“Remna Zawngin Um Zêl Rawh”
“Remna Zawngin Um Zêl Rawh”
“A theih phawt chuan nangmahni lam tal, mi zawng zawng nên inremin awm rawh u.”—ROM 12:18.
1, 2. Mihring siam remnain rei a daih loh chhan ṭhenkhatte chu eng nge ni?
NGHAHCHHAN nghet lo, khanchhuk ngêt tawh leh a chung pawh far tawh in pakhat han mitthla teh. Chu in chu luah i châk ang em? I châk lo rêng rêng ang. Rawng thar pawh hnawih mah ila, chu in nihna chu a thlâk danglam chuang lo. Engtik hunah emaw chuan a la tlu chhe tho tho dâwn.
2 He khawvêl aṭanga chhuak remna engpawh hi, chu mi in ang chu a ni. A nghahchhan nghet lo taka sak a ni—“chhandamna rêng rêng awm lohna,” mihring fapa thutiamahte leh thil ruahmanahte chuan. (Sâm 146:3) Hun kal tawha thil thleng chanchin chu ram inkâr te, hnam inkâr te, leh chi inkâr tea buainain a khat tlat a ni. Hun rei lo te chhûng remna chu a awm zawk ṭhîn ngei mai; mahse, chu chu eng ang remna nge ni? Ram pahnih an indo va, a lehlam pang a tlâwm vâng emaw, indo zêl hlâwkna an hriat loh vâng emawa inremna chu eng ang remna nge ni ang? Chûng indona lo chhuah chhan inhuatna te, inrinhlelhna te, leh inthîknate chu a la awm reng si. Siam chawp remna, inhmêlmâkna ‘chunga rawng thar hnawih’ ang lek inremna chu remna tluantling a ni lo.—Ezekiela 13:10.
3. Engvângin nge Pathian mite remna chu mihringte remna siam nên a inan loh?
3 Nimahsela, remna dik tak chu he indona khawvêlah ngei hian a awm a ni. Khawiah nge a awm? Kristian dik, Isua thu ngaihsak a, a nun kawng zir tum tlattu, Isua Krista hniak hnung zuitute zîngah a awm a ni. (1 Korinth 11:1; 1 Petera 2:21) Kristian dik mi chi hrang hrang te, nihna chi hrang hrang te, leh hnam hrang hrangte kâra remna awm chu, Pathian nêna inlaichînna muanawm an neihna aṭanga lo chhuak a nih avângin a tak bîk êm êm a ni: chu inlaichînna chu Isua Krista tlanna inthawina chunga rinnaah a innghat a ni. An remna neih chu mihring siam ni lovin, Pathian thilthlâwnpêk a ni. (Rom 15:33; Ephesi 6:23, 24) Chu remna chu “Remna Lal,” Isua Krista hnêna an intukluh avâng, leh “hmangaihna leh remna Pathian,” Jehova chibai an bûk avânga an neih a ni.—Isaia 9:6; 2 Korinth 13:11.
4. Engtin nge Kristianin remna a “ûm”?
4 Remna chu ṭha famkim lo mihringte hnênah hian amahin a rawn awm mai lo va. Chuvângin, Petera chuan Kristian tinte chu ‘remna zawnga ûm zêl’ tûrin min fuih a ni. (1 Petera 3:11) Chu chu engtin nge kan tih theih? Hmân laia hrilh lâwkna pakhat chuan chu chu a chhâng a ni. Isaia hmangin Jehova chuan: “I fate zawng zawng chu LALPA zirtîrin an awm ang a, i fate thlamuanna chu nasa tak a ni ang,” tiin a lo sawi a ni. (Isaia 54:13; Philippi 4:9) Ni e, Jehova zirtîrna ngaihsaktute chuan remna tak tak an nei a ni. Chu bâkah, remna leh “hmangaihna te, hlimna te, . . . dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te,” chu Pathian thlarau thianghlim rah a ni. (Galatia 5:22, 23) Hmangaihna nei lo te, mi hlim thei lo te, thinram te, nun râwng te, mi sual te, mi rinawm lo te, leh mi kawlhsen te, leh insûm thei lo te chuan remna an nei thei lo.
‘Mi Zawng Zawng Nêna Inrema Awm’
5, 6. (a) Inrema awm leh remna siam inkâr danglamna chu eng nge ni? (b) Kristiante chuan tute nên nge remna siam an tum ang?
5 Remna chu dinhmun thlamuan thlâk leh reh tia hrilhfiah a ni a. Chu mi hrilhfiahna chuan buaina awm lohna dinhmun tam tak a huam a ni. Chuvângin alâwm mitthite takngial pawh thlamuang takin a châwl ta an tih ṭhin! Nimahsela, remna dik tak nei tûr chuan remna siamtu nih a ngai a ni. Tlâng chunga a Thusawiah pawh Isua chuan: “Remna siamtute chu an eng a thâwl e; Pathian faa vuahin an la awm dâwn si a,” a ti. (Matthaia 5:9) Isua’n he thu hi nakina Pathian thlarau lam faa vuah a, vâna thi thei lo nunna dawng tûrte hnêna a sawi a ni. (Johana 1:12; Rom 8:14-17) Mahse, a tâwpah chuan, vân lam beiseina nei ve lo mi rinawm zawng zawngte pawh chu “Pathian fate zalênna ropuiah chuan” an lût ang. (Rom 8:21) Chutiang beiseina chu remna siamtute chauhvin an nei thei a ni. Remna nei—thlamuang taka awm—tih leh remna siam tih hian danglamna a nei fo. Pathian Lehkha Thu-a remna siam tih chuan remna awmsa awm chhunzawmtîrna leh a châng chuan inrem lohna ata remna awmtîr hi a kâwk a ni.
6 Hei hi rilrua vawng rengin, tirhkoh Paula’n Rom mite a fuihna: “A theih phawt chuan nangni lam tal, mi zawng zawng nên inremin awm rawh u,” tih hi ngaihtuah teh. (Rom 12:18) Thlamuang taka awm chuan anmahni ṭanpui thei tho mah se, Paula chuan Rom mite chu chutianga awm tûr ringawtin a fuih lo. Remna siam tûrin a fuih zâwk a ni. Tute nên maw? “Mi zawng zawng”—chhûngkaw zînga mite, Kristianpuite, kan rinna min ṭawmpui ve lote nên a ni. Rom mite chu ‘anmahni tih theih a nih phawt chuan’ mi dangte nêna remna siam tûrin a fuih a ni. Chutianga a tih avângin, remna siam duh avâng maia an rinna phatsan chu a duh tihna a ni lo. Ṭûl lêm lova mi dangte tihthinrim ai chuan, inrem tum chungin anmahni an be zâwk tûr a ni. Kohhran chhûnga mi an ni emaw, ni lo emaw Kristiante chuan mi dangte an dâwrnaah chutiang chuan an ti tûr a ni. (Galatia 6:10) He mi nêna inrem tak mai hian, Paula pawhin heti hian a ziak a: “In thil intihsak tawnna lamah leh, mi zawng zawng chunga in tihsakna lamah pawh, a ṭha apiang ûm fo zâwk rawh u,” tiin.—1 Thessalonika 5:15.
7, 8. Kristiante chuan an rinna ṭawmpui lote nên engtin nge an remna an siam theih a, engvânga remna siam tûr nge an nih?
7 A nih leh kan rinna min ṭawmpui ve lote leh a dodâl hialtute nên chuan engtin nge remna kan siam theih ang? Siam theih dân kawng khat chu, chungnung zâwk anga inlantîr loh a ni. Entîr nân, ngaihnêpna ṭawngkam hmanga mi tuemaw biak chuan inrem a harsa a. Jehova chuan pâwlte leh mi chi hrang hrangte chunga a rorêlna chu a lantîr a; nimahsela, kan tân chuan tuemaw chu thiam loh chantîr tawh ang maia biak a thiang lo. Ni e, mi dangte chu sawi loh, min dodâltute ngei pawh kan sawisêl thei lo a ni. Kret thliarkâra Kristiante chu thuneitute an dâwr dân chungchânga fuihna thu pe tûra Tita a hrilh hnuah, Paula chuan, ‘tumah sawichhe lo tûr te, kawhmawh bâwl lo tûr te, mi zawng zawng laka thuhnuairawlhna tinrêng tilanga nunnêm tûrtea’ hriattîr leh tûrin a hrilh a ni.—Tita 3:1, 2.
8 Kan rinna min ṭawmpui lote nêna remna siam chuan an hnêna thutak hriattîrna kawng remchâng tak a hawng thei a. Amaherawhchu, ‘nungchang ṭha tikhawlo ṭhîn’ inṭhianna siam chu kan duh hauh lo a ni. (1 Korinth 15:33) Nimahsela, an lakah kan hawihhâwm thei a, mi zawng zawng chu zahna leh ngilneihnain kan cheibâwl thei a ni. Petera chuan tihian a ziak: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah chuan Pathian an chawimawi thei ang,” tiin.—1 Petera 2:12.
Rawngbâwlnaah Remna Siamin
9, 10. Ring lo mite nêna inrem taka indâwrna kawngah tirhkoh Paula’n eng entawn tûr ṭha tak nge a siam?
9 Kum zabi pakhatnaa Kristiante chuan an huaisenna avângin hriat an hlawh a. An thuchah kente chu an tidal lo va; dodâlna an tawn chângin, mihring thu aia Pathian thu zawm chu an tum nghet tlat ṭhîn. (Tirhkohte 4:29; 5:29) Amaherawhchu, huaisenna leh chaltlaina chu an ngaihfin ngai lo. Paula’n Lal Herod Agrippa ll-na hmaa a rinna a vênhim dân kha han ngaihtuah ta la. Herod Agrippa chu a farnu Berniki nêna bawlhhlawh taka khawsa ṭhîn a ni a. Nimahsela, Paula chuan Agrippa hnênah chuan nungchang thianghlimna chungchânga zilhna thu a sawi lo. An pawm tlân ngei tûr thute sawi uarin, Agrippa chu Judate zîngah dân leh thubuai zawng zawng kawnga fing a nih thu leh zâwlneite thu a âwihzia chu a sawi uar zâwk a ni.—Tirhkohte 26:2, 3, 27.
10 Paula chuan zalênna pe thei a nih avângin a fak der mai mai em ni? Ni lo ve. Paula chuan ama thusawi ngei chu zuiin thutak a sawi a. Herod Agrippa hnêna a thu sawiah thu dik lo engmah a awm lo. (Ephesi 4:15) Mahse, Paula chu remna siamtu a ni a, ‘mi zawng zawng hnêna engkim’ nih dân a hria a ni. (1 Korinth 9:22) A tum ber chu Isua chungchâng hril tûra dikna a neih chu humhim tlat a ni a. Zirtîrtu ṭha a nih angin, amah leh Agrippa pawm ngei tûr thil a sawi ṭan a. Chutiang chuan Paula chuan, chu Lal nungchang bawlhhlawh tak mithmuhah Kristianna chu a tiduhawm zual a ni.—Tirhkohte 26:28-31.
11. Engtin nge kan rawngbâwlnaah remna siamtu kan nih theih?
11 Engtin nge kan rawng bâwlnaah remna siamtu kan nih theih? Paula angin, inhnialna kan pumpelh tûr a ni. Engemaw châng chuan kan rinna chu huaisen taka humhim a, ‘hlau lova Pathian thu hril,’ a ngai ngei ang. (Philippi 1:14) Nimahsela, kan tum ber chu chanchin ṭha hrilh a ni fo ṭhîn. (Matthaia 24:14) Miin Pathian thiltum chungchâng thutak a hriat chuan, sakhuana dik lo ngaihdân chu paih bo ṭan theiin, chin dân ṭha lote lak ata a intifai thei a ni. Chuvângin, a theih chhûng chu kan thu ngaithlatute rilru la thei zâwngte sawi uar a, pawm tlân theih thilte sawi ṭan chu a sâwt hle. Thiam taka biak avânga kan thusawi ngaithla tûrte tihthinrim mai chu hlawhchhamna a ni.—2 Korinth 6:3.
Chhûngkuaa Remna Siamtute
12. Eng kawngin nge chhûngkuaah remna siamtu kan nih theih?
12 Paula chuan nupui pasal neite chuan “tisaah chuan hrehawm an tuar ang,” a ti a. (1 Korinth 7:28) Harsatna chi hrang hrang an tawng dâwn a tihna a ni. Chûng zînga pakhat chu, nupa ṭhenkhat chuan inrem loh châng an neih ṭhîn chu a ni. Chu chu engtianga chinfel tûr nge ni? Inrem duh tak chunga chinfel tûr a ni. Remna siamtu chuan innghirnghona nasa lehzual tûr chu tihtâwp an tum tûr a ni. Engtin nge an tih ang? A hmasa berah chuan an lei vêng ṭhain. Mi dang ṭawngel khum nân leh tihthinur nâna hman a nih chuan, he thil tê tak tê hi “thihna hlova khat, sual awm hle hle thei lo” a ni thei. (Jakoba 3:8) Remna siamtu chuan a lei chu mi dangte tihchhiat nâna hmang lovin, mi dangte tundin nân a hmang zâwk ṭhîn.—Thufingte 12:18.
13, 14. Ṭawngkama thil kan tihsual hunah emaw, rilru hah lutuk hunah emaw chuan engtin nge remna kan awm chhunzawmtîr theih ang?
13 Ṭha famkim lo kan nih avângin, a hnua kan inchhir lehna tûr thil engemaw sawi châng kan nei ṭhîn. Chutiang a awm châng chuan, remna siam nân, ngaihdam dîl vat ang che. (Thufingte 19:11; Kolossa 3:13) “Inhnial” leh “hnial hrâtna te” pumpelh rawh. (1 Timothea 6:4, 5) A pâwnlâng mai en lovin, i kawppui rilru chu hriatthiam tum zâwk ang che. Ṭawngkam na tak taka biak i nih chuan, thungrûl kher suh. “Chhânna nêmin thinur a tikiang ṭhîn” tih hre reng ang che.—Thufingte 15:1.
14 Engemaw châng chuan Thufingte 17:14 thu: “Insualna a awm ṭan hmâin inhnial bâng rawh,” tih thurâwn hi i ngaihtuah a ngai mai thei. Chutiang inhnialna ata chu inhnûkdâwk rawh. Thinurna a reh hnu chuan, harsatna chu inrem taka i tihven theih a rinawm a ni. Engemaw châng chuan, ṭanpuitu tûra Kristian enkawltu puitling koh chu a finthlâk mai thei. Chutiang mi khawngaih thei tak leh thiltawn nei tawhte chu nupa inremna a derthâwn laia mi chhâwkzângkhaitu an ni châwk ṭhîn a ni.—Isaia 32:1, 2.
Kohhrana Remna Siamtute
15. Jakoba sawi angin, Kristian ṭhenkhatte zîngah eng rilru put hmang ṭha lo tak nge lo chhuak a, engvângin nge chu rilru chu “khawvêl,” “ramsa ang,” leh “ramhuaia mi” a nih?
15 Lungchhiat thlâk takin, kum zabi pakhatnaa Kristian ṭhenkhatte chuan îtsîkna leh inelna thlarau an lantîr a, chu chu remna ep chiah a ni. Jakoba chuan tihian a sawi: “Chu finna chu chung lam aṭang lo chhuk chu a ni lo va, khawvêl leh taksa châkna [“ramsa ang,” NW] leh ramhuaia mi a ni zâwk e. Inîtsîkna leh inelna awmnaah chuan buaina leh thiltihsualna tinrêng a awm ṭhîn,” tiin. (Jakoba 3:14-16) Ṭhenkhat chuan “inelna” tia lehlin Grik thu mal hian dinhmun lama mahni hmasialna, nihna inchuh buaina a kawh an ring. Chuvângin, Jakoba’n “khawvêl leh ramsa ang leh ramhuaia mi” tia a vuah hi a inhmeh hle. Mihring chanchin pum puiah hian khawvêl hruaitute hi ramsa kawlh insual ang maiin, an inel êm êm reng mai a ni. Chuvângin, inelna chu “khawvêl” leh “ramsa ang” nihna a ni ngei mai. Tin, “ramhuaia mi” a ni bawk. He rilru put hmang hlauhawm tak hi nihna châk ngawih ngawih vântirhkoh chuan a lantîr hmasa a; chu chuan Pathian Jehova dodâltu, ramhuaite hotu Setana a nihtîr a ni.
16. Kum zabi pakhatnaa Kristiante khân engtin nge Setana rilru ang an lantîr?
16 Inelna rilru put hmang chuan remna a kalh tlat avângin Jakoba chuan do tlat tûrin Kristiante chu a fuih a. Hetiang hian a ziak: “In zînga indona leh inhnialnate hi khawi aṭanga lo chhuak nge ni? In taksa pêngahte indona siam ṭhîntu, in duhzâwng aṭangte chuan lo chhuak a ni lo vem ni?” tiin. (Jakoba 4:1) Heta “duhzâwng” a tihah hian neihnun châkna emaw, hmingthan châkna emaw, mite thunun theih châkna emaw, a nih loh leh mi chunga huhâng neih châkna a kâwk thei a ni. Setana ang bawkin, kohhrana mi ṭhenkhatte chuan, Isua’n a hnungzuitu dik takte nih dân tûr nia a sawi ‘tê ber’ nih ai chuan mi langsâr nih an duh zâwk a ni. (Luka 9:48) Chutiang rilru chuan kohhrana remna awm chu a tibo thei a ni.
17. Tûnlaia Kristiante chu engtin nge kohhranah remna siamtu an nih theih?
17 Tûn laiah pawh, khawvêl thil âtchilhna te, îtsîkna te, a nih loh leh thiltum duhâm thlâk takte chu kan do tlat tûr a ni bawk. Remna siamtu dik tak kan nih chuan, kohhrana tuemaw chu keimahni aiin rawngbâwlna kawng ṭhenkhatah an thiam zâwk a nih pawhin thiam lo zâwk nih kan hreh lo vang a; an rilru put hmang chu ringhlelin, mi dangte hriatah kan sawichhe hek lo vang. Thiamna ṭha tak kan nei a nih pawhin, kan thiamna leh theihna avânga kohhran hi changtlung anga lantîr tum ang hrimin, mi dangte aia kan ṭhat zâwk nân kan hmang lo vang. Chutiang rilru put hmang chuan inṭhendarhna a siam a; remna a thlen thei lo. Remna siamtu chuan an thiamnate chu alang apauvin an lantîr ngai lo va, an unaute rawng bâwlsak nân leh Jehova chawimawi nân inngaitlâwm takin an hmang zâwk ṭhîn. Anni chuan theihna ni lovin, hmangaihna chu Kristian dikte chhinchhiahna a ni zâwk tih an hre tlat a ni.—Johana 13:35; 1 Korinth 13:1-3.
“Remna Chu I Hotuah”
18. Engtin nge upate’n an zîngah remna an awmtîr?
18 Remna siam kawngah chuan kohhrana upate chuan hma an hruai a. Jehova chuan a mite chungchâng chu hetiang hian a sawi lâwk a ni: “Remna chu i hotuah ka ruat bawk ang a, felna chu nangmah phûttuah ka ruat ang,” tiin. (Isaia 60:17, NW.) He hrilh lâwk thu nêna inmil hian, Kristian berâmpu rawng bâwltute chuan anmahni inkârah leh an berâmte zîngah remna siam tumin an thawk rim a ni. Upate chuan “chung lam aṭanga finna” remna leh hriatthiamna chu lantîrin an zîngah remna an vawng a ni. (Jakoba 3:17) Thil tawn chi hrang hrang nei leh lo chhuahna thuhmun an nih loh hlawm avângin, upate pawh hian ngaihdân inan loh châng an nei ṭhîn. Chutiang hunah chuan remna an thlachham ta tihna em ni? Chutiang dinhmun chu a nihna tûr ang taka chinfel a nih chuan remna an tlachham tihna a ni lo. Remna siamtute chuan an ngaihdân chu inngaitlâwm takin an sawi chhuak a; tichuan, mi dangte ngaihdân chu zah takin an ngaihthlâksak a ni. Mahni ngaihdân ringawta kaltîr tum ai chuan, remna siamtu chuan a unaute ngaihdân pawh ngun takin a ngaihtuah zâwk ang. Bible dân bulte a kalh loh phawt chuan, ngaihdân chi hrang hrang a awm thei ṭhîn. Tichuan, mi dangin a ngaihdân an pawm lo a nih chuan, remna siamtu chuan a tam zâwk thu tlûkna siam chu a zâwmin a thlâwp ang. Chutiang chuan mi nunnêm tak a nihzia a lantîr tihna a ni ang. (1 Timothea 3:2, 3) Thiltawn nei hotute chuan mahni ngaih dâna thiltih ai chuan, remna humhim chu a pawimawh zâwk tih an hria a ni.
19. Engtin nge upate’n kohhranah remna an siam?
19 Upate chuan an berâmte chunga ṭanpui leh an thawhrimnate chunga lâwm thiamna lantîrin anmahni nên remna an siam a. Dik takin, ṭhenkhat chuan siam ṭhat mamawh châng an nei ṭhîn. (Galatia 6:1) Nimahsela, Kristian hotu hna ber chu zilhna pêk a ni lo. Fakna pawh a pe fo bawk a ni. Hmangaihna nei upate chuan mi dangte ṭhatna hmuh an tum rân a. Hotute chuan an Kristianpuite thawhrimna chu an hlut a, theih tâwp an chhuah ṭheuh tih an ring tlat a ni.—2 Korinth 2:3, 4.
20. Mi zawng zawng remna siamtu an nih chuan eng kawngin nge kohhranin a hlâwkpui?
20 Tichuan, chhûngkuaah te, kohhranah te, leh kan rinna min ṭawmpui ve lote dâwrnaah te chuan inremna atân an thawkin, remna siamtu nih an tum ṭâng ṭâng a ni. Taima taka remna kan siam chuan kohhran hlimna kan ti pung tihna a ni ang. Chutih rual chuan, thuziak leha kan hmuh tûr angin kawng tam taka humhim leh tihchakin kan awm ang. (w01 9/1)
I Hre Chhuak Em?
• Remna siam tih awmzia hi eng nge ni?
• Thuhretu ni lote kan dâwr hunah engtin nge remna kan siam theih?
• Chhûngkuaa remna siam dân kawng ṭhenkhat chu eng nge ni?
• Engtin nge upate’n kohhranah remna an siam theih?
[Zirlai Atâna Zawhnate]
[Phêk 9-naa milem]
Remna siamtute chuan chungnung zâwk anga inlantîr an pumpelh
[Phêk 10-naa milemte]
Kristiante chu rawngbâwlnaah te, inah te, leh kohhranah te hian remna siamtu an ni