“Pathian Kan Lama A Ṭan Chuan Tuin Nge Min Do Thei Ang?”
“Pathian Kan Lama A Ṭan Chuan Tuin Nge Min Do Thei Ang?”
“Chûng thuah chuan engnge ka sawi ang le? Pathian kan lama a ṭan chuan tuin nge min do thei ang?”—ROM 8:31.
1. Israelte rualin tute’n nge Aigupta kalsan ve a, anni chu engin nge tur?
ISRAEL mite chu kum 215 chhûng Aigupta ramah an awm a, chu hun tam zâwk chu salin an awm a ni. Chu mi hmun ata zalên tûra hruai chhuah an nih khân, “an hnênah chuan mipui inpawlhsawp tam tak an kal ve bawk a.” (Exodus 12:38) Chûng Israel mi ni lote chuan Aigupta chunga chhiatna nasa tak thlentu leh a pathian lemte nuihzabûra siamtu hremna râpthlâk tak chi sâwmte chu an tawng a ni. Chutih rual rual chuan a mite humhim tûra Jehova thiltihtheihzia chu a bîkin hremna a chi lina aṭangin an hmu a ni. (Exodus 8:23, 24) Anni chuan Jehova thil tumte chu hre vek lo mah se, thil pakhat chu an hre chiang êm êm a ni: Jehova chu Israelte chhanchhuak tûra a chak êm êm laiin, Aigupta pathiante chuan an mite chu an chhanhim thei lo tih chu.
2. Engvângin nge Rahabi khân Israel enthlatute kha a lo ṭanpui a, an Pathian chunga a rinna chu engvângin nge a thlâwn mai a nih loh?
2 Chu mi hnu kum 40, Israel mite’n Ram Tiam an luh hma chiah chuan, Mosia aiawhtu Josua chuan ram enthla tûrin mi pahnih a tîr a. Anni chuan Jeriko khuaa mi Rahabi an va tawng a. Ani chuan Israel mite’n Aigupta an chhuahsan aṭanga kum 40 chhûnga anmahni humhim tûra Jehova thiltih nasa takte a lo hria a; chu chuan, Pathian malsâwmna dawn a duh chuan, a mite a lo ṭanpui tûr a ni tih a hriattîr a ni. A thu tlûkna fing tak avângin, a hnua Israel mite’n chu khawpui an tihchhiat khân amah leh a chhûngte chu an him a ni. Mak taka chhanchhuah an ni chu an hnênah Pathian a awm tih tichiang êm êmtu a ni. Chuvângin, Israelte Pathian chunga Rahabi rinna chu a thlâwn mai lo.—Josua 2:1, 9-13; 6:15-17, 25.
3. (a) Jeriko khawpui sak ṭhat leh bulah eng thil mak nge Isua’n a tih a, engtin nge Juda puithiamhote’n an chhân lêt? (b) Juda ṭhenkhatte leh a hnuah Juda ni lo tam takte’n eng thil nge an lo hriat thiam tâk?
3 A hnu kum zabi sâwm panganaah chuan, Isua Krista Marka 10:46-52; Luka 18:35-43) Chu pa chuan Isua chu Pathianin a ṭanpui a ni tih a hriatzia tilangin, a chunga zah ngai tûrin a ngên a ni. Juda sakhaw hruaitute leh an ṭhuihhruaite erawh chuan, Pathian rawng a bâwlzia tihlan nâna Isua thil mak tihte chu a tlângpui thuin an pawm duh lo. Pawm ahnêkin an sawichhe zâwk a ni. (Marka 2:15, 16; 3:1-6; Luka 7:31-35) Isua chu an tihhlum hnua kaihthawh leh a nih hnuah pawh, Pathian thil tih a ni tih chu an la pawm duh ta chuang lo. Chutih ahnêkin, Isua hnungzuitute tihduhdahnaah chuan hma an hruai a, ‘Lalpa Isua chanchin ṭha an hril’ chu tihtâwp an tum a ni. Mahse, Juda ṭhenkhat leh Juda ni lo mi tam takte chuan, chûng thil thlengte chu an chhût dik hle a. Pathianin mahni intifel Juda sakhaw hruaitute chu a hnâwl a, Isua Krista hnungzuitu mi inngaithlâwmte chu a ṭanpui a ni tih an chiang ta a ni.—Tirhkohte 11:19-21.
chuan Jeriko khawpui sak ṭhat leh bulah kutdawh mitdel pakhat a tidam a. (Tûn Laiah Tute’n Nge Pathian Ṭanpuina Dawng?
4, 5. (a) Sakhaw thlan chungchâng chu mi ṭhenkhat chuan engtin nge an ngaih? (b) Sakhaw dik thliar hrannaah eng zawhna nge pawimawh êm êm?
4 Tûn hnai TV-a sakhaw dik chungchâng zawhna a chhânnaah, sakhaw hruaitu pakhat chuan heti hian a sawi: “A mi leh sate tûn hma aia mi ṭha zâwka siam thei sakhua chu sakhaw dik ka ti tlat ang,” tiin. Ni e, sakhaw dik chuan mi a siam ṭha ngei mai. Mahse, sakhuain mi a siam ṭhat mai avângin chu sakhua chuan Pathian ṭanpuina a dawng tihna a ni em? Chu chu sakhaw dik leh dik loh tehna awm chhun a ni em?
5 Mi tin hian mi mal duh thlan theihna chu kan hlut ṭheuh va, chutah chuan sakhaw duhzâwng thlan pawh a tel a ni. Mahse, zalên taka duh thlan theihna chu miin kawng dik a thlang ngei ang tihna a ni hauh lo. Entîr nân, mi ṭhenkhat chuan sakhua chu an tam zâwng te, a hausak zâwng te, a ropui zâwng te, a nih loh leh an chhûng leh khat an tam zâwng te azîrin, an thlang ṭhîn. Hêng zînga a engamah hi sakhaw dik leh dik lo hriat theihna a ni lo. He mi chungchânga zawhna pawimawh tak chu hei hi a ni: Eng sakhuain nge a mi leh sate chu Pathian duhzâwng ti tûra fuih a, chu sakhaw vuantute chuan ‘Pathian kan lamah a ṭang’ an tih theih nâna Pathian ṭanpuina an dawnzia chu eng sakhuain nge chiang taka tilang? tih hi.
6. Sakhaw dik leh dik lo chungchângah Isua thusawi engin nge hriatthiamna min pêk?
6 Isua’n: “Zâwlnei derte lakah fimkhur rawh u; chûng chu berâm vun sinin in hnênah an lo kal ṭhîn a, an chhûng lamah erawh chuan chinghne koham takte an ni si a. Anmahni chu an rahah in hre mai ang,” tia a sawi hian sakhaw dik leh dik lo thliar hran theihna dân a siam a ni. (Matthaia 7:15, 16; Malakia 3:18) Chuvângin, tûn laiah tute’n nge Pathian ṭanpuina dawng tih chiang taka kan hriat theih nân, sakhaw dik chhinchhiahna, a nih loh leh a “rah” ṭhenkhatte chu i lo ennawn ang u.
Pathian Ṭanpuina Dawngtute Chhinchhiahna
7. Bibe-a awm chauh zirtîr tih chu eng tihna nge ni?
7 An zirtîrna chu Bible-ah an nghat. Isua chuan: “Ka thu zirtîr hi ka ta a ni lo va, mi tîrtu ta a ni zâwk. Tupawh ama duhzâwng tih duh chuan, ka thu zirtîr hi Pathian tihchhuah nge keima phuahchawpa ka sawi a hria ang,” a ti a. Tin, “Pathian hnêna chhuak chuan Pathian thu a pawm ṭhîn,” a ti bawk. (Johana 7.16, 17; 8:47) Inâwm takin, Pathian ṭanpuina dawng tûr chuan Pathianin a Thu-a a târ lante chauh a zirtîr tûr a ni a; tin, mihring finna emaw, pipute thurochhiah emaw ṭanchhan zirtîrna rêng rêng chu a hnâwl tûr a ni.—Isaia 29:13; Matthaia 15:3-9; Kolossa 2:8.
8. Biaknaa Pathian hming hman chu engvângin nge a pawimawh?
8 Pathian hming, Jehova, chu an hmang a, an puang zâr bawk. Isaia chuan: “Chu mi nîah chuan heti hian in la sawi ang, ‘Jehova hnênah chuan lâwm thu hril ula, a hming lam ula, a thiltihte chu mi tin zîngah hriattîr ula, a hming chu chawimawiin a awm tih sawi rawh u. Jehova chawimawiin hla sa rawh u; ani chuan thil ṭha berte chu a lo ti tawh si a; chu chu leilung luah zawng zawngah hian hriatin awm rawh se,’ ” tiin a lo hrilh lâwk diam a. (Isaia 12:4, 5, NW) Isua pawhin a zirtîrte chu: “Kan Pa vâna mi, i hming zahawm rawh se,” tia ṭawngṭai tûrin a zirtîr a ni. (Matthaia 6:9) Chuvângin, Juda mi an ni emaw, ni lo emaw Kristiante chuan ‘Pathian hming an pu’ tûr a ni. (Tirhkohte 15:14) Pathian chuan ‘a hming putute’ ṭanpui chu a châk hle si a.
9. (a) Engvângin nge hlimna hi sakhaw dik vuantute nihna bîk a nih? (b) Isaia’n sakhaw dik leh dik lo chu engtin nge a khaikhin?
9 Pathian mizia hlimna chu an lantîr. “Chanchin ṭha” ziaktu a nih angin, Jehova chu “Pathian hlim” a ni a. (1 Timothea 1:11, NW) Chuvângin amah chibai bûktute chu entin nge maw an hlim lohvin, an lungngaih reng theih ang le? He lungngaihna khawvêl leh mi mal harsatna hrang hrang kârah pawh, Kristian dikte chu thlarau lam chaw ṭhaa hnianghnâr taka châwm reng an nih avângin an hlim reng thei a ni. Isaia chuan sakhaw dik betute chu sakhaw dik lo betute nêna an inthlauhzia hetiang hian a sawi: “Lalpa PATHIAN chuan heti hian a ti, ‘Ngai teh u, ka chhiahhlawhte chuan an ei ang a, nangni erawh chu rilṭâmin in awm ang: ngai teh u, ka chhiahhlawhte chuan an in ang a, nangni erawh chu tuihâlin in awm ang: ngai teh u, ka chhiahhlawhte chu an hlim ang a, nangni erawh chu in zak ang: ngai teh u, ka chhiahhlawhte chu thinlunga an lâwm avângin hlim takin an zai ang a, nangni erawh chu thinlunga in lungngaih avâgin in ṭap ang a, thlarauva in vui avângin in chiau vak vak ang,’ ” tiin.—Isaia 65:13, 14.
10. Engtin nge sakhaw dik vuantute chuan thil ṭha ber hriat nân thil chi hrang hrang an chhin kual reng loh vang?
10 An chêtzia leh an thu tlûknate chu Bible thu bulah an innghahtîr. Thufing ziaktu chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tiin min fuih a. (Thufingte 3:5, 6) Pathian chuan Pathian lam finna ngaihthahtu mihring thiamna lam hawi aia ama kaihhruaina zawng zâwktute chu a ṭanpui ṭhîn. Miin Pathian Thu mila a nun a siam ṭhat duh phawt chuan, thil ṭha ber hriat nân thil chi hrang hrang a ti chhin kual reng lo vang.—Sâm 119:33; 1 Korinth 1:19-21.
11. (a) Engvângin nge sakhaw dik vuantute chu puithiamho leh mi narânho anga an inṭhen hran theih loh? (b) Pathian mite zînga hma hruaitute chuan berâmte tân entawn tûr eng nge an siam ang?
11 Kum zabi pakhatnaa Kristian kohhrante ang khân an inruahman. Isua chuan hetiang hian dân bul a lo siam a: “Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng chu unau in ni si a. Tin, lei chungah hian tumah ‘Ka pa’ ti suh u, in Pa chu pakhat chauh a ni, vâna mi khi. ‘ “Hruaitute” tihin awm hek suh u’ in hruaitu chu pakhat chauh a ni, Krista chu. In zînga ropui ber chu in rawngbâwltuah a awm zâwk tûr a ni,” tiin. (Matthaia 23:8-11) Unauhote awmna kohhran chuan mi narânte chunga lêng, mahni inchawi sâng tak, sakhaw puithiamho chu kohhran chhûng ata a hnâwl bo a ni. (Joba 32:21, 22) Pathian berâm vêngtute chu ‘tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilrua duh tak zâwkin, in chante chungah intilal hek lovin, pâwlho entawnan insiam zâwka’ an berâmte ho tûra hrilh an ni. (1 Petera 5:2, 3) Kristian berâmvêngtu dik takte chuan mi dangte rinna chunga hotua insiam an tum lo. Pathian rawngbâwlnaa an hna thawhpuite an nih angin, entawn tûr ṭha siam an tum ngar ngar zâwk a ni.—2 Korinth 1:24.
12. Pathian chuan a ṭanpuina dawng duhte hnênah mihring sawrkârte chungchâng eng ang thlîr dân inbûktâwk nge a phût?
12 Sawrkâr lakah intulût reng chungin an tual dawih reng. ‘Rorêltute thu thua awm’ lote chuan Pathian ṭanpuina an beisei thei lo. Engvâng nge? Bible-in: “Rorêltua awmte hi Pathian ruat an ni. Chuvângin tupawh rorêltu hnial chu Pathian ruat dodâl an ni” a tih avângin. (Rom 13:1, 2) Nimahsela, Isua’n an duhzâwng a inkalh thei tih hriain: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a. (Marka 12:17) Tichuan, tupawh Pathian ṭanpuina dawng duh tawh phawt chuan Pathian laka an mawhphurhna nêna inrem ram thuneitute thu an zawm rualin, ‘[Pathian] ram leh a felna chu a zawng hmasa zâwk’ ngei ngei tûr a ni. (Matthaia 6:33; Tirhkohte 5:29) Isua’n a zirtîrte hnênah: “Anni chu khawvêla mi an ni lo, kei khawvêla mi ka ni lo ang bawk hian,” a tih hian tual dawih a ṭûlzia a sawi pawimawh hle. Chu mi hnuah chuan: “Ka ram chu he khawvêla mi hi a ni lo,” tiin a sawi belh bawk.—Johana 17:16; 18:36.
13. Pathian mite thliar hrannaah hmangaihna hian eng chanvo nge a neih?
13 ‘Mi zawng zawng chunga thil ṭha’ tihnaah thlei bîk an nei lo. (Galatia 6:10) Kristian hmangaihna chuan thlei bîk a nei lo; vun rawng te, sum leh pai dinhmun te leh thiamna te, hnam te, a nih loh leh ṭawngte chu inang lo mah se, mi zawng zawng a pawm vek a ni. Mi zawng zawng—a bîk takin an rinpuite—chunga thil ṭha tihna chuan tute’n nge Pathian ṭanpuina dawng tih hre tûrin min ṭanpui a ni. Isua chuan: “In inhmangaih chuan mi zawng zawngin ka zirtîrte in ni tih chu miah chuan an hria ang,” a ti.—Johana 13:35; Tirhkohte 10:34, 35.
14. Pathian pawm zâwngte chuan mite pawm an hlawh em? Hrilhfiah rawh.
14 Pathian duhzâwng tih avânga tihduhdahna tawrh an inhuam. Isua chuan: “Annin kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zâwm ang,” tiin a hnungzuitute chu a vaukhân lâwk a ni. (Johana 15:20; Matthaia 5:11, 12; 2 Timothea 3:12) A rinna avânga khawvêl thiam loh chantîrtu Nova angin, Pathian ṭanpuina dawng apiang chuan mi huat an hlawh ṭhîn. (Hebrai 11:7) Tûn laiah pawh, Pathian ṭanpuina dawng duhte chuan tihduhdahna pumpelh nân Pathian thu an tidalin, a dân nghette an phatsan ngam lo va. Pathian rawng rinawm taka an bâwl chhûng chuan, mite’n anmahni chu ‘mak an ti a, an sawichhe reng’ dâwn tih an hre reng a ni.—1 Petera 2:12; 3:16; 4:4.
Thu Dik Chhût Hun
15, 16. (a) Pathian ṭanpuina dawng kohhran hriat theih nân eng zawhnate’n nge min ṭanpui ang? (b) Mi maktaduai têlte chuan eng nge an pawm a, engvâng nge?
15 Heti hian han inzâwt teh, ‘Pathian Thu chu mi tam zâwkte rin dân nêna a inan loh châng pawhin, eng kohhranin nge a zirtîrna vuan tlat? Tute’n nge Pathian hming hman a pawimawhzia sawi uar a, anmahni pawh chu hminga in chhinchhiah? Tute’n nge mihringte harsatna zawng zawng tiveng tûr awmchhun Pathian Ram chu beisei taka sawi ṭhîn? Mite’n a ṭhing lutuk nia an ngaih lai pawhin tute’n nge nungchang lama Bible tehkhâwngte chu vawng tlat? Eng pâwlah nge suma rawih puithiamho a awm loh va, a mi leh sa zawng zawngte chu thuhriltu an nih vek? Politics-a inhnam hnawih lo mah se, tute nge khua leh tui dân zâwm? Tute’n nge Pathian leh a thiltumte hre tûra mi dangte ṭanpuinaah an hun leh sum leh paite hmang? Hetiang thil ṭha an ti chung pawhin, tute nge hmuhsit, nuihzatbûr, leh tihduhdah an nih?’ tiin.
16 Khawvêl pum puia mi maktaduai têlte chuan thudik chu an chhût a, Jehova Thuhretute chauh hian sakhuana dik an zâwm a ni tih an pawm ta. Chutianga an pawm chhan chu Jehova Thuhretute zirtîrna leh an khawsak dân te, an sakhuain an chunga hlâwkna a thlenzia te an hmuh vâng a ni. (Isaia 48:17) Zakaria 8:23-a hrilh lâwk ang hian, mi maktaduai têlte chuan Jehova Thuhretute hnênah he thu an sawi a tih theih a ni: “[In] hnênah Pathian a awm th kan hriat avângin [in] hnênah kan kal ve dâwn e,” tih hi.
17. Jehova Thuhretute chauhvin sakhaw dik an vuan tia sawi chu engvângin nge chapona a nih loh?
17 Jehova Thuhretute chauhvin Pathian ṭanpuina an dawng tia sawi chu an chapo vâng a ni em? Chu chu Aigupte mite’n eng ang pawhin ring mah se, Aigupta rama Israelte’n Pathian ṭanpuina dawng anga an inchhâl ang leh, kum zabi pakhatnaa Kristiante chuan Juda sakhaw vuan nghettute’n Pathian ṭanpuina an dawng lo va, anmahni chauhvin dawng anga an inchhâlna nên a inang chiah a. Thil awm dânte chuan chu inchhâlna a dikzia a finfiah mai a ni. Isua’n tâwpna huna a hnungzuitu dik takte tih tûra a hrilh lâwk hna chu tûnah hian Jehova Thuhretute chuan ram Matthaia 24:14.
235-ah an thawk mêk a. Chu Isua sawi lâwk chu hei hi a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih hi.—18, 19. (a) Dodâlna tâwk mah se, engvângin nge Jehova Thuhretute tân an thuhrilhna bânsan chhan tûr a awm loh? (b) Engtin nge Sâm 41:11 chuan Thuhretute’n Pathian ṭanpuina an dawng a ni tih a thlâwp?
18 Jehova Thuhretute chuan he hna hi an chhunzawm zêl dâwn a, tihduhdahna emaw, dodâlna emaw te chuan an rawngbâwlna chu a titâwp ngai lo vang. Jehova hna chu thawh ngei ngei tûr a ni. Ani chuan: “Nangmah beihna tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang. Chu chu LALPA chhiahhlawhte rochan chu a ni a, an felna chu ka hnên ata a ni,” tia a lo tiam tawh avângin, kum zabi kal taa Thuhretute Pathian hna thawhna titawp tuma beihna zawng zawng chu a tâwpah chuan a hlawhchham vek a ni.—Isaia 54:17.
19 Jehova Thuhretute chuan khawvêl pumah dodâlna tâwk mah se, tûn hma zawng aiin an chak a, an phûr zâwk bawk a; chu chu Jehova’n an hna thawh a pawmzia tifiahtu a ni. Lal Davida chuan: “He mi-ah hian ka chungah i lâwm tih ka hria, mi dotu chuan mi ngam ṭhin loh avâng hian,” a ti. (Sâm 41:11; 56:9, 11) Pathian hmêlmate chuan Jehova mite chu an ngam ngai hauh lo vang; an hruaitu Isua Krista chu a tâwp thlenga hneh zêl tûra a chhuah avângin! (w01 6/1)
I Chhâng Thei Em?
• Hmân laia Pathian ṭanpuina dawngtute entîr siam ṭhenkhat chu eng nge ni?
• Sakhuana dik chhinchhiahna ṭhenkhatte chu eng nge ni?
• Engvângin nge Jehova Thuhretute’n Pathian ṭanpuina an dawng tih i pawm tlat?
[Zirlai Atâna Zawhnate]
[Phêk 21-naa milem]
Pathian ṭanpuina dawng duhte chuan an zirtîrna chu a Thu-ah an innghahtîr tlat tûr a ni
[Phêk 23-naa milem]
Kristian upate chu berâmte entawn tûrin an awm