In Kutte Tichak Rawh U

BIBLE-AH hian kut hi vawi tam tak sawi lan a ni a. Kawng chi hrang hrangin thu chi hrang hrang sawi nâna hman a ni. Entîr nân, kut thianghlim leh kut fai tih chuan sualna neih lohzia a entîr a. (2 Samuela 22:21; Sâm 24:​3, 4) Kut phar tih chuan mi dangte chunga thil phalna a entîr a. (Sâm 145:16) Hmêlmate laka chhanchhuahte chu an kut ata chhanchhuak anga sawi an ni. (1 Samuela 4:⁠3) Kut uai thla tih chu lunghnual tihna a ni bawk a. (Hebrai 12:12) Tin, mahni kut tihchak tih chu thil ti tûra inthuam ṭha tihna a ni.​—1 Samuela 23:16.

“Hun khirh takte” kâra nung kan nih avângin, tûn laiah hian kan kutte kan tihchak thuai thuai a ngai a ni. (2 Timothea 3:⁠1) Mihring rilru put hmang chu kan lunghnual chânga tlâwm mai a, kan kut uai thlâktîr mai hi a ni ṭhîn. Tûn laiah chuan tleirâwl laia school chhuahsan te, pasalin a chhûngkua a tlansan te, leh nu berin a fa a kalsan te chu hmuh tûr a tam tawh hle. Kristian kan nih angin, Pathian rawng kan bâwlnaa fiahna kan tawnte chhel taka tuar thei tûrin kan kutte kan tihchak a ngai a ni. (Matthaia 24:13) Chutianga tihna chuan Jehova thinlung a tilâwm a ni.​—Thufingte 27:11.

Kutte Tihchak Dân

Ezra hun laia Judate chuan Jerusalema Jehova biak in an sak zawh theih nân an kutte an tihchak a ngai a. Engtin nge an kutte an tihchak? Thuziak chuan heti hian a sawi: “Chhang dawidim telh loh kût chu lâwm takin ni sarih an hmang a: LALPA chuan anni chu a tihlim a, Pathian, Israelte Pathian in saknaa an kutte tihchaksak tûrin Assuria lal rilru chu a lamah a thlêktîr a ni,” tiin. (Ezra 6:22) Chiang takin, Jehova chuan a chakna chevêl reng hmangin “Assuria lal” rilru chu Pathian mite kîrtîr tûrin a chawk tho va; tin, mipuite rilru pawh an hna ṭan tawh an thawh zawh theih nân A chêttîr bawk a ni.

Chu mi hnua Jerusalem kulh tundinleh a ngaih khân, chu hna atân Nehemia chuan a unaute kut chu a tihchaksak a. Hetiang hian kan chhiar a ni: “Ka Pathian mi duhsak thu te ka hrilh a, ka hnêna lal thu sawite pawh. Tin, anni chuan, ‘I tho vang u khai; i din teh tak ang u,’ an ti a. Chutichuan chu hna ṭha thawk tûr chuan an kut an tichak a,” tiin. An kut tihchakte hmang chuan, Nehemia leh a Judapuite chuan mak tak maiin, ni 52 chhûng lekin Jerusalem kulh chu an tungding leh thei ta mai a!​—Nehemia 2:18; 6:​9, 15.

Chutiang bawkin, Jehova chuan Lalram chanchin ṭha hrilh tûrin kan kutte a tichak a. (Matthaia 24:14) ‘A duhzâwng ti tûra thil ṭha tinrêng kawnga tihfamkimna’ hmangin min tichak a ni. (Hebrai 13:21) Kan kutah chuan hmanraw ṭha ber berte min pe a. Bible leh Bible ṭanchhan lehkhabu te, magazine te, brochure te, tract te, leh cassette leh video cassette te chu khawvêl pum puia mite hnêna thuhrilh nân kan nei a ni. Kan thu leh hla chhuahte phei chu ṭawng 380 chuanga hmuh theih a ni a. Chu bâkah, kohhran inkhâwm te, assembly te, inkhâwmpui te  hmangin Jehova chuan theocratic zirtîrna min pein, hêng hmanraw ṭha takte hi kan rawngbâwlnaa kan hman dân tûr min zirtîr bawk a ni.

Jehova chuan kan kutte chu kawng chi hrang hrangin tichak mah se, theihtâwp kan chhuah ve pawh a beisei a ni. Anmahni rûntu Suria mite bei tûra ṭanpuina dîla lo kal Lal Jehoasa hnêna zâwlnei Elisa thu hrilh kha ngaihtuah lêt ta la. Elisa chuan lal hnênah chuan thal ṭhenkhat la a, lei chhun tûrin a hrilh a ni. Bible thuziak chuan heti hian a sawi: “Vawi thum a chhun a, a bâng ta mai a. Tichuan Pathian mi chu a chungah a thinrim ta a, ‘Vawi nga vawi ruk lai i chhun tûr asin ni le; tichuan Suria-hote chu boral dêr khawpin i hneh tûr a ni a. Amaherawhchu Suria-ho chu vawi thum chauh i hneh dâwn a nih tâk hi,’ a ti a,” tiin. (2 Lalte 13:​18, 19) Taima taka a tih hrâm hrâm loh avângin, Jehoasa chuan Suria-hote chu a hneh pumhlûm thei ta lo a ni.

Jehova hna min pêk thawk chhuak tûr chuan, chutiang thu bul bawk chu kan tân pawha hman a ni. Harsatna kan tawn tûrte avâng emaw, kan hna thawh tûrte a harsat avâng emawa lungngai mai lovin, taima tak leh thinlung zawng zawngin kan thawk zâwk tûr a ni. Kan kutte kan tihchak a, Jehova ṭanpuinaa kan innghah tlat a ngai a ni.​—Isaia 35:​3, 4.

Jehova’n Kan Kutte A Tichak Ang

Jehova chuan a duhzâwng ti tûrin min ṭanpui ang a, kan kutte a tichak ngei ang. Pathianin kan tân thilmakte tiin, engkim a ti ang tihna erawh a ni hauh lo. Kan chanpuala tla​—nî tina Bible chhiar te, inkhâwmnaa zîr tûr inpuahchah leh inkhâwmnaa tel zat zat te, a theih anga tama rawngbâwlnaa tel te, leh a hnêna bâng lova ṭawngṭaite​—chu kan tih a beisei a ni. Hun remchâng kan neih laia rinawm tak leh taima taka kan tih chuan, Jehova chuan ti tûra min beiseite ti thei tûrin chakna min pe dâwn a ni.​—Philippi 4:13.

Kum khat chhûnga a nupui leh a nu thihnaa chân ta Kristian pakhat chanchin hi ngaihtuah teh. A monuin a fapa kalsan a, Kristian nun kawng a pênsan laia a rilru natna chu a la tharlâm hle bawk nên. Chu unaupa chuan: “Fiahna kan tawn tûrte hi kan thlang thei lo va, a lo thlen hun tûr leh a thlen zîn dân tûr lah kan thlan theih a ni hek lo tih ka hria a ni,” a ti. Engtin nge tuar thei tûra chakna a neih theih? “He hun khirh takah hian ṭawngṭaina leh mahnia zirna neih chu tuia pil lova min siamtu nunna kawr ang mai a ni. Tin, thlarau lama ka unaute min ṭanpuina pawhin thlamuanna nasa tak min pe bawk. Thil dang zawng ai chuan, dinhmun harsa a lo thlen hma ngeia Jehova nêna mi mal inlaichînna ṭha neih a pawimawhzia ka hre ta a ni,” tiin a sawi.

I nunah eng thil pawh tawng mah la, Jehova rinchhan tum tlat la, i kutte tihchak nâna ruahmanna a siam zawng zawngte chu hmang ṭangkai vek ang che. Chuti chuan, Jehova hnênah rawngbâwlna ṭha ber i hlân thei ang a, chu chuan a hming hlu tak chungah fakna leh chawimawina a thlen dâwn a ni.​—Hebrai 13:15. (w02 12/1)

[Phêk 31-naa milem]

Taima taka a tih hrâm hrâm loh avângin, Jehoasa chuan Suria-hote chu a hneh pumhlûm thei ta lo