“Khaw Chhak Mi Fing Pathumte”—Tute Nge An Nih?

Isua pian lai lemziakahte chuan kawrfual ha mi pathumte chu an sanghâwngseite nên ran chaw pêkna thlênga Isua mutna ran in an lo thlen lai a lang tlângpui a ni. Chu ropui taka inthuam mi khualte chu khaw chhak mi fing pathumte tia hriat an ni ṭhîn. Bible chuan chu mite chanchin eng nge a sawi?

Bible sawi dân chuan, mi fingte chu “khaw chhak lam” aṭanga lo kal an ni a, chuta ṭangin Isua pian thu an lo hria a ni. (Matthaia 2:​1, 2, 9) An tân Judai ram lo thlen nân hun rei tak a ngai ngei ang. A tâwpa Isua an va hmuh chuan, ani chu ran ina nausên piang hlim a ni tawh lo. Mari leh “nautê” chu ina an awm lai an va hmu ta zâwk a ni.​—Matthaia 2:⁠11.

Bible chuan chûng mite chu mitdawivaih thiamte, a nih loh leh “arsi en thiamte” tiin a ko va, engzât nge an nih erawh a sawi lo. (Matthaia 2:​1, 2, NW, footnote) The Oxford Companion to the Bible chuan: “Mitdawihvaih leh arsi en inzawmna chu mi khualte’n Bethlehem lama anmahni hruaitu arsi an lawm dânah a lang a ni,” tiin a hrilhfiah a ni. Bible erawh chuan mitdawihvaih thil zawng zawngte leh Babulon mite thil chîn arsi aṭanga chanchin hriat tumnate chu a dem chiang hle thung.​—Deuteronomy 18:​10-12; Isaia 47:⁠13.

Arsiin hêng mite hnêna chanchin a pêk chuan rah ṭha a chhuah lo. Lal sual Heroda thinurna leh îtsîkna chu a chawk tho zâwk a ni. Chu chuan Josefa, Mari, leh Isua chu Aigupta rama a tlân chhiattîr bâkah, Bethlehem mipa naupang “kum hnih achin hnuai lam” zawng zawng tual thihna a thlen a ni. Heroda chuan khaw chhak mi fingte hnên aṭanga a thil hriatte aṭangin, Isua pian hun chu a lo dîlchhût reng tawh a. (Matthaia 2:16) An lo kalnain a thlen buaina zawng zawng han thlîr hian, chu arsi leh chu miin a hril “Judate lal lo piang” tih chu Isua tihboral duhtu, Pathian hmêlma, Diabol-Satana awmtîr a ni tia thu tâwp siam chu a âwm hle.​—Matthaia 2:​1, 2. (w02 12/15)