Pathian Biakna Hmunte—Chûng Chu Kan Mamawh Em?

‘Ram chhûng puan chi hrang hrang mit la tak tak haa lo kal khâwm hmun thianghlim tlawha zin mi sâng tam takte; Hmâsânga Spain lâm dân khuang rema entîr Indian hnamho te; mipui tam tak kâra hahthlâk tak leh rethei taka ṭhingṭhi chunga hmun thianghlim lam pantu sakhaw mi ruh tak tak te; chûng zawng zawngte chuan biak in ropui tak kawtlai leh a bula kawngpuite chu an tikhat mup mup a ni.’

HEI hi El Economista chanchinbuin kum 2001 December thlaa mipui pungkhâwm tamzia a sawi dân a ni. Chutih lai chuan, mipui maktaduai thum vêl chuan Virgin of Guadalupe (Guadalupe Nula Thianghlim) an rinzia tilang tûrin Mexico City Khawpuia biak in ropui chu an tlawh a. Sakhaw in lian tam tak dang, Rom khuaa Mi Thianghlim Petera Biak In Ropui ang chite chuan tlawhtu a ngah hle bawk.

Pathian be duh mi tam takte chuan sakhaw in ropuite chu an ngainain an ngaisâng hle a ni. Brazil rama Maria-i chuan: “Ka tân chuan biak in hi Pathian ka hnaih theina hmun a ni. Hmum thianghlim a ni a. Biak ina kal chuan thlarau a tithianghlim a, Mass-a kal loh leh Châwlhni tina sual puan loh chu thil sual a nih kan ring tlat a ni,” a ti. Mexico rama Consuelo-i pawhin: “Biak in chuan ka thinlung a chawk tho va; biak in chu ka hlut êm êm a ni. Chuta ka awm chhûng chuan vân rama awmah ka inngai hial ṭhîn,” a ti bawk.

Mi ṭhenkhat chuan biak inte chu ngai pawimawh hle mah se, mi dangte chuan Pathian biakna hmun bîk a nih an ring lo. England rama Catholic puithiam, Peter Sibert-a chuan biak ina inkhâwm a tlâk hniamzia sawiin: “[Mite] chuan sakhaw rin dân an duhna lai lai an thlang a. Upa lam mi tam tak chu Catholic niin an rinna milin an nung a​—mahse ṭhalaite zîngah chuan chutiang tih nachâng hria pawh an awm tawh lo,” a ti. Kum 1998, November 20-a London khawpui chanchinbu Daily Telegraph chuan: “Kum 1979 aṭangin  England ramah biak in thar 495 sak a ni a, 150 thuai thar a nih bawk laiin, biak in 1,500 vêl chu khâr a ni,” a ti bawk.

Kum 1997 khân, German ram Munich khawpuia Süddeutsche Zeitung chanchinbu chuan: “Biak inte chu cinema hall emaw, khawsakna apartment inah emaw chantîr a ni: Ringtute chu biak inah an inkhâwm lo va, Pathian biakna hmunte chu thil dang atâna hman a ni. . . . Netherland ram leh England rama thleng ṭhîn ang chu German ramah pawh a thleng ve ta,” a ti a. Heti hian a sawi belh a: “Kum tlêm tê kalta chhûngin biak in 30 emaw, 40 emaw an hralh thu chu a hmuh theih a ni,” tiin.

Sakhaw in liante chu Pathian biak nân a ṭûl tak tak em? Biak in ropui takte leh uar taka cheimawite hian Bible ṭanchhan tûr a nei em? Eng anga sak inte nge Pathian nung leh dik biakna nêna inkûngkaih? Chûng aṭang chuan Pathian biakna hmunte mamawhna chungchâng leh chu mi hmuna thiltih âwmte chungchâng eng nge kan zir theih? (w02 11/15)