“In Pawisa Ka Pêkkîr Che U Chhan In Hria Em?”

GEORGIA ram, Kaspi khuaa khawsa mipa naupang pathumte nu mal ṭan Nana-i chu, “Aw, pawisa ka va mamawh tak êm!” tiin a inngaihtuah a. Tûk khat chu a duhthusâm ang ngei chuan a lo thleng dik ta. Police station kiangah lari 300 (Rs 7,000 vêl) a chhar hlauh mai a. A chhar lai tuman an hmu lo va. Pawisa lah tam tham tak a ni lehnghâl. Dik tak chuan Nana-i chuan kum nga kaltaa an ram pawisa lari a lo nih aṭang khân lari 100 note a la hmu pha lo rêng rêng a ni. Tualchhûng sumdâwngtute pawhin kum engemawzât an thawh hnuah pawh chutiang zât an la hlawhchhuak lo vang.

Nana-i chuan ‘Ka rinna te, Pathian ka ṭihna te, leh ka thlarau lam nun te ka hloh dâwn chuan he pawisa hi engah nge ka mamawh ang?’ tih a ngaihtuah a. Ani chuan chutiang Kristian miziate chu a rinna avânga tihduhdahna leh vuakhrepna hnuaiah pawh a lo chhawm nung tawh a ni si a.

Police station-a a han luh chuan hotu lian pangate chuan engemaw an zawng chiam tih Nana-i chuan a va hmu a. Pawisa an zawng a ni tih a hria a, chuvângin anni chu va panin: “Hloh in nei elo?” tiin a zâwt a.

“Pawisa kan hloh alâwm mawle,” tiin an chhâng a.

“Eng zât nge?”

“Lari zathum ngawt!”

Nana-i chuan, “Pawisa chu ka chhar alâwm,” a ti a. Tichuan: “In pawisa ka pêkkîr che u chhan in hria em?” tiin a zâwt a. Mahse, a chhan an hre lo.

“Jehova Thuhretu ka nih vâng a ni,” a ti a. Tichuan, “Ni lo ilang chuan ka pekîr hauh lo vang che u,” tih a sawi belh a.

Pawisa tibotu police hotu ber chuan Nana-i chunga a lâwmzia târ lan nân lari 20 chu a pe ta a ni.

Chu mi chanchin chu Kaspi bial chhûngah a thang chak hle a. A tûkah chuan, police station aṭanga lo chhuak in tifaitu chuan Nana-i hnênah chuan: “[Pu ber] chuan i lehkhabu chu a office-ah a dah reng a. Tûnah chuan chu lehkhabu chu a hlut sawt ngei ang,” tih a hrilh a. Police hotu lian pakhat phei chuan: “Mi zawng zawng hi Jehova Thuhretute ni vek sela chuan, tuin nge dân bawhchhia ang le?” a ti hial a ni. (w02 8/15)