Pathian Chu Tunge A Nih Kan Hriat A Ngai

ZAN thiang reh tak hnuaia arsi pe un mai thlîr chu nuam i ti hle lo maw? Pangpâr mawi tak leh rimtui tak rim nam chûk mai hriatte pawh a nuam hle lâwm ni? Sava hrâm mawi tak takte leh thlifîm lêng vêlin thing hnah a chhêm rîk hiau hiaute chu a ngaihnawm i ti hle lâwm ni? Tin, Sangha lian tak tak leh tuipuia chêng nungcha dangte hmuh pawh chu a va nuam em! Chu bâkah, chhia leh ṭha hriat theihna leh mak taka siam thluak nei mihringte an la awm lehnghâl. Engtin nge hêng kan vêla thilmak ropui tak takte lo awm dân hi i sawifiah ang?

Ṭhenkhat chuan hêng thil zawng zawngte hi chhan awm mumal lova lo awm ve mai niah an ngai a. Chutiang chu ni ta se, engati nge mihringte hian Pathian an rin? Engvângin nge tum nei lova mahnia thil chi hrang hrang infinkhâwm ve mai chuan thlarau lam mamawh nei thilnungte a siam chhuah theih ang?

“Sakhua chu mihring miziaah hian a intuh nghet tlat a; hausa leh rethei, lehkha thiam leh thiam lote pawhin sakhua an nei vek a ni.” He thu hian Professor Alister Hardy-a’n a lehkhabu The Spiritual Nature of Man tiha a thuziak tlângpui chu a khaikhâwm a ni. Thluak chungchâng tûn hnaia zirchîkna chuan thluak chanchin zir mi ṭhenkhatte chu mihringte hi sakhua vawn nei thei tûra “duan sa thlap” niin ngaih dân a siamtîr a ni. Is God the Only Reality? tih lehkhabu chuan: “Sakhua hmanga thil awmzia zawnna hi . . . mihringte lo awm tirh aṭangin hnam tinah leh eng hunah pawh a hmuh theih a ni,” a ti.

Kum 2,000 vêl kaltaa mi thiam pakhat thusawi hi lo ngaihtuah teh. Ani chuan heti hian a ziak a: “Chhûng tin hian puipa tu emaw tal an nei ṭheuh si a; engkim puipa erawh chu Pathian a ni,” tiin. (Hebrai 3:⁠4) Dik tak chuan, Bible châng bul ber pawhin: “Atîrin Pathianin lei leh vân a siam a,” a ti a ni.​—Genesis 1:⁠1.

A nih leh Pathian chu tunge ni? He zawhna chungchângah hian mite ngaih dân chu a hrang nuai a ni. Japanese tleirâwl pakhat Yoshi-a chu Pathian chu tunge a nih an zawh chuan: “Ka chiang chiah lo. Buddhist ka ni a, ka tân Pathian chu tunge a nih hriat a ngai kher lo,” tiin a chhâng a ni. Mahse, amah Yoshi-a ngei chuan Buddha chu mi tam takin pathianah an pawm tih chu a pha lo. Kum 60 bâwr vêl mi sumdâwngtu pakhat, Nick-a pawhin Pathian a ring a, thiltithei tak chakna a nih a ring a ni. Pathian chungchânga a thil hriatte zawh a nih chuan, a inngaihtuah vang vang hnuah: “Ṭhianpa, chu zawng zawhna khirh tak a nih chu. Ka sawi theih awmchhun  chu Pathian a awm tih hi a ni mai,” tiin a chhâng a ni.

Ṭhenkhat chuan “Siamtu biak aiin a siama chu biain a rawng an bâwl” a ni. (Rom 1:​25) Mi maktaduai tam takte chuan Pathian chu pan phâk loh khawpa hmun hla taka awm a nih ringin, an thlahtu thi tawhte an bia a. Hindu sakhuaah chuan pathian leh pathiannu tam tak an awm a ni. Isua Krista tirhkohte hun laia mite chuan Zeus leh Hermes-te ang chi pathian chi hrang hrangte chu an be bawk. (Tirhkohte 14:​11, 12) Kristianna ram sakhaw tam tak chuan Pathian chu Trinity a ni a, Pa Pathian, Fapa Pathian, leh Thlarau Thianghlim Pathian angin an zirtîr a ni.

Ni e, Bible chuan, “‘pathian’ tam tak leh ‘lalpa’ tam tak an awm” tih a sawi rêng a. Nimahsela, “Pathian pakhat chauh (Pa chu) a awm a, ama hnên aṭangin engkim a chhuak a,” tiin a sawi zawm a ni. (1 Korinth 8:​5, 6) Ni e, Pathian dik pakhat chauh a awm a ni. A nih leh, tunge a nih? Eng hmêl nge a put? Hêng zawhnate chhânna hi kan hriat a pawimawh a ni. Isua ngeiin he Pathian dik hnêna a ṭawngṭainaah: “Hei hi chatuan nuna a ni, nang Pathian tak chauh leh i tirh Isua Krista hriat hi,” a ti si a. (Johana 17:⁠3) Kan chatuan hmakhua chu Pathian chungchâng thutak kan hriatnaah a innghat a ni tih rinna tûr chhan a awm a ni. (w02 5/15)

[Phêk 3-naa milem]

An awm chhan chu eng nge ni?

[Milem Hawhtîrtu]

Nghapui: Courtesy of Tourism Queensland