Pathian Chu Tunge Ni?

“PATHIAN tih chu lei leh vâna chakna leh thiltihtheihna ropui ber lo chhuahna koh nâna hman a ni a, sakhaw inpumpêkna ber a ni,” tiin The Encyclopedia Americana chuan a sawi. Dictionary chuan Pathian chu thuneitu sâng ber niin a hrilhfiah a ni. Chutiang thuneitu sâng ber mizia chu eng nge ni?

Pathian chu chakna ringawt nge ni a, mi tak tak zâwk? Hming a nei em? Mi tam tak rin angin Pathian pathum infinkhâwm Trinity a ni em? Engtin nge Pathian kan hriat theih ang? Bible chuan hêng zawhnate chhânna dik leh lungawithlâk tak a pe a ni. Chu chuan, Pathian zawng tûra min fuihin: “Ani chuan min hlat lo ṭheuh si a,” a ti a ni.​—Tirhkohte 17:27.

Chakna Ringawt Nge Mi Tak Tak?

Pathian ringtu tam tak chuan ani chu mi tak tak ni lovin, chakna ringawt niah an ngai a. Entîr nân, hnam ṭhenkhat chuan, pathiante chu leilung pianken chakna nên an thlunzawm a ni. Science lam zirchîkna hmanga lei leh vân pianphung leh he leia nun nihphung bulte finfiahna la khâwmtu ṭhenkhat chuan hêng thilte Awmtîrtu engemaw a awm tûr a ni tih an ring a ni. Nimahsela, chu mi Awmtîrtu chungah chuan mi nihna an bel hreh tlat a ni.

Mahse, thil siam chipchiar takte chuan a Awmtîrtu fin nasatzia a lantîr lâwm ni? Fing tûr chuan rilru neih a ngai a. Hêng thil zawng zawng siam chhuaktu, rilru ropui tak neitu chu Pathian a ni. Ni e, Pathian chuan taksa a nei a; mahse, kan neih ang taksa a ni lo va, thlarau lam taksa a nei a ni. Bible chuan: “Mihring lam taksa a awm chuan thlarau lam taksa pawh a awm ang,” a ti. (1 Korinth 15:44) Pathian nihphung sawifiahin Bible chuan: “Pathian chu thlarau a ni,” tiin chiang takin a sawi a. (Johana 4:24) Thlarau nunna chu kan nunna lakah a danglam êm êm a; mihringte mita hmuh theih a ni lo. (Johana 1:18) Chu bâkah, hmuh theih loh thlarau thil siamte pawh an awm bawk a. Anni chu vântirhkoh​—“Pathian fapate”​—an ni.​—Joba 1:6; 2:⁠1.

Pathian chu thlarau lam taksa nei, siam lohva awm a nih avângin, chênna hmun pawh a neih ngei a rinawm. Thlarau ram chungchâng sawiin Bible chuan vânte hi Pathian “awmna” tiin a sawi a ni. (1 Lalte 8:43) Bible ziaktu Paula pawhin: “Krista chu . . . Pathian hmaah kan aia ding tûrin vânah ngei a lût,” a ti bawk a ni.​—Hebrai 9:​24.

“Thlarau” tih thu mal hi Bible-ah chuan awmze dang neia hman a ni bawk a. Ṭawngṭainaa Pathian a kohnaah fakna hla phuahtu chuan: “I thlarau chu i tîr chhuak a, siamin an awm ṭhîn,”  a ti a ni. (Sâm 104:30) He thlarau hi Pathian ni lovin, Pathianin a duhzâwng tih puitlin nâna a tirh chhuah, a nih loh leh a hman a chakna a ni zâwk a ni. Chu mi hmang chuan a ni Pathianin vân te, lei te, leh thilnung zawng zawngte a siam ni. (Genesis 1:​2; Sâm 33:⁠6) Chu a thlarau chu thlarau thianghlim tia koh a ni a. Pathian chuan Bible ziaktute thâwk khum nân a thlarau thianghlim chu a hmang a ni. (2 Petera 1:​20, 21) Chuvângin, thlarau thianghlim chu Pathianin a thiltum tihpuitlin nâna a hman, hmuh theih loh a chakna chevêl reng hi a ni.

Pathian Chuan Hming Danglam Bîk Tak A Nei

Bible ziaktu Agura chuan: “Tunge ni vâna chho tawh a, lo chhuk leha chu? Tunge ni a kuta thli hûm khâwmtu chu? Tunge ni a puana tui fûntu chu? Tunge ni kâwlkil zawng zawngte tinghet? Tunge ni a hming, tunge ni a fapaa hming pawh i hria em?” tiin zawhna a siam a ni. (Thufingte 30:⁠4) A nihna takah chuan, Agura zawhna chu, ‘Mihringte zîngah hêng thilte titu hming emaw, a thlahtute hming emaw hriat i nei em?’ a tihna a ni. Pathian chauhvin leilung chaknate thunun thei tûrin thiltihtheihna a nei a. Thil siamte chuan Pathian a awm ngeizia chiang takin târ lang mah se, Pathian hming erawh a târ lang thei tlat lo. Dik tak chuan, amah Pathian ngeiin min hriattîr loh chuan, a hming chu kan hre ngai hauh lo vang. Mahse, amah ngeiin min hriattîr a ni: “Kei JEHOVA ka ni,” tiin.​—Exodus 6:⁠2.

Pathian hming danglam bîk tak, Jehova tih hi atîra Hebrai Pathian Lehkha Thuah chauh pawh vawi 7,000 dâwn lai a lang a ni. Isua Krista chuan mi dangte hnênah chu hming chu a hriattîrin, a fak a ni. (Johana 17:​6, 26) Chu hming chu Bible bu tâwp bera thu chham “Halleluia” tihah a tel a, a awmzia chu “Jehova chu fak rawh u” tihna a ni. “Ia” tih chu “Jehova” hming kaihtawi a ni. * (Thu Puan 19:​1-6) Mahse, tûn laia Bible tam takah chuan chu hming chu hman a ni mang lo. A aiah hawrawp puia “LALPA” leh “PATHIAN” tia ziak chu an hmang zîng hle a, chu chu “Lalpa” leh “Pathian” tih nihna pângngai aṭanga tihhran nân a ni. Mi thiam ṭhenkhat chuan Pathian hming chu Yahweh tia lam a nih an ring thung.

Engvângin nge lei leh vâna Mi ropui ber hming chungchângah chutianga ngaih dân inpersan tak chu a awm? Kum zabi engemaw zât kalta khân Juda-ho chuan an puithuna avângin  Pathian hming lam chu an lo bânsan a, Pathian Lehkha Thu an chhiara Pathian hming lam a ngaih hun apiangin a aiah Hebrai ṭawnga “Lalpa” tihna thumal chu an hmang ta a, chuta ṭang chuan Pathian hming lam dân chungchânga buaina hi a lo chhuak a ni. Hebrai ṭawnga ziak Bible chu vowel tel lova ziak a nih avângin, Mosia te, Davida te, leh hmân laia mi dangte’n Pathian hming an lam dân dik tak chu hriat ngaihna a awm lo va. Amaherawhchu, Mizo lam dân, Jehova, tih hi kum zabi tam tak chhûng hman a lo ni tawh a; tin, tûn laiah ṭawng chi hrang hranga chu a hming tlukpui lehlinte chu hriat lâr tak a ni.​—Exodus 6:3; Isaia 26:⁠4.

Hmân lai Hebrai ṭawnga Pathian hming an lam dân chu hriat chian ni lo mah se, a hming awmzia erawh hriat loh thil a ni lo. A hming awmzia chu “A Nihtîr” tihna a ni. Hetiang hian, Pathian Jehova chu Ruahmantu Ropui tak angin a inhriattîr a. A thiltumte leh a thutiamte rêng rêng chu a tak a nihtîr ziah a ni. Hetiang ti tûra thiltihtheihna nei, Pathian dik chauh hian he hming hi a pu thei a ni.​—Isaia 55:11.

Rinhlelh rual lovin, Jehova tih hming chuan Pathian Engkimtitheia chu pathian dang zawng zawngte lakah a thliar hrang a. Chuvângin a ni, Bible-ah a hming chu vawi tam tak a lan ni. Ṭawng letlingtu tam takin Pathian hming chu hmang lo mah se, Sâm 83:18 chuan: “Nangmah chauh hi JEHOVA hming pu, leilung zawng zawng chunga Chungnungber i nih an hriat theih nân,” tiin chiang takin a sawi a ni. Isua Krista chuan a rawng bâwl chhûng khân a zirtîrte chu: “Chutichuan nangni chuan hetiang hian ṭawngṭai rawh u: ‘Kan Pa vâna mi, i hming zahawm rawh se’” tiin a zirtîr a ni. (Matthaia 6:⁠9) Chuvângin, kan ṭawngṭai hunah te, amah kan biak hunah te, leh mi dangte hmaa kan fak hunah te hian Pathian hming chu kan hmang tûr a ni.

Isua Hi Pathian A Ni Em?

Amah Pathian Jehova ngei chuan a Fapa nihna pawh chiang takin a sawi a. Chanchin Ṭha, Matthaia ziak chuan Isua’n baptisma a chan veleh, “vân aṭangin awin, ‘Hei hi ka Fapa duh tak, ka lawm êm êma chu a ni, a ti tlat a,” tiin a sawi a. (Matthaia 3:​16, 17) Isua Krista chu Pathian Fapa a ni.

Mahse, sakhaw mi ṭhenkhat chuan Isua chu Pathian a ni an ti a. Ṭhenkhat dang chuan Pathian chu pathum infinkhâwm Trinity a ni an ti tlat bawk. Chu zirtîrnaah chuan, “Pa chu Pathian a ni a, Fapa chu Pathian a ni a, Thlarau Thianghlim pawh Pathian a ni; mahse, Pathian pathum a awm lo va, Pathian pakhat chauh a awm a ni.” Chu pathumte chu “chatuan mi vek leh intluktlâng dial,” anga ngaih a ni. (The Catholic Encyclopedia) Chûng ngaih dânte chu a dik em?

Jehova chungchângah chuan Pathian Lehkha Thu chuan heti hian a sawi: “Chatuan ata chatuan thleng pawhin nang chu Pathian i ni,” tiin. (Sâm 90:⁠2) Ani chu “Lalber chatuana awm”​—awm ṭan hun leh tâwp hun nei lo a ni. (1 Timothea 1:17) Isua erawh chu, “thil siam zawng zawnga piang hmasa ber,” “Pathian thil siam bula,” a ni thung. (Kolossa 1:​13-15; Thu Puan 3:14) Pathian chu a Pa anga sawiin, Isua chuan: “Pa chu keimah aiin a ropui zâwk,” a ti. (Johana 14:28) Tin, Isua chuan amah leh vântirhkohte pawhin an hriat loh, Pathian chauhvin a hriat thil engemaw a awm thu a sawi bawk. (Marka 13:32) Chu bâkah, Isua chu a Pa hnênah: “Keia thu ni lovin, nangma thu thu ni zâwk rawh se,” tiin a ṭawngṭai a ni. (Luka 22:42) Amah aia chungnung zâwk Mi hnên a nih loh chuan tu hnênah nge a ṭawngṭai ang le? Tin, Isua kha thihna ata amah leh amah a inkaitho lo va, a kaithotu chu Pathian a ni.​—Tirhkohte 2:32.

Tichuan, Pathian Lehkha Thu sawi dân chuan Jehova chu Pathian Engkimtithei a ni a, Isua chu a Fapa a ni. An pahnih chuan Isua he leia a rawn kal hma leh he leia a awm chhûng pawh khân, an intluk lo va; thihna ata vâna kaihthawha a awm hnuah pawh an intluk hek lo. (1 Korinth 11:3; 15:28) Kan hriat tawh angin, Trinity-a a pathumnaa an vuah, thlarau thianghlim chu mi a ni lo. Pathianin a duhzâwng apiang tipuitling tûra a hman a chakna a ni zâwk a ni. Chuvângin, Trinity chu Pathian Lehkha Thu zirtîrna a ni lo. * “LALPA kan Pathian chauh chu LALPA a ni,” Bible chuan a ti.​—Deuteronomy 6:⁠4.

Pathian Hre Chiang Lehzual Rawh

Pathian hmangaih tûr leh a phû ngawih  ngawih inpumpêkna hlân tûr chuan, a nihna tak tak kan hriat a ngai a ni. Engtin nge ani chu kan hriat chian lehzual theih ang? Bible chuan: “A thil hmuh theih loh (a chatuan thiltihtheihna leh a Pathianzia chu) khawvêl siam tirh ata fiah taka hmuhin a awm a, thil siamah chuan a lang a ni,” a ti. (Rom 1:20) Pathian hriat chian lehzual theih dân kawng khat chu, a thil siamte han thlîra, lâwm nachâng hre taka ngaihtuahzui veng veng hi a ni.

Nimahsela, thil siam chuan Pathian chungchânga hriat ngai zawng zawng min hrilh kim lo va. Entîr nân, thlarau taksa nei Mi tak tak leh hming danglam bîk tak nei a nihzia hre thiam tûr chuan Bible kan en a ngai a. Dik tak chuan, Bible zir hi Pathian hriat chian lehzualna kawng ṭha ber a ni. Pathian Lehkha Thuah chuan, Jehova chuan eng ang Pathian nge a nih tih chungchângah kimchang lehzualin min hrilh a. A thiltumte min hrilh bâkah a kawngte pawh min zirtîr bawk a ni. (Amosa 3:7; 2 Timothea 3:​16, 17) Pathian chuan hmangaih taka a thil ruahmante kan hlâwkpui theih nâna “thutak hriaah” min duh avângin kan va lâwm tak êm! (1 Timothea 2:⁠4) Chuvângin, Jehova chungchâng kan hriat theih apiang zir tûrin theihtâwp i chhuah ang u. (w02 5/15)

[Footnote-te]

[Phêk 5-naa milemte]

Pathian chuan a thlarau thianghim chu khawvêl siam nân leh Bible ziak tûra mite thâwk khum nân a hmang

[Phêk 5-naa milem]

Vân aṭanga aw chuan: ‘Hei hi ka fapa a ni’ a ti

[Phêk 7-naa milem]

Isua chu Pathian hnênah a ṭawngṭai​—amah aia chungchung zâwk Mi hnênah chuan

[Phêk 7-naa milem]

Isua chuan Pathian hming chu mi dangte a hriattîr

[Phêk 7-naa milem]

Pathian kan hre chiang lehzual thei