Chhiartute Zawhna
Chhiartute Zawhna
Jehova’n tlanna inthâwina zâra sualte ngaihdam a duh si chuan, engvângin nge kohhran upate hnêna inpuan kher a ngaih?
Davida leh Bathsebi chungchânga kan hmuh angin, tih tak zeta a inchhîr avângin Davida sualna chu nasa hle mah se, Jehova’n a ngaidam a. Zâwlnei Nathana’n a kawm khân, Davida chuan: “LALPA chungah thil ka tisual ta a ni,” tiin a inpuang a ni.—2 Samuela 12:13.
Nimahsela, Jehova chuan mi sual tih tak zeta inpuanna chu a ngaidam mai ni lovin, thlarau lama a chak leh theih nân hmangaih taka ṭanpui tûrin ruahmanna a siam bawk a ni. Davida dinhmunah chuan zâwlnei Nathana hmangin ṭanpuina a lo thleng a. Tûn lai Kristian kohhranah chuan, thlarau lama mi puitling upate an awm a ni. Zirtîr Jakoba chuan: “In zîngah damlo an awm em? Kohhran upa kohtîr sela, anin Lalpa hminga hriak hnawihin a chungah ṭawngṭai rawh se; tin, rinnaa ṭawngṭaina chuan damlo chu a chhandam ang a, Lalpa chuan ani chu a kai tho vang; tin, thil a lo tihsual tawh chuan ngaihdamsak a ni ang,” tiin a sawi.—Jakoba 5:14, 15.
Upa thiltawn ngah takte chuan thil sual ti inchhîrte thinlung natna tidam tûrin tih theih tam tak an nei a ni. Chutiang mi an dâwrnaah chuan Jehova entawn an tum tlat a. Zilhna khauh tak pêk ngai a nih pawhin, nunrâwng takin an ti ngai lo va, zahngai takin mi mal mamawhte chu an ngaihtuah zâwk ṭhîn. Dawhthei takin, sual titu ngaihtuahna chu Pathian Thu hmanga siam ṭhat leh an tum a ni. (Galatia 6:1) Ama thuin inpuang lo mah se, Davida chu Nathana kawmna avânga a inchhîr nghâl angin, upate kawmna avângin ani chu a inchhîr nghâl mai thei a ni. Chuvângin upate ṭanpuina pêk chuan thil sual tinawnleh tawh lo tûr leh thil sual tih rahchhuah râpthlâk tak, thinlung chawlawlna pumpelh tûrin a ṭanpui a ni.—Hebrai 10:26-31.
Mi dangte hnêna kan thiltih zahpuiawm tak puan leh ngaihdamna dîl chu thil awlsam a ni lo khawp mai. Chutiang ti tûr chuan chhûngril lam chakna neih a ngai a ni. A nih loh leh kawng dang zâwngin han ngaihtuah lawk teh. A thil tihsual nasa tak kohhran upate hnêna inpuang lo pa pakhat chuan heti hian a sawi: “Ka thinlung nâ chu eng tikah mah a reh lo vang. Thuhrilnaah ṭan ka la zual sauh va; mahse, ka thinlung natna chu a châmbâng reng si,” tiin. Ṭawngṭaia Jehova hnêna inpuan chu tâwkah a ngai a; mahse, a tâwk mai lo tih a chiang hle a ni, Lal Davida ang bawka thinlung natna a tuar avângin. (Sâm 51:8, 11) Chuvângin, Jehova’n upate kal tlanga min pêk hmangaih ṭanpuina pawm mai hi a va ṭha zâwk êm! (w01 6/1)