Rilru Put Hmang Inang Lo Unau Pahnih

NU LEH PATE thu tlûkna siam hian an fate chungah nghawng a nei ngei ngei a. Chu chu hmân lai Eden huana mi angin, tûn laiah pawh a thleng dik a ni. Adama leh Evi helna chuan mihring zawng zawngte chungah nghawng nasa tak a nei a. (Genesis 2:​15, 16; 3:​1-6; Rom 5:12) Mahse, kan duh phawt chuan, Siamtu nêna inlaichînna siam ṭhat theihna hun ṭha kan nei ṭheuh va. Chu chu, mihringte zînga unau piang hmasa ber, Kaina leh Abela te chanchin aṭangin a hriat theih a ni.

Pathianin Eden huan aṭanga Adama leh Evi a hnawh chhuah hnu khân, anmahni a biak zawm leh zawm loh chungchâng chu Bible chuan a sawi lo va. Mahse, Jehova chuan an thlahte chu a be zêl tho a ni. Kaina leh Abela chuan an nu leh pate hnên aṭangin thil awmdân chu an hre ngei ang a. ‘Nunna thing kawng vêngtu . Cherub-te leh mei khandaih vir tawn zawk zawk chu’ an hmu thei a ni. (Genesis 3:24) Tin, thlantui leh hrehawm tuar tûra Pathian thu puan chhuah dikzia pawh an hre bawk a ni.​—Genesis 3:​16, 19.

Kaina leh Abela chuan rûlpui hnêna Jehova thusawi: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” tia a hrilh pawh kha an hriat ngei a rinawm. (Genesis 3:15) Kaina leh Abela’n Jehova chanchin an hriatte chuan, pawm tlâka amah nêna inlaichînna siam tûrin a ṭanpui thei a ni.

Jehova hrilh lâwkna leh hmangaih taka mi Chhawmdâwltu a miziate ngaihtuahna chuan Kaina leh Abela chu Pathian pawm mi nih duhna a neihtîr a ni ngei ang. Mahse, chutiang Pathian pawm mi nih duhna chu eng chen nge an chhawmnun dâwn? An pianpui Pathian chibai bûk duhna chu chhâng lêtin, amaha rinna lantîr tûr khawp hialin thlarau lamah hma an sâwn ang em?​—Matthaia 5:⁠3, NW.

Unau Pahnihte’n Thil Hlan An Rawn Keng

Nakinah chuan, Kaina leh Abela chuan Pathian hnêna thil hlan tûr an rawn keng ve ve a. Kaina chuan a lova thlai rahte a rawn keng a, Abela pawhin a ran rual zînga piang hmasa berte a rawn keng bawk a. (Genesis 4:​3, 4) Chutih lai chuan kum 100 mi vêl an nih a rinawm; Adama’n fapa Setha a neih khân ani chu kum 130 mi a nih avângin.​—Genesis 4:​25; 5:⁠3.

Thil an hlan aṭangin Kaina leh Abela te chuan mi sual an ni tih chu an inhria a, Pathian duhsakna dawn an duh a ni tih a hriat theih a. Hmeichhe thlah leh rûl thlah chungchânga Jehova thusawi chungchâng chhe tê tal chu an ngaihtuah ngei ang. Kaina leh Abela chuan Jehova nêna inlaichînna siam nân engtin nge an thawh rim a, hun engzât nge an pêk tih chu sawi lan a ni lo. Mahse, an thil hlante Pathian chhân lêt dân chuan an thinlung chhûngril ngaihtuahna min hriatthiamtîr a ni.

Kaina a pian khân, Evi’n: “LALPA ṭanpuiin mipa ka lo nei ta,” a tih avâng hian mi thiam ṭhenkhat chuan Evi hian Kaina chu rûlpui tiboraltu tûr ‘chi thlah’ niah a ngai niin an sawi. (Genesis 4:⁠1) Kaina pawhin chutiang bawk ngaih dân a nei a nih chuan, a ngaisual chiang hle tihna a ni. A leh lamah ve thung chuan, Abela chuan rinnain thil hlan chu a hlân a ni. Chuvângin, “rinnain Abela chuan Kaina ai chuan inthawina ṭha zâwk Pathian hnênah a hlân,” a ni.​—Hebrai 11:⁠4.

Abela’n thlarau lam hriat thiamna a neih leh Kaina’n a neih ve loh chu an unau inan lohna awmchhun a ni lo. An rilru put hmang pawh a  danglam êm êm a ni. Chuvângin, “LALPA chuan Abela leh a thil hlan chu a lâwm a: Kaina leh a thil hlan erawh chu a lâwm ve lo va.” Kaina chuan a thil hlanah a rilru tak tak pe lovin, a rûn dâl chauhvin a hlân a nih ngei a rinawm. Mahse, Pathian chuan a hming maia amah chibai bûk chu a duh si lo. Kaina chuan rilru sual a nei a, Jehova chuan chu chu a hria a ni. A thil hlan hnâwl a nih huna Kaina chhân lêt dân chuan a rilru put hmang dik tak a târ lang a. Insiamṭhat tum ai mahin, “Kaina chu a thinur êm êm a, a hmêl chu a lo dur ta khup a.” (Genesis 4:​5) A awm dân chuan a rilru leh ngaihtuahna sualzia chu a târ lang a ni.

Vaukhânna leh A Chhânlêtna

Kaina rilru puthmang chu a hriat avângin Pathian chuan: “Engati nge i thin a ur? Engati nge i hmêl a lo dur tâk? Thil i tih ṭhat chuan lawm i hlawh dâwn lo vem ni? I tih ṭhat loh erawh chuan sual chu kawngka bulah a bawk reng a ni; a duhzâwng chu nangma hnên lam a ni ang a, a chungah thu i nei tûr a ni,” tiin a zilhhau va.​—Genesis 4:​6, 7.

Heta ṭang hian zir tûr kan nei a ni. Min man tumin sual chu kawngka bulah a bawk reng a ni. Chutiang chu ni mah sela, Pathian chuan mahnia duh thlan theihna min pe a, thil ṭha tih kan thlang thei a ni. Jehova chuan Kaina chu ‘thil ṭha tia’ inlamlêt tûrin a sâwm a; mahse, a tilui lo. Kaina chuan a kawng duhzâwng a thlang a ni.

Pathian thâwk khum thu chuan heti hian a sawi zawm a: “Kaina chuan a nau Abela hnênah, ‘Lovah i feh ang’ a ti a. Tin, heti hi a ni a, lova an awm laiin Kaina chuan a nau Abela chu a bei a, a that ta mai a,” tiin. (Genesis 4:⁠8) Tichuan, Kaina chu thuâwih lo, râwng taka tualthattu a lo ni ta a ni. Jehova’n: “I nau Abela kha khawiah nge a awm tâk?” tia a zawh pawh khân, inchhîrna chhe tê pawh a lantîr lo. Kaina chuan pawisakna nei hauh lo leh luhlul takin: “Ka hre lo. Ka nau vêngtu ka ni em ni?” tiin a chhâng zâwk mah a ni. (Genesis 4:⁠9) Chu dâwt thu chiang tak leh a thiltih chunga mawhphurhna a lâk duh lohna chuan Kaina nunrâwnzia a târ lang a ni.

Jehova chuan Kaina chu Eden huan bul ata a hnawt chhuak ta a. Lei anchhe lawh tawh chuan Kaina tân anchhia a lawh lehzual niin a lang a, lei a leh pawhin lei chuan a ṭhatna a pe phal dâwn lo va. Leiah hian tlân bo leh vâkvai mai a lo ni tawh ang. Kaina’n a hremna dawn râpthlâk tak a sawisêlna chuan, a unaupa a thah avânga a chunga phuba lâk a hlauhzia a târ lang a; mahse, inchhîrna dik tak a lantîr chuang lo. Jehova chuan Kaina chu a “chhinchhiah” ta a ni​—chu a chhinchhiahna chu amah tihluma, phuba an lâk lohna tûr dân khauh tak, mi dangte hriat leh zawm a chhuah chu a nih a rinawm.​—Genesis 4:​10-15.

“Tichuan, Kaina chu LALPA hnên ata chu a chhuak a, Eden chhak lama Nod ramah chuan a awm ta a.” (Genesis 4:16) A farnu emaw, a tunu emaw zînga mi chu nupuia neiin, a fatîr Enoka hming chawiin khawpui a din a. Kaina thlah Lameka chu a thlahtu Pathian ngaihsak lo mite ang bawkin tha rum thawh mi a lo ni chho va. Mahse,  Kaina thlahte zawng zawng chu Nova hun laia Tuilêtah tihboral vek an ni.​—Genesis 4:​17-24.

Kan Zir Tûr Chu

Kaina leh Abela chanchin aṭang hian zir tûr kan nei a ni. Tirhkoh Johana chuan Kristiante chu, “Kaina, mi sual laka mi, mahni unau thattu ang khân awm lovin,” inhmangaih tawn tûrin min fuih a. Kaina “thiltihte a sual a, a unau thiltihte a fel” a ni. Johana chuan heti hian a sawi bawk: “Tupawh a unau hua chu tualthat a ni: tualthattu tumah chatuana nunna pai reng rêng an awm lo tih in hre si a,” tiin. A ni, kan Kristianpuite kan cheibâwl dân chuan Pathian nêna kan inlaichînna leh nakin hun beiseina chu a nghawng tak zet a ni. Kan rinpuite haw reng chungin Pathian pawmna kan dawng thei lo.​—1 Johana 3:​11-15; 4:20.

Kaina leh Abela chuan enkawlna thuhmun an dawng ngei ang a; mahse, Kaina chuan Pathiana rinna a tlachham a ni. A dik a dik chuan, Diabola, atîr ata ‘tualthat leh dâwt pa’ rilru chu a lantîr a. (Johana 8:44) Kaina nun kawng chuan kan za hian duhthlan tûr kan nei vek a, sual thlang chuan Pathian lak ata anmahni leh anmahni an intihrang a; tin, Jehova chuan sual sim duhlote chungah a rorêlna a thlentîr ṭhîn a ni tih a târ lang.

Abela erawh chuan Jehova laka rinna a lantîr a. “Rinain Abela chuan Kaina ai chuan inthawina ṭha zâwk Pathian hnênah a hlân a, chu mi avâng chuan mi fel a ni tih hriattîrna a hlawh a, Pathianin a thilpêkte kawngah chuan thu a hriattîr a.” Pathian Lehkha Thu chuan Abela ṭawngkam chhuak pakhat mah sawi lang lo mah se, a rinna entawn tlâk tak mai hmang chuan “thu a la sawi ta fo a ni.”​—Hebrai 11:⁠4.

Abela chu rinawmna vawng tlattu mi tam takte zînga a hmasa ber a ni a. ‘Lei aṭanga Jehova autu’ a thisen chu theihnghilh a ni lo. (Genesis 4:10; Luka 11:​48-51) Abela anga rinna kan lantîr chuan, keini pawhin Jehova nêna inlaichînna hlu tak, chatuan daih chu kan nei thei a ni. (w02 1/15)

[Phêk 32-naa bâwm]

LO NEITU LEH BERAM VENGTU

Ran enkawl leh lei leh chu Pathianin atîra Adama hnêna mawhphurhna a pêkte zînga mi a ni a. (Genesis 1:28; 2:15; 3:23) A fapa Kaina chuan lei a let a, Abela erawh chu berâm vêngtu a lo ni a. (Genesis 4:⁠2) Tuilêt hma zawng chuan mihringte chaw chu thei leh thlaihnah chauh a ni si a, chutiang ni siin engvângin nge berâm an vulh?​—Genesis 1:29; 9:​3-4.

Berâmte chuan an lo pun theih nân mihring enkawlna an mamawh a. Abela hna thawh hian mihringin hêng rante hi atîr tê aṭangin an vulh ṭan a ni tih a târ lang a ni. Pathian Lehkha Thu chuan Tuilêt hmaa mite chuan ran hnutê chu chawa an rin leh rin loh a sawi lang lo va; mahse, sa ei ngai lote pawhin berâm hmul chu an hmang thei a ni. Chu bâkah, berâm thite vun chu a ṭangkai em em a ni. Entîr nân, Adam leh Evi hâk atân Jehova chuan “savun kawrfualte” a siamsak a ni.​—Genesis 3:21.

Engpawh ni se, Kaina leh Abela chu atîrah chuan an inthurual hle tih chu a hriat theih a. An chhûngkuaa mi dangte thawmhnaw hâk tûr leh ei leh in tûr an thawk chhuak dûn a ni.

[Phêk 31-naa milem]

Kaina “thiltihte chu a sual a, a unau thiltihte chu a fel”