Chhiartute Zawhna

Nu emaw, pa emaw chu Jehova Thuhretu a nih loh chuan, naupang zirtîrna chungchângah Pathian Lehkha Thuin eng kaihhruaina nge a pêk?

Pathian Lehkha Thu, thu bul pawimawh pahnih chuan kawppui Thuhretu ni lo, Thuhretu nu emaw, pa emaw tân naupang zirtîrna chungchângah kaihhruaina a pe a ni. Chûng zînga a pakhat chu: “Mihring thu aiin Pathian thu kan zâwm zâwk tûr a ni,” tih hi a ni a. (Tirhkohte 5:29) A dang chu: “Krista chu . . . kohhranho lû a ni ang bawk hian, pasal chu nupui lû a ni,” tih hi a ni. (Ephesi 5:23) A hnuhnûng zâwk hi Thuhretu pasala nei nupuite tân chauh ni lovin, Thuhretu ni lo pasala nei nupuite tân pawh a ni. (1 Petera 3:⁠1) Thuhretu nu emaw, pa emaw chuan a fate a zirtîr hunah he thu bulte hi engtin nge inbûk tâwk takin a hman theih ang?

Pasal chu Jehova Thuhretu a nih chuan, ani chuan thlarau lam leh tisa lama a chhûngkaw mamawh phuhru tûrin mawhphurhna a nei a. (1 Timothea 5:⁠8) Thuhretu ni lo nu ber chuan an fate nên hun tam zâwk hmang mah se, Thuhretu pa ber chuan in lama sakhaw lam zirtîrna hmangin leh, nungchang lam zirtîrna leh inkawmna ṭha an neih theihna tûr, Kristian inkhâwmnaa hruaina hmangin a fate chu a zirtîr tûr a ni.

A nih leh a nupui Thuhretu ni lo chuan an fate chu an inkhâwmnaah hruai a tum tlat emaw, a thurinte a zirtîr emaw a nih chuan engtin nge ni ang? Chutiang tih theihna chu ram dân chuan a phal pawh a ni thei. Naupangte’n chutiang hmuna kal châkna an neih leh neih loh chu pa berin thlarau lam zirtîrna a pêk ṭhat leh ṭhat lohvah a innghat thui hle. Naupangte chu a lo upat deuh deuhvin, an pa Pathian Lehkha Thu zirtîrna chuan Pathian Thu thutak zui tûrin a chêttîr tûr a ni. Thuhretu pasal chu a fate’n thutak lama kal an tum chuan a va hlim dâwn êm!

Nu ber chu Jehova Thuhretu a nih chuan, a fate chatuan hmakhua ngaihtuah reng chung siin lû nihna thu bul chu a zah tûr a ni. (1 Korinth 11:⁠3) Hmun tam takah chuan, ring lo mi pasal chuan Thuhretu a nupuiin an fate hnêna nungchang lam leh thlarau lama zirtîrna a pêk chu a hnial lo vang a, chutiang lama ṭanpuina chu Jehova mite inkhâwmna hmunah a hmuh theih a ni. Nu ber chuan Thuhretu ni lo a pasal chu Jehova inawpna pâwl hmanga an fate’n zirtîrna ṭha tak an dawnzia hmu thiam tûrin a ṭanpui thei a ni. An fate chuan nungchang bawlhhlawh tak an hmachhawn reng avângin, Bible-a nungchang lam tehna thu bulte an rilrua tuh a ṭhatzia chu fing thiam takin nupui chuan a sawi thei ang.

Amaherawhchu, Thuhretu ni lo pasal chuan a fate’n a sakhuana zui tûr leh, an biak ina kal a, a rinna lama zirtîrna dawng tûrin a phût tlat mai thei a. A nih loh leh pasal chuan sakhuana zawng zawng chu dodâlin, a fate sakhaw lama zirtîrna engmah dawng lo tûrin a ti tlat thei bawk. Chhûngkaw lû ber a nih angin, ani hi thutâwp siamtu tûr a ni. *

Kristian inpumpêk tawh a nih angin, a pasal lû nihna a zah rual rualin, Thuhretu nupui chuan tirhkoh Petera leh Johana te rilru put hmang chu an hre reng a ni. Anni chuan heti hian an sawi: “Keini zawng thil kan hmuh leh kan hriatte kha sawi lovin kan awm thei lo,” tiin. (Tirhkohte 4:​19, 20) A fate thlarau lam ṭhatna tûr a ngaihtuah  avângin, Thuhretu nu ber chuan a fate tâna nungchang lam kaihhruaina pe tûrin hun remchâng ṭha a zawng reng ang. Ani chuan thutak nia a hriat chu mi dangte zirtîr tûrin Jehova hmaah mawhphurhna a nei a, chûng mi dangte zîngah chuan a fate ngei pawh an tel a ni. (Thufingte 1:8; Matthaia 28:​19, 20) Engtin nge Thuhretu nu ber chuan he harsatna hi a hmachhawn ang?

Entîr nân, Pathiana rinna chungchâng ngaihtuah ta ila. Thuhretu nupui chuan a pasalin a phal loh avângin a fate chu dân pângngai anga Bible zirpuina a nei thei lo mai thei a. Chu mi avângin a fate hnênah Jehova chanchin a hrilh lo mai dâwn tihna em ni? Ni lo ve. A ṭawngkam leh thiltihte hmangin Siamtu a rinzia a târ lang thei ngei ang a. A fate chuan chu mi chungchângah zawhna pawh an siam ngei ang. Chutiang hunah chuan Siamtu a rinzia chu a fate pawh tiama mi dangte hnênah sawi chhuahna hmangin, zalên taka sakhua a vawn theihna chu a hmang tûr a ni. A fate chu Bible a zirpui thei lo emaw, inkhâwmnaah a hruai ziah thei lo emaw pawh nise, Pathian Jehova chungchâng chu a hriattîr reng thei a ni.​—Deuteronomy 6:⁠7.

Thuhretu leh ringtu ni lo a pasal emaw, a nupui emawte inkâra inlaichînna chu sawiin, tirhkoh Paula chuan heti hian a ziak a ni: “Pasal ring lo mi chu a nupui zârah tihthianghlimin a awm a, nupui ring lo mi pawh chu a pasal zârah tihthianghlimin a awm bawk si a; chuti ni suh sela in fate chu an thianghlim lo vang; nimahsela an thianghlim reng e,” tiin. (1 Korinth 7:14) Jehova chuan ringtu kawppuite avângin an inlaichînna chu thianghlim angin a thlîr a, Jehova mithmuhah an fate pawh an thianghlim a ni. Thuhretu nupui chuan a theih ang tâwka ṭan khawhin a fate chu thutak hre thiam tûrin a ṭanpui tûr a ni a, a rahchhuah tûr chu Jehova kutah a nghat tûr a ni.

Naupangte chuan an lo upat deuh deuh hian, an nu leh pate hnên aṭanga an thu hriatte ṭanchhanin thutlûkna an siam tûr a ni a. Isua thusawi: “Tu pawh a nu emaw, a pa emaw keimah aia hmangaih zâwk chu, ka mi ni tlâk a ni lo,” tih milin thutlûkna an siam mai thei a ni. (Matthaia 10:37) Tin, anni chu: “Naupangte u, Lalpaah chuan in nu leh in pate thu zâwm rawh u,” tih thu pêk an ni bawk. (Ephesi 6:⁠1) Ṭhalai tam tak chuan hrehawm tam tak tuar reng chung pawhin Thuhretu ni lo nu ber emaw, pa ber emaw aia ‘Pathian thu zawm zâwk’ chu an thlang a ni. Thuhretu nu emaw, pa emaw tân chuan dodâlna tâwk reng chunga a fate’n Jehova rawng bâwl an tum hmuh chu a va hlimawm dâwn êm! (w02 8/15)

[Footnote]