Jehova Thil Phûtte Tlinna Chuan Amah A Chawimawi
Jehova Thil Phûtte Tlinna Chuan Amah A Chawimawi
“Lâwm thu sawiin amah chu ka chawimawi ang.”—SAM 69:30.
1. (a) Engvângin nge Jehova chuan chawimawi a phu? (b) Engtin nge lâwm thu sawi chungin amah chu kan chawimawi theih?
JEHOVA chu Pathian engkimtithei, Lei leh Vân Lalber, leh Siamtu a ni a. Chuvângin a hming leh a thiltumte hian chawimawi a phu a ni. Jehova chawimawi tih awmzia chu amah tihhmingṭhat, ṭawngkam leh thiltih hmanga amah tihropui leh fak hi a ni. ‘Lâwm thu sawi’ chunga chutiang ti tûr chuan, tûna kan tâna a thil tih leh nakina a la tih tûrte avânga kan lâwm reng a ngai a. Kan neih tûr rilru put hmang chu, vâna thil siam rinawm takte’n: “Nang, kan Lalpa leh kan Pathian ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tih an puanna Thu Puan 4:11-ah hian târ lan a ni. Engtin nge Jehova chu kan chawimawi? A chungchâng zir a, a thil phûtte tihna hmangin kan chawimawi a ni. Fakna hla phuahtuin: “I duhzâwng tih mi zirtîr ang che; ka Pathian i ni si a,” a tih laia a vei ang hian kan vei ve tûr a ni.—Sâm 143:10.
2. Engtin nge Jehova’n amah chawimawitute leh chawimawi lo tute a cheibâwl?
2 Jehova chuan amah chawimawitute chu a ngaihlu êm êm a. Chuvângin, ani chu “zawngtute hnêna lâwmman pêk hmang a ni.” (Hebrai 11:6) Chu lâwmman chu eng nge ni? Isua chuan vâna a Pa hnêna a ṭawngṭainaah hetiangin a sawi a ni: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin. (Johana 17:3) Ni e, “lâwm thu sawiin amah [Jehova] chawimawi” apiang chuan “ram hi an luah ang a, a chhûngah hian kumkhuain an awm ang.” (Sâm 37:29) Kawng lehlamah erawh ‘mi sual tân chuan lâwmman a awm dâwn lo va.’ (Thufingte 24:20) Tin, Jehova chuan nakin lawkah sualna zawng zawng tiboral a, mi ṭhate a humhim dâwn avângin, tûn ni hnuhnûnga amah chawimawi chu a hmanhmawhthlâk hle a ni. “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang.”—1 Johana 2:17; Thufingte 2:21, 22.
3. Engvângin nge Malakia lehkhabu hi kan ngaihven ang?
3 “Pathian Lehkha Thu zawng zawng hi Pathian thâwk khuma pêk” a nih avângin, Jehova duhzâwng chu Bible-ah hmuh theihin a awm a. (2 Timothea 3:16) Chu Pathian Thuah chuan Jehova’n amah chawimawitute mal a sâwm dân leh amah chawimawi lote chunga thil thlengte chanchin tam tak a chuang a. Chûng thu ziak zînga pakhat chu zawlnei Malakia hun laia Israel rama thil thleng hi a ni. B.C.E. kum 443 lai vêl, Nehemia’n Juda ram a awp laiin, Malakia chuan a hming pu lehkhabu chu a ziak a. He lehkhabu thiltithei tak leh ngaihnawm takah hian ‘keini hun tâwp lo thlennate min zilhna tûra ziak’ thute leh hrilh lâwknate a chuang a ni. (1 Korinth 10:11) Malakia thu ngaihvenna chuan he suahsualna khawvêl A tihchhiat hun, “LALPA ni ropui leh râpthlâk tak” atâna inbuatsaih tûrin min ṭanpui a ni.—Malakia 4:5.
4. Malakia bung 1-naah hian eng thu pawimawh parukte nge kan ngaihtuah dâwn?
4 Engtin nge kum 2,400 aia tam kaltaa ziak Malakia bu hian, keini kum zabi 21-naa mite hi Jehova ni ropui leh râpthlâk tak atâna inbuatsaih tûra min ṭanpui? Bung hmasa ber hian a duhsakna leh chatuan nunna kan chan theih nâna lâwm thu sawia Jehova kan chawimawina tûr chhan pawimawh tak, a lo berah paruk chu min hrilh a ni. Chûngte chu: (1) Jehova chuan a mite a hmangaih. (2) Thil thianghlimte ngaihhlutna kan lantîr tûr a ni. (3) Jehova chuan kan thil neih ṭha ber kan pêk a beisei. (4) Pathian chibai bûkna dik tak chu duhâmna avânga tih ni lovin, mahni hma sial lo hmangaihna avânga tih a ni. (5) Pawm tlâka Pathian rawngbâwl chu thil khirh a ni lo. (6) Mi tinin Pathian hmaah kan chanchin kan sawi ṭheuh dâwn, tihte a ni. Chuvângin, Malakia lehkhathu chungchâng thuziak pathum zînga a hmasa berah chuan, Malakia bung 1-na thu chîk zâwka en pahin, hêng thu pawimawhte hi a indawt zêlin i lo ngaihtuah ang u.
Jehova’n A Mite A Hmangaih
5, 6. (a) Engvângin nge Jehova’n Jakoba a hmangaih? (b) Jakoba rinawmna kan entawn chuan, eng nge kan beisei theih?
5 Jehova hmangaihna chu Malakia châng tîr lamah a lang chiang hle a. A lehkhabu chu: “Israel-ho hnêna LALPA thu chhuak,” tiin a inṭan a. Chu bâkah, Pathian chuan: “Ka hmangaih che u a ni,” a ti a. Chu mi châng vêkah chuan entawn tûr pakhat târ langin, Jehova chuan: “Jakoba chu ka hmangaih a,” a ti a ni. Jakoba chuan Jehova a ring tlat a. A hnuah chuan, Jehova chuan Jakoba hming chu Israela tiin a thlâk a, Israel hnam thlahtu a lo ni ta a ni. Jakoba chu rinna nei mi a nih avângin Jehova chuan a hmangaih a. Israel hnamte zînga Jehova laka Jakoba ang rilru put hmang lantîr apiangte pawh chu A hmangaih a ni.—Malakia 1:1, 2.
6 Jehova kan hmangaih a, rinawm taka a mite hnêna kan awm tlat chuan 1 Samuela 12:22 thu: “A hming ropui tak avâng hian LALPA chuan a mite chu a hawisan dâwn si lo va,” tih chu kan thlamuanpui thei a ni. Jehova chuan a mite a hmangaih a, lâwmman a pe ṭhîn, a tâwpa chatuan nunna nên. Chuvângin hetiang hian kan chhiar: “Lalpa chu ring la, thil ṭha ti rawh; he ramah hian awm la, rinawmna ûm zêl rawh. LALPA chungah chuan lâwm bawk rawh; tichuan i thinlung duhzawngte chu a pe ang che,” tiin. (Sâm 37:3, 4) Jehova kan hmangaihnaah chuan Malakia bung 1-naa mi kan ngaihtuah tûr thu pahnihna hi a tel a ni.
Thil Thianghlimte Ngaihhlutna Lantîr Rawh
7. Engvângin nge Jehova’n Esauva a huat?
7 Malakia 1:2, 3 kan chhiar chuan Jehova’n “Jakoba ka hmangaih a,” a tih hnuah “Esauva erawh chu ka hua” a ti. Engvâng nge? Jakoba chuan Jehova a chawimawi a, a phirpui Esauva erawh chuan a chawimawi loh vâng a ni. Esauva chu Edoma tia koh a ni a. Malakia 1:4-ah chuan Edom ram chu suahsualna ram tia koh a ni a, a chhûnga chêngte pawhin dem an hlawh a ni. Esauva chuan englo sen chhum kâwiin a fa tîr nihna chu Jakoba hnênah a hralh a; chuvângin, Edoma tih hming (“A Sen” tihna) chu a pu ta a ni. “Esauva chuan a fa tîr nihna chu a ngainêp a ni,” tiin Genesis 25:34 chuan a sawi. Tirhkoh Paula chuan a rinpuite chu ‘inngaih hmang emaw, a fa tîr nihna chu chaw vawi khat eia hralhtu Esauva anga Pathian zah lo mi [“thil thianghlimte hlut lo mi,” NW] emaw an lo awm loh nâna’ fîmkhur tûrin a fuih a ni.—Hebrai 12:14-16.
8. Engvângin nge Paula chuan Esauva leh inngaihna chu a tehkhin?
8 Engvângin nge Paula hian Esauva thiltih leh inngaihna a sawi kawp? Esauva rilru put hmang ang neihna chuan thil thianghlimte ngaihnêpna a thlen theih vâng a ni. Chu chuan, sual nasa tak, inngaihna ang chite a rah chhuak thei a ni. Chuvângin, ‘Ka Kristian rochan—chatuan nunna—hi dailuah chhumkâwi ang thil ho tak engemawa hralh duh mai châng ka nei ṭhîn em? Ka hriat lohvin thil thianghlimte ka ngainêp em?’ tih te hi mahni leh mahni kan inzâwt ṭhîn tûr a ni. Esauva chuan a tisa châkna chu phuhrûk a châk ngawih ngawih a. Jakoba hnênah: “Khawngaih takin i englo sen chhum kawi ngei kha mi eitîr vat teh,” a ti a ni. (Gen. 25:30, NW) Lungchhiat thlâk takin, Pathian chhiahhlawh ṭhenkhatte chuan: “Vat vat! Engah nge maw inneihna thianghlim kan nghah kher ang ni?” an ti ṭhîn. Engpawh chân inhuama mipat hmeichhiatna hman an duhna chu an tân englo sen chhumkâwi ang a lo ni ta.
9. Engtin nge Jehova ṭihna ṭha kan neih theih ang?
9 Thianghlimna te, rinawmna te, leh kan thlarau lam ro chan te ngainêpin thil thianghlimte chu i hmusit ngai lo vang u. Esauva ang ni lovin, mi rinawm Jakoba ang ni zâwk ila, thil thianghlimte ngaihhlutna thûk tak lantîrin Pathian ṭihna ṭha i nei zâwk ang u. Chu chu engtin nge kan neih theih ang? Jehova thil phûtte tlin tuma fîmkhurna hmangin. Hei hian Malakia bung 1-naa sawi chhuah thu pawimawh a pathumnaah min hruai thleng a ni. Chu chu eng nge ni?
Kan Thil Neih Ṭhat Ber Chu Jehova Pe Rawh
10. Eng kawngin nge puithiamte chuan Jehova dawhkân an hmuhsit?
10 Malakia hun laia Jerusalem biak ina rawng bâwl Juda puithiamte chuan inthawina ṭha ber chu Jehova hnênah an hlân lo. Malakia 1:6-8 chuan: “Fapa chuan a pa a chawimawi ṭhîn a, bâwih chuan a pu: Kei hi pa ka nih chuan min chawimawina chu khawiah nge? Kei hi in pu ka nih chuan min ṭihna chu khawiah nge? Aw, puithiam ka hming hmusittute u, sipaihote LALPA chuan a ti che u a ni,” a ti a. Puithiamte chuan: “Engah khân nge i hming kan hmusit ni?” an ti a. Jehova chuan: “Ka maichâmah chuan chhang bawlhhlawh in hlân alâwm,” tiin anni chu a chhâng a ni. Puithiamte chuan: “Engah khân nge kan tihbawlhhlawh che?” tiin an zâwt leh a. Chuvângin, Jehova chuan: “LALPA dawhkân hi hmusitawm a ni, in tih ṭhinah hian a ni,” tiin anni chu a hrilh a ni. Chûng puithiamte chuan inthawi nâna ran silawng te an hlan apiangin: “Sualna a awm hek lo,” tiin, Jehova dawhkân an hmusitzia an lantîr a ni.
11. (a) Inthawina pawm tlâk loh chungchângah Jehova’n eng nge a sawi? (b) Eng kawngin nge mipuite chuan thiam loh an chan?
11 Tichuan, Jehova chuan an inthawina pawm tlâk loh chungchâng thu chu heti hian a hrilhfiah ta a: “In ram awptu pawh pe teh u; a lo lâwm dâwn che u em ni? A nih leh, a lo ngaisâng ang che u maw?” tiin. Chutiang thilpêk chuan an ram awptu chu a tilâwm hauh lo vang. Chutiang a nih si chuan Lei leh Vâna Lal chungnungbera chuan thil hlan ṭha lote chu a va pawm lo lehzual dâwn êm! Tin, puithiamte chauh chu thiam loh chantîr tûr an ni lo. Anni chuan a taka inthawina hlânin Jehova an hmuhsitzia an lantîr ngei mai. A nih leh, mipuite chu an thiam em? Teuh lo mai! Anni chu puithiamte hnêna chûng ran mitdel te, kebai te, leh silawngte Jehova hnêna hlan atâna rawn kengtute an ni miau si a. Suahsualna a va ni êm!
12. Kan thil neih ṭha ber Jehova pe tûrin eng anga ṭanpui nge kan nih?
12 Kan thil neih ṭha ber Jehova hnêna pêk hi amah kan hmangaih tak zetzia lantîrna kawng pakhat a ni a. (Matthaia 22:37, 38) Malakia hun laia puithiam tlâktlai lote ang ni lovin, tûn laia Jehova inawpna pâwl chuan Pathian thil phûtte tlinna hmangin, Jehova chawimawi tûra min ṭanpui thei Pathian Lehkha Thu kaihhruaina ṭha tam tak min pe a ni. He thu hi Malakia bung 1-na aṭanga thu pawimawh tak a palina nên a inzawm a ni.
Chibai Bûkna Dik Chu Duhâmna Ni Lovin, Hmangaihnaa Chêttîr A Ni
13. Duhâmna avânga rawng bâwl an nihzia lantîrtu puithiamte thiltih chu engte nge ni?
13 Malakia hun laia puithiamte chuan mahni hma an sial a, hmangaihna an nei lo va, sum leh pai an ît êm êm a ni. Engtin nge chu chu kan hriat theih? Malakia 1:10, King James Version chuan: “In zîngah a thlâwna kawngkhâr khârtu in awm em? A thlâwnin ka maichâmah mei in chhêm lo. In chungah lâwmna rêng ka nei lo va, in kut ata thilhlan chu ka pawm hek lo vang; Sipaihote LALPA chuan a ti,” tih kan chhiar vâng a ni. Ni e, chûng puithiam duhâm takte chuan biak ina an rawngbâwlna ho tê tê, kawngkhâr khâr leh maichâma mei chhêm ringawt nân pawh sum an phût tlat mai! Chuvângin, Jehova’n ‘an kut ata thilhlan a pawm lo’ pawh hi a mak lo ve!
14. Engvângin nge Jehova Thuhretute chu hmangaihnaa chêttîr an ni kan tih theih?
14 Hmân lai Jerusalema Puithiam suaksualte mahni hma sialna leh duhâmna chuan, Pathian Thua ziak ‘mi duhâmte chuan Pathian ram an luah lo vang’ tih min hriatchhuahtîr a ni. (1 Korinth 6:9, 10) Mahni hmasial chûng puithiamte thiltih ngaihtuahna chuan Jehova Thuhretute thu hrilh rawngbâwlna chu min ngaihsântîr zual bawk a ni. Kan rawngbâwlna hi mahni duh thua inpêkna a ni a, a man kan phût ngai lo. ‘Pathian thu chu sumdâwn nân kan hmang lo’ a ni. (2 Korinth 2:17) Paula angin: ‘Pathian chanchin ṭha [“lâwm takin,” NW] a thlâwn ngawtin ka hrilh’ kan ti thei a ni. (2 Korinth 11:7) Paula chuan ‘chanchin ṭha lâwm takin a hrilh’ tih hria ang che. Chu chuan Malakia bung 1-nain min hriattîr thu pawimawh a pangana a hril a ni.
Pathian Rawng Bâwl Chu Thil Khirh A Ni Lo
15, 16. (a) Thilhlan chungchângah eng rilru put hmang nge puithiamte’n an neih? (b) Engtin nge Jehova Thuhretute chuan an thilhlante chu an hlan?
15 Hmân lai Jerusalema rawng bâwl rinna tlachham puithiamte chuan inthawina thilhlan chu thil hahthlâk takah an ngai a. Chu chu an tân chuan phur rit a ni si a. Malakia 1:13-a târ lan angin, Pathian chuan, an hnênah: “Ngai teh u, a va ninawm êm! in ti bawk a, in hnâr in tum khum a,” tih a hrilh a ni. Chûng puithiamte chuan Pathian thil thinghlimte chu an hnâr an tum khum, a nih loh leh an hmusit a ni. Anni ang kan nih loh nân tih tak zetin i ṭawngṭai ang u. Chutiang ni ve lovin, 1 Johana 5:3 thu: “Pathian kan hmangaihna chu hei hi a ni, a thupêkte kan zawm hi; a thupêkte chu a khirh si lo va,” tih ang rilru chu i lantîr reng zâwk ang u.
16 Pathian hnêna thlarau lam inthawina hlan chu thil hahthlâkah ngai lovin, chu inthawina hlan chu i châk zâwk ang u. Zâwlnei thusawi: “[Jehova] hnênah chuan heti hian sawi rawh: khawlohna zawng zawng chu la bo la, a ṭha apiang chu pawm ang che; tichuan kan hmui rahte chu bâwngpa aiah ka rawn hlân ang e,” tih hi i ngai pawimawh tlat ang u. (Hosea 14:2) ‘Bâwngpa aia kan hmui rahte hlan’ tih thu hian thlarau lam inthawina, Jehova fak nân leh a thiltum chungchâng sawi nâna thu kan sawite a kâwk a ni. Hebrai 13:15 chuan: “[Krista] zârah chuan faka inthawina hi Pathian hnênah i hlân fo vang u, chu chu a hming ṭanna hmuite rah chu a ni,” a ti a. Kan thlarau lam inthawina chu tihdân phung pângngai mai ni lo va, thinlung tak taka Pathian kan hmangaihzia târ lanna a ni chu a va lâwmawm êm! Hei hian Malakia bung 1-na aṭanga kan zir theih thu pawimawh a paruknaah min hruai thleng leh a ni.
Mahni Chanchin Kan Sawi Ṭheuh Dâwn
17, 18. (a) Engvângin nge Jehova chuan “bumtu” chu ânchhia a lawh? (b) Chûng bumtute chuan eng nge an ngaihtuah loh?
17 Malakia hun laia mite chuan an thiltih rah an seng ṭheuh angin, keini pawhin kan thiltih rah kan seng ve ang. (Rom 14:12; Galatia 6:5) Chuvângin, Malakia 1:14 chuan: “A ran ruala [hmêlhem lo] apa awm renga, thu pawh tiama, Lalpa hnêna a hmêlhem hlâna bumtu chu ânchhe dawng a ni,” a ti a. Ran rual nei rêng rêng chuan thlan bîk tûr awm lo khawpin, ran pakhat chauh—berâm pakhat chauh—a nei ngai lo. Chuvângin, hlan tûra ran a thlan hian a mitdel emaw, a kebai emaw, a silawng emaw a thlang tûr a ni lo. Chutianga a hmêlhem a thlan chuan, chu chuan Jehova inthawina ruahmanna a hmuhsitzia a lantîr a ni; ran rual neitu chuan a hmêlhem lo thlan tûr a nei reng si a!
18 Chhan ṭha tak neiin Jehova chuan ran pa ṭha tak nei reng si a, a hnuha hnuh ngai hial ran mitdel te, a kebai te, a nih loh leh a silawngte inthawi nâna puithiamte hnêna rawn kengtu, bumtu chu ânchhia a lawh a ni. Chutichung chuan ran hmêlhem rêng rêng chu pawmtlâk a ni lo tih Pathian Dân chu puithiam tumahin an sawi lang chuang lo rêng rêng a. (Leviticus 22:17-20) Mi pângngai tawh phawt chuan an ram awptu hnêna chutiang thilpêk ṭha lo pêk chu hrehawm tuar phahna tûr a nihzia an hre ngei ang. A nihna takah chuan ram awptu aia ropui zâwk daih Lei leh vâna Lal Chungnungber, Jehova chu an dâwr a ni. Malakia 1:14 chuan chu mi chungchâng chu hetiang hian a sawi: “Kei chu lal ropui tak ka ni si a, ka hming pawh Jentailte zîngah a ṭihawm a ni, Sipaihote LALPA chuan a ti,” tiin.
19. Eng nge kan nghahhlelh a, eng nge kan tih ang?
19 Pathian chhiahhlawh rinawm kan ni a, Lal Ropui tak, Jehova chu mi zawng zawngin an chawimawi hun kan nghâkhlel hle a ni. Chutih hunah chuan “tuite hian tuifinriat a khuh reng angin, leilung hi LALPA hriatnain a khat zo vek dâwn a ni.” (Isaia 11:9) Chu hun a lo thlen hma chuan, “Lâwm thu sawiin amah chu ka chawimawi ang” tih fakna hla phuahtu hi entawnna hmanga Jehova thil phûtte tlin tumin i bei ṭâng ṭâng ang u. (Sâm 69:30) Chu mi tipuitling tûr chuan, Malakia hrilh lâwkna chuan kan hlâwkpui tûr thurâwn tam tak a la nei a ni. Chuvângin, kan zirleh tûr thuziak pahnihah Malakia lehkhabu hmun danga thute hi ngun takin i ngaihtuah ang u. (w02 5/1)
I La Hre Reng Em?
• Engvângin nge Jehova kan chawimawi ang?
• Engvângin nge Malakia hun laia puithiamte thil hlan chu Jehova’n a pawm loh?
• Engtin nge Jehova hnênah fakna inthawina kan hlan?
• Biakna dik atân engin nge min chêttîr tûr?
[Zirlai Atâna Zawhnate]
[Phêk 9-naa milem]
Malakia hrilh lâwkna chuan kan hun a kâwk