Kristiante Chuan Thlarau Leh Thutakin Pathian Chibai An Bûk
Kristiante Chuan Thlarau Leh Thutakin Pathian Chibai An Bûk
“Pathian chu thlarau a ni; amah chibai bûktuten thlarau leh tih tak zetin [“thutakin,” NW] chibai an bûk tûr a ni.”—JOHANA 4:24.
1. Eng ang chibai bûkna hi nge Pathianin a lawm?
JEHOVA Fapa neih chhun, Isua Krista chuan a Pa vâna mi lawmzâwng chibai bûkna chu chiang takin min hrilh a. Sukâr khaw kianga tuichhunchhuaha Samari hmeichhe hnêna thu a hrilh khân, Isua chuan: “Nangnin in hriat loh chibai in bûk ṭhîn; keini zawngin kan hriata chu chibai kan bûk ṭhîn. Chhanhimna Judate hnên ata a lo chhuak dâwn si a. Chutichuan a hun a thleng dâwn ta, tûnah pawh a thleng tawh mêk, chu mi hunah chuan Pathian chibai bûktu taktakten thlarau leh tih tak zetin [“thutakin,” NW] Pa chibai an bûk ang, Pain chutiang mi chu a chibai bûktu tûrin a zawng a ni. Pathian chu Thlarau a ni; a chibai bûktuten thlarau leh tih tak zetin [“thutakin,”] chibai an bûk tûr a ni,” tiin a hrilh a ni. (Johana 4:22-24) Hêng thute hian eng nge min hrilh?
2. Samari mite khân an chibai bûkna chu engah nge an nghah?
2 Samari mite chuan sakhaw ngaih dân dik lo an nei a. Pathian Lehkhabu Thianghlima bu hmasa pa ngate chauh hi thlarauva thâwk khumah an pawm a, chutah pawh anmahni ziah ṭhat liau liau, Samaritan Pentateuch tia an koh chauh chu an pawm a ni. Samari mite chuan Pathian hre chiang lo mah se, Juda-ho chu Pathian Thu hriatna kawltîr an ni. (Rom 3:1, 2) Chuvângin, Juda mi rinawmte leh mi dangte tân chuan Jehova duhsakna chu a neih theih a. Mahse, chu chuan an lakah eng nge a phût dâwn?
3. ‘Thlarau leh thutaka’ Pathian chibai bûk tûr chuan eng nge ngai?
3 Jehova tilâwm tûr chuan, hmân lai Judahote, Samari mite, leh mi dangte chuan eng nge an tih ngai? “Thlarau leh thutakin” amah chibai an bûk a ngai a. Chuvângin, keini pawhin chutiang bawkin kan ti tûr a ni. Pathian rawng bâwl chu phûr tak, a nih loh leh ṭhahnemngai taka tih tûr a ni a, hmangaihna leh rinnaa khat thinlungin a chêttîr tûr ni mah se, thlarauva Pathian chibai bûk tûr chuan a thlarau thianghlim chu kan neih ngei a ngai a, chu chu kan inkaihhruaitîr tûr a ni. Pathian Thu zirna leh nunpuina hmangin, kan thlarau, a nih loh leh rilru put hmang chu Pathian rilru leh thlarau nên a inrem tûr a ni a. (1 Korinth 2:8-12) Kan biakna Jehova pawm tlâk ni tûr chuan, thutak nêna kan hlan a ngai bawk. Chu chu Pathian Thu, Bible-in amah leh a thiltum chungchâng a târ lante nên a inmil tûr a ni.
Thutak Chu Hmuh Theih A Ni
4. Engtin nge ṭhenkhatin thutak an thlîr?
4 Thurin chungchâng zirlai ṭhenkhat chuan thutak pumhlûm chu mihringte hriat phâk a ni lo tih ngaih dân an nei a. Dik tak chuan, Swedish mi thuziaktu Alf Ahlberg-a chuan heti hian a ziak a: “Hêng thurin lam hawi zawhna tam tak hi a chhânna dik tak pêk theih a ni lo,” tiin. Mi ṭhenkhat chuan dik zâwk chauh a awm thei an ti a; mah se, an sawi dik tak zet em? Isua chuan an sawi dik a ti lo.
5. Engvângin nge Isua khawvêlah a lo kal?
5 A hnuaia thilthlengte hi a lo thlîrtu angah han inchan ta ila: A hun chu C.E. 33 kum tîr lam a ni a, Isua chu Rom Ramawptu Pontia Pilata hmaah a ding a. Isua chuan a hnênah: “Thutak hriattîr hi . . . khawvela ka rawn kal chhan a ni” tiin a hrilh a. Pilata’n a hnênah: “Thutak engnge ni?” a ti a. Mahse, Isua chhânna a nghâk chuang lo.—Johana 18:36-38.
6. (a) “Thutak” hi eng anga hrilhfiah nge ni? (b) Eng hna nge Isua’n a hnungzuitute a pêk?
6 “Thutak” chu “thudik, tak, belhchian dâwl” tia hrilhfiah a ni a. (Zoṭawng Dictionary) A nih leh Isua khân thutak satliah em ni a hriattîr? Ni lo. Thutak engemaw bîk tak a ni a rilrua awm chu. Chutiang thutak chu puang chhuak tûrin a hnungzuitute chu a tîr a ni, hetiang hian thu a pe si a: “Kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tiin. (Matthaia 28:19, 20) Isua hnungzuitu dik takte chuan khawvêl tâwpna lo thlen hmain “chanchin ṭha thutak” chu an puangchhuak tûr a ni. (Matthaia 24:3; Galatia 2:14) Hei hi Isua’n: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” a tih thlen famkim nâna tih a ni dâwn. (Matthaia 24:14) Chuvângin, Ram chanchin ṭha hrilhna hmanga hnam zawng zawngte thutak zirtîrtute kan hriat chu a pawimawh êm êm a ni.
Thutak Kan Zir Theih Dân
7. Engtin nge Jehova chu thutak Lo Chhuahna Hnâr a ni tih i finfiah ang?
7 Jehova chu thlarau lam thutak Lo Chhuahna Hnâr a ni a. Fakna hla phuahtu Davida phei chuan Jehova chu “thutak Pathian” tiin a ko hial a ni. (Sâm 31:5; 43:3) Isua chuan a Pa thu chu thutak a ni tih a pawm thlap a, hetiang hian a puang bawk a ni: “Zâwlneite lehkhabuah, ‘Pathian zirtîrin an awm vek ang,’ tih ziak a ni. Mi tin Pa thu hriaa zir apiang chu ka hnênah an lo kal ṭhîn,” tiin. (Johana 6:45; 17:17; Isaia 54:13) Chuvângin, thutak zawngtute chu Zirtîrtu Ropui Ber, Jehova zirtîrin an awm tûr a ni. (Isaia 30:20, 21, NW) Thutak zawngtute chuan “Pathian hriatna” an neih a ngai bawk. (Thufingte 2:5) Tin, Jehova chuan hmangaihna nên thutak chu kawng chi hrang hrangin a zirtîr a ni.
8. Eng kawngin nge Pathianin thutak chu a zirtîrin, a pêk chhuah?
8 Entîr nân, Pathian chuan vântihkoh hmangin Israel mite hnênah Dân a pe a. (Galatia 3:19) Thlahtu Abrahama leh Jakoba chu mumang lamah malsâwmna a tiam bawk a. (Genesis 15:12-16; 28:10-19) Isua’n baptisma a chan laia thu bengverh tak mai: “Hei hi ka Fapa duh tak, ka lawm êm êma chu a ni,” tih leia hriat a nih angin, Pathian chuan vân aṭang ngeiin thu a sawi hial bawk a ni. (Matthaia 3:17) Chu bâkah, Pathianin Bible ziaktute thâwk khumna hmanga thutak a hriattîr avâng hian kan lâwm thei a. (2 Timothea 3:16, 17) Chuvângin, Pathian Thu zirna aṭangin ‘thutak kan âwih’ thei a ni.—2 Thessalonika 2:13.
Thutak leh Pathian Fapa
9. Engtin nge Pathianin a Fapa chu thutak hriattîr nân a hman?
9 A bîk takin Pathian chuan mihringte hnêna thutak hriattîr nân a Fapa, Isua Krista chu a hmang a. (Hebrai 1:1-3) Dik tak chuan, Isua sawi angin tuman thutak an la sawi ngai lo a ni. (Johana 7:46) Vâna a lâwn chhoh hnuah pawh a Pa hnên ata thutak chu a la hriattîr reng tho va. Entîr nân, tirhkoh Johana chuan, “Isua Krista thu puan chhuah, Pathianin a bâwihte hriattîr atâna a hnêna a pêk, thil lo awm lawk tûr thu chu” a dawng a ni.—Thu Puan 1:1-3.
10, 11. (a) Isua thutak hriattîr chu eng nên nge a inlaichîn? (b) Engtin nge Isua’n thutak chu a taka a chantîr?
10 Isua chuan Pontia Pilata hnênah thutak hriattîr tûra leia A lo kal thu a hrilh a. A rawng bâwl chhûng zawngin, Isua chuan chutiang thutak chu Krista Lalna Pathian Ram hmanga Jehova lalchungnunna thiamchantîrna nên a inkungkaih tlat tih a târ lang a ni. Mahse, thutak hriattîr tûr chuan thuhrilh leh zirtîr mai aia tam Isua’n a tih a ngai a. Isua chuan thutak thlen famkimtîrin thutak chu a takah a chantîr a ni. Chutiang tak chuan tirhkoh Paula chuan: “Ei thu-ah emaw, in thu-ah emaw, kût ni thu-ah emaw thla thar thu-ah emaw, chawlhni (sabbath) thu-ah emaw, tuman sawisêl che u suh se; chûng chu thil lo thleng tûrte hlim a ni, a tak erawh chu Krista ta a ni,” tiin a ziak a ni.—Kolossa 2:16, 17.
11 Thutak a tak chantîr anih dân kawng khat chu sawi lâwk ang ngeia Bethlehema Isua a lo pianna hi a ni. (Mika 5:2; Luka 2:4-11) Tin, ‘kum hapta’ 69-na tâwp lama Messia lo lan tûr chungchâng Daniela hrilh lâwk thu thlen famkimna pawh chu thutak a taka chantîrna a ni bawk. Chu chu sawi lâwk hun chiah, C.E, 29, Isua’n baptisma changa Pathian hnêna a inpêk hun leh thlarau thianghlima hriak thih a nih hun khân a thleng famkim a ni. (Daniela 9:25; Luka 3:1, 21, 22) Chu bâkah, Lalram thu puangtu anga Isua rawngbâwlna bengvârthlâk tak khân thutak chu a takah a chantîr lehzual bawk. (Isaia 9:1, 2, 6, 7; 61:1, 2; Matthaia 4:13-17; Luka 4:18-21) Tin, a thihna leh a thawhlehna pawh khân thutak chu a takah a chantîr bawk a ni.—Sâm 16:8-11; Isaia 53:5, 8, 11, 12; Matthaia 20:28; Johana 1:29; Tirhkohte 2:25-31.
12. Engvângin nge Isua’n ‘thutak ka ni’ a tih theih?
12 Thutak chu Isua Krista-ah a innghah tlat avângin: “Keimah hi kawng leh thutak leh nunna ka ni; keimaha kal lo chu tumah Pa hnênah an thleng ngai lo,” a ti thei a ni. (Johana 14:6) Mite chu Pathian thiltuma Isua chanvo pawmna hmanga “thutaka mi” an lo nih chuan, thlarau lama tihzalen an lo ni a. (Johana 8:32-36; 18:37) Berâm ang mite chuan thutak an pawm a, rinnaa Krista an zui avângin, chatuan nunna an chang ang.—Johana 10:24-28.
13. Eng kawng pathumte nge Pathian Lehkha Thu thutak hmanga kan belhchian dâwn?
13 Isua leh thlarauva thâwk khum a zirtîrte puan chhuah thutak chuan Kristian thurin dik a siam a. Chuvângin, ‘rinna âwihtute’ chu “thutakah an awm” zêl a ni. (Tirhkohte 6:7; 3 Johana 3, 4) A nih leh tûn laiah tute nge thutakah awm? Tute’n nge hnam zawng zawngte chu thutak zirtîr? Chûng zawhnate chhân nân, Kristian hmasate chu kan thlûr bîk ang a; tin, (1) rina te, (2) biak dân phung te, leh (3) mi mal nungchang te kaihhnawih Pathian Lehkha Thu thutak chu kan bêlchiang dâwn a ni.
Thutak leh Thurin
14, 15. Kristian hmasate leh Jehova Thuhretute’n Pathian Lehkha Thu an thlîr dân chungchângah eng nge i sawi theih?
14 Kristian hmasate chuan Jehova Thu chu an ngaisâng hle a. (Johana 17:17) An thurin leh thil chînte chungchânga an tehfung ber a ni. Kum zabi pahnihna leh pathumnaa awm Aleksandria khaw chhuak Clement-a chuan heti hian a sawi: “Taima taka ṭhatna ûmtute chuan an thurin chu Bible aṭanga a finfiahna an hmuh hma loh zawng, thutak an zawnna chu an bânsan lo vang” tiin.
15 Kristian hmasate ang bawkin, Jehova Thuhretute chuan Bible an ngaisâng hle a. “Pathian Lehkha Thu zawng zawng hi Pathian thâwk khuma pêk a ni a, zirtîr kawngahte . . . a sâwt” tih an ring a ni. (2 Timothea 3:16) Chuvângin, tûn laia Jehova chhiahhlawhte’n Bible hi zirlaibu bera an hman avânga an thil hriatte hmangin Kristian hmasate thurin ṭhenkhat i lo ngaihtuah ang u.
Mitthi Chungchâng Thutak
16. Mitthi chungchâng thutak chu eng nge ni?
16 Pathian Lehkha Thu an rin avângin, Kristian hmasate chuan mitthi chungchânga thutak an zirtîr a. Pathianin mihring a siam khân “mihring chu mi nung a lo ni,” tih an hria a. (Genesis 2:7) Chu bâkah, chu mihring chu a lo sual chuan a thi a ni tih an ring bawk. (Ezekiela 18:4) Tin, “mitthi erawh chuan engmah an hre lo,” tih an hre bawk a ni.—Thuhriltu 9:5-10.
17. Engtin nge mitthite tâna beiseina chu i hrilhfiah ang?
17 Chutichung chuan, Isua zirtîr hmasate chuan Pathian hriatrengnaa thite chu kaihthawhleh, a nih loh leh tihnunleh an ni dâwn tih beiseina nghet tak an nei bawk. Chu rinna chu Paula’n chiang takin heti hian a sawi chhuak a ni: “Mi felte leh fel lote thawhlehna a awm ang tih Pathian lamah ka beisei a,” tiin. (Tirhkohte 24:15) Chu mi hnuah pawh, Kristiana inchhâl Minucius Felix-a chuan tihian a ziak: “Pathian ngeiin atîra a din tawh hnu chu din nawnleh thei lo tûra ngai tûr khawpin tunge maw chhâw a, mâwl ang le?” tiin. Kristian hmasate ang bawkin, Jehova Thuhretute chuan mitthi leh thawhlehna chungchânga Pathian Lehkha Thu thutak chu an vuan tlat a ni. Tûnah chuan Pathian leh Krista nihna lo ngaihtuah ta ila.
Thutak leh Trinity
18, 19. Engvângin nge Trinity chu Pathian Lehkha Thu zirtîrna a ni lo tih a sawi theih?
18 Kristian hmasate chuan Pathian, Krista, leh thlarau thianghlim chu Trinity angin an thlîr lo. The Encyclopedia Britanica chuan: “Thuthlung Thar-ah hian Trinity tih thu mal emaw, chu mi lampang sawina emaw a awm lo rêng rêng a, Isua leh a hnungzuite pawhin Thuthlung Hlui-a Judate thurin bul ber: ‘Aw Israel mite u, ngaithla teh u, Lalpa kan Pathian chu pakhat chauh a ni’ tih Shema [Hebrai ṭawngṭaina] hi kalh an tum hek lo (Deuteronomy 6:4),” tiin a sawi. Kristiante chuan Rom-ho pathian infinkhâwm emaw, an pathian dangte emaw chu an be lo. Isua’n Jehova chauh chu chibai bûk tûr a ni a tih chu an pawm thlap a ni. (Matthaia 4:10) Tin, Krista thusawi: “Pa chu kei aiin a ropui zâwk si a,” tih chu an ring tlat bawk. (Johana 14:28) Tûn laia Jehova Thuhretute pawhin chutiang bawk chuan an ring a ni.
19 Isua hnungzuitu hmasate chuan Pathian, Krista, leh thlarau thianghlim te chu an thliar hrang chiang êm êm a. Dik tak chuan, zirtîrte chu (1) Pa hming, (2) Fapa hming, leh (3) thlarau thianghlim hmingin an baptis a, Trinity hmingin an baptis hauh lo. Jehova Thuhretute chuan chutiang bawkin Pathian Lehkha Thu thutak chu an zirtîr a, Pathian, a Fapa, leh thlarau thianghlim chu an thliar hrang a ni.—Matthaia 28:19.
Thutak leh Baptisma
20. Baptisma chang tûrte’n eng nge an hriat a ngaih?
20 Isua chuan a hnungzuitute chu mite thutak zirtîrna hmanga zirtîrahte siam tûrin thu a pe a. Baptisma chang thei tûr chuan, Pathian Lehkha Thu hriatna bul an neih a ngai a ni. Entîr nân, Pa leh a Fapa, Isua Krista dinhmun leh thuneihnate chu an hre tûr a ni. (Johana 3:16) Baptisma chang tûrte chuan thlarau thianghlim chu mi ni lovin, Pathian chakna chevêl reng a ni tih an hriat thiam a ngai bawk a ni.—Tirhkohte 2:1-4.
21, 22. Engvângin nge baptisma chu ringtute tân a ni tih i sawi theih?
21 Kristian hmasate chuan engkim hrilhhriat tawh leh inlamlêt a, Pathian duhzâwng ti tûra mahni thua inpumpêkna pumhlûm neite chauh an baptis ṭhîn a. Juda mi leh saphun, C.E. 33 Pentikost nîa Jerusalema kal khâwmte chuan Hebrai Pathian Lehkha Thu hriatna an nei vek tawh a. Tirhkoh Petera’n Messia Isua chungchâng a sawi an hriatin, mi 3,000 vêl chuan ‘a thu an zâwm a,’ “baptisma an chang” a ni.—Tirhkohte 2:41; 3:19–4:4; 10:34-38.
22 Kristian baptisma chu ringtute tân a ni a. Samaria rama mite chuan thutak chu an pawm a, “Pathian ram chanchin ṭha leh Isua Krista hming chanchin ṭha Philipa hrilh chu an âwih veleh ahmei apain baptisma an chang ta a.” (Tirhkohte 8:12) Ethiopia mi tilreh chu saphun inpumpêk tak, Jehova hriatna nei tawh a ni a; mahse, Messia chungchâng hrilh lâwkna thlen famkimna thu Philipa sawi chu a pawm phawt a, chu mi hnuah chauh baptisma a chang a ni. (Tirhkohte 8:34-36) Chu mi hnuah, Petera chuan Kornelia leh Jentailte hnênah “hnam tin zîngah tupawh amah [Pathian] ṭiha fel taka ti apiang a lâwmzâwng mi an ni” tih thu leh Isua Kristaa rinna nghattu apiangte chu an sualte ngaihdam an ni tih a hrilh a ni. (Tirhkohte 10:35, 43; 11:18) Hêng zawng zawngte hi ‘zirtîra siam a, thu a pêk zawng zawngte zâwm tûra zirtîr’ tûra Isua thupêk nên a inrem vek a ni. (Matthaia 28:19, 20; Tirhkohte 1:8) Jehova Thuhretute chuan chutiang tehfung bawk chu an hmang a, Pathian Lehkha Thu hriatna bul nei a, mahni thua Pathian hnêna inpumpêk tawhte chauh chu baptisma chang tûrin an pawm a ni.
23, 24. Kristian baptisma chan dân dik tak chu eng nge ni?
23 Tuia inhnimphûm vek chu ringtute baptisma chan dân tûr dik tak a ni a. Isua chu Jordan Luia baptisma a chan zawhah, ‘tui ata a rawn chhuak’ a ni. (Marka 1:10) Ethiopia mi tilreh pawhin baptisma a chan khân, amah leh Philipa chu “tuiah chuan an zuk kal dûna,” tin, ‘tui ata an lo chhuak’ dûn leh a ni. (Tirhkohte 8:36-40) Chu bâkah, Bible-in mitthi inphûmna tehkhin nâna baptisma a hmanna pawh hian baptisma chu tui chhûnga inhnimpil pumhlûm a ni tih a târ lang bawk.—Rom 6:4-6; Kolossa 2:12.
24 The Oxford Companion to the Bible chuan: “Thuthlung Thara baptisma chungchâng sawi hi chuan baptisma changtu chu tui chhûngah a inhmimpil vek tih a kâwk,” a ti a. French lehkhabu Larousse du XXe Siècle (Paris, 1928), sawi dân chuan “Kristian hmasate chuan tui an hmuh remchânna apiangah inhmimphûmin baptisma an chang ṭhîn” a ni. Tin, After Jesus—The Triumph of Christianity tih lehkhabu pawhin hetiang hian a sawi bawk: “Tih dân phung pângngaiah chuan, [baptisma] chang tûrte chuan an rinna an puanchhuah phawt a, chu mi hnuah Isua hmingin tuiah an inhmimphûm pumhlûm a ngai a ni,” tiin.
25. Thuziak dawtlehah eng nge kan sawikhâwm dâwn?
25 Kristian hmasate Bible ṭanchhan thurin leh tih dânte chungchânga kan sawi tâkte kha entîrna mai a ni a. An thurin leh Jehova Thuhretute thurin inanna dang pawh sawi tûr a la awm a ni. Thuziak dawtlehah chuan, mite thutak zirtîrtute hriat theih dân kawng dangte kan sawikhâwm leh ang. (w02 7/15)
Engtin Nge I Chhân Ang?
• Eng ang chi chibai bûkna nge Pathianin a phût?
• Engtin nge thutak chu Isua Krista hmangin a taka a lo chan?
• Mitthi chungchânga thutak chu eng nge ni?
• Engtin nge Kristian baptisma chu chantîr a nih a, baptisma chang tûr chu eng nge phût a nih?
[Zirlai Atâna Zawhnate]
[Phêk 26-naa milem]
Isua’n Pilata hnênah: ‘Thutak hriattîr tûrin ka lo kal’ a ti