In Chhelnaah Chuan Pathian Ngaihsakna Telh Rawh U
In Chhelnaah Chuan Pathian Ngaihsakna Telh Rawh U
“In rinnahah chuan . . . chhelna telh ula, in chhelnaah chuan Pathian ngaihsakna telh ula.”—2 PETERA 1:5, 6.
1, 2. (a) Naupangah chuan eng ang ṭhanna nge beisei a nih? (b) Thlarau lama ṭhan hi engti taka pawimawh nge ni?
NAUPANG tân chuan ṭhan hi a pawimawh êm êm a; mahse, taksa ṭhan mai chu a duhawm lo. Rilru leh ngaihtuahna lama an ṭhan bawk chu beisei a ni. Tichuan, a hun têah naupang chuan a naupang rilru chu paihin, puitling a lo ni chho a ni. Tirhkoh Paula pawhin: “Ka naupan laiin naupang ṭawngin ka ṭawng a, naupang hriatin ka hria a, naupang ngaihtuahin ka ngaihtuah ṭhîn; tûna ka lo puitlin hnu hian naupang tih dân chu ka bân tawh,” tia a ziah khân he mi chungchâng hi a sawi a ni.—1 Korinth 13:11.
2 Paula thu chuan thlarau lama ṭhan a pawimawhzia chungchângah thu pawimawh tak mai a sawi a. Kristiante chu thlarau lama naupang nihna ata ‘rilru lama puitling’ ni tûra an ṭhan chhoh a ngai a ni. (1 Korinth 14:20) “Krista famkimna lenzia tluka” awm tumin theihtâwp an chhuah tûr a ni a. Chutianga an tih chuan, “zirtîrna thli tinrênga lehlam lehlama vawrh leh len len naupang” an ni lo vang.—Ephesi 4:11-14.
3, 4. (a) Thlarau lama mi puitling ni tûrin eng nge kan tih ngai? (b) Eng Pathian lâwmzâwng miziate nge kan lantîr tûr ni a, chûngte chu engti fakauvin nge a pawimawh?
3 Engtin nge thlarau lama puitling kan nih theih ang? Tisa lama ṭhanna chu dinhmun pângngaiah chuan amaha lo awm mai a nih laiin, thlarau lama ṭhanna erawh chu a thawha thawh chhuah ngai a ni a. Pathian Thu hriatna dik neih leh chu kan thil hriatte mila thiltihah a inṭan a ni. (Hebrai 5:14; 2 Petera 1:3) Tin, chu chuan Pathian lâwmzâwng miziate târ lang tûrin min ṭanpui a. Tisa lam ṭhanna pawh thil tam tak nên a ṭhan rual angin, Pathian lâwmzâwng mizia chi hrang hranga ṭhanna pawh a rualin a thleng tlângpui a ni. Tirhkoh Petera chuan heti hian a ziak a: “Taihmâk rêng rêng chhuahin, in rinnaah chuan ṭhatna telh ula, in ṭhatnaah chuan hriatna telh ula, in hriatnaah chuan insûmna telh ula, in insûmnaah chuan chhelna telh ula, in chhelnaah chuan Pathian ngaihsakna telh ula, in Pathian ngaihsaknaah chuan unaute hmangaihna telh ula, in unaute hmangaihnaah chuan hmangaihna telh rawh u,” tiin.—2 Petera 1:5-7.
4 Petera sawi chhuah mizia zawng zawngte hi a pawimawh vek a, pakhat mah ngaihthah theih a ni lo. Heti ang hian a sawi zawm a: “Chûng chu in ta a nih a, a pun zêl si chuan kan Lalpa Isua Krista hriatna kawngah hian thatchhe lo leh rah lo lovin a siam ṭhîn che u a ni,” tiin. (2 Petera 1:8) Tûnah chuan kan chhelnaa Pathian ngaihsakna telh a ngaihzia i lo thlûr bing ang u.
Chhel A Ngaihna
5. Engvângin nge chhelna kan mamawh?
5 Petera leh Paula chuan Pathian ngaihsakna leh chhelna an thlun zawm ve ve a. (1 Timothea 6:11) Chhel tih awmzia chu harsatna tawrh ṭâng ṭâng leh rilru thlâk chuang loh mai a ni lo. Fiahna te, harsatna te, thlêmna te, a nih loh leh tihduhdahnate hnuaia beiseina hlauh hauh lo va dawhtheihna, huaisenna, leh nghehna neih a huam a ni. “Krista Isuaa Pathian ngaihsaka awm” kan nih avângin, tihduhdahna tawn chu kan inbeisei a. (2 Timothea 3:12) Jehova kan hmangaihna finfiah tûr leh chhandamna atâna mamawh miziate nei tûr chuan kan chhel tûr a ni. (Rom 5:3-5; 2 Timothea 4:7, 8; Jakoba 1:3, 4, 12) Chhelna tel lo chuan chatuana nunna kan chang thei lo vang.—Rom 2:6, 7; Hebrai 10:36.
6. Eng kan tihin nge a tâwp thlenga chhel kan nih?
6 Ṭha takin bul ṭan mah ila, a pawimawh ber chu chhelna hi a ni. Isua chuan: “A tâwp thlenga tuar peih [“chhel,” NW] apiang chu, chu mi ngei chu chhandamin a awm ang,” a ti. (Matthaia 24:13) Ni e, tûna kan nun tâwpna a ni emaw, he khawvêl suaksual tâwpna a ni emaw, a tâwp thlengin kan chhel tûr a ni. A engemaw zâwk zâwk pawh nise, Pathian laka kan rinawmna chu kan vawng tûr a ni. Nimahsela, kan chhelnaah Pathian ngaihsakna kan telh loh chuan Jehova kan tilâwm thei lo va, chatuan nunna kan chang thei lo vang. A nih leh, Pathian ngaihsakna chu eng nge ni?
Pathian Ngaihsakna Awmzia Chu
7. Pathian ngaihsakna chu eng nge ni a, chu chuan engti tûrin nge min turluih?
7 Pathian ngaihsakna chu lei leh vâna a lal chungnunna laka rinawm avânga Pathian Jehova zahna, chibai bûkna, leh a rawng bâwlna hi a ni. Jehova zahna nêna Pathian ngaihsakna lantîr tûr chuan, amah leh a kawngte hriatna dik kan neih a ngai a ni. Pathian chu mahni ngeia hriat leh inhre chiang tak nih kan duh tûr a ni. Chu chuan kan thiltih leh nun kawng hmanga lantîr thinlung tak taka amah hnaihna chu nei tûrin min chêttîr ang. A kawngte entawn leh a mizia leh nungchangte târ lang a, a theih ang chen chena Jehova an chu kan châk tûr a ni a. (Ephesi 5:1) Pathian ngaihsakna chuan kan thiltih zawng zawnga Pathian tihlâwm chu duh tûrin min chêttîr a ni.—1 Korinth 10:31.
8. Engtin nge Pathian ngaihsakna leh a hnêna inpumpêkna pumhlûm chu a inkawp tlat?
8 Pathian ngaihsakna dik tak nei tûr chuan, thinlung zawng zawngin Jehova chauh chibai kan bûk tûr a ni a, kan thinlunga a hmun chan chu engmahin a luahlan kan phal tûr a ni lo. Min Siamtu a nih angin, a hnêna inpêk pumhlûmna min phût tûrin dikna a nei a ni. (Deuteronomy 4:24; Isaia 42:8) Nimahsela, Jehova chuan amah be tûrin min tilui lo va. Duhthua kan inpêk chu a duh a ni. Kan nunte siam ṭha a, a hnêna inpumpêk pumhlûm a, chu kan inpumpêkna thutiam hlen chhuak tûra min chêttîrtu chu Pathian hriatna dik kan neih avânga amah kan hmangaihna hi a ni.
Pathian Nêna Inlaichînna Siam Rawh
9, 10. Engtin nge Pathian nêna inlaichînna ṭha tak kan siam theih a, chu chu kan vênhim theih ang?
9 Baptisma changa Pathian hnêna kan inpumpêkzia kan lantîr hnuah amah nêna inlaichînna ṭha lehzual kan siam a ngai a. Chuvângin, chu mi tih kan duhna leh rinawm taka a rawng bâwl kan duhna chuan a Thu zirna chhunzawm tûr leh chhût ngun tûrin min chêttîr a ni. Tichuan, kan rilru leh kan thinlunga Pathian thlarauvin hna a thawh kan phal chhûng chuan, Jehova kan hmangaihna chu a thûk sawt ṭhîn a. Amah nêna kan inlaichînna pawh kan nuna thil pawimawh ber a ni chhunzawm zêl a ni. Jehova chu kan Ṭhian ṭha ber angah ngaiin, engtik lai pawha amah tihlâwm reng chu kan duh a. (1 Johana 5:3) Pathian nêna kan inlaichînna duhawm tak avânga kan lâwmna chu a ṭhang zêl a; tin, kan mamawh huna hmangaih taka min zirtîrna leh min thununna avângin kan lâwm êm êm bawk a ni.—Deuteronomy 8:5.
10 Jehova nêna kan inlaichînna hlu tak chu tihngheh tuma ṭan kan lâk reng loh chuan, kan inlaichînna chu a chhe thei a. Chutianga a chhiat chuan, Pathian dik loh vâng a ni lo, “ani chuan min hlat lo ṭheuh si a.” (Tirhkohte 17:27) Jehova chu pan harsaa a awm loh avângin kan va lâwm tak êm! (1 Johana 5:14, 15) Ni e, Jehova nêna inlaichînna ṭha tak neih reng tumin kan thawk tûr a ni rêng a. Mahse, ani chuan Pathian ngaihsakna nei tûr leh chu mi vênghim tûra kan mamawh zawng zawngte min pein, amah hnaih tûrin min ṭanpui a ni. (Jakoba 4:8) Engtin nge hêng ṭanpuina zawng zawngte hi kan hman ṭangkai theih ang?
Thlarau Lamah Chak Reng Rawh
11. Pathian ngaihsakna kan lantîr dân kawng ṭhenkhat chu engte nge ni?
11 Pathian kan hmangaihna nghet tak chuan, kan Pathian ngaihsakna chu Paula min fuihna nêna inmila târ lang tûrin min chêttîr ang. Paula fuihna thu chu hei hi a ni: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tih hi. (2 Timothea 2:15) Hetianga ti tûr hian mumal taka Bible zir te, inkhâwm te, leh thlawhhma rawngbâwlnaa tel te a ngai a ni. Tin, ‘bâng lova ṭawngṭaiin’ Jehova kan hnaih reng thei bawk. (1 Thessalonika 5:17) Hêngte hi Pathian kan ngaihsakzia kan lantîrna thiltih awmze nei tak a ni. Hêng zînga a enga pawh ngaihthahna hian thlarau lama hrisêl lohna min thlen thei a, Setana hmanrua lakah min titlâwm thei bawk a ni.—1 Petera 5:8.
12. Engtin nge fiahnate hlawhtling taka kan tuar chhuah theih?
12 Thlarau lama chakna leh phusakna pawhin fiahna kan tawn tam takte hmachhawn thei tûrin min ṭanpui bawk. Fiahnate chu tawrh harsa kan tihzual tûrte hnên aṭanga lo chhuak pawh a ni thei. Inngaihthahna te, dodâlna te, leh tihduhdahna te chu chhûngkaw zînga mite te, chhûng leh khat te, a nih loh leh ṭhenawmte hnên aṭanga a lo chhuah hian tawrh a har zual bîk a. Hna thawhna hmunah emaw, school-ah emaw chuan Kristian thu bulte zawi zawia min thlahthlamtîr thei nêksâwrna engemaw a chhuak thei bawk. Lunghnualna te, natna te, leh lungngaihna te chuan tisa lamah min tichauvin, rinna fiahnate hmachhawn chu a tiharsa sawt ṭhîn. Mahse, “Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah” ṭan kan khawh reng hian fiahna zawng zawng chu hlawhtling takin kan tuar chhuak thei a ni. (2 Petera 3:11, 12) Tin, chutianga kan tih chuan Pathian malsâwmna kan dawng dâwn tih kan chiang a, hlimna pawh kan nei reng thei a ni.—Thufingte 10:22.
13. Pathian ngaihsakna târ lang reng tûr chuan eng nge kan tih ngai?
13 Pathian ngaihsaktute chu Setana beih duhzâwng ni mahse, kan hlauh a ngai lo. Engvâng nge? A chhan chu Jehova chuan “amah ngaihsaktute chu thlêmna ata chhan chhuah dân” a hriat vâng a ni. (2 Petera 2:9) Fiahna tuar chhuak thei tûr leh chutiang chhanchhhuahna tawng tûr chuan, “Pathian ngaihsak lohna leh khawvêl châknate bânsanin, tûn lai khawvêlah hian insûm leh fel tak leh Pathian ngaihsakin kan awm tûr a ni.” (Tita 2:12, 13) Kristian kan nih angin, tisa châknate leh tisa thiltihte kaihhnawih chaklohna eng amah hian kan Pathian ngaihsakna chu a luahlân a, a tihboral loh nân kan fîmkhur reng tûr a ni. Tûnah chuan chûng thil hlauhawm ṭhenkhatte chu i lo ngaihtuah ang u.
Pathian Ngaihsakna Tiderthâwng Theite Lakah Fîmkhur Rawh
14. Sum leh pai âtchilhna thanga kan awh chuan eng nge kan hriat reng tûr?
14 Sum leh pai âtchilhna hi mi tam takte tân chuan thang a ni. “Pathian ngaihsak hi [sum leh pai lama] hlâwkna emaw” tiin keimahni leh keimahni kan inbum thei a. Chuvângin, rinnaa kan unaute min rinna chu dik lo takin remchângah kan la thei a ni. (1 Timothea 6:5) Kan rulh leh theih beisei awm lêm lo tûr pawisa min pûktîr tûra kan unau Kristian mi hausate nawrluih pawh a pawi lovah ngaiin, kan ngaisual hial mai thei bawk. (Sâm 37:21) Mahse, “nunna tûna awm sa leh la awm tûr pêk tiamna” chu sum leh paiah ni lovin, Pathian ngaihsaknaah a awm a ni. (1 Timothea 4:8) ‘Khawvêlah hian engmah kan luhpui lo va, engmah kan chhuahpui theih bawk loh’ avângin, ‘lungawina tel Pathian ngaihsakna’ chu ûm zui zêl tum tlatin, ‘ei tûr leh silh tûr neiin chûngah chuan lungawi’ i tum tlat ang u.—1 Timothea 6:6-11.
15. Nawmsip ûmnain kan Pathian ngaihsakna a dîpdâl mai a hlauhawm chuan eng nge kan tih theih?
15 Nawmsip ûmna chuan Pathian ngaihsakna a dîpdâl thei. He mi chungchângah hian insiamṭhat vat kan ngai em? Taksa lam insawizawina leh intihhlimna aṭangin hlâwkna engemaw zâwng a neih theih ngei mai. Mahse, chûng hlâwknate chu chatuan nunna nêna khaikhin chuan engmah a ni lo. (1 Johana 2:25) Tûn laia mi tam takte hi ‘Pathian hmangaih aia mahni lâwmna mai hmangaih zâwktute, Pathian ngaihsak anna nei a, nimahsela a thiltihtheihna âwih si lote’ an ni a, chutiang mite chu kan hawisan a ṭûl a ni. (2 Timothea 3:4, 5) Pathian ngaihsakna dah pawimawh zâwktute chuan ‘nunna, nunna taktak chu an vawn theih nân, hun lo thleng tûr atân chuan lungphûm ṭha tak an tân an khâwlkhâwm’ a ni.—1 Timothea 6:19.
16. Eng sual lam châknain nge mi ṭhenkhat chu Pathian thil phût felte zawm lohtîr a, engtin nge chûng châknate chu kan hneh theih ang?
16 Zu ngawl veina leh Ruihhlo ngaihna te, nungchang bawlhhlawhna te, leh châkna sual te hian kan Pathian ngaihsakna a tichhe thei. Hêng thiltea tlûkna hian Pathian thilphût felte zâwm lo tûrin min dang chat thei a ni. (1 Korinth 6:9, 10; 2 Korinth 7:1) Paula ngei pawhin a tisa sual chu a do chhunzawm reng a ngai a. (Rom 7:21-25) Châkna dik lo tibo tûr chuan nasa taka inkhuahkhirh a ngai a ni. Thil pakhatah chuan, nungchang lama thianghlim reng kan tum tlat tûr a ni. Paula chuan: “In taksa pêng leia awmte hi tihlum rawh u, inngaihna te, bawlhhlawhna te, hurna te, châkna sual te, duhâmna te hi (duhâmna chu milem biakna a ni si a)” tih min hrilh a ni. (Kolossa 3:5) Chutiang thil sualte laka kan taksa pêngte tihbo nân leh tih reh vek nâna tihlum vek tûr chuan tum ruh a ngai a ni. Pathian ṭanpuina dîla ṭhahnemngai taka ṭawngṭai fan fanna chuan he khawvêl suaksual taka châkna sualte tibo tûr leh felna leh Pathian ngaihsakna ûm zêl tûrin min ṭanpui ang.
17. Engtin nge zilhhauna hi kan thlîr ang?
17 Lunghnualna chuan kan chhelna a tichau thei a, kan Pathian ngaihsakna chungah nghawng ṭha lo tak a nei thei. Jehova chhiahhlawh tam takin lunghnualna an lo tawng tawh ṭhîn a. (Numbers 11:11-15; Ezra 4:4; Jona 4:3) A bîk takin lunghnualna chu tihthinur kan nih vânga huatna thinlung emaw, zilhna leh thununna nasa tak avânga huatna thinlung emaw nêna a inkawp hian, chu chuan kan chungah chhiatna nasa tak a thlen thei a ni. Nimahsela, zilhna leh thununna te chu Pathian min hmangaihzia leh min ngaihtuahzia târ lanna a ni a. (Hebrai 12:5-7, 10, 11) Thununna chu inhremna ringawta ngaih tûr a ni lo va, felna kawnga inzirtîrnaah kan ngai tûr a ni. Kan inngaihtlâwm chuan, “zirtîrna zilhhauna chu nunna kawng a ni” tih hriain, thununna chu kan hlutin, kan pawm ang. (Thufingte 6:23) Chu chuan Pathian ngaihsakna ûmna kawngah thlarau lama hmasâwnna ṭha tak siam tûrin min ṭanpui thei a ni.
18. Mi mal intihthiam lohna a lo awmin eng mawhphurhna nge kan neih?
18 Inhriatthiam lohna leh mi mal intihthiam lohna chuan kan Pathian ngaihsakna a cho thei. Chu chuan lungkhamna emaw, ṭhenkhat chu âtthlâk taka an thlarau lam unaute laka inkulh hranna emaw a awmtîr thei a ni. (Thufingte 18:1) Chuvângin, mi dangte huatna neih zui reng emaw, duh lohna neih reng emaw chuan Jehova nêna kan inlaichînna chu a nghawng chhe hle thei tih hriat reng a ṭha. (Leviticus 19:18) Dik tak chuan, miin ‘a unau a hmuh tawh renga mah a hmangaih loh chuan Pathian a hmuh ngai lohva chu a hmangaih thei lo.’ (1 Johana 4:20) Tlâng chunga a Thusawiah Isua chuan mihring inkâra inhmuh thiam lohna chingfel tûra hma lâk vat a pawimawhzia a sawi uar hle a. A thu ngaithlatute hnênah chuan: “Chutichuan, maichâm bula i thilpêk i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thil pêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tih a hrilh a ni. (Matthaia 5:23, 24) Thupha chawina chuan ṭawngkam leh thiltih avânga rilru natna chu a tidam leh thei a. Mawihnai lo taka kan khawsak zia kan pawm a, ngaihdam kan dîl chuan kan inlaichînna ṭha lo chu a tihṭhat leh theihin, inlaichînna muanawm tak chu neih leh theih a ni. Isua chuan harsatna chinfel dânah fuihna dang pawh a pe bawk a. (Matthaia 18:15-17) Harsatnate hlawhtling taka kan chinfel theih hian kan va hlim ṭhîn tak êm!—Rom 12:18; Ephesi 4:26, 27.
Isua Entawn Tûr Siam Chu Zui Rawh
19. Engvângin nge Isua entawn tûr siam entawn chu a pawimawh êm êm?
19 Fiahna chu kan tawng ngei ang; mahse, chatuan nunna kawng ata mi la pêng tûr a ni lo. Jehova chuan fiahna kan tawnte ata min chhanchhuak thei tih hre reng ang che. ‘Min tihnawk apiang dah ṭha’ a, ‘kan hmaa intlânsiakna tûr awmah chhel taka kan tlân hian,’ ‘Isua, kan rinna siamtu leh tifamkimtu lam chu i en’ tlat ang u. (Hebrai 12:1-3) Isua entawn tûr siam chu ngun taka kan endik a, kan thiltih leh ṭawngkama amah entawn tlat kan tumna chuan Pathian ngaihsakna nei tûr leh nasa lehzuala târ lang tûrin min ṭanpui ang.
20. Chhelna leh Pathian ngaihsakna ûmna chuan eng lâwmman nge a thlen?
20 Chhelna leh Pathian ngaihsakna chuan kan chhandamna tichiang tûrin an thawk kawp tlat a. Hêng mize hlu takte târ lanna hmangin, kan Pathian rawngbâwlna thianghlim chu rinawm takin kan hlân zêl thei a ni. Tin, fiahna kan tawn pawhin, chhelna leh Pathian ngaihsakna kan lantîr avânga Jehova malsâwmna leh khawngaihna kan dawn avângin kan hlim reng ang. (Jakoba 5:11) Chu chang a ni lo, Isua ngei chuan: “In chhelin in nun in chhanhim ang,” tih min tiam bawk.—Luka 21:19. (w02 7/15)
Engtin Nge I Chhân Ang?
• Egvângin nge chhel a pawimawh?
• Pathian ngaihsakna chu eng nge ni a, eng anga lantîr nge a nih?
• Engtin nge Pathian nêna inlaichînna ṭha tak kan neih theih a, engtin nge kan neih zawm zêl theih?
• Kan Pathian ngaihsakna tiderthâwng thei thil ṭhenkhatte chu engte nge ni a, engtin nge kan pumpelh theih ang?
[Zirlai Atâna Zawhnate]
[Phêk 20-naa milemte]
Pathian ngaihsakna chu kawng tam taka târ lan a ni