“Pathian Hnaih Rawh U”
“Pathian Hnaih Rawh U”
“Pathian hnaih rawh u, tichuan anin a hnaih ang che u.”—JAKOBA 4:8.
1, 2. (a) Mihringte hian eng inchhâlna eng nge an siam fo? (b) Eng fuihna thu nge Jakoba’n a pêk a, engvângin nge chu chu mamawh a nih?
“PATHIAN kan hnênah a awm.” He thu hi hnam puanzârte leh sipai uniform-te tak ngial pawh chei nâna hman a ni. Tin, tûn lai pawisa leh pawisa nawi tam takah chuan, “Pathianah rinna kan nghat,” tih thute chu chhut a ni bawk. Pathian nêna inlaichînna ṭha tak nei anga inchhâl chu mihringte thiltih tlânglâwn tak a ni. Mahse, chutiang inlaichînna nei tak tak tûr chuan, a sawia sawi mai emaw, mite hmuh atâna a ziaha ziah mai emaw piah lam a ngai tih i pawm dâwn lâwm ni?
2 Bible chuan Pathian nêna inlaichînna neih theih a nihzia a târ lang a. Mahse, thawh rim a ngai a ni. Kum zabi pakhatnaa hriak thih Kristian ṭhenkhatte pawhin Pathian Jehova nêna an inlaichînna chu an tihchak a ngai a. Kristian enkawltu Jakoba chuan ṭhenkhat chu an mihring rilru sûkthlêk dân leh thlarau lam faina an neih loh chungchângah a vaukhân a ngai a ni. Chu a fuihna thute zîngah chuan, he fuihna thiltithei tak mai hi a tel a ni: “Pathian hnaih rawh u, tichuan anin a hnaih ang che u,” tih hi. (Jakoba 4:1-2) Jakoba’n “hnaih” a tih hian eng a tihna nge?
3, 4. (a) “Pathian hnaih rawh u” tih ṭawngkam hian kum zabi pakhatnaa Jakoba lehkha thawn chhiartute kha eng nge a hriatnawntîr a rinawm? (b) Engvângin nge Pathian chu pan theih a ni tih kan chian theih?
3 Jakoba chuan a thuziak chhiartute hriat ṭhan ngei tûr thu mal a lo hmang a. Mosia Dân chuan puithiamte chu a mite ai awha Jehova “kinga lo kal,” a nih loh leh an pan dân tûr chungchângah kaihhruaina chiang tak a pe a ni. (Exodus 19:22) Chuvângin, Jakoba thuziak chhiartute chu Jehova kianga lo kal hnaih chu thil ho mai maia ngaih tûr a nih lohzia hriatnawntîr an ni ngei ang. Jehova chu lei leh vâna mi zahphu ber a ni si a.
4 A lehlamah chuan, Bible lama mi thiam pakhat sawi dânin, “he [Jakoba 4:8-a] fuihna hian beiseina sâng tak a târ lang a ni.” Jakoba chuan Jehova’n mihring ṭha famkim lote hi Amah hnaih tûrin hmangaih takin a sâwm reng tih a hria a. (2 Chronicles 15:2) Isua inthawina chuan famkim lehzuala Jehova pan theih dân kawng a hawng a ni. (Ephesi 3:10-13) Tûn laiah hian, Pathian pan theihna kawng chu mi maktaduai tam takte tân a inhawng a ni! Mahse, engtin nge chu hun remchâng ropui tak chu kan hman ṭangkai theih ang? Pathian Jehova kan hnaih theih dân kawng thumte lo ngaihtuah ta ila.
Pathian ‘Hriatna La Lût Reng’ Zêl Rawh
5, 6. Engtin nge naupang Samuela chungchâng chuan Pathian ‘hriatna lâk luh rengna’ thil kaihhnawih telte a târ lan?
5 Johana 17:3 (NW) sawi dânin, Isua chuan: “Hei hi chatuana nunna a ni, nang Pathian tak awmchhun leh i tirh Isua Krista hriatna lâk luh reng hi,” a ti a. He mi chângah hian Bible lehlin dangte hian New World Translation nên inan lohna chhe tê an nei a. Lehlin dangte chuan Pathian ‘hriatna la lût reng’ ti lovin, Pathian “hria” emaw, Pathian “hriat” emaw tiin an letling mai a. Mahse, mi thiam tam takte chuan original Grik-a thu mal hman hian chu aia tam chu a huam a—mi dangte nêna inhriat chianna thlen thei hiala thil tihchhunzawm zêl lam a kâwk tel an ti.
6 Isua hun lai chuan, Pathian hriat chianna neih chu thil thar a ni lo. Entîr nân, Hebrai Pathian Lehkha Thu-ah chuan, Samuela chuan naupang mai a la nih lai chuan “LALPA chu a hre lo va” tih kan chhiar a. (1 Samuela 3:7) Samuela chuan a Pathian chungchâng a hre miah lo tihna em ni? Ni lo ve. A nu leh pate leh puithiamte chuan thil tam tak an zirtîr ngei ang. Mahse, mi thiam pakhat sawi dânin, he mi chânga Hebrai thu mal hman hi “inhmêlhriat ṭha berte sawi nâna hman” theih thu mal a ni. Chutih lai chuan, Samuela chuan Jehova chu a thusawitua a ṭan tâk hnua a hriat chian ang tlukin a la hre chiang rih lo tihna a ni. A lo ṭhanlen telh telh chuan, Jehova chu a lo hre tak tak ta a, amah nêna mi mal inlaichînna ṭha tak a lo nei ta a ni.—1 Samuela 3:19, 20.
7, 8. (a) Engvângin nge Bible zirtîrna thûk zâwkte avâng chuan kan beidawn loh vang? (b) Pathian Thu thutak thu ril ṭhenkhat kan zir ngei tûrte chu engte nge ni?
7 Jehova nêna inhmêlhriat ṭha tak ni tûrin amah hriatna chu i la lût em? Chutianga ti tûr chuan thlarau lam chaw Pathian pêk chu i “châk” a pawimawh a ni. (1 Petera 2:2) Bible zirtîrna thu bulte hriatah hian lungawi mai suh. Bible zirtîrna thu ril zâwk ṭhenkhatte chu hriat tum ang che. (Hebrai 5:12-14) Chûng zirtîrnate chu a har lutuka ngaiin i beidawng mai em? I beidawng mai a nih chuan, Jehova chu “Zirtîrtu Ropui Ber” a ni tih hre reng ang che. (Isaia 30:20, NW) Ani chuan ṭha famkim lo mihringte rilrua thutak thu thûk takte tuh dân a hria a ni. Tin, a thu zirtîrte hre thiam tûra theihtâwp i chhuahna pawh mal a sâwm thei bawk a ni.—Sâm 25:4.
8 Engvângin nge “Pathian thu ril” ṭhenkhat chungchângah i inenfiah loh vang? (1 Korinth 2:10) Chûngte chu Pathian thu zir mite leh sakhaw hruaitute’n ninawma an ngaih mai theih anga tuiawm lo a ni hauh lo. Chûng chu hmangaihnaa khat kan Pa rilru leh thinlung chungchâng tuiawm tak tak min hriattîrtu thurin ṭangkai leh pawimawh tak a ni. Entîr nân, tlanna te, “thurûk” te, leh Jehova’n a mite vênhim nân leh a thiltumte hlen chhuah nâna a hman thuthlung chi hrang hrangte—hêngte leh a dang tam takte hi mi mal zir bingna leh zirna neih nâna thu tuiawm tak leh hlâwk takte an ni.—1 Korinth 2:7.
9, 10. (a) Engvângin nge chapona hi a hlauhawm a, chu mi pumpelh tûr chuan engin nge min ṭanpui ang? (b) Jehova hriatna chungchângah engvângin nge inngaihtlâwm kan tum ang?
9 Thlarau lam thutak thu ril zâwkte i lo hriat tam deuh deuh chuan, hriatna avânga lo awm thei thil—chapona—lakah chuan fîmkhur hle ang che. (1 Korinth 8:1) Chapona chuan mihringte hi Pathian lak ata a mihrantîr avângin a hlauhawm hle a ni. (Thufingte 16:5; Jakoba 4:6) Mihring tumah hian an hriatna uanpuina tûr chhan an nei lo tih hre rawh. A tihchian lehzual nân, tûn hnaia mihringte science thiamna lama an hlawhtlinna chhûtna lehkhabu thuhmahruai hi ngaihtuah teh: “Kan hriat tam poh leh, kan hriat tlêmzia kan hre chhuak ting mai a. . . . Kan thil zir tawh rêng rêng hi kan la zir zêl tûrte nêna khaikhin chuan a hotham hle a ni,” tih hi. Chutiang khawpa inngaihtlâwmna chu hriat a nuamin a danglam ngei mai. Hriatna ropui ber—Pathian Jehova hriatna—chungchângah phei chuan inngaihtlâwm rengna tûr chhan ṭha lehzual kan nei a ni. Engvâng nge?
10 Jehova chungchânga Bible thusawi ṭhenkhatte hi lo ngaihtuah ta la. “I ngaihtuahnate chu a thûk êm êm a ni.” (Sâm 92:5) “[Jehova] finna chuan tawpintai a nei lo.” (Sâm 147:5) “[Jehova] hriat thiamzia chu zawn chhuah rual a ni lo.” (Isaia 40:28) “Pathian finna leh hriatna ngahzia chu a va thûk êm!” (Rom 11:33) Chiang takin, Jehova chungchâng chu kan hre vek ngai lo vang. (Thuhriltu 3:11) Ani chuan thilmak tam tak min zirtîr a; chuti chung pawhin, kan hmaah hian thil la zir zêl tûr chhiarsên loh a la awm a ni. Chu hmabâk chu a phurâwmin, chu chuan min inngaihtlâwmtîr hle a ni lâwm ni? Tichuan, kan zir pahin, kan hriatna hi mi dangte laka inchawisân nân hmang lovin, Jehova hnaih nân leh mi dangte pawh chutiang bawka ti tûra ṭanpui nân i hmang ang u.—Matthaia 23:12; Luka 9:48.
Jehova I Hmangaihna Târ Lang Rawh
11, 12. (a) Engtin nge Jehova chungchâng hriatna kan lâk luh chuan min nghawng ang? (b) Engin nge miin Pathian a hmangaihna chu a tak leh tak loh tifiah?
11 Tirhkoh Paula chuan hriatna leh hmangaihna chu inhmeh takin a thlunzawm a ni: “In hmangaihnain hriat famkimna leh bengvârna tinrêng a ngah lehzual nân ka ṭawngṭai ṭhîn,” tiin. (Philippi 1:9) Chapo nâna hman ai chuan, Jehova leh a thiltumte chungchâng thutak hlu tak tak kan zirte hian kan Pa vâna mi kan hmangaihna a tipung zâwk tûr a ni.
12 Dik takin, Pathian hmangaihna neia inchhâl tam tak chuan an hmangaih tak tak lo. Thinlunga veina nasa tak an nei tak tak pawh a ni thei ang. Chutiang veina chu hriatna dik nêna a inrem phawt chuan a ṭha a, a fakawm a ni. Mahse, chu chu Pathian hmangaihna tak tak a ni lo. Engvângin nge a nih loh? Pathian Thu-in chutiang hmangaihna a hrilhfiah dân hi chhinchhiah teh: “Pathian kan hmangaihna chu hei hi a ni, a thupêkte kan zawm hi,” tih hi. (1 Johana 5:3) Chuvângin, Jehova hmangaihna chu thuâwihna thiltiha târ lan a nih chuahvin a tak a ni.
13. Engtin nge Pathian ṭihna chuan amah kan hmangaihna lantîr tûrin min ṭanpui ang?
13 Pathian ṭihna chuan a thu âwih tûrin min ṭanpui ang. He Jehova zahna thûk tak leh mak tak hi a chungchâng hriatna lâk luhna aṭang te, a thianghlimna tâwpintai nei lo te, a ropuina te, a thiltihtheihna te, a rorêl dikna te, a finna te, leh a hmangaihna te chungchâng zirna aṭanga lo awm a ni. Chutianga ṭihna chu amah hnaih nân a pawimawh a ni. Sâm 25:14 sawi hi chhinchhiah teh: “LALPA thurûk chu amah ṭihtute hnênah a awm,” tih hi. Chuvângin, kan hmangaih tak kan Pa vâna mi tihlâwm loh hlauhna ṭha kan neih chuan amah kan hnaih thei a ni. Pathian ṭihna chuan Thufingte 3:6-a fuihna fing tak: “I kawng zawng zawngah amah hre reng la, i kawngte chu a kawhhmuh zêl ang che,” tih hi zâwm tûrin min ṭanpui ang. Chu chu eng tihna nge?
14, 15. (a) Nî tina thu tlûkna siam ngai kan tawn ṭhenkhatte chu engte nge ni? (b) Engtin nge Pathian kan ṭihna târ lang tûr zawnga thu tlûkna kan siam theih?
14 A tê emaw, a lian emaw pawh ni se, nî tinin thu tlûkna tam tak i siam ziah a ngai a. Entîr nân, i hnathawhpuite, school kalpuite, leh ṭhenawmte chu eng chungchâng nge i titi pui ang? (Luka 6:45) I hna thawh tûr chu taima takin i thawk dâwn nge, hahdam thei ang bera thawh dân kawng i zawng zâwk dâwn? (Kolossa 3:23) Jehova hmangaihna nei lo mite chu i hnaih tawlh tawlh dâwn nge, thlarau lam thil ngaihtuahte nêna in inlaichînna chu i tichak sauh zâwk dâwn? (Thufingte 13:20) Pathian Lalram hmakua tih hmasâwn nân kawng ho tham tak pawh ni se, eng nge i tih ang? (Matthaia 6:33) Heta kan târ lan Pathian Lehkha Thu-te hian i nî tin thu tlûkna a kaihhruai phawt chuan, “i kawng zawng zawngah” Jehova i hre reng tak zet tihna a ni ang.
15 Dik takin, thu tlûkna kan siam rêng rêng hian, hêng ngaihtuahna: ‘Jehova’n eng ti tûrin nge min duh ang? Eng hian nge amah tilâwm ber ang?’ tihte hian min kaihruai tûr a ni. (Thufingte 27:11) Hetiang kawnga Pathian ṭihna lantîr hi Jehova kan hmangaihzia kan târ lan theihna kawng ṭha ber a ni. Tin, Pathian ṭihna chuan thlarau lam, nungchang lam, leh tisa lama thianghlim tûrin min chêttîr bawk ang. Jakoba’n “Pathian hnaih” tûra Kristiante a fuihna Bible châng vêk chuan: “Mi sualte u, in kutte silfai rawh u; rilru bulbâl nei lote u, in thinlung tithianghlim rawh u,” tiin a fuih bawk tih chhinchhiah ang che.—Jakoba 4:8.
16. Jehova hnêna thil pêkna hmangin eng nge kan tih theih ngai loh va, mahse eng nge kan tihhlawhtlin theih reng?
16 A ni, Jehova kan hmangaihzia kan târ lannaah chuan thil ṭha lo laka inthiarfihlîm mai bâk thil tam tak a tel a ni. Hmangaihna chuan thil ṭha ti tûr pawhin min chêttîr bawk a ni. Entîr nân, Jehova thilphalna nasa tak chu engtin nge kan chhân lêt? Jakoba chuan: “Thilpêk ṭha leh thilpêk famkim zawng zawng chu chung lam aṭangin êngte Pa hnên ata, a lo chhuk ṭhîn a ni,” tiin a ziak a. (Jakoba 1:17) Jehova hnêna kan thil neihte kan pêk hian, ani chuan a neihnun phah chuang lo ngei mai. Thil leh thil hlu zawng zawngte neitu a ni sa reng si a. (Sâm 50:12) Tin, kan hun leh tha leh zung kan pêk pawh hian, a tih theih loh tûr kan tihsak tihna a ni hek lo. Pathian Lalram chanchin ṭha chu kan puang duh lo a nih pawhin, lung tête a au chhuahtîr thei reng asin! Chuti a nih si chuan, engvângin nge kan neih sum te, hun te, leh tha leh zungte kan pêk ang ni? A chhan bul ber chu, chutianga tih chu kan thinlung zawng zawng, kan thlarau zawng zawng, kan rilru zawng zawng, leh kan chakna zawng zawnga amah kan hmangaihzia kan târ lanna a nih vâng a ni.—Marka 12:29, 30.
17. Engin nge hlim taka Jehova hnêna thil pe tûrin min chêttîr thei?
17 Jehova hnêna thil kan pêk rêng rêngin, hlim takin kan pe ṭhîn tûr a ni, ‘Pathian chuan hlim taka petu a hmangaih’ si a. (2 Korinth 9:7) Deuteronomy 16:17-a thu bul chhinchhiah: “LALPA in Pathianin malsâwmna a dawntîr che u ang zêlin mi tinin an theih ang tâwk an pe tûr a ni,” tih hian hlim taka pe tûrin min ṭanpui thei a ni. Kan chunga Jehova thilphalzia kan ngaihtuah hian, phal tak leh hlim taka pêk châkna kan nei tlat a ni. Fa duh lai thilpêk te tak têin a nu leh a pa rilru a tihlâwm angin, chutiang thilpêkte chuan Jehova thinlung a tilâwm a ni. Hetiang kawnga kan hmangaihna târ lanna chuan Jehova hnaih tûrin min ṭanpui ang.
Ṭawngṭaina Hmangin Inṭhianna Siam Rawh
18. Engvângin nge kan ṭawngṭai dân tihchangkân dân ngaihtuah chu manhla tak a nih?
18 A fâla kan ṭawngṭaina hian kan Pa vâna mi nêna ṭhian bul inbiakna leh thu rûk inhrilhna hun remchâng hlu tak chu min neihtîr a ni. (Philippi 4:6) Ṭawngṭaina hi Pathian hnaih theihna hmanraw pawimawh tak a nih avângin, kan ṭawngṭai dân ngaihtuah chu a manhla hle a ni. Kan ṭawngṭaina chu a nâlin, thiam taka phuah rem tûr tihna a ni kher lo va, thinlung aṭanga lo chhuak tak tak a ni tûr a ni. Engtin nge kan ṭawngṭai dân chu kan tihchangkân theih?
19, 20. Engvângin nge ṭawngṭai hmain kan thu chham tûr kan ngaihtuah lâwk ang a, eng thute nge chutianga ngaihtuah lâwk chu âwm?
19 Kan ṭawngṭai tûrte chu kan ngaihtuah lâwk thei a. Chutianga kan ngaihtuah lâwk chuan, kan sawi duh tak kan sawi theiin, awmze nei zâwkin kan ṭawngṭai thei a; thu ngai sawinawn tlut tlut chu kan pumpelh thei a ni. (Thufingte 15:28, 29) Isua’n ṭawngṭai dân tûr a sawi thupui ṭhenkhatte ngaihtuah a, chûngte chuan kan mi mal dinhmun nêna inkungkaihna an neih dân ngaihtuahna chu a ṭangkai thei bawk. (Matthaia 6:9-13) Entîr nân, he leia Jehova duhzâwng tihnaa chanvo chhe tê neih ve kan inbeisei chu kan inzâwt thei a. A theih ang tâwka atâna mi ṭangkai nih kan duhzia Jehova chu kan hrilhin, chanvo min pêk apiang hlen chhuak tûrin a ṭanpuina kan dîl em? Kan tisa lam mamawhte kan lungkham lutuk em? Eng ang chi sual lakah nge ngaihdam kan ngaih a, tute chungah nge ngaihdamna kan lantîr lehzual ngai? Eng thlêmna nge kan tawn a, chu mi chungchânga rang taka Jehova vênhimna kan mamawhzia chu kan hria em?
20 Chu bâkah, Jehova ṭanpuina mamawh êm êm kan mi hriatte kan ngaihtuah thei bawk. (2 Korinth 1:11) Chûng zawng zawng kârah chuan lâwmthu sawi kan theihnghilh tûr a ni hauh lo. Lâwmthu sawi nachhan tûrte kan ngaihtuah chian tak zet chuan, Jehova chunga lâwm nachhan tûr leh a ṭhatna nasa tak avânga nî tina amah fak chhan tûr kan hre ngei ang. (Deuteronomy 8:10; Luka 10:21) Chutianga tihna chuan hlâwkna dang a nei a, chu chuan kan nunah beiseina leh lâwmna rilru put hmang nei lehzual tûrin min ṭanpui thei a ni.
21. Eng Pathian Lehkha Thu entîrnate zirna hian nge ṭawngṭaia Jehova kan panna min ṭanpui thei?
21 Zirna hian kan ṭawngṭaina chu a tichangkâng thei bawk a. Pathian Thu-ah hian mi rinawm a hmei a pate ṭawngṭaina entawn tlâk tak tak a chuang a ni. Entîr nân, buaina khirh tak kan hmachhawn a, chu chuan lungkhamna leh kan nunna emaw, kan hmangaihte nunna emaw a tihderthâwn chuan, a unaupa phuba la duh mi Esauva a tawh dâwn huna Jakoba ṭawngṭaina hi kan chhiar thei a ni. (Genesis 32:9-12) A nih loh leh, Ethiopia mi maktaduai khat vêlin Pathian mite an vau ṭuma Lal Asa ṭawngṭaina thute hi kan zir thei bawk. (2 Chronicles 14:11, 12) Jehova hming tihliau thei buaina kan tâwk a nih chuan, Karmel Tlânga Baal betute hmaa Elija ṭawngṭaina hi ngaihtuah phu tak a ni a; tin, Jerusalem dinhmun chhe tak mai avânga Nehemia ṭawngṭaina pawh ngaihtuah phu tak a ni bawk. (1 Lalte 18:36,37; Nehemia 1:4-11) Chutiang chi ṭawngṭainate zir a, rilrua chhût ngunna chuan kan rinna a tichak thei a, kan lungngaihnate chungchânga Jehova pan dân ṭha ber hre tûrin min ṭanpui thei a ni.
22. Kum 2003 atâna kum châng chu eng nge ni a, chu mi kum chhûng zawngin eng thute nge keimah ni leh keimahni kan inzawh fo vang?
22 Chiang takin, “Pathian hnaih” tûra Jakoba fuihna zawm aia tum sâng zâwk leh chawimawina ropui zâwk a awm lo. (Jakoba 4:8) Chu chu Pathian kan hriatna tihpun zêlna te, amah kan hmangaihzia lantîr zual deuh deuhna te, leh ṭawngṭainaa amah nêna inṭhianna siamna te hmangin i ti zêl ang u. Kum 2003 chhûng zawngin, kum châng atâna Jakoba 4:8 thu kan vawn reng rualin, Jehova kan hnaih tak zet leh zet loh i inenfiah zêl ang u. Mahse, Jakoba thusawi zawm chu eng nge ni ve? Engkawngin nge Jehova’n “a hnaih ang che” a, chu chuan eng malsâwmna nge a thlen dâwn? Thuziak dawtleh chuan chu mi chungchâng chu a sawifiah ang. (w02 12/15)
I Hre Chhuak Em?
• Engvângin nge Jehova hnaih chu thil urhsûn tak a nih?
• Jehova hriatna lâk luh chungchânga thiltum kan siam theih ṭhenkhatte chu engte nge ni?
• Engtin nge Jehova kan hmangaih tak zetzia kan lantîr theih?
• Eng kawngin nge ṭawngṭaina hmangin Jehova nêna inṭhianna bul lehzual kan neih theih?
[Zirlai Atâna Zawhnate]
[Phêk 22-naa thu lâk chhuah]
Kum 2003 atâna kum châng tûr chu hei hi a ni: “Pathian hnaih rawh u, tichuan anin a hnaih ang che u.”—Jakoba 4:8.
[Phêk 21-naa milem]
Samuela chuan a lo puitlin chuan, Jehova a hre tak tak
[Phêk 22-naa milem]
Karmel Tlânga Elija ṭawngṭaina chu kan tâna entawn tûr ṭha tak a ni