“Jentailte Zînga In Chêtzia Chu Mawi Tak Ni Rawh Se”
“Jentailte Zînga In Chêtzia Chu Mawi Tak Ni Rawh Se”
“Mi zawng zawng chawimawi rawh u. Unauhote chu hmangaih rawh u.”—1 PETERA 2:17.
1, 2. (a) Chanchinbu mi pakhatin Jehova Thuhretute chungchâng eng nge a sawi? (b) Engvângin nge Jehova Thuhretute’n nungchang lama tehna sâng tak chu vawn reng an tum tlat?
KUM engemaw zât kalta khân, Amarillo khua, Texas, U.S.A-a chanchinbu mi pakhat chuan chu mi khuaa biak in hrang hrang chu tlawh kualin, a thil hmuhte chu a ziak a. Pâwl pakhat chuan a rilru a hneh ta bîk riau mai a ni. Hetiang hian a sawi a: “Amarillo khua Civic Center-a Jehova Thuhretute inkhâwmpuiah hian kum thum chhûng ka tel tawh a. An zînga ka awm chhûng zawngin cigarette zu emaw, beer in emaw, a nih loh leh ṭawngkam bawlhhlawh hmang emaw pakhat tê mah ka la hmu ngai lo. Mipui kâlkhâwm ka hmuh tawhte zînga fai ber, hawihhâwm ber, ṭha taka inchei, leh nungchang mawi ber an ni,” tiin. Jehova Thuhretute chungchânga hetiang bawk fakna thu hi chhuah a ni fo. Engvângin nge Thuhretute chu an rin ang ring ve lote pawhin an fak fo?
2 A tlângpui thuin, Pathian mite chu an nungchang mawi avânga fak an ni ṭhîn a. Tehna tam takin tlâkchhiat lam a pan zêl laiin, Jehova Thuhretute chuan nungchang tehna sâng takte chu an tih tûr, an biakna pêng pakhat angin an thlîr a ni. An thiltihte chuan Jehova leh an Kristian unaute chungah nghawng a nei tih an hria a, an nungchang mawi chuan an thutak hrilh chu a chawimawi tih an hre bawk a ni. (Johana 15:8; Tita 2:7, 8) Tûnah chuan, Jehova leh a Thuhretute hming ṭha chawisâng zêl tûra nungchang mawi tak kan neih reng theih dân leh chutiang kan tihna kan hlâwkpui dân i lo en ang u.
Kristian Chhûngkua
3. Kristian chhûngkuate chu eng lak aṭanga vênhim nge ngai?
3 Chhûngkuaa kan nungchang lo ngaituah ta ila. Gerhard Besier leh Erwin K. Scheuch-a ziah sakhaw zalênna chungchâng ziakna lehkhabu (Die Neuen Inquisitoren: Religionsfreiheit und Glaubensneid) chuan: “[Jehova Thuhrutute] tân chuan, chhûngkua chu ṭha taka vênhim tûr thil a ni,” a ti. He thu ziak hi a dik hle; tûn laiah phei chuan thil hlauhawm tak tak a awm a, chûng thilte lak aṭanga chhûngkaw vênhim chu a ngai a ni. Tûn laiah hian naupang “nu leh pa thu âwih lo” leh puitling “pianpui hmangaihna nei lo” emaw, “insûm thei lo” emaw chu an tam hle. (2 Timothea 3:2, 3) Chhûngkua chu nupa insawisakna hmun, nu leh pain an fate chu ṭawngkam te, kutthlâka sawisak te leh mipat hmeichhiatna lama an khawih chingpenna emaw, naupang ngaihthahna emaw hmun, naupangte’n nu leh pa thu an âwih lohna leh ruihhlo ngaihna, leh nungchang bawlhhlawhna, a nih loh leh an tlân bosanna hmun a ni. Hêng zawng zawngte hi chhiatna thlentu ‘khawvêl thlarau’ vâng vek a ni. (Ephesi 2:1, 2) Chu thlarau laka kan chhûngkua kan vênhim chu a ṭûl a ni. Engtin nge kan vênhim ang? Chhûngkaw mite tâna Jehova zilhna leh kaihhruainate zawmna hmangin.
4. Kristian chhûngkaw mite’n eng mawhphurhna nge an neih ṭheuh?
4 Kristian nupate chuan rilru lam, thlarau lam, leh tisa lamah intihsak tûr an nei tawn ve ve tih an hria a. (1 Korinth 7:3-5; Ephesi 5:21-23; 1 Petera 3:7) Kristian nu leh pate pawhin an fate chungah mawhphurhna rit tak an nei bawk. (Thufingte 22:6; 2 Korinth 12:14; Ephesi 6:4) Tin, Kristian chhûngkuaa naupangte pawhin an lo ṭhanlen hian, tih tûr mawhphurhna an nei ve tih an hria a ni. (Thufingte 1:8, 9; 23:22; Ephesi 6:1; 1 Timothea 5:3, 4, 8) Chhûngkaw mawhphurhna hlenchhuak tûr chuan thawhrimna te, tumruhna te, hmangaihna leh inpumpêkna rilru te a ngai a ni. Nimahsela, chhûngkaw mite’n Pathian pêk mawhphurhna an hlen chhuah dân azir zêlin, anni chu chhûngkaw zînga mi dangte leh kohhrana mite tân malsâwmna an ni dâwn a ni. Chu aia pawimawh zâwk chu, chhûngkaw Dintu, Pathian Jehova an chawimawi hi a ni.—Genesis 1:27, 28; Ephesi 3:15.
Kristian Inunauna
5. Kan Kristianpuite nêna inkawmna aṭangin eng hlâwkna nge kan têl?
5 Kristian kan nih angin, kohhrana kan rinpuite chungah leh a tâwp berah chuan, “unau khawvêla awmhote” chungah pawh mawhphurhna kan nei bawk a ni. (1 Petera 5:9) Kohhran nêna kan inlaichînna hi kan thlarau lam hrisêl nân a pawimawh a. Kan Kristianpuite nêna kan inkawm hian, an mi kawmna mi tichak thei takte leh “bawi rinawm, fing tak” hnên aṭanga lo kal thlarau lam châwmnate chu kan ṭangkaipui a ni. (Matthaia 24:45-47) Buaina kan neih chuan, Pathian Lehkha Thua thu bulte ṭanchhana thurâwn ṭha tak min pe tûrin kan unaute kan pan thei bawk. (Thufingte 17:17; Thuhriltu 4:9; Jakoba 5:13-18) Ṭanpui kan ngaih châng lahin, kan unaute hian min thlahthlam ngai hek lo. Pathian inawpna pâwla kan awm hi malsâwmna a va ni êm!
6. Engtin nge Paula chuan Kristian dangte laka mawhphurhna kan neihzia a târ lan?
6 Nimahsela, kohhranah hian hlâwkna dawng tûr ringawta awm kan ni lo va; pe chhuak ve tûr pawha awm kan ni. Isua pawhin: “Englo lâk aiin pêkin lukhâwng a nei zâwk,” a ti a. (Tirhkohte 20:35) Tirhkoh Paula pawhin: “Kan beisei thurin [“vântlâng hmaa puan,” NW] hi a nghîn lohna tûrin i pawm tlat ang u, thutiamtu chu a rinawm si a; tin, hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuaih tawn nasa lehzual sauh rawh u,” tia ziakin pêk duhna rilru neih a sawi pawimawh a ni.—Hebrai 10:23-25.
7, 8. Engtin nge kan kohhran chhûngah leh ram danga Kristiante chungah pêk duhna rilru kan lantîr?
7 Kohhranah chuan, inkhâwmnaa chhânna kan pêk emaw, kawng danga kan tel emaw hian ‘kan beisei thurin chu kan puang’ tihna a ni. Chûng thilte chuan kan unaute chu a tichak tak zet a. Tin, inkhâwm hma leh inkhâwm bâna kan titipuiin, anni chu kan fuih bawk. Chutih hun chu chak lote kan tihchak a, lungngaite kan hnem a, dam lote kan thlamuan theih hun a ni. (1 Thessalonika 5:14) Kristian dikte chu chutiang chi thilpêkah chuan an thilphal hle a; chuvângin, a vawikhatna atâna kan inkhâwmnaa rawn tel tam takte’n kan zînga inhmangaihna an hmuhte chu mak an ti hle a ni.—Sâm 37:21; Johana 15:12; 1 Korinth 14:25.
8 Mahse, kan kohhran chhûnga mite chauh kan hmangaih lo. Khawvêl pumpuia kan unau zawng zawngte pawh kan hmangaih vek a ni. Chuvâng alâwm, Kingdom Hall tinah hian Kingdom Hall sakna tûr thawhlâwm bâwm a awm ṭheuh a ni. Kan Kingdom Hall chu a ṭha pawh a ni thei; mahse, ram danga kan Kristianpui sâng tam takte’n inkhâwmna tûr hmun ṭha an nei lo tih kan hria a. Kingdom Hall sakna tûr thawhlâwm bâwma pawisa kan thawh hian, a mi malin hre lo mah ila, chûng mite chu kan hmangaihzia kan lantîr tihna a ni.
9. Eng chhan bulte avângin nge Jehova Thuhretute chu an inhmangaih tawn?
9 Engvângin nge Jehova Thuhretute chu an inhmangaih tawn? Isua’n inhmangaih tawn tûra thu a pêk vâng a ni. (Johana 15:17) Inhmangaih tawnna an neih chu Pathian thlarauvin a mi mal leh a pâwl chunga hna a thawhzia târ langtu a ni. Hmangaihna chu “thlarau rah” zînga pakhat a ni si a. (Galatia 5:22, 23) Jehova Thuhretute’n Bible an zir a, Kristian inkhâwmnaa an tel a, Pathian hnêna an ṭawngṭai reng hian, ‘mi tam zâwkte hmangaihna a daihna’ khawvêla chêng ni hlawm mah se, hmangaihna chu an tân thil pângngai tak a lo ni ṭhîn.—Matthaia 24:12.
Khawvêl Mite Nêna Indâwrna
10. Khawvêl mite chungah eng mawhphurhna nge kan neih?
10 Paula’n “kan beisei thurin vântlâng hmaa puan” chungchâng a sawi hian mawhphurhna dang min hriatchhuahtîr a ni. He vântlâng hmaa puannaah hian kan Kristian unau la ni lote hnêna chanchin ṭha hrilh rawngbâwlna pawh a tel a. (Matthaia 24:14; 28:19, 20; Rom 10:9, 10, 13-15) Chutianga thuhrilhna chu pêkchhuahna thiltih dang pakhat a ni. Chuta tel tûr chuan hun te, tha leh zung te, inpuahchah te, inzir te, leh mahni sum leh pai hman te a ngai a. Chuti chung chuan Paula chuan heti hian a lo ziak bawk: “Grik mite leh Awze mite hnênah bat ka nei; mi fing leh mi finglote hnênah pawh. Chutichuan nangni Rom khuaa awmte hnênah pawh chanchin ṭha ka theihtâwpa hril tûrin ka inpeih reng a ni,” tiin. (Rom 1:14, 15) Paula angin, he ‘bâ’ kan rulhna kawngah hian i uikawm lo vang u.
11. Eng Pathian Lehkha Thu thu bul pahnihtein nge khawvêl nêna kan inlaichînna a thunun tlat ang a; mah se, eng nge kan hriat reng tho?
11 Kan rinpui ni lote chungah mawhphurhna dang kan nei em? Nei tehrêng e. “Khawvêl pumhlûm hi mi sual thu thuin a awm” tih kan hre ngei mai a. (1 Johana 5:19) Isua’n a zirtîrte chungchângah: “Anni chu khawvêla mi an ni lo, kei khawvêla mi ka ni lo ang bawk hian,” a ti tih kan hre bawk a ni. Mahse, khawvêla chêng, khawvêla ei zawng, leh khawvêl râwngbâwlsakna dawng kan ni a. (Johana 17:11, 15, 16) Chuvângin, he khawvêlah hian mawhphurhna kan nei a ni. Chûng mawhphurhnate chu engte nge ni? Chu zawhna chu tirhkoh Petera’n a chhâng a. Jerusalem tihchhiat a nih hma lawk khân, Asia Minor-a Kristiante hnênah lehkha a thawn a, chu a lehkha thawna a thu ziahte chuan khawvêla mite nêna inlaichînna âwm tâwk nei tûrin min ṭanpui a ni.
12. Eng kawngin nge Kristiante chu “mikhual leh khualzin” an nih a, chutiang an nih vângin eng lakah nge an inthiarfihlîm a ngaih?
12 A ṭan nân Petera chuan: “Duh takte u, mikhual leh khualzin in nih avângin, thlarau do ṭhîntu tisa châknate bânsan tûrin ka ngên a che u,” tiin a ziak a. (1 Petera 2:11) Kristian dikte chu thlarau lam thila sawi chuan “mikhual leh khualzin” mai an ni a, a chhan chu an thil thlîr ber chu chatuan nun beiseina a ni—thlarauva hriak thihte tân vâna nunna leh “berâm dang” tân nakina lei paradis-a nunna chu. (Johana 10:16; Philippi 3:20, 21; Hebrai 11:13; Thu Puan 7:9, 14-17) A nih leh tisa châknate chu engte nge ni? Chûngah chuan hausak châkna te, hmingthan châkna te, mipat hmeichhiatna lama nungchang bawlhhlawh chîn châkna te, leh “awhna” leh “duhâmna” tia sawite a tel a ni.—Kolossa 3:5; 1 Timothea 6;4, 9; 1 Johana 2:15, 16.
13. Engtin nge tisa châkna chuan ‘[kan] thlarau a do ṭhin’?
13 Chutiang châknate chuan ‘[Kan] thlarau a do ṭhîn’ tak zet a ni. Pathian nêna kan inlaichînna a tichhia a, kan Kristian beiseina (kan “thlarau,” a nih loh leh nunna) chu hlauhthâwnawmah a siam a ni. Entîr nân, nungchang bawlhhlawhna lam châkna kan neih chuan, engtin nge “inthawina nung leh thianghlim leh Pathian lawm tlâk ni tûrin” kan taksa chu kan hlan theih ang? Hausak chakna thanga kan awh chuan, engtin nge ‘lalram chu kan zawn hmasak’ theih ang? (Rom 12:1, 2; Matthaia 6:33; 1 Timothea 6:17-19) Kawng ṭha zâwk chu Mosia entawn tûr siam zuia khawvêl thlêmnate chu hnâwl a, kan nuna Jehova rawng bâwl dah hmasak ber hi a ni. (Matthaia 6:19, 20; Hebrai 11:24-26) Chu chu khawvêl nêna inlaichînna inbûk tâwk neih nâna thil pawimawh ber ni.
‘Chêtze Mawi Tak Nei Rawh’
14. Engvângin nge keini Kristiante hian chêtze mawi neih kan tum hrâm hrâm?
14 Petera thu sawi zawmah hian kaihhruaina ṭha tak dang kan hmu thei a ni: “Jentailte zînga in chêtzia chu mawi tak ni rawh se, chutichuan thil tisualtute anga an sawichhiat che u kawngah chuan in thil tihṭhat an hmuhte avângin fanin an awm hunah chuan Pathian an chawimawi thei ang,” tihah hian. (1 Petera 2:12) Kristian kan nih angin, entawn tlâk nih kan tum hrâm hrâm a. School-ah pawh taima takin kan zir a. Hna thawhnaah pawh, pu berin mi hriatthiamna nei lêm lo mah se, kan taimain, kan rinawm a ni. Thutaka awm vek lo chhûngkuaah lah nupui emaw, pasal emaw, ringtu ni zâwk zâwk chuan Kristian thu bulte zui tumin theihtâwp a chhuah a ni. Chu chu thil awlsam a ni lo; mahse, kan chêtze mawi entawn tlâk tak chuan Jehova a tilâwm a, Thuhretu ni lote chungah nghawng ṭha a nei fo tih kan hria a ni.—1 Petera 2:18-20; 3:1.
15. Engtin nge Jehova Thuhretute chêtze tehna sâng tak hi khawvêl puma hriat a nihzia kan hriat theih?
15 Jehova Thuhretu tam zâwkte’n tehna entawn tlâk siam an tumna lama an hlawhtlinzia chu anmahni chungchâng fakna thuziak kum tam tak chhûnga an chhuahte aṭangin a hriat theih a ni. Entîr nân, Italy ram chanchinbu Il Tempo chuan heti hian a ziak a: “Jehova Thuhretute hna thawhpuite chuan anni chu hna thawktu rinawm tak, an rinna a ngheh êm avânga an rinnain a ta neih ang hiala lan châng pawh nei; mahse, nungchang lama an nghehna avânga zah phu an nih thu an sawi,” a ti. Argentina ram Buenos Aires khawpui Herald chanchinbu pawhin: “Jehova Thuhretute hian kum tluanin ram khua leh tui taima tak, mi tak, mi inren thiam tak, leh Pathian ṭih mi tak an nihzia an lantîr a ni,” tiin a sawi bawk. Russian scholar Sergei Ivanenko-a chuan: “Jehova Thuhretute chu khawvêl zawng zawngah hian dân hnuaia intulût tlat nia hriat an ni a, a bîk takin chhiah chawi chungchâng an ngaih dânah a ni zual,” a ti bawk. Zimbabwe rama Jehova Thuhretute’n inkhawmpui nâna an hman in enkawltu manager pawhin: “Thuhretu ṭhenkhat chuan lehkha chhia an chhar khâwm lai leh inthiarna an tifai lai ka hmu a. Tuallai chu tûn hma aia fai zâwkin an kalsan a ni. In tleirâwlte lah an invawng fel si. Khawvêl pum pui hi Jehova Thuhretute hlîrin khat thei se ka ti ngawt mai,” tiin a sawi bawk a ni.
Kristian Intukluhna
16. Sawrkâr hotute nêna kan inlaichînna hi eng nge ni a, engvâng nge?
16 Petera chuan sawrkâr hotute nêna kan inlaichînna chungchâng a sawi bawk a. “Lalpa avâng chuan mihring ruat apiangte hnênah intulût rawh u, chungnunga awm lalber hnênah emaw, thil tisualtute chunga phuba la tûr leh, thil tiṭhatute fak tûra ama tirh chhâwn Ram Awptu hnênah pawh. Hei hi Pathian duhzâwng a ni si, mi âte thusawi fing lo chu thil ṭha tia in tihdan hi,” a ti. (1 Petera 2:13-15) Sawrkâr fel tak hnên aṭanga hlâwkna kan dawnte avângin kan lâwm a; tin, Petera thute inkaihhruaitîrin, a dânte kan zâwm a, chhiah kan pe bawk a ni. Dân bawhchhetute hrem tûra sawrkâr hnêna Pathian thuneihna pêk hi pawm mah ila, sawrkâr hotute hnêna kan intukluh chhan ber chu “Lalpa avâng chuan” a ni. Chu chu Pathian duhzâwng a ni. Chu bâkah, thilsual tia hrem kan nih avânga Jehova hming tihchhiat chu kan duh lo a ni.—Rom 13:1, 4-7; Tita 3:1; 1 Petera 3:17.
17. ‘Mi âten’ min dodâl hunah, eng nge kan rin tlat theih?
17 Vânduaithlâk takin, hotute zînga ‘mi â’ ṭhenkhat chuan kan chungchâng thu dik lo thehdarhna ang chi kawng dang hmangin min tiduhdah emaw, min dodâl emaw ṭhîn. Mahse, Jehova’n hun a tihah chuan an dâwt thute chu a lo lang zêl ṭhîn a; an “thusawi fing lo chu” tihtâwp a ni zêl ṭhîn. Kan Kristian chêtzia chuan a dik zâwk chu a târ lang mai ṭhîn a ni. Chuvângin, sâwrkâr hotu rinawmte’n thil ṭha titute tiin min fak fo a ni.—Rom 13:3; Tita 2:7, 8.
Pathian Chhiahhlawhte
18. Kristian kan nih angin, eng kawngin nge kan zalênna hman khaw loh chu kan pumpelh theih?
18 Tûnah chuan Petera chuan: “Zalên in ni a, nimahsela in zalênna chu sual khuh nân hmang lovin, Pathian bâwiha awm nân hmang zâwk rawh u,” tiin min vaukhân a. (1 Petera 2:16; Galatia 5:13) Tûn laiah hian, Bible thutak kan hriatna hian sakhaw der zirtîrna dik lo lak ata min tizalên a. (Johana 8:32) Chu bâkah, zalên taka duhthlan theihna kan nei a, keimahniin duh kan thlang thei bawk a ni. Mahse, chu kan zalênna chu a khaw lo zâwngin kan hmang chuang lo. Ṭhian kawm tûr te, thawmhnaw inbel tûr te, inchei dân te, leh ei leh in chungchâng pawh tiamin intihhlimna te kan thlannaah Kristiante chuan mahni lâwmzâwng kan zawng lo va, Pathian chhiahhlawh kan nih zâwkzia kan hre reng a ni. Mahni duhzâwng emaw, he khawvêla incheina leh chîn dân lâr emawte chhiahhlawh nih ai chuan, Jehova rawng bâwl chu kan thlang zâwk a ni.—Galatia 5:24; 2 Timothea 2:22; Tita 2:11, 12.
19-21. (a) Engtin nge sawrkâr thuneitute kan thlîr? (b) Engtin nge ṭhenkhatin ‘unauhote an hmangaihna’ an lantîr? (c) Kan mawhphurhna pawimawh ber chu eng nge ni?
19 Petera chuan heti hian a sawi zawm zêl a: “Mi zawng zawng chawimawi rawh u. Unauhote chu hmangaih rawh u. Pathian ṭih dêk rawh u. Lalber chu chawimawi rawh u,” tiin. (1 Petera 2:17) Pathian Jehova’n mihringte hi thuneihna engemaw an chelh a phalsak avângin, chûng mite phû ang tâwk chawimawina chu kan lantîr a ni. Thlamuang tak leh Pathian ngaihsakna nei chunga kan rawngbâwlna kan chhunzawm zêl theih nân an tân pawh kan ṭawngṭaisak hial a ni. (1 Timothea 2:1-4) Nimahsela, chutih rual chuan, ‘unauhote hmangaihna’ kan nei a. Kan Kristian unaute tihnat kan tum lo va, an ṭhatna tûr kan thawk reng zâwk a ni.
20 Entîr nân, Africa rama chi leh chi inkâra tharum thawhna a chhuah lai khân, Jehova Thuhretute Kristian chêtzia chu a chhinchhiah tlâk hle. Switzerland chanchinbu pakhat Reformierte Presse chuan heti hian a ziak: “Kum 1995 khân, African Rights . . . chuan Jehova Thuhretute tih chauh lo sakhaw dang zawng zawng chu [intihbuainaa] an tel vekzia a finfiah thei a ni,” tiin. Thilthleng lungchhiatthlâk tak chanchin an han hriat chuan, Europe rama Jehova Thuhretute chuan chu mi hmuna an unaute leh mi dangte ṭanpui nân ei tûr leh damdawi an thawn nghâl thuai a ni. (Galatia 6:10) Anni chuan Thufingte 3:27 thu: “A phute tân ṭhatna ui suh, i kuta tih theihna a awm phwt si chuan,” tih chu an zâwm a ni.
21 Mahse, sawrkâr hotute laka kan bat chawimawina leh kan unaute laka kan bat hmangaihna ai pawha pawimawh zâwk mawhphurh pakhat a awm a. Chu chu eng nge ni? Petera chuan: “Pathian ṭih dêk rawh u,” a ti. Mi tupawh laka kan bat aiin Jehova lakah kan ba nasa zâwk daih a ni. Chu chu engtin nge a nih theih? Engtin nge Pathian laka kan mawhphurhna leh sawrkâr hotute laka kan bat chu inbûk tâwka kan vawn theih ang? Hêng zawhnate hi thu ziak lehah chhân a ni ang. (w02 11/1)
I La Hre Reng Em?
• Kristiante’n chhûngkuaah eng mawhphurhna nge an neih?
• Engtin nge thilpêk pêk duhna rilru chu kohhranah kan lantîr theih?
• Khawvêl mite lakah eng mawhphurhna nge kan neih?
• Nungchang tehna sâng tak vawn tlatna aṭanga hlâwkna lo awm ṭhenkhatte chu engte nge ni?
[Zirlai Atâna Zawhnate]
[Phêk 21-naa milem]
Engtin nge Kristian chhûngkua chu hlimna nasa tak bul a nih theih?
[Phêk 22-naa milemte]
Engvângin nge Jehova Thuhretute chu an inhmangaih tawn?
[Phêk 22-naa milemte]
A mi malin hre kher lo mah ila kan unaute kan hmangaihzia chu kan lantîr thei em?