Jehova Chuan Inbumna A Hua
Jehova Chuan Inbumna A Hua
‘Unau leh unau inbum suh u.’—MALAKIA 2:10.
1. Chatuan nunna nei tûr chuan Pathianin eng nge min phût?
CHATUANA NUN chu i duh em? Bible-a tiam chu beiseina chu i ring a nih chuan ‘Dâwn lâwm ni’ i ti ngei ang. Mahse, Pathianin a khawvêl thara chatuan nunna a pêk che i duh chuan a thil phûtte i tlin a ngai ang. (Thuhriltu 12:13; Johana 17:3) Chutiang ti tûra mihring ṭha fam kim lote beisei chu thil âwm lo a ni em? Ni lo ve, Jehova chuan: “Inthawina duh lovin khawngaihna ka duh si a; hâlral thilhlan aite chuan Pathian hriatna ka duh zâwk a ni,” a ti. (Hosea 6:6) Chuvângin, thil sual tih hrât mihringte pawhin Pathian thil phûtte an tlin thei a ni.
2. Engtin nge Israelte chuan Jehova chunga vervêk taka an tih?
2 Nimahsela, mi zawng zawngin Jehova duhzâwng tih chu an duh lo. Israel mi tam takte pawhin, Jehova duhzâwng tih chu an duh lo tih Hosea chuan a târ lang a ni. A hnam pumin, Pathian dânte zâwm tûra thuthlung siam, intiamkamna siam chu an remti a. (Exodus 24:1-8) Mahse, rei lote hnuah a dânte bawhchhiain, “thuthlung chu an bawhchhia” a ni. Chuvângin, Jehova chuan Israel mite’n “vervêk takin” a chungah an tih thu a sawi a ni. (Hosea 6:7) Chuta ṭang chuan mi tam takin an tih zawm ta zêl a ni. Jehova chuan a chunga vervêk taka tih, a nih loh leh amah bumna emaw, amah hmangaih avânga a rawngbâwltute bumna emaw pawh ni se, inbumna hrim hrim hi a hua a ni.
3. He zir tûr thuziakah hian eng nge sawiho ni dâwn?
3 Hosea chu bumna chungchâng Pathian thlîr dân puang chhuaktu awmchhun a ni lo. Chu thlîr dân chu nun hlim taka hman kan inbeisei a nih chuan kan neih ngei tûr thlîr dân a ni. Thu ziak hmasaah khân, Malakia hrilh lâwk thu tam tak chu bung khatna aṭanga ṭanin kan sawiho tawh a. Tûnah chuan chu mi lehkhabu vêk bung hnihna en ila; bumna chungchâng Pathian thlîr dân chu ngaihsak tlâk a nihzia kan hmu ang. Malakia sawi chu Pathian mite Babulon aṭanga an lo kîr hnu, kum sâwmbi engemaw zâta an dinhmun chungchâng ni mah se, he bung hnihna hian tûn laiah kan tân awmzia a nei hle a ni.
Puithiam Demawmte
4. Eng vaukhânna nge Jehova’n puithiamte a pêk?
4 Bung 2-na chu puithiamte’n Jehova felna kawngte an pênsan avânga a demna thuin a inṭan a. A zilhhauna thu an ngaihthlâk loh va, an kawngte an siamṭhat duh loh chuan, a sawhkhâwk râpthlâk tak chu a lo thleng ngei ang. A châng hmasa pahnihte hi lo chhinchhiah teh: “Puithiamte u, he thupêk hi nangmahni tân a ni e. Ka hming tiropui tûra in ngaihthlâk lohva, thinlunga in vawn loh chuan in chungah ânchhia ka rawn thlentîr ang, Sipaihote LALPA chuan a ti, in malsâwmna dawnte chu ânchhia ka lawh ang,” a ti. Puithiamte chuan mipuite chu Pathian dânte zirtîrin, anmahni’n zâwm bawk sela chuan malsâwmna chu an chang mai tûr. Mahse, Pathian duhzâwng an ngaihthah avângin, malsâwmna aiah ânchhia an chungah a rawn thleng dâwn a ni. Puithiam malsâwmnate pawh ânchhiaah a chang vek dâwn a ni.
5, 6. (a) Engvângin nge puithiamte chu an demawm zual bîk? (b) Engtin nge Jehova’n puithiamte a hmusitzia a târ lan?
5 Engvângin nge puithiamte’n dem an hlawh zual bîk? Châng 7-na chuan a chhan chiang takin min hrilh a ni: “Puithiam hmuite chuan hriatna a vawng tûr a ni si a, a kâ aṭangin dân chu an zawng ṭhîn tûr a ni; ani chu Sipaihote LALPA tirhkoh a ni si a,” tiin. Chu mi hma kum sângkhat aia tam kalta khân, Israelte hnêna Pathian dân Mosia hmanga pêkah chuan puithiamte chuan ‘LALPAN Mosia hmanga an hnêna a sawi, thupêk zawng zawngte chu Israela thlahte zirtîr tûrin’ mawhphurhna an nei tih a lo sawi tawh a. (Leviticus 10:11) Lungchhiat thlâk takin, a hnuah chuan 2 Chronicles 15:3 ziaktu chuan: “Israel mite chu rei tak Pathian tak nei lo leh zirtîrtu leh puithiam nei lo leh dân nei lovin an lo awm a,” tiin a ziak a ni.
6 B.C.E., kum zabi panganaa Malakia hun laiah pawh, puithiamho dinhmun chu a la pângngai reng a. Mipuite chu Pathian Dân an zirtîr lo a ni. Chuvângin, chûng puithiamte chuan dem an phû hliah hliah a ni. An laka Jehova ṭawngkam khauh tak hi lo chhinchhiah teh. Malakia 2:3 chuan: “In hmaiahte chuan êk ka tât pherh ang, in kûtna êk ngei chu,” a ti. Zilhna nasa tak a va ni êm! Inthawina ran êk rêng rêng chu daipâwn lama kalpui a, hâl tûr a ni a. (Leviticus 16:27) Mahse, chutianga ti lovin, êk chu an hmaia a tah pherh zâwk tûr thu a hrilh a, chu chuan an thil hlan leh a hlântute chu a tenin, a hnâwl ve ve a ni tih a târ lang a ni.
7. Engvângin nge Jehova chu Dân zirtîrtute lakah a thinrim?
7 Malakia hun hma kum zabi engemawzât kalta khân, Jehova chuan biak bûk leh a hnua biak in leh rawngbâwlna thianghlim chu enkawl tûrin Levia mite a ruat a. Anni chu Israel hnam zirtîrtute an ni. An hna hlen chhuah chu anmahni leh an ram tâna nunna leh remna a ni ang. (Numbers 3:5-8) Nimahsela, Levia-hote chuan atîra Pathian ṭihna an neih kha an hloh a. Chuvângin Jehova chuan: ‘Kawng ata chu in lo pêng ta a; dânah chuan mi tam tak in petektîr a; Levia thuthlung chu in tichhia a ni . . . ka kawngte tumah zawh in awm lo’ tiin anni chu a hrilh a ni. (Malakia 2:8, 9) Mi dangte thutak an zirtîr lohna leh an entawn tûr siam ṭha lo takte hmangin puithiamte chuan Israel mite chu an hruai sual a; chuvângin, an chunga Jehova a thinrim chu a âwm hle a ni.
Pathian Tehnate Zâwmin
8. Pathian tehnate zâwm tûra mihringte beisei chu thil harsa lutuk a ni em? Hrilhfiah rawh.
8 Chûng puithiamhote chu mihring ṭha famkim lo an ni a, Pathian tehnate zâwm thei tûra beisei theih an ni lo; chuvângin, ngaihdam leh hriatthiam an phu a ni tih ngaih dân i nei lo vang u. A nihna takah chuan mihringte chuan Pathian thupêkte chu an zâwm thei a ni: Jehova hian an theih tâwk bâk engmah a phût loh avângin. Chutih laia puithiam ṭhenkhatte pawh chuan Pathian tehnate chu an zâwm ni âwm tak a ni a; chu mi hnuah phei chuan rinhlelh rual lova zâwmtu mi pakhat a awm a ni—Isua, “Puithiam Lalber” chu. (Hebrai 3:1) Chuvângin, a chungchâng thu chu: “Thutak dân chu a kâah a awm a, thu sual a hmuiah a awm lo: thlamuang tak leh ngîl takin ka hmâah a lêng ṭhîn a, mi tam tak an khawlohna ata a lamlêttîr a ni,” tiin dik taka sawi theih a ni.—Malakia 2:6.
9. Tute’n nge kan hunah hian rinawm taka thutak sem chhuak?
9 Chutiang bawkin, tûn laia Krista unau hriak thih, vân lam beiseina neite chuan “Pathian lâwmzâwng thlarau lam inthawina hlân tûrin puithiam thianghlimho” angin kum zabi khat aia rei rawng an bâwl tawh a. (1 Petera 2:5) Mi dangte hnêna Bible thutak sem chhuahnaah hma an hruai a ni. An zirtîr thutakte chu i han zir hian, i thiltawnte aṭangin an kâah hian thutak dân a awm tih i hre thei a ni lâwm ni? Mi tam takte chu sakhaw dik lote kalsan tûrin an ṭanpui tawh a; chuvângin, tûnah chuan khawvêl pum puiah mi maktaduai tam takte chuan Bible thutak zirin, chatuan nun beiseina an nei tawh a ni. Tichuan, chûng mite chuan mi maktaduai tam tak dangte hnêna thutak dân zirtîr lehchhâwnna chanvo an nei a ni.—Johana 10:16; Thu Puan 7:9.
Fîmkhurna Tûr Chhan
10. Engvângin nge fîmkhurna tûr chhan kan neih?
10 Nimahsela, fîmkhur chhan tûr kan nei. Malakia 2:1-9-a zir tûr awm hi kan hmaih theih avângin. Fel lohna thu kan hmuia a awm loh nân kan fîmkhur tâwk em? Entîr nân, kan chhûngkaw zînga mite’n kan thusawi an ring tak tak em? Kohhrana kan thlarau lam unaute’n kan thusawi an ring em? Mi thusawi chu dik ve si; mahse, mi dang bum nâna awmze dang nei tûra lâk kawisak chîn hi a awlsam hle. A nih loh leh, mi chuan an sumdâwnna chanchin kipkawi chu a thup emaw, a sawi uar zâwk emaw a ni thei. Jehova chuan chûng chu a hmu dâwn lo vem ni? Chutiang thilte kan chîn chuan, kan hmuite rah inthawina chu a pawm dâwn em ni?
11. Abîk takin, tute tân nge fîmkhur ngai?
11 Malakia 2:7 thu chu, tûn laia kohhrana zirtîrna chanvo chelhte tân vaukhânna a ni tûr a ni. Chutah chuan an hmuite chuan ‘hriatna a vawng tûr a ni si a, an kâ aṭangin dân thu an zawng ṭhîn tûr a ni,’ tih a inziak a ni. Jakoba 3:1 pawhin, ‘rorêlna nasa lehzual an tâwk ang’ a tih avângin, chutiang zirtîrtute chuan mawhphurhna nasa tak an nei a ni. Phûr tak leh theih tâwp chhuaha zirtîr tûr an nih laiin, an zirtîrna chu Pathian Thu ṭanchhan leh Jehova inawpna pâwl hmanga lo kal kaihhruainaah a innghat bawk tûr a ni. Chutiang chuan “mi dangte zirtîr chhâwng thei” tûrin an lo tling dâwn a ni. Chuvângin, anni chu: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tia zilh an ni.—2 Timothea 2:2, 15.
12. Mi dang zirtîrtute chu eng kawngah nge an fîmkhur a ngaih?
12 Kan fîmkhur loh chuan, kan zirtîrnaah mi mal duhzâwng emaw, ngaih dân emaw pawh telh duh châng kan nei thei a. Chu chu Jehova inawpna pâwl zirtîrna a kalh hun pawha mahni ngaih dân ring tlattu tân a hlauhawm zual a ni. Nimahsela, Malakia bung 2-na chuan kohhrana zirtîrtute chu berâmte tlûktîr thei mi mal ngaih dân ni lovin, Pathian hnên aṭanga an dawn hriatna chu vuan tlat tûrin kan beisei tûr a ni tih min hrilh a. Isua chuan: “Tupawh hêng mi ringtu mi tête zînga pakhat pawh titlu apiang chu, an nghâwngah buh râwt sawmna lung lianpui awrhtîrin tuifinriat thûk laiah thlâk daih sela an tân a sâwt zâwk ang,” a ti a ni.—Matthaia 18:6.
Ring Lo Mi Nêna Inneihna
13, 14. Malakia târ lan inbumna kawng khat chu eng nge ni?
13 Châng 10-na aṭang hian Malakia bung 2-na chuan inbumna chungchâng chu chiang lehzualin a sawi lang a. Ani chuan nungchang inkungkaih pahnih chungchâng a sawinaah “bum,” tih thu mal chu a hmang nawn ṭhîn a ni. A hmasa berin, Malakia chuan hêng zawhnate hmang hian a zilhna thu chu a ṭan a: “Kan vaiin pa hmun kan ni lo vem ni? Pathian pakhat siam pawh kan ni lo vem ni? Engati nge kan pate thuthlung tibawrhbânga, unau leh unau kan inbum ṭhin?” tiin. Tichuan, châng 11-ah chuan, an inbumna chu “Jehova thianghlimna” tibawrhbâng ang tluk a ni tih a sawi belh a ni. (NW) Thil sual khûn khân tak an tihte chu engte nge ni? Chu mi châng chuan an kawng sual pakhat chu a târ lang: ‘Ram dang pathian fanute an nei’ tiin.
14 Kawng danga sawi chuan, Jehova hnêna hnam inpumpêk, Israelte zînga mi ṭhenkhat chuan Jehova chibai bûk lo mite an nei a. Thuziak chuan chutianga tih chu sual nasa tak a nihzia min hriat thiamtîr a ni. Châng 10-na chuan an vaiin pa hmun an nih thu a sawi a. Hei hi Jakoba (Israela ni bawk) emaw, Abrahama emaw a sawina a ni lo va, Adama a sawina lah a ni hek lo. Chu “pa hmun” a tih chu Jehova a ni tih Malakia 1:6 chuan a târ lang a ni. Israel hnam chuan amah nên inlaichînna an nei a, an pate nêna thuthlung an siamah an tel a ni. Chu thuthlunga dânte zînga pakhat chu: “Nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in neihtîr tûr a ni hek lo,” tih hi a ni.—Deuteronomy 7:3.
15. (a) Engtin nge ṭhenkhatin ring lo mi an neihna chu thiam inchantîr an tum? (b) Engtin nge Jehova chuan inneihna chungchângah a ngaih dân a puan chhuah?
15 Tûn laia mi ṭhenkhat chuan: ‘A! ka ngaihzâwng hi chu a fel êm! Nakinah chuan thutak a rawn pawm ve mai ang,’ an ti mai thei. Chutiang ngaihtuahna chuan Pathian thâwk khum vaukhânna thu: “Thinlung hi thil zawng zawng aiin bumhmang ber, chhe lailet dêr a ni a; tuin nge hre thiam thei ang?” tih hi a nemnghet a ni. (Jeremia 17:9) Ring lo mi neih chungchânga Jehova ngaih dân chu Malakia 2:12-ah hetiang hian târ lan a ni: “Hetiang ti chu, a tua-pawh . . . LALPAN a tifihlîm [“tiboral,” NW] vek ang,” tiin. Chuvângin, Kristiante chu “Lalpaa awm mi chauh” nei tûra fuih an ni. (1 Korinth 7:39) Kristian ruahmanna hnuaiah chuan ringtu chu ring lo mi a neih avânga ‘tihboral’ a ni lo va. Mahse, ring lotu chuan inthlâk danglam lo ta se, nakin lawka Pathianin he khawvêl a tihboral hunah chuan a chungah eng nge lo thleng dâwn?—Sâm 37:37, 38.
Kawppuite Chunga Nunrâwn
16, 17. Ṭhenkhatin eng inbumna kawng nge an zawh?
16 Malakia chuan bumna pahnihna a sawi leh a ni: a bîk takin dik lo taka ṭhenna hmanga kawppuite chunga nunrâwnna chu. Bung 2 châng 14-na chuan: “Nang leh i nupui tawntirh inkâra thu hretu chu LALPA a ni a, i kawppui leh i thuthlung nupui a ni nachungin a chungah bumna thil i tih ṭhin avâng a ni,” a ti. Juda pasalte chuan an nupuite bumna hmangin Jehova maichâm chu ‘mittuiin an tikhat’ a ni. (Malakia 2:13) Hêng mite hian an nupui tawntirhte aia naupang zâwk leh hnam dang hmeichhiate an neih theih nân, thiang lo takin an nupuite chu an ṭhen a. Puithiamte lahin an ngaithei bawk si! Mahse, Malakia 2:16 chuan: “‘Inmâk hi ka haw si a,’LALPA Israel-ho Pathian chuan a ti,” tiin a puang chhuak a ni. Chu mi hnuah, Isua chuan nungchang bawlhhlawhna chauh hi a kawppuiin zalên taka mi dang a neih theihna kawng awmchhun a ni tih a târ lang a ni.—Matthaia 19:9.
17 Malakia thu sawite khân mi pângngaite ngilneihna thinlung leh rilru a khawih leh khawih loh hriat nân ngun takin ngaihtuah teh. Ani chuan ‘kawppui leh thuthlung nupui’ chungchâng a sawi a. An zînga mi tin chuan Israel hmeichhia, an rinpui chu an dam chhûng kawppui tûr duh tak atân an thlang ṭheuh va. Anni chu an naupan laia innei an ni thei ang; mahse, hun lo kal zêl chuan inneihna thuthlung an thlun chu a tireh chuang lo a ni.
18. Eng kawngin nge inbumna chungchânga Malakia fuihna thu chu tûn lai atân pawh a nih?
18 He mi chungchânga zilhna thu hi tûn lai atân pawh a ni. Mi ṭhenkhatte’n Lalpaa awm mi chauh nei tûra Pathian kaihhruaina an ngaihsak lo chu a zahthlâk hle a. Tin, ṭhenkhatin an inneihna tinghet sauh sauh tûra hma an la duh lo pawh hi a pawi hle a ni. Chutiang tih ahnêkin, mahni inthiam chawpin mi dang an neih theih nân Pathian Lehkha Thu kalha an nupui pasal ṭhenin Pathian huat zâwng nun kawng chu an ûm a ni. Chutiang tiin ‘Jehova chu an tihah’ a ni. Malakia hun lai chuan, Pathian fuihna hnâwltute chuan Jehova thlîr dânte chu dik lovah an ngai hial a. “Rorêl felna Pathian chu khawiah nge?” an ti ngam hial a ni. Ngaihtuahna suaksual a va ni êm! Chutiang thangah chuan i tlu lût ve lo vang u.—Malakia 2:17.
19. Engtin nge nupui leh pasalte chuan Pathian thlarau an dawn theih?
19 A ṭha lam thlîr chuan, Malakia chuan a hun laia pasal ṭhenkhatte chuan an nupuite an bum ve lo tih a sawi a. Anni chuan ‘Pathian thlarau thianghlim châm bâng an la nei a ni.’ (Châng 15, NW) Hlimawm takin, tûn laia Pathian inawpna pâwlah chutianga ‘nupuite chawimawitu’ chu tam tak an awm a ni. (1 Petera 3:7) Anni chuan an nupuite chungah ṭawngkam ṭha lo an hmang ngai lo va, kut an thlâk ngai lo bawk a, mipat hmeichhiatna pawh ahlei ahluaka hmanpui an phût lui bawk lo va; hmeichhe dang ngaizâwngin emaw, saruak lemte enin emaw an nupuite an chawimawi lo ngai hek lo. Jehova inawpna pâwl chu Pathian leh a dân laka rinawm Kristian nupui rinawm tam taka malsâwm a ni bawk a ni. Chutiang mipa leh hmeichhiate chuan Pathian huatzâwngte chu an hria a, chu an hriatna mil zêl chuan an khawsa a ni. ‘Mihring thu aia Pathian thu awihin’ anmahni ang zêl la, thlarau thianghlim malsâwmna dawng zêl ang che.—Tirhkohte 5:29.
20. Mihring zawng zawngte tân eng hun nge hnai êm êm tawh?
20 Nakin lawkah, Jehova chuan he khawvêl pumpui chungah hian ro a rêl dâwn a. Mi tinin an rinna leh thiltih chanchin chu a hnênah an sawi ṭheuh dâwn a ni. “Kan zain Pathian hnênah mahni chanchin kan sawi ṭheuh tûr a ni.” (Rom 14:12) Zawhna ngaihven awm tak lo awm ta chu: Jehova nîah chuan tunge dam khaw chhuak ang? tih hi a ni. Chu mi thu chu he thuziak inzawm a pathumna leh a tâwpna ber hian a rawn sawi lang ang. (w02 5/1)
I Hrilhfiah Thei Em?
• Eng vângin nge Jehova chuan Israel puithiamte chu a dem?
• Engvângin nge Pathian tehnate chu mihringte tân zawm harsa lutuk a nih loh?
• Envângin nge tûn laia kan zirtîrnaah kan fîmkhur ang?
• Eng nungphung pahnihte nge Jehova’n a bîk taka a dem?
[Zirlai Atâna Zawhnate]
[Phêk 13-naa milem]
Malakia hun lai khân puithiamte chuan Jehova kawng an zawh loh avângin dem an hlawh
[Phêk 16-naa milemte]
Jehova chuan chhan ho tak taka an nupuite ṭhen a, milembetu nupuia neite chu a dem
[Phêk 16-naa milem]
Tûn laia Kristiante chuan an inneih thuthlung chu an chawimawi