Isua Pian Dân Chanchin Aṭanga Kan Thil Hriat

MIHRING maktaduai tam takte rilru chu Isua pian hun laia thilthlengte hian a la tlat a. Chu chu khawvêl pumpuia Isua pian lai lem chi hrang hrang târte leh Christmas hun laia Isua pian dân lemchan chhuahte aṭangin a hriat theih a ni. Hun hlimawm tak ni mah se, Bible chuan Isua pian hun laia thil thlengte chu mite intihhlim nâna a chhinchhiah a ni lo. Chûng chu zirtîr kawng leh zilh kawnga hman atâna Pathian thâwk khum, Pathian Lehkha Thu zawng zawngte zînga mi a ni zâwk a ni.​—2 Timothea 3:16.

Pathianin Kristiante chu Isua piancham lâwm tûra duh ni sela chuan, a pian nî dik tak chu Bible-ah a ziak lang ngei ang. A nih leh a pian nî târ lan a ni em? Kum zabi 19-naa Bible lam mi thiam Albert Barnes-a chuan, Isua pian laia berâmpute chuan zâna berâm an vên thu a sawi zawhah: “He mi aṭang hian min chhandamtu chu December ni 25 hmain a piang tih a lang chiang . . . Chu hun chu a vâwt hle a, a bîk takin Bethlehem khaw kianga hmun sângte leh tlâng ramte chu a vâwt zual bîk avângin. Pathianin [Isua] pian hun chu a thup tlat a. . . . Kan tân a hun lo hriat a pawimawh lo; pawimawh ni se zawng Pathianin a nî a lo chhinchhiahtîr ngei ang,” tih thutâwp a siam a ni.

Chu mi nêna inkalh takin, Chanchin Ṭha ziak palite chuan Isua thih nî chu min hriattîr ṭheuh a ni. Chu chu Kalhlên Kût nî, Juda thla Nisan ni 14, nipui laia thil thleng a ni. Chu bâkah, Isua pawhin a hungzuitute chu chu mi nia amah hriatrengna nei ṭhîn tûrin chiang takin thu a  pe bawk a ni. (Luka 22:19) Bible chuan Isua piancham lâwm tûra thu a pêk loh bâkah, piancham rêng rêng lâwm tûrin a sawi ngai lo. Lungchhiatthlâk takin, Isua pian nî chungchânga inhnialna chuan chûng lai vêla thilthleng chhinchhiah tlâk zâwk chu a hliahkhuh tlat a ni.

Pathian Thlan A Nu leh Pa

Israel rama chhûngkaw sâng tam takte zîngah Pathianin a Fapa enkawl seilian tûrin eng ang nu leh pa nge a thlan? Challanna leh hausakna lam A ngai pawimawh em? A ngai pawimawh lo. Jehova chuan a nu leh pa thlarau lam mizia chu a ngaihtuah zâwk a ni. Messia nu a nih tûr thu hrilh a nih hnuaa a hla sak, Luka 1:​46-55-a chinchiah Mari fakna hla chu bihchiang teh. Thil dang tam takte bâkah: “Ka nun hian Lalpa a chawimawi e . . . A bawinu hnam tlâwmzia a hmu a,” a ti tel a. Inngaitlâwm takin, Jehova bawinu, ‘hnam tlâwm tak’ angin a inthlîr zâwk a ni. Chu aia pawimawh zâwk chu, Mari fakna hla mawi tak chuan thlarau mi, Pathian Lehkha Thu hriatna ṭha nei a nihzia a târ lang a ni. Adama thlah sual nei a ni nachungin, Pathian Fapaa lei lam nu atân duhthusâm a tling a ni.

Isua pa hrawn lo ni tûr, Mari pasal chu eng ang mi nge a nih ve le? Josefa chu thingrem siam thiam tak a ni a. A kuta hna hahthlâk thawh a inhuam avângin, fapa panga leh a lo berah fanu pahnih awmna chhûngkaw mamawhte chu a phuhrûk thei a ni. (Matthaia 13:​55, 56) Josefa chu mi hausa a ni lo. Mari’n a fatir Pathian biak ina a hlan hun a lo thlen khân, inthawina berâm a pêk theih loh avângin Josefa chu a beidawng ngei ang. A aiah, mi retheite tâna pawm theih chu an hman a ngai a. Pathian dân chuan fapa nei thar hmeichhe chungchâng chu: “A neihin berâm no a tlin loh chuan ṭhuro tuak khat emaw, pârva no tuak khat emaw a keng tûr a ni; pakhat chu hâlral thilhlanah, pakhat chu sual thawi nân: tin, puithiamin inremna a siamsak ang a, tichuan a thianghlim tawh ang,” tiin a sawi a ni.​—Leviticus 12:​8, Luka 2:​22-24.

Bible chuan Josefa chu “mi fel tak” a nih thu a sawi a. (Matthaia 1:19) Entîr nân, a nupui nula thianghlimin Isua a hrin hma loh chu a pâwl rêng rêng lo a ni. Chu chuan Isua Pa dik tak hriat sual theih lohvin a siam a ni. Innei hlim in khata chêng dûn nupa tân chuan nupa thil laka insûm chu a âwlsam hauh lo vang; mahse, an insûmna chuan Pathian Fapa enkawl tûra an chanvo an hlutzia a târ lang a ni.​—Matthaia 1:​24, 25.

Mari ang bawkin, Josefa chu thlarau mi a ni a. Kum tin a hnate kal sanin a chhûngkua chu kum tina neih ṭhin Kalhlên Kûn hmang tûrin Nazareth aṭanga ni thum chhûng kal ngai, Jerusalem khuaah a hruai ṭhîn a ni. (Luka 2:41) Chu bâkah, Josefa chuan naupang Isua chu chawlhkâr tin an tih dân ṭhin anga Pathian Thu chhiar leh sawi fiahna hmun, tualchhûng inkhâwmna ina tel tûrin a zirtîr ngei bawk ang. (Luka 2:​51, 4:16.) Chuvângin, Pathianin a Fapa tâna lei lam nu leh a pa hrawn tûr chu a thlang dik a ni tih kan chiang thei a ni.

Berâmpu Mi Tlâwmte Tâna Malsâwmna Ropui Tak

A nupui naupai chu thla kua lai niin harsa hle tawh mah se, Josefa chuan Kaisara thu pêk anga a thlahtute khuaa hming inziak tûrin a hruai a. An nupaa Bethlehem an lo thlen  chuan, khawpuiah mipui an tam avângin thlenna tûr an hmu zo lo va. Loh theih lohvin ran inah an khawsak a ngai ta a, chutah chuan Isua chu piangin, ran chaw pêkna thlêngah chuan an muttîr a ni. An rinna tihchak nân, Jehova chuan he nu leh pa tlâwm takte hnênah hian nausên pian dân chu Pathian duhzâwng a nihzia nem nghehna a pe a ni. A nih leh Pathianin an nupa thlamuan tûrin Bethlehema mi challang upate chu a tîr em? A tîr lo. An aiah, Pathian Jehova chuan chu mi chungchâng chu phûla an berâm riah chilhtu, hna hahthlâk tak thawk berâm vêngtute hnênah a puangzâr ta zâwk a ni.

Pathian vântirhkoh chu an hnêna inlârin, “ran chaw pêkna thlênga mu” nausên piang hlim Messia hmu tûra Bethlehema kal tûrin a tîr a. Chûng mi tlâwmte chuan Messia piang hlim chu ran inah a awm tih an hriatin mak an tiin an hrilhhai em? Teuh lo mai! An berâmte chu kalsanin, Bethlehem lam pan chuan an kal nghâl thuai a ni. Isua an va hmuh chuan Josefa leh Mari hnênah Pathian vântirhkoh thusawite chu an hrilh a. Chu chuan an nupa rinna chu a tichak thar ngei ang: Pathian thiltum anga thil a thlen chhoh zêl avângin. “Berâmpute” pawh chu “engkim an hmuha an hriat avângin, Pathian chawimawi leh fak chung zêlin an kîr leh ta a.” (Luka 2:8-20) A ni, Pathian ṭih mi berâmpute hnênah thu chu puang chhuakin, Jehova chuan thutlûkna dik a siam a ni.

A chunga kan hmuhte aṭangin, eng ang mite’n nge Jehova duhsakna dawng tih kan hria a ni. Challanna emaw, hausakna emaw chu kan ûm a ngai lo. Chu ai mahin, Josefa te, Mari te, leh berâmpute angin Pathian thu kan âwih a, khawvêl thil hausakna aia thlarau lam thil kan dah hmasak zâwk a ngai a ni. Dik takin, Isua pian hun lai vêla thilthlengte rilrua kan chhût ngun chuan zir tûr ṭha tam tak a awm a ni. (w02 12/15)

[Phêk 7-naa milem]

Mari’n ṭhuro pahnih a hlanna chuan eng nge a târ lan?

[Phêk 7-naa milem]

Pathianin Isua pian thu chu berâmpu tlâwm tak ṭhen khat hnênah a hrilh