Thutakah An Awm Reng
Thutakah An Awm Reng
“Ka fate thutakah an awm tih ka hriat aliama lâwmna nasa zâwk rêng ka nei lo ve.”—3 JOHANA 4.
1. “Chanchin ṭha thutak” chuan eng nge a thlûr bing?
JEHOVA chuan “thlarau leh thutaka” amah chibai bûktute chauh a pawm a. (Johana 4:24, NW) Anni chuan thutak an pawm a, Pathian Thu-a innghat Kristian zirtîrna zawng zawng chu an pawm vek a ni. He “chanchin ṭha thutak” hian Isua Krista leh Lalram hmanga Jehova lal chungnunna thiam chantîrna a thlûr bing a. (Galatia 2:14) Pathian chuan chûng dâwt thu thlangtute hnênah chuan “sual hnathawhna” a thlen chu a phal a; mahse, chhandamna chu chanchin ṭhaa rinna neih leh thutaka awm leh awm lohvah a innghat a ni.—2 Thessalonika 2:9-12; Ephesi 1:13, 14.
2. Eng thil avângin nge tirhkoh Johana chu a lâwm bîk a, Gaia nêna an inlaichîn dân chu eng nge ni?
2 Lalram chanchin puangtute chu “thutak thawh puitute” an ni. Tirhkoh Johana leh a ṭhian Gaia angin, thutak chu an vuan nghet tlat a, thutakah an awm tlat a ni. Gaia chu a rilrua vawng rengin, Johana chuan heti hian a ziak a: “Ka fate thutakah an awm tih ka hriat aliama lâwmna nasa zâwk rêng ka nei lo ve,” tiin. (3 Johana 3-8) Kum upa tawh tak Johana chuan Gaia chu thutak zirtîr chiah lo pawh ni se, chu tirhkoh kum upatna te, a Kristian puitlinna te, leh pa ang maia hmangaihna a neihna te chuan a thlarau lam fate zînga pakhat anga amah aia naupang zâwk Gaia a sawina chu thil inâwm tak a nihtîr a ni.
Thutak leh Kristian Chibai Bûkna
3. Kristian hmasate inhmuhkhâwm chhan leh an hlâwkpui dân chu eng nge ni?
3 Kristian hmasate chu thutak zîr tûrin mi mal inahte an inhmukhâwm ṭhîn a. (Rom 16:3-5) Chutianga an tihna aṭang chuan fuihna an dawng a, hmangaih leh thil ṭha tiin an inchawkphûr tawn a ni. (Hebrai 10:24, 25) Chu mi hnua Kristiana inchhâlte chungchâng chu hetiang hian Tertullian-a (c. 155-220 C.E. hnu lam) chuan a ziak: “Pathian lehkhabu chhiar tûrin kan inhmukhâwm ṭhîn a . . . Chûng thu thianghlimte chuan kan rinna kan châwm a, kan beiseina kan tizual a, kan rintâwkna kan tinghet bawk a ni,” tiin.—Apology, bung 39.
4. Kristian inkhâwmnaah hla sak hian eng chanvo nge a neih?
4 Zaiho pawh hi Kristian hmasate inkhâwmna pêng pakhat a nih hmêl hle a. (Ephesi 5:19; Kolossa 3:16) Professor Henry Chadwick-a chuan kum zabi pahnihnaa mi thiam Celsus-a’n Kristiana inchhâlte hman ni âwm tak, hla “mawi tak tak, a rilru a khawih dân avânga a ngaih huat hial” a hmuh thu a ziak a ni. Chadwick-a chuan heti hian a ziah belh a: “Aleksandria khaw chhuak Clement-a chu Kristiante hman atâna mawi rimawi chungchâng ziak hmasa bertu a ni. Ani chuan châkna titho thei tûr zâwnga lâm rem rimawi ang chi a ni tûr a ni lo tih a rawt a ni,” tiin. (The Early Church, phêk 274-5) A lan dâna Kristian hmasate chu an inhmuhkhâwmnaa an zaiho ṭhîn ang bawkin, Jehova Thuhretute pawhin Bible ṭan chhan hla, Pathian leh Lalram chawimawina hlate chu an sa ṭhîn a ni.
5. (a) Engtin nge Kristian kohhran hmasaah thlarau lam kaihhruaina chu pêk a nih? (b) Engtin nge Kristian dikte chuan Matthaia 23:8, 9-a chhinchhiah Isua thute chu an hman?
5 Hmân laia Kristian kohhranah chuan, kohhran hotute chuan thutak an zirtîr ṭhîn a, kohhranho rawngbâwltute chuan kawng chi hrang hrangin an rinpuite chu an ṭanpui ṭhîn. (Philippi 1:1) Pathian Thu leh thlarau thianghlim rinchhan governing body chuan thlarau lama kaihhruaina a pe a ni. (Tirhkohte 15:6, 23-31) Sakhua lama nihna engmah an hmang lo, a chhan chu Isua’n a zirtîrte hnênah: “Nangni erawh chu ‘Rabbi’ tihin awm suh u; in zirtîrtu chu pakhat chauh a ni a, nangni zawng zawng chu unau in ni si a. Tin, lei chungah hian tumah ‘Ka pa’ ti duh u; in Pa chu pakhat chauh a ni, vâna mi khi,” tih thu a pêk avângin. (Matthaia 23:8, 9) He mi kawngah leh kawng dang tam takah chuan, Kristian hmasate leh Jehova Thuhretute chuan inanna an nei a ni.
Thutak Hrilh Avânga Tihduhdah
6, 7. Remna thuchah puang chhuak chung pawhin, engtin nge Kristian dikte chu cheibâwl an nih?
6 Remna Lalram chanchin puang chhhuak mah se, Kristian hmasate chuan Isua ang bawkin tihduhdahna an tuar a ni. (Johana 15:20; 17:14) Thilthleng chanchin ziaktu John L. von Mosheim-a chuan Kristian hmasate chu “mi pawikhawih lo ber, sawrkâr chunga rilru dik lo leh huatna rilru rêng rêng pu ngai lo mite,” tiin a ko a ni. Dr. Mosheim-a chuan “Rom hovin Christian an duh loh nachhan chu mi dangte serh leh sâng nêna inanna nei rêng rêng lo an Pathian biak dân mâwlmang tak vâng a ni,” a ti. Hetiang hian a sawi zawm a: “Anni chuan inthawina te, biak in te, milim te, zâwlneiho te, a nih loh leh puithiamho te an nei lo va; hei ringawt pawh hi engmah hre lo mi tam tak, hêng thilte tel lova sakhuana awm thei lova ngaitute tân chuan Kristiante sawichhiatna tûr chhan a tling a. Chuvângin, Pathian awm ring lo mi anga thlîr an ni a; tin, Rom ho dân dinglai chuan Pathian awm ring lo rêng rêng chu khawtlâng tichhetu angin a puang a ni,” tiin.
7 Puithiamte, mi themthiamte, leh milem biakna hmanga ei zawng mi dangte chuan, milem be lo Kristiante huatna chu mipui zîngah an chawk chhuak a. (Tirhkohte 19:23-40; 1 Korinth 10:14) Tertullian-a chuan: “Kristiante chu ram chunga chhiatna tinrêng leh mite vânduaina tinrêng thlentuah an ngai tlat a. Tiber lui tui chu khawpui kulh bang chîm khawpa a len châng te, Nile lui tui chu ram châwmna tûr khawpa a tam loh châng te, ruah a sûr loh châng te, lîr a nghîn châng te, ṭâm a tlâk châng te, pulh hri a lên châng te hian: ‘Kristiante kha Sakeibaknei pûkah paih rawh u!’ tih chu an au hla a ni nghâl ṭhîn,” tiin a ziak a ni. A sawhkhâwk chu engpawh ni se, Kristian dikte chu ‘milem lakah an inthiarfihlîm’ a ni.—1 Johana 5:21.
Thutak leh Sakhaw Ni Serhte
8. Engvângin nge thutaka awmte’n Kristmas an lawm loh?
8 Thutaka awmte chuan Pathian Lehkha Thu ang ni lova ni serhte chu an hmang lo, a chhan chu ‘thim leh êngin inpâwlna a neih loh’ vâng a ni. (2 Korinth 6:14-18) Entîr nân, December 25-a lâwm ṭhîn Kristmas te an lâwm ve lo. “Tumahin Krista pian nî chiah an hre lo” tiin, The World Book Encyclopedia chuan a sawi. The Encyclopedia Americana (1955 Edition) pawhin: “December thla laihâwl vêla neih ṭhîn, Rom-ho ruai ṭheha hlimlawp bâwlna Saturnalia kût chu Krismas hlimlawp chi hrang hrangte lo chhuahna bul a ni,” a ti bawk. M’Clintock and Strong’s Cyclopædia pawhin: “Kristmas lawm hi Pathian thupêk a ni lo va, Thuthlung Thara lo inṭan a ni hek lo,” tiin a sawi bawk a ni. Daily Life in the Time of Jesus lehkhabu pawhin hetiang hian a sawi bawk: “Berâmte chu . . . thlasik chhûng zawng hulhliap hnuaia dah a ni; he mi aṭang ringawt pawh hian thlasik laia Kristmas hman hi a dik theih a rinawm lo a ni, Chanchin Ṭha ziak chuan berâmpute’n phûla berâm an vên lai a ni a tih si avângin,” tiin.—Luka 2:8-11.
9. Engvângin nge hmân lai leh tûn laia Jehova chhiahhlawhte chuan Easter an lawm loh?
9 Easter pawh hi Krista thawhleh hriatrengna ni lawm ni tûra ngaih a ni a; mahse, lehkhabu rin tlâk tak chuan milem biakna nên a thlunzawm tlat a ni. The Westminster Dictionary of the Bible chuan Easter chu “atîrah chuan êng leh nipui pathiannu Teutonic chawimawina kût a ni a, Anglo-Saxon-ho chuan Eastre, [a nih loh leh Eostre] tiin an ko a ni,” tiin a sawi. Eng pawh nise, Encyclopædia Britannica (11th Edition) pawhin: “Thuthlung Tharah chuan Easter kût hmanna rêng rêng a lang lo,” a ti. Easter chu Kristian hmasate ni lawm a ni lo va, tûn laia Jehova mite pawhin an lâwm lo a ni.
10. Eng hun serh nge Isua’n bul a ṭan a, chu chu tute’n nge a nih dân tûr taka hmang?
10 Isua chuan a hnungzuitute chu a pian cham emaw, a thawhlehna emaw chu lâwm tûrin thu a pe lo va; mahse, tlan nâna a thih Hriatrengna erawh amah ngeiin a ṭan a ni. (Rom 5:8) Hei chauh hi a ni, a zirtîrte hnêna ti ṭhîn tûra thu a pêk chu ni. (Luka 22:19, 20) Hei hi Lalpa Zanriah tia koh a ni bawk a, he kum khata vawikhat thleng hi tûn thlengin Jehova Thuhretute chuan an la hmang reng a ni.—1 Korinth 11:20-26.
Khawvêl Puma Thutak Puanna
11, 12. Engtin nge thutaka awmte chuan an thuhrilh rawngbâwlna chu an chhawmdâwl reng?
11 Thutak hriate chuan, an hun te, an tha leh zung te, leh an thil neih hlute chanchin ṭha hrilh rawng bâwl nâna hman chu chanvo ropuiah an ngai a. (Marka 13:10) Kristian hmasate thuhrilh rawngbâwlna chu thawhlâwm hmanga chhawmdâwl a ni. (2 Korinth 8:12; 9:7) Tertullian-a chuan heti hian a ziak: “Pawisa thlâkna tûr thawhlâwm bâwm chu awm mah se, sakhuana hi sumdâwnna hmun ang maia luh man pêk ngai a ni lo. Thla tinin mi tinin pawisa tlêm azâwng an rawn keng ziah a—a nih loh leh thawh a duh hun apiangah, a man a duh a, a theih chauhvin a rawn keng ṭhîn; tumah tihluih an ni lo; mahni duhthua pêk a nih avângin,” tiin.—Apology, bung 39.
12 Khawvêl puma Jehova Thuhretute Lalram chanchin puan rawngbâwlna pawh hi mahni duhthua thawhlâwm pêkte hmanga chhawmdâwl a ni. Thuhretute bâkah, mi dang tuina nei lâwm nachâng hriate chuan thawhlâwm thawha he rawngbâwlna ṭanpui hi chanvo hlu-ah an ruat a ni. Hetah pawh hian, Kristian hmasate leh Jehova Thuhretute chu an inang leh bawk a ni.
Thutak leh Mi Mal Nungchang
13. An nungchang chungchângah Jehova Thuhretute chuan Petera fuihna thu eng nge an zawm?
13 Thutaka awm an nih angin, Kristian hmasate chuan he tirhkoh Petera fuihna thu hi an zâwm a ni: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah chuan Pathian an chawimawi thei ang,” tih hi. (1 Petera 2:12) Jehova Thuhretute chuan hêng thute hi an zâwm a ni.
14. Kristiante’n intihhlimna bawlhhlawh an thlîr dân chu eng nge ni?
14 Kalpênna a lo awm tâk hnuah pawh, Kristiana inchhâlte chuan nungchang bawlhhlawh thiltihte chu an pumpelh a. Kohhran chanchin chhui mi, professor W. D. Killen-a chuan heti hian a ziak: “Kum zabi pahnihna leh pathumnaah chuan khawpui lian apianga awm ennawm chhuahna in chu mite hîptu ber a ni a; a changtute chu nungchang bawlhhlawh tak takte an ni tlângpui a, an lemchante lah chu a hun laia châkna sual kaiharh tûr chi deuh hlîr a ni bawk. . . . Chu ennawm chhuahna in chu Kristian dik zawng zawngte chuan an ten vek a. . . . A bawlhhlawhna ata an inla hrang a; tin, chu hmuna milem pathiante leh pathiannute hnêna an ṭawngṭainate chuan an sakhaw rinna chu a chêksawlh a ni,” tiin. (The Ancient Church, phêk 318-19) Tûn laia Isua hnungzuitu dik takte pawhin intihhlimna bawlhhlawh leh thianghlim lote chu an pumpelh a ni.—Ephesi 5:3-5.
Thutak leh “Rorêltute”
15, 16. “Rorêltute” chu tute nge ni a, thutaka awmte chuan anni chu engtin nge an thlîr?
15 Kristian hmasate nungchang chu ṭha hle mah se, Rom lal tam tak chuan thiam loh an chantîr a. Thilthleng chanchin ziaktu E. G. Hardy-a chuan lalte chuan anni chu “hmusit awm mi ṭhahnemngaiho” anga an thlîr thu a sawi a. Governor Pliny the Younger of Bithynia leh Lal Trajan-a lehkha inthawnte chuan thuneitute’n Kristianna nihphung dik tak an man lo tih a târ lang a ni. Kristiante chuan Sawrkâr hi engtin nge an thlîr?
16 Isua hnungzuitu hmasate ang bawkin, Jehova Thuhretute chuan sawrkâr “rorêltute” lakah intukluh chin an nei a. (Rom 13:1-7) Mahse, mihringte thil phût leh Pathian duhzâwng a inkalh châng chuan: “Mihring thu aiin Pathian thu kan zâwm zâwk tûr a ni,” an ti tlat a ni. (Tirhkohte 5:29) After Jesus—The Triumph of Christianity tih lehkhabu chuan: “Kristiante chu lal chibai bûknaah tel lo mah se, hel hmang an ni lo va, an sakhua pawh milem betute ngaihah chuan a danglamin, engemaw châng chuan ngeiawm tak ni mah se, chu chu lal tân a hlauhawm ngai lo,” a ti.
17. (a) Kristian hmasate chuan eng sawrkâr nge an thlâwp tlat? (b) Engtin nge Krista hnungzuitu dik takte chuan Isaia 2:4 thu hi an nunpui?
17 Kristian hmasate chuan, hmân lai mi Abrahama te, Isaaka te, leh Jakoba te’n ‘Pathian siam khuaa’ rinna an lantîr ang bawkin, Pathian Ram chu an thlâwp tlat a ni. (Hebrai 11:8-10) An Hotu ang bawkin, Isua zirtîrte chu “khawvêla mi an ni lo.” (Johana 17:14-16) Mihring indona leh inhuatna chungchângah chuan, ‘an khandaihte chu leilehna hmâwrzumahte chherin’ remna an ûm a ni. (Isaia 2:4) Chutiang thu bawk chu kohhran chanchin zirtîrtu Geoffrey F. Nuttall-a pawhin a sawi a ni: “Indona chungchânga Kristian hmasate rilru put dân chu Jehova Thuhretu intite rilru put dân nên a inang hle a; mahse, chu chu pawm harsa kan ti hle a ni,” tiin.
18. Engvângin nge eng sawrkâr mahin Jehova Thuhretute hlauhna tûr chhan an neih loh?
18 “Rorêltute” hnuaia intulût mi tualdawihte an nih avângin, Kristian hmasate chu eng sawrkâr ding lai tân pawh an hlauhawm lo va, Jehova Thuhretute pawh chutiang bawk chu an ni. “Jehova Thuhretute chu eng sawrkâr tân pawh an hlauhawm a ni tih thu pawm tûr chuan ngaihtuahna zîm tak leh rinhlelhnaa khat neih a ngai ang. Anni chu theih ang tâwka hel hmang lo leh remna hmangaih sakhaw pâwl an ni,” tiin America Ram Hmâr Lama editor thukhawchâng ziaktu chuan a ziak a ni. Chutiang an nihzia hre thiam rorêltute chuan Jehova Thuhretute chu an hlauh a ngai lo rêng rêng tih an hria a ni.
19. Chhiah chungchângah, Kristian hmasate leh Jehova Thuhretute chungchâng eng nge kan sawi theih?
19 Kristian hmasate’n “rorêltute” an zahzia an lantîrna kawng khat chu chhiah chawinaah a ni. Justin Martyr-a chuan Rom Lal Antoninus Pius-a (138-161 C.E.) hnêna lehkha a thawnnaah Kristiante chuan “mi dang zawng zawng aiin phal taka” chhiah an chawi thu a ziak a ni. (First Apology, bung 17) Tin, Tertullian-a pawhin Rom ram awptute hnênah chhiah khawntute chuan taima taka chhiah chawitu “Kristiante hnênah lâwmthu hrilh an ba,” tih a hrilh bawk. (Apology, bung 42) Kristiante chuan Pax Romana, a nih loh leh Rom Inremna te, a dân leh thupêk te, kawng ṭha te, leh tuipuia zin kawng him thawkhat te chu an hlâwkpui a ni. Chuvângin khawtlânga an lei bat chu hre rengin, Isua thu: “Kaisara thilte chu Kaisara hnênah pe ula, Pathian thilte chu Pathian hnênah pe ta che u,” tih chu an zâwm a ni. (Marka 12:17) Tûn laia Jehova Thuhretute pawhin he fuihna hi an zâwm a, an rinawmna, chhiah chawi chungchâng angah te, fak an hlawh a ni.—Hebrai 13:18.
Thutak—Phuarkhâwmna
20, 21. Remnaa inunauna chungchângah hmân lai Kristiante leh tûn lai Jehova chhiahhlawhte chungah inanna eng nge awm?
20 Kristian hmasate chu thutaka an awm avângin, tûn lai Jehova Thuhretute ang bawkin, inunauna inrem takah chuan an inphuarkhâwm tlat a ni. (Tirhkohte 10:34, 35) Moscow Times chanchinbu-a lehkha thawn chhuah chuan: “[Jehova Thuhretute chu] mi nêlawm tak, ngilnei tak, leh khawsakpui nuam mi inngaitlâwm tak, mi dangte chunga tihluihna hmang ngai lo leh mi dangte nêna an inlaichînnaa remna zawng reng an ni . . . An zîngah chuan thamna lâk chîng an awm lo va, zu ngawlvei leh damdawi ngawl vei an awm hek lo, a chhan chu ho tê a ni: An thil tih leh sawi rêng rêngah an Bible ṭanchhan rinna inkaihhruaitîr an tum mai a ni. Khawvêla mi zawng zawngte hian Jehova Thuhretute anga Bible mila nun hi tum chhin tal sela chuan, he kan khawvêl nunrâwng tak hi a danglam ngei ang le,” tiin.
21 Encyclopedia of Early Christianity chuan: “Kohhran hmasa chu, tûn hmaa inhaw ṭhîn Judate leh Jentailte remnaa an inpumkhat theihna, mihring chhûngkaw tharah a inngai a ni,” tiin a sawi. Jehova Thuhretute pawh remna hmangaih khawvêl pum huap inunauna—khawvêl thar pâwl an ni tak zet a ni. (Ephesi 2:11-18; 1 Petera 5:9; 2 Petera 3:13) South Africa rama Pretoria Ennawm Chhuahna Mual vênghimtute hotupa chuan Thuhretu hnam chi hrang hrang inkhâwmpuia lo kalkhâwmte a hmuh chuan: “An vaiin an hawihhâwm hlawm hle a, ṭha takin an inbe tawn vek a, ni rei lo te kalta chhûnga in rilru put hmang lantîr zawng zawngte khân, in pâwl mite nungchang ṭhatzia a lantîr a, mi zawng zawng chu chhûngkaw khat hlim tak ang maiin in khawsaho a ni,” a ti.
Thutak Zirtîrna Lâwmman
22. Kristiante’n thutak an hriattîr avângin eng nge thleng?
22 Paula leh Kristian dangte chuan an nungchang leh thuhrilh rawngbâwlna hmangin, ‘thutak an hriattîr’ a ni. (2 Korinth 4:2) Jehova Thuhretute chuan chutiang bawkin an ti a, hnam tina mite thutak an zirtîr tih chu i pawm lo vem ni? Khawvêl pumpuia mite chuan biakna dik chu an pawm a, chûng mi pung zêlte chu ‘Jehova in awmna tlângah’ chuan an kal nguah nguah a ni. (Isaia 2:2, 3) Kum tinin, mi sâng tam takte chuan Pathian hnêna an inpumpêkna lantîrin baptisma an chang a; chuvângin, kohhran thar tam tak din a nih phah a ni.
23. Hnam zawng zawng thutak zirtîrtute chu engtin nge i thlîr?
23 Ṭobul chi hrang hrang nei ni mah se, Jehova mite chu biakna dikah chuan an inpumkhat tlat a. Hmangaihna an lantîr chuan Isua zirtîrte an nihzia a târ lang a ni. (Johana 13:35) ‘An zîngah Pathian a awm’ tak meuhvin i hria em? (1 Korinth 14:25) Chûng hnam zawng zawng thutak zirtîrtute zînga mi i ni tawh em? I nih tawh chuan, thutak i ngaihhlutna chu lantîr rengin, kumkhuaa thutaka awm reng theihna chanvo chu nei ang che. (w02 7/15)
Engtin Nge I Chhân Ang?
• Pathian chibai bûk dân chungchângah, Kristian hmasate leh Jehova Thuhretute’n inanna eng nge an neih?
• Thutaka awmte’n sakhaw serh leh sâng an hman awmchhun eng nge ni?
• “Rorêltute” chu tute nge ni a, engtin nge Kristiante’n anni chu an thlîr?
• Engtin nge thutak chu phuarkhâwmna a nih?
[Zirlai Atâna Zawhnate]
[Phêk 31-naa milem]
Thutaka awmte tân chuan Kristian inkhâwmte chu malsâwmna a ni reng ṭhîn