Hremhmun Eng Nge A Nih Chiah?

“HREMHMUN” tih thumal hian i rilruah engpawh hriatchhuahtîr che mah se, mi tam tak chuan hremhmun chu thilsual tih inhremna hmunah an ngai a ni. Sual leh a sawhkhâwk chungchâng chu Bible chuan: “Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” a ti. (Rom 5:12) Chu bâkah: “Sual man chu thihna a ni,” a ti bawk. (Rom 6:23) Sual hremna chu thihna a nih avângin, hremhmun nihphung tak tak chu: Kan thih hian kan chungah eng nge lo thleng? tih zawhnaah a innghat ta a ni.

Thih hnuah hian nun engemaw ber hi eng ang emawin a nung zêl em? Eng nge hremhmun chu ni a, eng ang mite nge chutah chuan kal? Hremhmuna awmte tân beisei tûr engemaw tal a awm em? Bible chuan he mi chungchângah hian chhânna lungawithlâk tak min pe a ni.

Thih Hnua Nunna?

Kan thih hnuah hian kan taksa chhûnga thil engemaw, thlarau an tih ang chi nung zawm zêl a awm em? Mi hmasa ber Adama’n nunna a neih dân kha han ngaihtuah teh. Bible chuan: “LALPA Pathianin leia vaivutin mihring a siam a, a hnârah chuan nunna thaw chu a thaw lût a,” a ti. (Genesis 2:⁠7) Thaw chuan a nunna chu châwm mah se, a hnâra “nunna thaw” a thâwk luh khân, a chuapa boruak thâwk luh mai aia tam a tel a. Pathian chuan nunna nei lo Adama taksaah chuan leia thil nung zawng zawngte pawh tinungtu, “nunna thlarau” chu a dah lût tihna a ni. (Genesis 7:22) Bible chuan chu thil nung zawng zawng tinungtu chu “thlarau” a ti a. (Jakoba 2:26) Chu thlarau chu khâwl leh hmanruate tinungtu electric chakna nêna tehkhin theih a ni. Electric chakna chuan a tihnun hmanruate hmêlhmang leh ziarâng a neih ngai loh angin, nunna thlarau chuan a tihnun thil siamte hmêlhmang leh ziarâng chu a la lo. Chu chuan mizia a nei lo va, ngaihtuah theihna a nei hek lo.

Hebrai thu mal “thlarau” tia lehlin hi Sâm 146:​4-ah chuan “thaw” tia lehlin a ni a. Chuti a nih chuan, mi a thih hian a thlarau chungah eng nge thleng? Sâm 146:4 chuan: “A thawin a chhuahsan a, ani chu a leilungah a kîr leh a; chu mi nî ngei chuan a ngaihtuahnate chu a bo nghâl a ni,” a ti. Chuvângin mi a thih hian, hmêlhmang leh ziarâng nei lo a thlarau chu khawi hmun emawah thlarau thil siam angin a nung zawm lo a ni. Chutih ahnêkin, “a petu Pathian hnênah a kîr leh a ni.” (Thuhriltu 12:⁠7) A awmzia chu, mitthia nakin nun beiseina zawng zawng chu Pathianah chauh a innghat tawh tihna a ni. *

Hmasâng Grik mi fing Socrates leh Plato te chuan mi a thih hnuah, a taksa chhûnga thi thei lo thil engemaw chu nung zui zêl niin an ring a. Chu mi chungchângah chuan Bible-in eng nge  min zirtîr? “LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a,” tiin Genesis 2:7 chuan a sawi. Ani chuan thi thei lo thil engemaw chu a dawng lo va, amah ngei chu hriatna nei mi nung a ni zâwk a ni. Tin, chu hriatna nei mi nung chu thil a tih sual hian a thi a ni.​—Ezekiela 18:⁠4.

A nih leh, mitthite dinhmun chu eng nge ni ta ang? Adama chunga hremna thu a puan khân, Jehova chuan: “Vaivut i ni a, vaivutah i kîr leh tûr a ni,” a ti a. (Genesis 3:19) Jehova’n lei ata Adama a siama, nunna a pêk hma khân, ani chu khawiah nge a awm? Khawiah mah a la awm lo ringawt mai a ni! A thih hunah pawh, Adama chu nung zui tûr awm tawh lovin, a awm tawh lo ṭhak mai a ni. Mitthite dinhmun chu Thuhriltu 9:​5, 10 hian a sawi chiang hle a, chutah chuan heti hian kan chhiar a ni: “Mitthi erawh chuan engmah an hre lo . . . thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo,” tiin. Bible sawi angin, thihna hi awm tawh lohna a ni. Mitthite chuan hriatna emaw, ngaihtuahna emaw, hriat theihna emaw an nei lo.

Innghaisakna Tâwp Nei Lo Nge Thlân Pângngai Zâwk?

Mitthite chu thil hre thei tûra an nun zawm loh avângin, hremhmun kan tih hi mi sualte thih hnua meia nghaisakna hmun a ni thei lo vang. Chuti a nih chuan, hremhmun kan tih chu eng nge ni ta ang? Isua thih hnua a chunga thilthleng bihchianna chuan chu zawhna chu a chhâng ang. Bible ziaktu Luka chuan: “Mitthi khuaa [“hremhmuna,” King James Version] hnutchhiahin a awm hek lo, a ruang pawh a ṭawih hek lo,” tih a sawi a ni. * (Tirhkohte 2:31) Isua meuh pawh a kalna hremhmun chu khawi lai nge? Tirhkoh Paula chuan: “Krista chu Pathian Lehkha thu ang zêla kan sualte avânga a thih a, an phûm a, Pathian Lehkha Thu ang zêla ni thum nia kaihthawha a awm,” thu a ziak a. (1 Korinth 15:​3, 4) Chuvângin, Isua chu hremhmun, thlânah a awm a ni; mahse, ani chu chuta hnutchhiahin a awm lo, kaihthawh leh a nih avângin.

Nasa taka natna tuar mi fel Joba chanchin ngaihtuah bawk teh. A tawrhna pumpelh a duh avângin, heti hian ngenna a siam a ni: “Hremhmunah [Seolah] chuan mi humhim la, i thinur reh hma chu chutah chuan mi thukru teh la,” tiin. * (Joba 14:​13, Douay Version) Joba chu inhumhim nâna meia kâng, hmun hrehawm taka kal a duh chu a va rinawm lo tak êm! Joba tân chuan ‘hremhmun’ kan tih hi, a hrehawm tawrh tâwpna tûr, thlân pângngai hi a ni. Chuvângin Bible-in hremhmun a tih chu mi ṭha leh mi sual zawng zawng an kalna mihringte thlân pângngai hi a ni.

Hremhmun Mei ​—Kan-Faivekna A Ni Em?

Hremhmun mei hi kan-faivekna, a nih loh leh azung azâr thlenga tihchhiat pumhlûmna a ni  thei ang em? Mei leh Mitthi Khua, a nih loh leh hremhmun chu thliarhran theih nân, Pathian Lehkha Thu chuan: “Thihna leh Mitthi Khua [“hremhmun,” King James Version] chu mei dîlah an paih a,” a ti. Thihna leh hremhmun mei dîla an paihte chu a taka kâng thei thil a nih loh avângin, heta “mei dîl” a sawi hi entîr nei a ni. “Chu [mei dîl] chu thih hnihna chu a ni”​—thawhlehna beiseina rêng rêng awm tawh lova thihna chu.​—Thu Puan 20:14.

Mei dîl tih chuan Isua sawi ‘hremhmun mei’ leh ‘Gehenna mei’ nên awmze thuhmun a nei a. (Matthaia 5:22; Marka 9:​47, 48) Gehenna tih thu mal chu Thuthlung Tharah vawi sâwm lai a lang a, Jerusalem khawpui kulh pâwn lama Hinnom ruam a kâwk a ni. Isua leia a awm lai chuan, chu ruam chu bawlhhlawh paihna, “mi sualho leh ran ruangte, leh bawlhhlawh dang rêng rêng an paihna hmun,” a ni. (Smith’s Dictionary of the Bible) Chûng bawlhhlawhte chu a kan zawh vek nân kât hmanga hâl reng a ni. Isua chuan chu ruam chu chatuana tihboralna entîr nân a lo hmang a ni.

Gehenna-in a entîr angin, mei dîl pawhin chatuana tihboralna a entîr a. Mihringte chu sual leh thihnaa thiam loh chantîrna ata tih zalen an nih hunah chuan, Thihna leh Mitthi Khua te chu mei dîla ‘paiha’ tihboral phiar a ni ang. Duhrêng vâng leh sim duh hauh lova thil sual titute pawhin chu mi dîlah chuan “chan” an nei ve ang a. (Thu Puan 21:18) Chatuana tihboral phiar an ni ve ang. Pathian hriatrengna hremhmuna​—mihring thlân pângngaia​—awmte erawh chuan hmabâk ropui tak an nei thung ang.

Hremhmun A Ruak!

Thu Puan 20:13 chuan: “Tuifinriat chuan a chhûnga mitthi awmte chu a chhuahtîr a, Thihna leh Mitthi khua [“hremhmun,” King James Version] chuan an chhûnga mitthi awmte chu an chhuahtîr bawk a,” a ti. Ni e, Bible-a hremhmun chu tihruah a ni dâwn. Isua’n a tiam angin, “a hun a thleng dâwn ta, chutih hunah chuan [“hriatrengna,” NW] thlâna awm zawng zawngin [Isua] aw an hria ang a, an chhuak vek ang.” (Johana 5:28) Pathian Jehova hriatrengnaa awm thi tawh maktaduai tam takte chu tûnah chuan taksa engemaw puin awm tawh rih lo mah se, lei paradis din thar lehah chuan kaihthawhleh, a nih loh leh tihnunleh an ni ang.​—Luka 23:43; Tirhkohte 24:15.

Pathian khawvêl tharah chuan, a dân felte zâwmtu kaihthawhlehte chu engtikah mah an thi leh tawh lo vang. (Isaia 25:⁠8) Jehova chuan “an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.” Dik takin, “thil hmasate chu a ral” tawh dâwn a ni. (Thu Puan 21:⁠4) Hremhmuna​—“hriatrengna thlâna”​—awmte tân chuan beisei tûr ropui a va ni êm! Chu malsâwmna ringawt pawh chu Pathian Jehova leh a Fapa, Isua Krista hriatna neih belh chhan tûr a tling a ni.​—Johana 17:⁠3. (w02 7/15)

[Footnote-te]

[Phêk 5-naa milem]

Joba chuan hremhmuna inhumhim a ngên

[Phêk 6-naa milem]

Gehenna Mei​—chatuana boralna entîrna

[Phêk 7-naa milem]

‘Hriatrengna thlâna awmte chu an lo chhuak ang’