Kawppui Tûr Thlan Kawnga Pathian Kaihhruaina

“Fing taka awmtîr chein i kalna tûr kawng chu ka entîr ang chia: Ka mita en reng chung chein rem ka ruatsak zêl ang che.”​—⁠SAM 32:⁠8.

1. Inneihna tihlawhtling tûrin eng thilte nge ngai?

HRUI ZAWH THIAM pakhat, hrui inthên laia ding chu a han kûn a, boruakah chuan thiam takin a rawn inbingbilet phei a. Rang taka a taksa chu tichar lehin a bân pahnih a phar chhuak a, amah ep chiah hruizêna a letlinga lo uai, hrui zawh bawk pakhat chuan a bân phar chhuah chu nghet takin a lo vuan chat mai a ni. Vûr chunga skate-a lâm ṭhîn tuak khat pawh vûr siam chawp hmun zau takah chuan an tawlh dûn zar zar a. Thâwklehkhatah, a mipa zâwk chuan a kawppuinu chu a chawikâng thut a, boruakah a vawrh ta mai a. Ani chu a vir chai chai a, skate khingkhat chauhva rawn ṭum thlain, a kawppuipa nên chuan an lâm zawm leh ta a ni. Hêng thiltih pahnihte hi tha thawh vak ngai âwm pawhin an lang lo. Mahse, zir chhin miah lo leh, kawppui  thiam tak tel lo leh, a bîkin kaihhruaina dik tak awm lo phei chuan, tuin nge a tih pawh tichhin ngam ang ni? Chutiang bawkin, inneihna ṭha tak pawh hi lo awm ve mai niin a lang mai thei a. Amaherawhchu, hei pawh hi kawppui ṭha tak leh, ṭanrualna leh, a bîk takin thurâwn fing takah te a innghat a ni. Kaihhruaina dik chu a pawimawh tak meuh meuh a ni.

2. (a) Inneihna hi tu din nge ni a, eng atân nge? (b) Eng angin nge Inneihna ṭhenkhatte chu ruahman a nih?

² Nula tlangvâl tân chuan kawppui tûr ngaihtuah chu thil nihphung pângngai a ni a. Pathian Jehova’n bul a ṭan aṭang rêngin, mipa leh hmeichhia inneih chu nunphung pângngai a la ni ta zêl a ni. Mahsela mihring hmasa ber Adama nupui chu ama thlan a ni lo va, Jehova’n a duhsak avânga a pêk a ni zâwk. (Genesis 2:​18-24) Nupa hmasa berte chu chi thlah pung a, lei pum pui hi tikhat tûr an ni. Anmahni hnu aṭang chuan inneihna chu mopa leh monu nu leh pate ruahmanna a ni deuh ber a, a châng chuan mopa leh monu tûr remtihna an lâk diam hnuah chauh an ruahman bawk ṭhîn. (Genesis 21:21; 24:​2-4, 58; 38:6; Josua 15:​16, 17) Ram ṭhenkhatah chuan nupui pasal tûr nu leh pate ruat chu tih dân phung la ni tho mah se, tûn laia mi tam takte chuan an kawppui tûrte chu anmahniin an thlang tawh a ni.

3. Kawppui tûr hi engtia thlan tûr nge?

³ Kawppui tûr hi eng tianga thlan tûr nge ni ang le? Ṭhenkhat chuan pawn lam lan dâna an mit la zâwng leh duh zâwng an en ṭhîn a. Ṭhenkhat dang leh chuan nuam taka an khawsak theihna, an mamawh leh duhzâwng apiang pe thei leh nuamsa taka siam thei mi an zawng bawk. A nih leh hêng ringawtte hian inlaichînna ṭha leh hlimawm a thlen thei em? Thufingte 31:30 chuan: “Duhsakna hi bumna a ni a, hmêl ṭhatna hi engmah lo mai a ni. LALPA ṭihtu hmeichhia erawh chu fak a ni ang,” a ti. He mi thuah hian thil pawimawh tak mai a awm: Kawppui thlan hunah Jehova râwn tûr tih chu.

Pathian Hnên Ata Hmangaih Taka Kaihhruaina

4. Kawppui tûr thlan kawngah eng ṭanpuina nge Pathianin a siam?

⁴ Hmangaihnaa khat vâna kan pa Jehova chuan kawng engkima min kaihruai tûrin a Thu min pe a. Heti hian a ti: “Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u ka ni.” (Isaia 48:17) Chuvângin, kawppui tûr thlan chungchânga kaihruaina rin tlâk hmuh chu thil mak a ni lo ve. Jehova chuan inneihna chu tluantling leh hlimawm tûrin a duh a. Chuvângin, chûng kaihhruainate hriatthiam nân leh a taka kan hman thiam nân chuan ṭanpuina min pe bawk a ni. Chu chu hmangaihnaa khat min Siamtu laka kan beisei chu a ni rêng lo vem ni?​—⁠Sâm 19:⁠8.

5. Inneihna hlimawm kumhlun siam tûrin eng nge pawimawh?

⁵ Jehova’n inneihna a ruahman khân, kumkhaw daih tûrin a ti a. (Marka 10:​6-​12; 1 Korinth 7:​10, 11) Chuvângin a ni ‘inngaihna’ vâng a nih chauh loh chuan ‘inmâk hi a huat’ ni. (Malakia 2:​13-​16; Matthaia 19:⁠9) Chuvângin, kawppui tûr thlan hi thil pawimawh berte zînga mi, ngaihzam mai mai theih loh a ni. Kawppui thlanna tluka hlimna emaw, lungngaihna emaw thlen thei thu tlûkna dang a tlêm hle. Thlan fuh chuan mi nun nuam taka a siam laiin, thlan fuh loh erawh chuan lungngaihna mai a thlen thei a ni. Inneihna chu inngeih dial dialna leh inpumkhatnaa ṭhang zêl a, dam chhûng kawppui ni tûra Pathian duan a nih avângin, hlim taka awm reng thei tûr chuan kawppui tûr thlan thiam leh rilru hminna tak tak neih a ngai a ni.​—⁠Matthaia 19:⁠6.

6. Engvângin nge tleirâwlte hi kawppui tûr thlan kawngah an fîmkhur zual a ngaih a, engtin nge thu tlûkna fing ber an siam theih ang?

⁶ Tisa châkna leh hmêl duhawmnain an thu tlûkna thunun lo tûrin ṭhalaite chu an fîmkhur zual tûr a ni a. Pawn lam lan dâna innghat inlaichînna chuan inhmusitna emaw, inhuatna hial pawh a hring thuai thei ṭhîn. (2 Samuela 13:15) Kawng lehlamah chuan hmangaihna tluan tling chu kan kawppuite leh keimahni ngei pawh inhriatchian lehzualna aṭangin a awm thei a. Tin, atîra kan duhthusâm chu kan tâna ṭha ber a ni kher lo thei tih pawh kan hriat a pawimawh bawk a ni. (Jeremia 17:⁠9) Chûngte avâng chuan a ni Bible-a Pathian kaihhruaina awmte hi a pawimawh tâk êm êm ni. Chu chuan damchhûnga thutlûkna fing ber siam tûrin min ṭanpui ṭhîn. Fakna hla phuahtu chuan Jehova ai awhin ti hian a sawi a:  “Fing taka awmtîr chein i kalna tûr kawng chu ka entîr ang chia: ka mita en reng chung chein rem ka ruatsak zêl ang che,” tiin. (Sâm 32:8; Hebrai 4:​12) Inneihna chuan kan pian tirh phat ata kan thlâkhlelh hmangaihna leh ṭhian ṭha neih duhna chu a phuhrûk laiin, puitlinna leh hriatthiamna mamawh harsatna eng enge maw pawh a awmtîr bawk a ni.

7. Engvângin nge mi ṭhenkhatin kawppui tûr thlan chungchângah Bible ṭanchhan fuihnate an pawm duh loh?

⁷ Kawppui thlan kawngah chuan inneihna bul tumtu thusawi ngaihven chu a finthlâk hle. Kan nu leh pate’n emaw, Kristian upate’n emaw Bible ṭanchhan thurâwn min pêk chângin pawm harsa kan ti mai thei a. Min hrethiam lo nite pawhin kan ngai mai thei a; tin, kan châkna nasa tak chuan thinlung duh zâwng chu zui tûrin min tur lui tlat thei bawk a ni. Mahsela, a taka kan tawn meuh chuan kan ṭhatna tûra thurâwn kan dawnte kan ngaithla duh lo chu kan inchhir mai ang. (Thufingte 23:19; 28:26) Hmangaihna awm lo inneihna mai bâkah fa enkawl chungchângah harsatna kan tâwk zui thei a, kan kawppui chu ring lo mi a la ni zui pawh a ni thei. Hlimna nasa tak thlentu tûr inneihna chu lungngaihna hnâra a chan mai chuan a va lungchhiat thlâk dâwn êm!

Pathian Ngaihsakna​—⁠Thil Pawimawh Ber

8. Inneihna tlo tûr leh hlimna thlen tûrin engtin nge Pathian ngaihsaknain a ṭanpui theih?

⁸ Rinhlelh rual lovin, inhîptawnna chuan inneihna tinghet tûrin a ṭanpui a. Mahse, inneihna chu hlimawma siam tûr leh chhel tûr chuan duhzâwng inan a pawimawh zâwk a ni. Pathian Jehova ngaihsak ve vena chuan chatuan daih inzawmna a siam a; tin, thil dangin a siam ve theih loh inremna a awmtîr a ni. (Thuhriltu 4:12) Kristian nupa chu Jehova biakna dika an innghah tlat chuan, thlarau lamah te, rilru lamah te leh chêt dânah an inlungrual a. Pathian thu an zir dûn a. An ṭawngṭai dûn a, chu chuan an thinlung a tipumkhat ta ṭhîn a ni. Kristian inkhâwmnaahte an inthurual a, thlawhhma rawngbâwlnaah pawh an thawk dûn zêl ṭhîn. Chûng zawng zawngte chuan thlarau lamah a thlung khâwm a, nupate chu a inhnaihtîr sauh ṭhîn a ni. Chu ai maha la pawimawh Jehova malsâwmna an dawng a ni.

9. Isaaka tâna nupui tûr zawn kawngah Abrahama’n eng nge a tih a, eng nge a rah chhuah?

 ⁹ He Pathian ngaihsakna hi a neih avângin, mi rinawm Abrahama chuan a fapa tâna nupui tûr a thlan sak hun a lo thlen chuan Pathian lâwmzâwng a zawng a. A chhiahhlawh, a neih zawng zawng chunga thuneitu hnênah chuan: “LALPA vân Pathian leh lei Pathian chu chhâlin, ka awmna Kanaan-ho nula zînga mi hi ka fapa nupuia neihsak lo tûrin chhia ka chhamtîr dâwn che a ni: kan ram lamah, ka laichînte hnêna kalin ka fapa Isaaka nupu i neihsak zâwk tûr a ni . . . [Jehova] ngeiin a vântirhkoh chu i hmaah a kaltîr ang a, chuta ṭang chuan ka fapa hi nupui i rawn neihsak dâwn nia,” a ti a. Tichuan Rebeki chu Isaaka hmangaih êm êm, nupui ṭha chung chuang nih a tling ta a ni.​—⁠Genesis 24:​3, 4, 7, 14-21, 67.

10. Nupui leh pasalte tân eng Bible thute nge zawm tûr awm?

¹⁰ Kristian nupui pasal la nei lo kan nih chuan, Pathian ngaihsakna chuan puitling zâwk tûrin min ṭanpui ang a, chu chuan inneihna chungchânga Pathian Lehkha Thu-in a phûtte tlin tûrin min ṭanpui dâwn a ni. Nupui leh pasal thu zawm tûrte zînga ṭhenkhat tirhkoh Paula târ lante chu: “Nupuite u, Lalpa hnêna in intulût ang hian mahni pasalte hnênah intulût rawh u . . . Pasalte u, in nupuite hmangaih rawh u, Kristan kohhranho a hmangaih a, an aia mahni a inpe ang khân . . . Pasalte pawhin mahni taksate angin mahni nupuite chu an hmangaih tûr a ni. . . .  tupawhin mahni a inhmangaih angin mahni nupui hmangaih ṭheuh se la, nupui pawhin a pasal hlau thiam rawh se,” tihte hi a ni. (Ephesi 5:​22-33) Heta kan hmuh ang hian, thâwkkhum Paula thu hian hmangaihna leh zahna a pawimawhzia a sawi uar hle a ni. Hêng fuihna thute zawmna hian Jehova zahna nasa tak a huam a. Hun nuam leh hrehawmah pawh thinlung tak taka inhuamna a mamawh a ni. Kristian tupawh nupui pasal neih duh chuan hêng mawhphurhna zawng zawng hi a phur thei tûr a ni.

Inneih Hun Tûr Chungchânga Thu Tlûkna

11. (a) Nupui pasal neih hun tûr chungchâng eng fuihna nge Bible-in a pêk? (b) 1 Korinth 7:​36-a ziah Bible fuihnate zawm a fin thlâkzia eng entîrnain nge lan tîr?

¹¹ Nupui pasal neih ngam hun hriat hi thil pawimawh tak a ni. He mi hun hi mi tinah a inan loh avângin, Bible chuan a kum zâtin a bithliah kher kher lo va. Mahse, tisa châknain thu tlûkna a thunun theih hun lai kan “vânglai a pelh” thlenga nghah chu a ṭha tih min hrilh a ni. (1 Korinth 7:36) Michelle-i chuan: “Ṭhian tleirâwl têtê-in ngaihzâwng an nei a, nupui pasal an nei ka hmuh hi chuan, he thurâwn hi zawm harsa tih châng ka nei ṭhîn; mahse, chûng thurâwnte chu Jehova hnên aṭanga lo kal a ni tih leh kan tâna ṭha tûr chauh thu râwn min pe ṭhîn tih ka hria a ni. Ka pasal neih hun tûr ka nghah chhûng hian, tleirâwl laia neih harsa tak Jehova nêna kan inlaichînna leh nuna thil tawn eng engemaw chungchângah rilru puitling zâwk ka put theih phah a. Kum engemaw zât hnuah chuan inneihna chungchânga harsatnate leh mawhphurhnate chu ka phur thei ta zâwk a ni” tiin a sawi.

12. La naupan laia inneih hmanhmawh chu engvângin nge a fin thlâk loh?

¹² Tleirâwl la nih lai reng pawha nupui pasal neih hmanhmawh lutuk rêng rêng chuan an lo puitlinin an mamawhte leh duhthusâmte a inthlâk leh ṭhîn a. Atîra an thil duh êm êmte kha an lo ngai pawimawh reng ta ṭhîn lo a ni. Kristian tleirâwl pakhat chuan kum 16 mi a nihin pasal neih a duh a. A nu leh a pi pawhin kum 16-mi ah bawk an lo nei tawh bawk a. Pasala neih a duh tleirâwl chuan nupui neih chu a la duh si lo va; tichuan, amah neih duhtu dang chu a nei ta a ni. Nimahsela, a hnuah chuan thu tlûkna a siam chûk chûk avânga a inchhîr thu a sawi a ni.

13. Puitlin hmaa nupui pasal neite chuan eng nge an tlâk chham fo?

¹³ Kawppui thlanna kawngah inneihna kaihhnawih thil engkim hriatthiamna puitling tak neih a pawimawh êm êm a. Puitlin hmaa inneihna chuan inbuatsaih tâwk lo nupa tuak naupang takte chinfel theih loh buaina tam tak a chawk chhuak ṭhîn. Nupa tuak chuan inneih harsatna leh fanau enkawl nâna mamawh thiltawn leh puitlinna an tlachham mai thei a. Kawppui chhel ni tûra taksa, thlarau, leh rilru lama kan inpeih hunah chauh nupui pasal chu neih tûr a ni.

14. Inneihnaa dinhmun harsatnate hmachhawn tûrin eng nge ṭûl?

¹⁴ Paula chuan nupui pasal neitu chuan “tisaah chuan hrehawm an tuar ang,” tiin a ziak a.  (1 Korinth 7:28) Mize hrang nei an ni a, ngaih dânte a inan loh theih êm avângin harsatnate chu a chhuak ngei ang. Chubâkah, famkim lohna avângin inneihna ruahmanna chungchânga Bible min kawhhmuh chanvote hlenchhuah chu a harsa mai thei. (1 Korinth 11:3; Kolossa 3:​18, 19; Tita 2:​4, 5; 1 Petera 3:​1, 2, 7) Harsatnate hmangaihna nêna tikiang tûra Pathian kaihhruaina dîl tûr leh zâwm tûr chuan thlarau lama puitlinna leh nghehna a ngai a ni.

15. Inneihna tûra an fate ṭanpuinaah nu leh pate’n eng nge an tih theih? Sawifiah rawh.

¹⁵ Nu leh pate chuan Pathian kaihhruaina zawm a pawimawhzia hrethiam tûra ṭanpuina hmangin inneihna chungchângah an fate chu an buatsaih thei a ni. Bible thu leh Kristian thu leh hla chhuahte thiam taka hmangin nu leh pate chuan an fate chu inneihna thuthlung siam fel tûra an inruahman tâwk leh tâwk loh chhût tûrin an ṭanpui thei bawk. * Kum 18-a upa Blossom-i chuan an kohhrana mi tlangvâl pakhat nên inhmangaihin a inhria a. A mipa chu full-time pioneer a ni bawk a, inneih chu an duh ta a. Mahse, a nu leh pate chuan a la naupang deuh tiin kum khat dang nghâk leh tûrin an râwn a ni. A hnua amah Bolossom-i’n a sawi leh dân chuan: “Thurâwn fing tak ka ngaihthlâk avângin la lâwm tak tak a ni. Kum khat chhûng chuan ka puitling sawt a, chu pa chuan pasal ṭha ni tûrin nungchâng ṭha a nei lo tih ka hmu thiam thei ta a ni. A tâwpah phei chuan Thuhretu pâwl chu a chhuahsan ta hial a, ka nuna thil râpthlâk tak lo thleng tûr chu ka pumpelh ta a ni. An thu rêlte rintlâk nu leh pa fing neih chu a va han ropui êm! a ti a ni.

‘Lalpaa Awm Mi Chauh Nei Rawh’

16. (a) Kristiante chu ‘Lalpaa awm mi nei’ tûrin engtin nge fiah an nih theih? (b) Ring lo mi nei tûra thlêmna a lo awm hunin, Kristianin eng nge a ngaihtuah tûr?

¹⁶ Kristiante tâna Jehova kaihhruaina chu a chiang êm êm a: ‘Lalpaa awm mi chauh nei rawh’ tih a ni. (1 Korinth 7:39) Hêng thilah hian Kristian nu leh pate leh an fate chu fiah an ni mai thei. Engtin maw? Ṭhalaite chuan nupui pasal neih an duh mai thei a; mahse, kohhran chhûngah neih tûr an awm lo a ni thei. Hei hi thil awm thei a ni. Vêng ṭhenkhatah chuan mipa aiin hmeichhia an tlêm zâwk pawh a ni thei a, a nih loh leh an khaw pum puiah pawh an mil zâwng mi an awm lo pawh a ni thei bawk. Kohhrana tlângvâl pakhat baptisma pawh la chang lo chuan Kristian nula chu neih duh ta se, chutiang hunah chuan nula leh a nu leh pate chuan Jehova tehkhâwngte ngaihzam duhna rilru an nei mai thei. Chutiang dinhmunah chuan Abrahama entawn tûr siam kha ngaihtuah lêt a ṭha khawp mai. Jehova nêna an inlaichînna a chhawmnun dân kawng khat chu a fapa Isaaka’n Jehova betu dik chauh nupuia neihtîrna hmangin a ni. Isaaka pawhin a fapa Jakoba chungah pawh chutiang bawk chuan a ti ve a. Chutianga tih chu thil awlai tak chu a ni lo va; mahse, Pathian a tilâwm a, a malsâwmna a rah chhuak a ni.​—⁠Genesis 28:​1-4.

17. Engvângin nge ring lotu neih chu chhiatna a nih theih a, ‘Lalpaa awm mi chauh’ neih a ṭûl chhan pawimawh ber eng nge ni?

¹⁷ Ring lo mi a tâwpa thutaka an lo inleh tâk chu a awm leh zauh ṭhîn mah se, a thleng khât hle. Ring lo mi neih chuan chhiatna a thlen tâm zâwk a ni. Chûng rual lo taka nghâwngkawl bâtte chu an rinna an inṭâwmpui lo va, an tehkhâwng leh thiltum pawh a inang hek lo. (2 Korinth 6:14) Chu chuan an inzawmnaah leh nupa hlimnaah nghawng ṭha lo tak a nei thei a ni. Entîr nân, Kristian nu pakhat chu mi tichak tak mai inkhâwm bânan ina a haw a, a pasal ring lotu nêna an sawiho theih loh avângin a rilru a hrehawm êm êm a ni. Chu aia ‘Lalpaa awm mi neih’ a la pawimawh  zâwkna chu Jehova laka rinawm nghehna a nih vâng a ni. Pathian Thu anga kan awm chuan, “a mithmuha thil lâwmawm” ti kan nih avângin, inthiam lohna rêng kan nei lo.​—⁠1 Johana 3:​21, 22.

18. Nupui pasal neih rilrûk a nih chuan, eng nge en hmasak ber tûr ni a, engvâng nge?

¹⁸ Nupui pasal neih rilrûk a nih rêng rêng chuan, mahni kawpui tûrte mize ṭhatna leh thlarau lam nun chu ngaihtuah hmasak ber tûr a ni a. Pathian a hmangaihna, leh soul zawng zawnga a laka a inpêkna Kristian mizia chu hmêl lan dân mai ai chuan a hlu zâwk êm êm a ni. Thlarau lama chak nupa ni tûra an tih tûrte hlen chhuak leh ngaihlute chuan Pathian pawm an hlawh a ni. Nupa inneih ngheh theihna ber chu Siamtu ngaihsakna leh a kaihhruaina apiang pawm vekna aṭanga lo kal a ni a. Hetiang hian Jehova a chawimawi a; tin, inneihna chu inpumkhatna kum hlun awmtîrtu, thlarau lam innghahna nghet takah a inṭan tihna a ni. (w01 5/15)

[Footnote-te]

Engtin Nge I Chhân Ang?

• Engvâng nge Kawppui ṭha thlang tûrin Pathian kaihhruaina a ṭûl?

• Engtin nge pathian ngaihsakna chuan inneihna tinghet tûrin a ṭanpui ang?

• Inneihna chungchângah nu leh pate’n engtin nge an fate an ṭanpui theih?

• Engvângin nge ‘Lalpaa awm mi chauh neih’ a pawimawh?

[Zirlai Atâna Zawhnate]

[Phêk 24-naa milem]

Malsâwmna nasa tak chu ‘Lalpaa awm mi neihna’ aṭangin a lo awm