭha zâwnga a thlîr theih dân leh chu mi rah chhuah theihte sawi fiah rawh
14 Tûn laia nêksâwrna i tawhte chu tûna kan hriat tâkte nên chuan a inang kher lo vang a. Mahse, eng ang hmanrua pawh ni se, nêksâwrnate do chu a harsa hrim hrim a ni. Entîr nân, i hna thawhna pa chu i hna thawh dânaah a phunchiar hle mai thei a—i sakhaw biak ang be ve lo hna thawk dangte aia nasa daihin i lakah chuan a phunchiar mai thei. Mahse, hna dang han zawn chu i tân thil tih theih a ni si lo va. Engtin nge i lâwm reng theih tâk ang le? Adolf-a leh a ṭhiante, an lungin tânnain mize pawimawh tak tak nei tûra a zirtîrte kha han ngaihtuahkîr leh la. I inhlawhna chu tihlungawi i tum tak zet chuan—mi “tihlâwm harsa tak” pawh ni mah se—chutiang Kristian mize chhelna leh dawhtheihnate chu i chher rêng rêng dâwn a ni. (1 Petera 2:18) Chu mai bâkah, hnathawhtu hlu tak pawh i lo ni mai thei a, chu chu engtik ni emawa hna ṭha zâwk hmuhtîrtuah che a ṭang thei bawk a ni. Tûnah chuan Jehova rawngbâwlnaa kan lâwm reng theih dân kawng ṭhenkhat dang i lo sawiho leh ang u.
Nun Tihtluang Mâwlin Lâwmna A Thlen
15-17. Engtin nge nupa tuak khatin an rilru hahna chu a zavaiin bo vek thei lo mah se, chu mi ata chu an zalên thei tih an zir?
15 I hna thawh duh zâwng leh thawhna hmun tûr chungchângah duh thlan tûr i nei lo pawh a ni thei e. Mahse, i nun dân kawng danga i inthunun theih dân dang a awm thei asin. A hnuaia thiltawnte hi ngaihtuah teh.
16 Kristian nupa tuak khat hian upa pakhat chu an ina chaw ei tûrin an sâwm a. An chaw ei lai chuan unaupa leh a nupui chuan tûn lai hnaia an khawsak a buaithlâkzia thu an hrilh ta a. An hna thawh chuan hun leh tha a heh êm êm a; mahse, hna dang zawng thei dinhmunah an ding si lo. Eng chen nge maw an tlin dâwn tih ngaihtuahin an buai hle a ni.
17 Upa hnêna thurâwn an dîl chuan ani chuan: “In nun titluangmâwl rawh u,” tiin a chhâng. Engtin maw? Chu mite nupa chuan an hna aṭanga in hlen nân chuan nî tin dârkâr thum an hmang ral ziah a. Anmahni hre chiang êm êmtu upa chuan, an hnathawhna hmun kal nâna an hun hman an tihtlêm deuh theih nâna an inluah chu sawn hnai tûrin a râwn a. Tichuan, chûng an hun khâwlte chu thil pawimawh dang tih nân—a nih loh leh chawlh nân ringawt pawh an hmang thei dâwn a ni. In khawsak dânin i lâwmna a tihbo dâwn chuan, engvângin nge a pumpelh nân insiamrem theih thil a awm leh awm loh i ngaihtuah lohvang ni?
18. Engvângin nge thu tlûkna siam hmain ngun taka ngaihtuah hmasak a pawimawh?
18 Nêkna tihkiam dân dang leh chu thu tlûkna siam hmaa ngun taka ngaihtuah a ni. Entîr nân, Kristian pakhat chuan in sak a rilrûk a. Tûn hmaa in la sa ngai hauh si lo khân, a sak dân khir tak mai a thlang mauh mai a. Tûnah chuan a in atâna a sak dân tûr a ruahmante kha ngun takin lo ngaihtuah lâwk se chuan a ṭûl lova a sên tam tamtakte hi a pumpelh thei dâwn tih a hmu chuak a ni. (Thufingte 14:15) Kristian dang pakhat leh chuan a rinpuiin loan a pûk chungchânga mawh phurhpui a remti a. An inremnaah chuan, a pûktuin a rulh theih loh chuan, mawhphurh inhuamtu chuan a rulh a ngai a ni. Atîrah chuan harsatna engmah a awm lo. Hun a lo kal zêl chuan pawisa pûktu chuan a thutiam chu a hlen thei ta lo va. A pûktîrtu chuan a pawisa pûktîr zawng zawng chu pe tûrin a rawn tur ta si a. Chu chuan mawh phurhpui inhuamtu chung chu a tirit ta riau mai a ni. Pawisa bat chungchânga mawh phurhpui a inhuamna chu a pawm hmain engkim ngun takin ngaihtuah vek ta se, chûngte chu pumpelh theih a ni ang em?—Thufingte 17:18.
19. Kan nuna rilru hahnate tih tlêm dân kawng ṭhenkhat chu engte nge ni?
19 Kan hah chângte’n mimal Bible zirna te, thlawhhma rawngbâwlna te, leh inkhâwm te neih lovin kan chunga nêksâwrna awmte chu kan titlêm thei tih i ring ngai lo vang u. Hêngte hi lâwmna thlentu, Jehova thlarau thianghlim kan dawn theihna kawng pawimawh takte an ni si a. (Galatia 5:22) Kristian thiltih rêng rêng chuan min tiharh a, a ninawm lutuk ngai lo tlângpui a ni. (Matthaia 11:28-30) Thlarau lam thil ni lo, pawn lam emaw, intihhlimna thiltihte emaw hian min tichau zâwk ṭhîn tlângpui a ni. A âwm tâwk huna mut hian min ṭanpui thei bawk. Tam tâwk tak chawlh hahdam hi a ṭangkai êm êm a. N.H. Knorr, a thih thlenga Jehova Thuhretute Governing Body membera ṭang chuan hetiang hian missionary te a hrilh ṭhîn: “In lunghnual deuh chânga in tih tûr hmasa ber chu chawlh hahdam hlek a ni. Tui taka i muhil i han ṭhangharh nâk chuan i beisei loh tak mai i tawng mai ang!” tiin.
20. (a) Kan lâwm reng theih dân kawng ṭhenkhatte sawi rawh. (b) Lâwmna tûr chhan engte nge i ngaihtuah theih? (Phêk 17-naa box en rawh.)
20 Kristiante chuan “Pathian hlim” rawng bâwlna hun chanvo hlu tak an nei a. (1 Timothea 1:11, NW.) Kan hmuh tawh ang khân, harsatna nasa tak avânga kan lungngaih êm êm lai ngei pawhin kan lâwm reng thei a ni. Lalram beiseina chu kan hmaah dah tlat ila, a ṭûl hunah chuan kan thil thlîr dânte pawh thlâk thlengin, kan nun i vawng tluangmawl ang u. Tichuan, eng dinhmunah pawh ding mah ila, Paula thusawi: “Lalpaah chuan lâwm rawh u: ka ti leh pêk ṭhîn ang, lâwm rawh u,” a tih ang hian kan awm thei dâwn a ni.—Philippi 4:4 (w01 5/1)
Hêng Zawhnate Hi Ngun Takin Ngaihtuah Teh:
• Engvângin nge Kristiante chuan Lalram beiseina chu an tinzâwn ngar ngar ang?
• Dinhmun harsa takah pawh lâwm reng tûrin engin nge min ṭanpui thei?
• Engvângin nge kan khawsaktih tluangmâwl kan tum ang?
• Eng kawngin nge ṭhenkhatin an khawsak an tihtluang mâwl?
[Zirlai Atâna Zawhnate]
[Phêk 17-naa bâwm/milem]
Lâwmna Tûr Chhan Dangte
Kristian kan nih angin, lâwmna tûr chhan tam tak kan nei a. Hêng a hnuaia mite hi ngaihtuah teh:
1. Jehova kan hria hi.
2. Pathian thu thutak kan hria hi.
3. Isua inthawina kan rinna avânginkan
sualte ngaihdam theih a ni hi.
4. Pathian Lalramin a awp mêk
—khawvêl thar a lo thleng thuai dâwn!
5. Jehova chuan thlarau lam paradise-ah
min hruai.
6. Kristian inkawmhona ṭha tak kan nei hi.
7. Thuhril rawngbâwlnaa telna chanvo
kan nei.
8. Kan nung a, chakna ṭha tâwk kan nei.
lâwmna tûr chhan dang point engzât nge i la sawi theih?
[Phêk 13-naa milem]
Paula leh Sila chu tân inah pawh an lâwm reng