Jehova Nîah Tunge Dam Khawchhuak Ang?
Jehova Nîah Tunge Dam Khawchhuak Ang?
‘Nî chu a lo thleng e, rawhtuina mei anga kâng chu.’—MALAKIA 4:1.
1. Engtin nge Malakia chuan he khawvêl suaksual tâwpna chanchin chu a sawi?
ZAWLNEI Malakia chu nakin lawka lo thleng tûr thilmak hlauhawm takte ziak chhuak tûrin Pathianin a thâwk khum a. Chûng thilte chuan leia mi zawng zawngte chu a nghawng dâwn a ni. Malakia 4:1 chuan heti hian a sawi lâwk a: “Ngai teh u, nî chu a lo thleng e, rawhtuina mei angin a kâng a ni; mi chapo zawng zawngte leh sual titu zawng zawngte chu buhpâwl an ni ang: chu ni lo thleng chuan anmahni a kâng ang; zung leh zâr chenin a zuah lo vang, sipaihote LALPA chuan a ti,” tiin. He khawvêl tihchhiatna chu engti fakauva nasa nge ni dâwn? Chawr leh tawh lo tûra a zung thlenga thing pawh phawi vek ang tluka nasa a ni ang.
2. Engtin nge Pathian Lehkha Thu ṭhenkhat chuan Jehova nî chungchâng an sawi?
2 ‘Zâwlnei Malakia hrilh lâwk chu eng “nî” nge?’ i ti mai thei. Isaia bung 13:9-a a sawi nî nên a inang chiah a ni, chu mi châng chuan: “Ngai teh, ram tiṭiau tûr leh chuta mi sualte chu a chhûng ata tiboral tûrin LALPA nî chu nasa takin thinrimna leh thinurna nasa tak nên, a lo thleng dâwn e,” a ti a ni. Tin, Zephania 1:15 chuan hetiangin a sawi bawk: “Chumi nî chu thinurna nî a ni a, mangan leh hrehawm nî, chhiatna leh ṭiauna nî, thimna leh khawdur nî, chhûm leh thim chhah mup nî a ni,” tiin.
“Hrehawm Nasa Tak”
3. “LALPA nî” chu eng nge ni?
3 Malakia hrilh lâwkna thlen famkimna ropui berah chuan, “Jehova nî,” chu “hrehawm nasa tak” tia a sawi hun a ni a. Isua chuan: “Chu mi hunah chuan hrehawm nasa tak a awm dâwn si a; chutianga nasa rêng rêng chu leilung pian tirh ata tûn thlengin a la awm ngai lo va, awm pawh engtikah mah a lo awm leh tawh hek lo vang,” tiin a sawi lâwk a ni. (Matthaia 24:21) Khawvêlin lungngaihna a hmachhawn tawh te, a bîk takin kum 1914 aṭanga a hmachhawnte chu han ngaihtuah teh. (Matthaia 24:7-12) Tihah chuan Khawvêl Indopui II-na ringawt pawh khân hring nun maktaduai 50 chuang a lâk si! Nimahsela, Isua’n “hrehawm nasa tak” lo thleng tûr chuan chûng chu a khûm dâwn tih a sawi a ni. Chu thil thleng chu, Jehova nî nêna thuhmun a ni a, chu chu Armageddon-ah a tâwp ang a, he khawvêl suaksual tak hi a titâwp ang.—2 Timothea 3:1-5, 13; Thu Puan 7:14; 16:14, 16.
4. Jehova nî tâwpnaah eng nge lo thleng dâwn?
4 Chu Jehova ni tâwpna lamah chuan, Setana khawvêl leh a thlâwptu zawng zawngte hi tihboral an ni ang. Sakhuana dik lo chu tihchhiat hmasak ber a ni ang a. Chu mi zawhah, Jehova rorêlna chu Setana politics leh sum dâwnna khawvêl lamah a ṭuan leh thung ang. (Thu Puan 17:12-14; 19:17, 18) Ezekiela pawhin: “An tangkarua leh an rangkachakte chuan LALPA thinurna nîah chuan a chhan chhuak thei lo vang,” tih a lo hrilh lâwk tawh a ni. (Ezekiela 7:19) Chu mi nî thu chu Zephania 1:14 chuan: “LALPA ni ropui tak chu a hnai e, a hnaiin a thleng thuai dâwn a ni,” tiin a sawi bawk. Jehova ni chungchâng Bible sawite avângin, Pathian thil phût felte mila nun chu kan tum tlat tûr a ni.
5. Jehova hming ṭihtute’n eng nge an tawn?
5 Jehova nîin Setana khawvêl a khawih chhiat dân tûr a hrilh lâwk hnuah Malakia 4:2-ah Jehova chuan: “Nangni ka hming ṭihtute tân erawh chuan felna nî, a thlaa tihdamna nên, a lo chhuak ang a, in kal chhuak ang a, bâwng note hrên lai thaukhawh angin in tualchai ang,” a ti a. “Felna nî” chu Isua Krista hi a ni. Ani chu thlarau lam “khawvêl êntu” a ni a. (Johana 8:12) Isua chu a hmasain thlarau lam tihdam theihna tûn laia kan tawn leh khawvêl thar lo awm tûra taksa lama tihdamna pumhlûm pe chhuakin a êng chhuak a ni. Jehova sawi angin, chûng tihdama awmte chu ‘bâwng note hrên lai zalêntîr thaukhawh angin an tualchai’ ang.
6. Jehova chhiahhlawhte chuan eng hnehna nge an lawm ang?
6 Jehova thil phût ngaihthahtute chu engtin nge an awm dâwn? Malakia 4:3 chuan: “Mi suaksualte chu in rap bet ang a [chu chu Pathian mite’n an rap bet dâwn tihna a ni]; nî ka ruatah chuan in kephah hnuaia meivâp an ni dâwn si a, sipaihote LALPA chuan a ti,” tiin a sawi. Pathian chibai bûktu mihringte chu Setana khawvêl tihchhiatnaah an tel lo vang. Jehova ni zawha ropui taka hnehna lawmnaa tel vena hmangin ‘mi suaksualte chu an rap bet zâwk ang.’ Pharaoa leh a sipaite kha Tuipui Sena tihboral vek an nih hnuah ropui taka lawm a nih kha. (Exodus 15:1-21) Setana leh a khawvêl tihboralna chu ropui taka lawm a ni zui dâwn a ni. Jehova nîa dam khawchhuak mi rinawm te chu: “A chhandamnaah chuan kan lâwmin kan hlim ang,” tiin an au chhuak ang. (Isaia 25:9) Jehova lal chungnunna thiam chantîr a nih a, khawvêl hi remnaa luah khah tûra tihfai a nih hun chuan lâwmna a va nasa dâwn êm!
Kristianna Ramin Israel A Entawn
7, 8. Malakia hun laia Israel ram thlarau lam dinhmun sawifiah rawh.
7 Jehova duhsakna dawngtute chu a rawngbâwltute an ni a, a bâwl lotute chuan an dawng ve lo. Malakia’n a lehkhabu a ziah lai pawh khân chutiang bawk chu a ni. B.C.E. 537-ah chuan Israel la bângte chu Babulona kum 70 chhûng an tân hnuah tihzalen an ni. Amaherawhchu, a hnu kum zabiah chuan Israelte chu an kal pêngin, suahsualna khurah an tlu lût leh ṭan ta a. Mi tam zâwkte chuan Jehova dân felte hlamchhiahin a hming an tichhia a, inthawina atâna ran mitdel te, kebai te, leh a silawngte kengin a biak in an tibawlhhlawh bawk a; tin, an tawntirh nupuite an ṭhen bawk a ni.
8 Chuvângin, Jehova chuan an hnênah: “Rorêl tûrin ka rawn hnaih dâwn a che u; dawithiamte, uirête, dâwta chhechhamtute chungah leh hmeithai leh fahrah leh inhlawhfa hlawh tikhawlova hnehchhiahtute leh hnam dang lo sathlatute leh mi ṭih lotute chungah chuan thu hretu ṭuanṭha tak ka ni ang, . . . kei Lalpa hi ka danglam si lo,” tih a hrilh a ni. (Malakia 3:5, 6) Chutichung pawhin, Jehova chuan: “Ka hnênah lo kîr ula, tichuan in hnênah ka lo kîr ang,” tiin tupawh an kawng ṭha lote bânsana a lam hawi leh duhte chu a la sâwm reng tho a ni.—Malakia 3:7.
9. Engtin nge Malakia hrilh lâwknain thlen famkimna hmasa a neih?
9 Hêng hrilh lâwknate hi C.E. kum zabi pakhatnaah pawh a thleng famkim bawk a. Juda la bângte chu thlarauva hriak thih Kristian, “hnam” thar zînga mi an lo ni a, chutah chuan Jentailte pawh an tel ta a ni. Nimahsela, tisa lam Israel tam tak chuan Isua chu an lo hnâwl a. Chuvângin Isua chuan Israel hnam hnênah chuan: “En teh u, in in chu aruaka hnutchhiah che uin a awm ta,” tiin a hrilh a ni. (Matthaia 23:38; 1 Korinth 16:22) Malakia 4:1-a sawi lâwk ang ngeiin, C.E. 70-ah chuan, ‘nî . . . rawhtuina mei anga kâng’ chu tisa lam Israelte chungah a lo thleng ta a. Jerusalem leh a biak in chu tihchhiat a ni a, ṭâm avâng te, thuneihna inchuhna avâng te, leh Rom sipaite beihna avângtein mi nuai sâwm chuang an thi a ni. Mahse, Jehova rawngbâwltute chuan chu hrehawmna chu an pumpelh a ni.—Marka 13:14-20.
10. Eng kawngin nge sakhaw hruaitute leh mipuite chuan kum zabi pakhatnaa Israelte an entawn?
10 Mihringte, a bîk takin Kristianna ram hian kum zabi pakhatnaa Israel hnamte chu an entawn a. Kristianna rama hruaitute leh mipuite chuan Pathian chungchâng thutak Isua zirtîrte ai chuan an sakhaw thupêk chhuahte chu an thlang zâwk a ni. Sakhaw hruaitute hlei hlei chu an demawm lehzual a. Jehova hming an hmang duh lo va, an Bible lehlin tam takah chuan a hming pawh an thai bo hial a ni. Pathian Lehkha Thua mi ni lo, Pathian chawimawi lo zirtîrna; meidîla chatuana nghaisakna te, milem betute thurin Trinity te, thlarau thi thei lo rinna te, leh chanchhâwnna rinna te hmangin Jehova an timualpho va. Hetiang hian Malakia hun laia puithiamte tih ang bawkin, Jehova dawn tûr chawimawina chu an rûk bosak a ni.
11. Engtin nge khawvêl sakhuate chuan a rawng an bâwla chu tu nge a nih an târ lan?
11 Kum 1914-a ni hnuhnûngte a inṭan aṭangin, Kristian nia inchhâlte kaihhruai khawvêl sakhuate chuan tu rawng nge an bâwl tih an tilang ta a. Khawvêl Indopui I-na leh II-na chhûng khân, an mi leh sate chu hnam inkâra indonaa tel tûr leh anmahni sakhaw anpuite ngei pawh that tûrin an fuih a ni. Pathian Thu chuan Jehova thu zâwmtu leh zâwm lotute chu chiang takin hetiang hian a târ lang: “He miah hian Pathian fate leh Diabola fate a hriat a ni; tupawh felna ti lo chu Pathiana chhuak a ni lo, a unau hmangaih lova pawh chu Pathiana chhuak a ni hek lo. Hei hi atîr ata thuchah in hriat kha a ni si a, kan inhmangaih tawh ṭheuh tûr a ni, tih hi; Kaina, mi sual laka mi, mahni unau thattu ang khân awm lovin,” tiin.—1 Johana 3:10-12.
Hrilh Lâwk Thu Thlen Famkimna
12, 13. Pathian chhiahhlawhte’n kan hunah hian eng hrilh lâwk thu nge an tihfamkim?
12 Kum 1918-a Khawvêl Indopui I-na tâwpah chuan, Pathian chhiahhlawhte chuan Pathianin Kristianna ram, leh sakhaw dik lo dang zawng zawngte chu thiam loh a chantîr tih an hre ta a. Chuta ṭang chuan: “Ka mite u, a sualnaahte in tel lohna tûr leh, a hremnate in hmuh ve lohna tûrin, a chhûng ata chhuak rawh u. A sualnate chuan vân pawh a tawng ta hial a, Pathianin a thiltih fel lote pawh chu a hre reng si a,” tih kohna chu mi rilru ṭhate hnênah tihchhuah a ni ta a ni. (Thu Puan 8:4, 5) Jehova rawng bâwl duhna rilru dik tak nei apiangte chu sakhuana dik lo aṭangin an inthliar fihlîm ṭan a, he khawvêl tâwp hmaa thawh zawh tûr, Lalram din tawh thu chanchin ṭha chu khawvêl pum pui ah an hril a ni.—Matthaia 24:14.
13 Hei hi, Malakia 4:5-a Jehova thu: “Ngai teh u, LALPA ni ropui leh râpthlâk tak a lo thlen hmâin zâwlnei Elija chu ka rawn tirh ang che u,” tih thlen famkim nân a ni. Chu hrilh lâwkna chuan, Elija-in a entîr lâwk, Baptistu Johana hna thawhah thlen famkimna hmasa zâwk a nei a. Johana chuan Dân thuthlung laka an sualnate aṭanga inlamlêt Judate simna baptisma a chantîr khân Elija hna thawh ang chu a thawk a. Chu aia pawimawh zâwk chu, Messia hmahruaitu a nihna chu a ni. Mahse, Johana hna thawh chu Malakia hrilh lâwk thu thlen famkim ṭanna chauh a ni. Isua chuan Johana chu Elija pahnihna anga sawiin, “Elija” hna thawh ang chu thawh zêl tûr a ni tih a târ lang a ni.—Matthaia 17: 11, 12.
14. He khawvêl tâwp hma hian eng hna pawimawh tak nge thawh zawh tûr a nih?
14 Malakia hrilh lâwkna chuan he Elija hna pawimawh tak hi ‘Jehova ni ropui leh râpthlâk tak’ lo thlen hmaa thawh zawh tûr a ni tih a târ lang a. Chu nî chu lo thleng thuai tûr Pathian Engkimtitheia ni ropui, Armageddon-ah a tâwp ang. Chu mi awmzia chu he khawvêl suaksual tâwpna leh Pathian van lam Lalram Awpna Kum Sângkhat a lo thlen hmain Elija hna thawh ang kha thawh a ni dâwn tihna a ni. Chu hrilh lâwkna ang ngeiin, Jehova’n he khawvêl suaksual a tihchhiat hma hian, tûn lai Elija ho hian, lei lam beiseina nei mi nuai tam takte ṭanpuinain biakna thianghlim dintharna hna te, Pathian hming chawimawina hna te, leh berâm ang rilru ṭha pute zirtîrna hna te chu phûr tak leh taima takin an thawk a ni.
Jehova’n A Chhiahhlawhte Mal A Sâwm
15. Engtin nge Jehova’n a chhiahhlawhte chu a hriat reng?
15 Jehova chuan a rawngbâwltute chu mal a sâwm ṭhîn a. Malakia 3:16 chuan: “Tichuan, LALPA ṭihtute chu an inbe tlâng a: LALPA chuan a lo ngaithla a, a lo hria a, LALPA ṭihtute leh a hming ngaihsaktute tân hriat rengna lehkhabu chu a hmâah ziak a ni ta a,” a ti a. Abela hun aṭang tawhin, Pathian chuan—lehkhabua chhinchhiah ang maiin—chatuana nunna chang tûrte hming chu a chhinchhiah reng a. Chûng mite hnênah Jehova chuan: “Ka inah ei tûr a awm theih nân sâwma pakhat zawng zawng chu thawhlâwm inah rawn la rawh u, vân tukverhte chu hawnsak che uin malsâwmna dawn sên loh khawp hial ka vûr dâwn che u nge dâwn lo, mi han fiah teh rêng u,” a ti a ni.—Malakia 3:10.
16, 17. Engtin nge Jehova’n a mite leh an rawngbâwlna mal a sâwm?
16 Jehova chuan a rawng bâwltute chu mal a sâwm tak zet a ni. Engtin nge? Mal a sâwm dân kawng khat chu a thil tumte hriatthiamna tipung zêlin a ni. (Thufingte 4:18; Daniela 12:10) Kawng dang leh chu an thuhrilh rawngbâwlnaa rah ṭha pein a ni. Thinlung ṭha pu mi tam takte chuan biakna dikah chuan anni chu an zâwm tawh a, chûng mite chu “mipui tam tak, . . . hnam tin zînga mi te, chi tin zînga mi te, mi tin zînga mi te, ṭawng tin zînga mi te” an ni a, “chûngte chuan aw ring takin, ‘Kan Pathian lalṭhutphaha ṭhua hnênah leh, Berâm No hnênah chhandamna,’ tiin an au,” a ni. (Thu Puan 7:9, 10) Hêng mipui tam takte hi mak takin an lo lang a, tûnah chuan Jehova chibai bûktute chu khawvêl puma kohhran 93,000 aia tamah an awm a, maktaduai ruk an chuang tawh a ni!
17 Chu bâkah, Jehova Thuhretute chu mihring chanchina Bible ṭanchhan thu leh hla chhuah tam ber an nihah hian Jehova malsâwmna chu a hmuh theih bawk a ni. Tûnah chuan thla tinin Vênnainsâng leh Awake! magazine te chu copy maktaduai sawmkua kan tichhuak reng a; Vênnainsâng chu ṭawng 144-in, Awake! chu ṭawng 87-a tihchhuah a ni. Tin, Bible zirna ṭanpuitu lehkhabu kum 1968-a chhuah, Chatuan Nunnaa Hruaitu Thutak tih chu ṭawng 117-in copy maktaduai 107 lai sem chhuah a ni a. Kum 1982-a tlângzarh, You Can Live Forever in Paradise on Earth tih chu ṭawng 131-in copy maktaduai 81 chuang sem chhuah a ni bawk a. Tin, kum 1995-a chhuah Chatuan Nunnaa Hruaitu Hriatna tih chu ṭawng chi hrang 154-in copy maktaduai 85 chuang chhutchhuah a ni bawk a ni. Kum 1996-a chhuah brochure, Eng Ti Tûrin Nge Pathianin Min Phût? tih chu ṭawng 244-in copy maktaduai 150 vêl sem chhuah a ni bawk.
18. Engvângin nge dodâlna tâwk chung pawha thlarau lam hausakna kan neih?
18 He thlarau lam hausakna hi Setana khawvêl dodâlna nasa ber tâwk reng chunga kan neih a ni a. Hei hian Isaia 54:17-a thu ziak: “Nangmah beihna tûra hriam chher rêng rêng a sâwt lo vang; lei tinrêng thupawia nangmah rawn khingtute chu thiam loh i chantîr ang. Chu chu LALPA chhiahhlawhte rochan chu a ni a, an felna chu ka hnên ata a ni, LALPAN a ti,” tih thu a dikzia a târ lang a ni. Malakia 3:17 thu: “Rochuam ka siam nîah chuan ka ta an ni ang, sipaihote LALPA chuan a ti,” tih thu hian an chungah thlen famkimna a nei a ni tih hriat chu Jehova chhiahhlawhte tân a va thlamuanthlâk êm!
Hlim Taka Jehova Rawngbâwlin
19. Engtin nge Jehova rawngbâwltute chu a bâwl lo tute lakah an danglam?
19 Jehova chhiahhlawh rinawmte leh Setana khawvêla mite danglamna chu nî tinin a lang chiang deuh deuh va. Malakia 3:18 chuan: “Mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin a sawi lâwk a ni. A thliar hran theihna tam tak zînga pakhat chu Jehova rawngbâwltute chuan hlim takin a rawng an bâwl a ni. Chutianga an hlim chhante zînga pakhat chu beisei ropui tak an neih hi a ni. Jehova’n: “Ngai teh u, vân tharte leh lei thar ka siam a nih hi; tûn hma thilte chu hriat rengin a awm tawh lo vang a, rilruah pawh a lût tawh hek lo vang. Nimahsela ka thil siamah chuan kumkhuain lâwmin hlim rawh u,” tih a sawi chu an ring tlat a ni.—Isaia 65:17, 18; Sâm 37:10, 11, 29; Thu Puan 21: 4, 5.
20. Engvângin nge mi hlim tak kan nih?
20 Jehova’n a mi rinawmte chu a ni ropuiah chuan an dam khawchhuak ang a, khawvêl tharah a hruai lût dâwn tih a tiam chu kan ringnghet tlat a ni. (Zephania 2:3; Thu Puan 7:13, 14) Kan zînga ṭhenkhatte chu kum upat vâng te, natna vâng te, a nih loh leh chêtsualna vângtein khawvêl thar lo thlen hmain thi mah sela, Jehova chuan min hre reng ang a, chatuana nunna nei tûrin min kaitho leh ang tih min tiam a ni. (Johana 5:28, 29; Tita 1:2) Chuvângin, mahni tâwkah buaina leh harsatnate tawng ṭheuh mah ila, Jehova nî nghah pahin, he khawvêla mi hlim berte nih theih chhan tam tak kan nei a ni. (w02 5/1)
Engtin Nge I Chhân Ang?
• Eng nge “Jehova nî” chu?
• Engtin nge khawvêl sakhuate hian hmân lai Israel a entawn?
• Eng hrilh lâwkna nge Jehova chhiahhlawhte’n an tihthlen famkim?
• Engtin nge Jehova’n a mite mal a sâwm?
[Zirlai Atâna Zawhnate]
[Phêk 20-naa milemte]
Jehova chhiahhlawhte chu beiseina ropui tak an neih avângin an hlim tak zet