Inkhâwmte Bânsan Suh

Pathian Lehkha Thu chuan: “Ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u” a ti a. (Hebrai 10:25) Dik takin, Pathian betu dik takte chu “hmangaih leh thil ṭha tiha inchawk tho tûrin [leh] inngaihtuah tawn” tûrin Pathian biakna hmun pakhatah an lo kal khâwm tûr a ni.​—Hebrai 10:24.

TIRHKOH Paula’n kan sawi tâk thute a ziah hun, kan Vântlâng Kum Chhiar kum zabi pakhatnaah chuan Jerusalema biak in ropui tak chu Judate Pathian biakna hmun a ni a. Chu bâkah inkhâwmna in tam tak a awm bawk a. Isua chuan “inkhâwmna in leh Pathian biak in, Juda zawng zawng awm khâwmnaahte chuan [a] zirtîr fo” a ni.​—Johana 18:20.

Paul’n Kristiante chu infuih tawn tûra kal khâwm tûra a fuih khân eng ang inkhâwmna hmun nge a rilruah awm? Kristianna ram sakhaw in lian tak takte chuan Jerusalema Pathian biak in ruahmanna ṭanchhan tûr a nei em? Kristiana inchhâlte chuan sakhaw in sak lian tak takte chu engtik aṭangin nge an chîn ṭan?

‘Pathian Hming Atâna In Sak’

Pathian biakna tûr hmun chungchânga kaihhruaina hmasa ber chu Bible-a Exodus buah a awm a. Pathian Jehova chuan a mi thlante​—Israel hnamte​—chu “biak bûk” emaw, “inbiakna puan in” emaw chu sa tûrin a hrilh a. Chutah chuan thuthlung  bâwm leh hmanraw thianghlim chi hrang hrangte dah tûr a ni. B.C.E. 1512-a biak bûk sak zawh a nih chuan, “biak bûk chu LALPA ropuinain a lo khat ta a.” Chu puan in ken sawn theih chu kum zali chuang chhûng lai amah hnaih nâna Pathian ruahmanna siam zînga pawimawh ber a lo ni a. (Exodus, bung 25-​27; Exodus 40:33-​38) Bible-in chu puan in chu “LALPA biak in” leh ‘LALPA in’ tiin a ko bawk.​—1 Samuela 1:​9, 24.

A hnuah, Davida Jerusalema lala a ṭhut khân, Jehova ropuina tûra in nghet sak a duhzia a sawi a. Mahse, Davida chu indo mi a nih avângin, Jehova chuan heti hian a hrilh a: “Ka hming atân in i sa lo vang” tiin. A aiah, Davida fapa Solomona chu biak in sa tûrin a thlang ta zâwk a ni. (1 Chronicles 22:​6-​10) Solomona chuan kum sarih leh a chanve chhûng a sak hnu, B.C.E. 1026-ah biak in chu a hlân a. Jehova chuan chu in sak chu a pawmzia sawiin: “He mi in i sak hi kumkhuaa ka hming awmtîr nân ka tithianghlim tawh e; ka mit leh ka thinlung chu chutah chuan a awm kumkhua tawh ang” a ti a. (1 Lalte 9:3) Isrelte an rinawm chhûng chuan Jehova duhsakna chu, chu inah chuan a awm reng tûr a ni a. Amaherawhchu, an pên erawh chuan, Jehova chuan chu hmun aṭang chuan a duhsakna chu a la kîr leh ang, ‘chu in chu sâng teh mah se.’​—1 Lalte 9:​4-9; 2 Chronicles 7:​16, 19, 20.

Tichuan, Israel hnam chu biakna dik ata an kal pêng ta tak tak a. (2 Lalte 21:​1-5) “Chuvângin [Jehova chuan] Kaldai lal an chungah a thawhtîr a, ani chuan . . . Pathian in te an hâl a, Jerusalem kulh te an tichim a, chuta in ropui zawng zawngte chu an hâl a, chuta bungbêl ṭha mi zawng zawngte chu an tichhe vek a. Khandaiha thah bâng zawng zawngte chu Babulon-ah a hruai a, amah leh a fapate chhiahhlawhah . . . an awm ta a.” Bible-in a sawi dânin, chu chu B.C.E. 607-ah a lo thleng a ni.​—2 Chronicles 36:15-​21; Jeremia 52:12-​14.

Zâwlnei Isaia sawi lâwk angin, Pathian chuan Babulon thuneihna lak ata Judate chhan chhuak tûrin Persia Lal Kura chu a dinchantîr a. (Isaia 45:⁠1) Kum 70 chhûng sala hruaibo a nih hnuah, B.C.E. 537-ah chuan biak in sa ṭha leh tûrin Jerusalemah an lo kîr leh a ni. (Ezra 1:​1-6; 2:​1, 2; Jeremia 29:10) An biak in sak chu tihkhawtlai a nih hnuah, B.C.E. 515-ah chuan sak zawh a lo ni ta a, Pathian biakna thianghlim chu din thar leh a lo ni a. Chu chu Solomona biak in sak ang chuan ropui lo mah se, kum 600 dâwn lai a ding a ni. Nimahsela, Israelte’n Jehova biakna an ngaihthah avângin, chu biak in chu siam ṭhat leh ngaiin a awm bawk. Isua Krista leia a lo kal lai khân, Lal Heroda’n biak in chu zâwi zâwiin a sa ṭha a ni. Chu biak in chungah eng thil nge a lo thlen dâwn?

‘Lung Intiang Rêng Rêng A Awm Lo Vang’

Jerusalema biak in chungchâng sawiin, Isua’n a zirtîrte hnênah: “Tihchim lohva lung intiang rêng rêng hetah a awm lo vang” a ti a. (Matthaia 24:​1, 2) Chûng a thu sawi ang ngei chuan, kum zabi tam tak chhûng Pathian biakna hmun ber nia hriat chu Juda helhote bei tûra lo kal Rom sipaiho chuan C.E. 70-ah an tichhe ta a ni. * Chu biak in chu sak ṭhat a ni tawh ngai lo. Kum zabi pasarihnaah chuan, Mosolmante hmun thianghlim, Dome of the Rock tia hriat chu tûn hmaa Judate Pathian  biakna hmunah sak a ni a, vawiin nî thlengin a la ding ta reng a ni.

Isua hnungzuitute tân Pathian biakna ruahmanna chu eng nge ni ta ang? Juda sakhua aṭanga lo inlet Kirstian hmasate khân nakin lawka tihchhiat tûr biak inah Pathian an be zawm zêl ang em? Juda mi ni lo Kristiante khân khawi hmunah nge Pathian an biak tâk ang? Kristianna ram sakhaw in sak ropui tak takte chuan Jerusalema biak in ai chu an awh em? Samari hmeichhia nêna Isua titina khân chu mi chungchâng hriatthiamna chu min pe a ni.

Samari mite chuan kum zabi tam tak chhûng chu, Gerizim Tlânga an biak in lian takah Pathian an be ṭhîn a. Samari hmeichhia chuan Isua hnênah: “Keini thlahtute chuan he tlângah hian Pathian chibai an bûk ṭhîn; nimahsela nangni zawngin, ‘Mihringin Pathian chibai an bûkna hmun tûr chu Jerusalem khuaah a awm,’ in ti ṭhîn,” a ti a. Isuan’n chhâng lêtin: “Hmeichhia, ka thu âwih rawh, he tlângah kher lo pawh, Jerusalem khuaah kher lo pawh Pa chibai in bûk hun a thleng dâwn ta,” a ti a. Jehova biak nân biak in tak tak a ngai tawh dâwn lo, Isua’n: “Pathian chu thlarau a ni; a chibai bûktuten thlarau leh tih tak zetin chibai an bûk tûr a ni,” a ti si a. (Johana 4:​20, 21, 24) A hnuah tirhkoh Paula pawhin Atheni khuaa mite hnênah: Pathian, khawvêl leh a chhûnga thil zawng zawng siamtu chu lei leh vân lal a nih avângin kuta sak inahte a awm lo va,” a ti bawk.​—Tirhkohte 17:24.

Kristianna ram sakhaw in sak lian tak takte chuan Kristian hun hmaa biak in ruahmanna nên inzawmna a nei lo tih a chiang hle. Tin, kum zabi pakhatnaa Kristiante khân chûng hmunte siam chhan tûr an nei lo bawk. Mahse, tirhkohte an thih hnua zirtîrna dik pênsanna​—kalpênna​—a awm tûr chungchâng sawi lâwk chu a lo thleng a. (Tirhkohte 20:​29, 30) C.E. 313-a Rom Lalber Constantine-a Kristiana inlet anga sawi a nih hma kum tam takah chuan Kristiana inchhâlte chu Isua zirtîrna aṭangin an pêng ṭan tawh a ni.

Constantine-a chu “Kristianna” leh milem bia Rom sakhaw chawhpawlhnaah a inhnamnawih a ni. The Encyclopædia Britannica sawi dânin: “Constantine-a ngei chuan Rom khuaa Kristian biak in ropui tak pathum: St. Peter’s te, S. Paolo Fuori le Mura te, leh S. Giovanni in Laterano te chu sa tûrin thu a pe a. Ani chuan . . . kros lema in sa tûrin ruahmanna a siam a, chu chu Middle Age hun chhûng zawnga Europe khawthlang lama biak in sak dân phung a lo ni ta” a ni. Rom khuaa sak ṭhat Mi Thianghlim Petera Biak In Ropui phei chu tûn thlêngin Roman Catholic Biak In pawimawh ber a la ni.

Hmân lai chanchin ziaktu Will Durant-a sawi dânin: “Biak in chuan Kristian hun hmaa [milembia] Rom mite Pathian biak dân leh sakhaw chîn dânte chu a la chhâwng a ni,” a ti. Chûng zîngah chuan he “biak in ropui sak dân” pawh a tel a ni. Kun zabi 10-na aṭanga 15-na chhûng chuan, biak in leh puithiam ṭhuthmun biak in puite chu nasa taka sak a ni a, a in sak dân chu ngaih pawimawh hle a ni bawk. Chu hun chu tûn laia hriat reng tlâk thiam thil anga ngaih Kristianna ram in sak lian tam takte lo chhuahna bul a ni.

Mite chuan thlarau lama intihharhna leh infuihna chu biak ina Pathian biakna aṭangin an dawng reng em? Brazil rama Francisco-a chuan: “Ka tân chuan, biak ina kal chu sakhuana thil ninawm leh hahthlâk tak a ni. Mass chu thil awmze nei lo, tih nawn fo mai  mai a ni a, chu chuan ka mamawh tak takte a phuhrûk lo. Hun serh zawhah chuan ka thawveng huai ṭhîn,” a ti. Nimahsela, ringtu dik takte chu inhmukhâwm tûra tih an ni a. Inkhâwmna atâna ruahmanna eng ang nge an zui ang le?

“An Ina Kohhran Inkhâwmho”

Kum zabi pakhatna ringtute inhmuhkhâwm dân endikna aṭangin Kristian inkhâwm dân tûr chu a lang a ni. Pathian Lehkha Thu chuan mi mal inah an inkhâwm tlângpui ṭhîn tih a târ lang a. Entîr nân, tirhkoh Paula chuan: “Priskilli leh Akuila, Krista Isuaa ka thawhpui[te] . . . kha chibai mi bûksak ang che u; . . . An ina kohhran inkhâwmho chu chibai mi bûksak bawk ang che u,” tiin a ziak a. (Rom 16:​3-5; Kolossa 4:​15; Philemona 2) Chuvângin, Kristian dikte Pathian biaknaah chuan uar taka chei sakhaw in liante neih a ngai lo a ni.

Kristian hmasate kohhranah khân inkhâwmna chu eng anga kaihhruai nge ni? Zirtîr Jakoba chuan Grik thu mal sy·na·go·ge’ chu Kristian inkhâwmna sawi nân a hmang a. (Jakoba 2:⁠2) He Grik thu mal hi “lo kalkhâwm” tihna a ni a, chu chu ek·kle·siʹa nên hman kawp a ni ṭhîn. Mahse, hunte a liam zêl chuan, chu chu inkhâwmna in emaw, hmun emaw tihna a lo ni a. Juda mi Kristian hmasate khân inkhawmna ina thil thlengte chu an hre chiang hle a ni. *

Judate chu an kum tin kûtte hmang tûrin Jerusalem biak inah inhmukhâwm mah se, inkhâwmna inte chu tualchhûnga Jehova chanchin zirna leh Dân thupêk zirna hmun atâna hman a ni. Inkhâwmna ina thiltihte zîngah chuan ṭawngṭai te, Pathian Lehkha Thu chhiar te, leh chipchiar taka sawihona leh infuihna te a tel a rinawm hle. Paula leh a hote chu Antiokei khua inkhâwmna ina an va kal khân, “inkhâwmna in hotuten an hnênah mi an tîr a, ‘Unaute u, mite fuihna thu eng emaw in neih chuan sawi rawh u,’ an ti a.” (Tirhkohte 13:15) Juda Kristian hmasate mi mal ina an inhmuhkhâwm hian, an inkhâwmna chu Pathian Lehkha Thu zir nân leh thlarau lama intihchak nâna hmangin, chutiang tih dân chu an zui ngei ang le.

 Infuihna Tûr Kohhrante

Kristian hmasate ang bawkin, tûn laia Jehova Thuhretute chu Pathian biakna hmun tlâwm takahte hian Bible zirtîrna dawng tûr leh inkawmna ṭha tak nei tûrin an kalkhâwm ṭhîn a. Kum tam tak chhûng chu mi mal inahte an inkhâwm reng ṭhîn a, tûnah pawh hmun ṭhenkhatah chuan mi mal inte an la hmang reng a ni. Mahse, kohhrante a lo pung a, tûnah chuan 90,000 a chuang tawh a ni; tin, an inkhâwmna hmun ber chu Kingdom Hall tia koh a ni hlawm bawk. Chûng inte chu ropui tak a ni lo va, biak in ang a ni hek lo. Chûng inte chu hman nuam tak leh tlâwm tak, Pathian thu zir tûr leh ngaithla tûra chawlhkâr tin inkhâwma mi 100 aṭanga 200 vêl kalkhâwm theihna tûr hmun a ni.

Jehova Thuhretute kohhran a tam zâwkte chu chawlhkâr khatah vawi thum an inkhâwm a. Inkhâwmna chi khat chu tûn laia thu ngaihven hlawh tak pakhat chungchâng sawina vântlâng thusawi a ni a. Chu chu Vênnainsâng magazine hmanga Bible thu emaw, hrilh lâwkna emaw zirnain a zui a. Inkhâwmna chi dang leh chu school a ni a, Bible thuchah zirtîr dân inzirna tûra buatsaih a ni. Chu chu Kristian rawngbâwlna atân bîka rawtna ṭangkai tak takte pêkna inkhâwm hian a zui a ni. Thuhretute chu Bible zirho tûrin chawlhkâr khatah vawi khat zêl mi mal inahte mi tlêm têin an inhmu khâwm ṭhîn bawk. Hêng inkhâwm zawng zawngte hi mi tinte tel theihna vek a ni a. Thawhlâwm khawn a ni ngai lo a ni.

A chanchin kan sawi tâk Francisco-a chuan Kingdom Hall-a inkhâwm chu manhla a ti hle a. “Ka tlawh hmasak ber inkhâwmna hmun chu in nuam tak khawpui lûn laia awm hi a ni a, a chungchâng ngaih dân ṭha tak neiin ka hawsan a ni. Chuta inkhâwmhote chu an nêlawm a, an zînga inhmangaih tawnna awm chu ka hre thei tlat a ni. Chuta kal leh hlân chu ka nghâkhlel êm êm a. Chu hun aṭang chuan inkhâwm ka pelh ngai lo rêng rêng a ni. Hêng Kristian inkhâwmte hi a tuiawmin, ka thlarau lam mamawh min phuhrûksak a ni. Chhan engemaw vânga ka lunghnual châng pawhin, thatho takin inah ka kîr leh dâwn tih hre reng chungin Kingdom Hall-ah ka kal ṭhîn,” a ti.

Bible zirtîrna te, inkawmna mi tichak thei tak te, leh Pathian fak theihna chanvo te chuan Jehova Thuhretute Kristian inkhâwmnaah a nghâk reng che a ni. I in aṭanga hnai ber Kingdom Hall-a inkhâwm tûrin phûr takin kan sâwm che a. I inkhâwm chuan i inchhîr lo rêng rêng ang. (w02 11/15)

[Footnote-te]

[Phêk 4-naa milemte]

Biak bûk leh a hnua biak in sakte chu Jehova biakna hmunpui ber a ni

[Phêk 6-naa milem]

Rom khuaa Mi Thianghlim Petera Biak In Ropui

[Phêk 7-naa milem]

Kristian hmasate chu mi mal inahte an inkhâwm

[Phêk 8-naa milemte]

Jehova Thuhretute chuan Kristian inkhâwmna chu mi mal inah leh Kingdom Hall-ahte an nei