“Ṭhian Min Hliamna”
“Ṭhian Min Hliamna”
TIRHKOH Paula chuan kum zabi pakhatnaa Galatia rama Kristiante chu zilh deuh an ngai tih a hria a. Inhuatna engemaw a awm loh nân a ti a ni ngei ang, hetiang hian a sawi a: “Chutichuan thu dik tak ka hrilh che u avângin in hmêlma ka lo ni em ni?” tiin.—Galatia 4:16.
‘Thu dik tak a hrilh’ avângin Paula chu an hmêlma a lo ni lo. Ani chuan Bible dân bul: “Ṭhian min hliamna chu a rinawm a,” tih nêna inmilin thil a ti zâwk a ni. (Thufingte 27:6, King James Version) Thil sual titu chuan a tuar na thei tih hre reng mah se, zilh a nih loh chuan Pathian Jehova hmangaihna chu a lakah lantîr a ni dâwn lo tih a hre bawk a ni. (Hebrai 12:5-7) Chuvângin, ṭhian rinawm leh kohhran hmakhaw ṭhat zêlna tûr a ni tih hre rengin, Paula chuan zilhna thu sawi chu a tîm lo.
Tûn laiah Jehova Thuhretute chuan ‘hnam tina mi zirtîrahte siam a, [Isua Krista] thu pêk zawng zawng pawm tûra zirtîr’ tûra an mawhphurhna chu an thawk mêk a. Chu hna an thawhnaah chuan, anni chuan Bible thutakin a laih lan leh a hnâwl, zirtîrna dik lo leh Kristian nun kalh zâwnga khawsak dânte chu an sawisêl fak fak a ni. (Matthaia 15:9; 23:9; 28:19, 20; 1 Korinth 6:9, 10) Chutianga an tih avângin anni chu hmêlma anga hnâwl tûr an ni lo. Anni chuan ṭhian ṭhate inngaihsakna dik tak an lantîr a ni zâwk mah a ni.
Pathian thlarauva thâwk khum avânga finna neiin, fakna hla phuahtu chuan heti hian a ziak a ni: “Mi fel chuan mi vaw rawh se, khawngaihna a ni ang; mi zilhhau rawh se, lûa hriak thih ang a ni ang; ka lûin duh lo suh se,” tiin.—Sâm 141:5 (w01 6/15)