Chhiartute Zawhna

Pawisa tam tham a nih loh phawt chuan inchawi chu a sual em ni?

Pathian Thu chuan pawisa khelh chungchâng chipchiar takin a sawi lang lo nâa, pawisa inkhelhna chi hrang hrang chu Bible thu bulte nên a inrem lohzia târ lanna tûr tham chu a sawi lang a ni. * Entîr nân, pawisa khelhna chuan duhâmna a siam tih chu tlâng hriat a ni a. Chu ringawt pawh chu Kristiante tân ngaihtuah tham a tling a ni; Bible-in “mi duhâmte” chuan Pathian Ram an luah loh tûr thu a sawi vâng leh duhâmna chu milem biakna nên thuhmuna a dah avângin.​—1 Korinth 6:​9, 10; Kolossa 3:⁠5.

Pawisa khelh chuan mahni hmasialna leh inchona rilru, hneh duhna nasa tak chu a awmtîr bawk. Tirhkoh Paula chuan: “Incho tawna inîtsîk tawnin i inngaihlu suh ang u,” tih a ziah khân, chûng thilte lakah chuan min vaukhân a ni. (Galatia 5:26) Chu bâkah, pawisa khelhna chuan vânneihna chunga innghat puithuna âtthlâk chu mi ṭhenkhatah a siam bawk. Inkhêltute chuan puithuna chi hrang hrang an siam chhuak a, vânneihna chu an lama ṭang tûra thunun theih an inbeisei a ni. Anni chuan Israel mi rinawm lo, “Vânneihna Siamtua tân dawhkân buatsaiha, Chantâwka Khawrêlsaktui tân uain chawlhpawlh sa chhûng khat ṭhînte” chu min hriatchhuahtîr a ni.​—Isaia 65:11.

Ṭhenkhat chuan ṭhian ṭhate leh chhûngte nêna lehkhaden emaw, inkâwi emaw huna pawisa tlêm tê inchawi chu intihhlimna satliah niin an ngai mai thei a. Pawisa tlêm têa inchawi chîngtu chu mi duhâm, mi îtsîk hmang, mi cho ṭhîn, a nih loh leh puithuna âtthlâk pawmtu angah a inngai lo pawh a ni mai thei. Mahse, a khelhpui chungah eng nghawng nge a neih theih? Pawisa khêl dawklak tam tak chu ‘intihhlimna satliah’ atâna tlêm têa inchawina aṭanga inṭan an ni fo. (Luka 16:10) An tân chuan thil pawi lo anga lang chu sual nasa taka tlûkna a lo ni.

Chu chu naupangte chungthuah a dik zual êm êm a. Naupang tam tak chuan tlêm têa inchawina phûrawmzia an hria a, tam zâwka inchawi an châk ṭhîn a ni. (1 Timothea 6:10) United States-a Arizona Council-in Pawisa Khêl Dawklakte chungchâng hun rei tak chhûng an zirna aṭangin pawisa khelh ngawlvei tam tak chu an naupan laia “infiamna emaw, lehkhaden emawa ṭhiante leh chhûngte nêna inchawina” aṭanga lo inṭan an nihzia a nemnghet a ni. Thu dawnna dangin a sawi dân chuan “naupangte chuan pawisa khelh chu in chhûng aṭangin, a tlângpui thuin chhûngte leh ṭhiante nêna lehkhadenna aṭangin an ṭan ṭhîn,” a ti bawk. Chu thu dawnna chuan “pawisa khêltu naupang zaa sâwmthumte chuan kum sâwm leh pakhat an tlin hmain an ṭan der tawh a ni,” a tih belh bawk. Miin pawisa nasa taka an khelh chhan ziakna, Why Do People Gamble Too Much​—Pathological and Problem Gambling, tih lehkhabu sawi dân chuan, pawisa khelh chîng tleirâwl tam tak chuan dân bawhchhiatna emaw, nungchang bawlhhlawhna emaw hmangin sum an zawng ṭhîn a ni. Atîra thil pawi lo anga lang mai thei thil sawhkhâwk râpthlâk tak a va ni êm!

Thlêmna leh thang tam tak awm tawhsa rengna khawvêla khawsa kan nih avângin, engah nge ṭûl lo taka a danga kan va inbarh luh ang? (Thufingte 27:12) Pawisa khelh chuan​—naupangte an tel emaw tel lo emaw; pawisa inchawi chu a tam emaw, a tlêm emaw pawh ni se​—thlarau lam nun a tiderthâwng a, chuvângin pumpelh tûr a ni. Intihhlim nâna inkâwi emaw, lehkhaden emaw nuamtitu Kristiante chuan ziaka an chhinchhiah mai emaw, chhinchhiahna an neih loh mai emaw chu a ṭha ang. Mahni leh ṭhiante leh chhûngte thlarau lam ngaihsak Kristian thuhnu dâwnte chuan pawisa khelh chu​—pawisa tam tham ni lo mah se​—an pumpelh a ni. (w02 11/1)

[Footnote]