Fakna Kan Mamawh Ṭheuh

HMEICHHE naupang tê tân chuan, chu nî chu ni nuam tak a ni. Hun dangah zilhhauhna mamawh reng mah se, chu mi nî kher chuan a fel hle a. Nimahsela, chu mi zâna khuma muttîr a nih hnu chuan a nu chuan a ṭap ri chu a hre ta a. A lungnih loh chhan an zawh chuan, lungchhe insût hlawp hlawp chungin: “Vawiin chu hmeichhe naupang fel tak ka ni lo vem ni?” a ti.

Chu zawhna chuan a nu rilru a khawih hle. A fanu chu engtik lai pawha zilh nghâl vat ṭhîn kha a ni a. Chu mi nî chuan, hmeichhe naupang tê chuan fel tumin nasa takin bei mah se, a nu chuan fakna ṭawngkam chhetê pawh a chhâk chhuak lo.

Aw le, hmeichhe naupang tê chauhvin fakna leh thlamuanna chu an mamawh lo. Kan vaiin kan mamawh ṭheuh a ni​—thurâwnte leh zilhnate kan mamawh ang bawk hian.

Rilru tak taka fakna kan dawn hunah engtin nge kan ngaih? Chu chuan min tihlimin min tilâwm hle a ni lâwm ni? Tuemawin min lo hriain min ngaihsak a ni tih inhriatna kan nei ngei ang. Kan thiltihte hian thawh rim a phu a ni tih min hriattîr a, chu chuan hma lamah pawh tinawn leh tûrin min chêttîr a ni. Chuvângin, rilru tak taka fakna chuan a sawitu lama min hîp ṭhîn pawh hi thilmak a ni lo.​—Thufingte 15:23.

Isua Krista pawh khân mite fak a ṭûlzia a hre thiam a. Talent tehkhin thuah khân, a pu (amah Isua ngei) chuan bawi rinawm pahnihte chu urhsûn takin: “Bawi ṭha leh rinawm, i ti ṭha e,” tiin a fak ve ve a ni. A va hlimawm tak êm! An thiltih theihna leh an hlawhtlin dân chu inang lo mah se, fakna thuhmun an dawng si a.​—Matthaia 25:19-​23.

Chu hmeichhe naupang tê nu chu i hrereng ang u. Mi dangte fak tûrin an lungchhiat thleng kan nghah kher a ngai lo. Chu ai chuan, kan fak theihna tûrin remchâng ṭha kan zawng reng zâwk tûr a ni. Hun remchâng apianga tih tak zeta fakna thu sawi chhan tûr ṭha kan nei tak zet a ni. (w02 11/1)