Kan Hriat Chian Loh Pathian Rin

GERMAN rama mi pathum zêla pahnih chuan Pathian an ring a. Mahse, mi sâng chuangte chu an rin Pathian chungchâng sawi tûra tih an nih chuan, an vai deuhthaw chuan chi hrang ṭheuhvin an chhâng a ni. Chanchin thar chhuahna magazine FOCUS chuan: “German mite hian anmahni mi hrang ṭheuh an nih ang bawkin Pathian chungchângah pawh ngaih dân hrang ṭheuh an nei a ni,” a ti. Pathian rin chu thil ṭha tak a nih laiin, eng ang Pathian nge a nih pawh hre lo va rin ngawt mai chu a lungchhiatthlâk hle lo maw?

He Pathian emaw, a nihna emaw hriat chian lohna hi German ram chauhva awm a ni lo; Europe khawmual hmun tinah pawh a awm a ni. Austria, Britain, leh Netherland-a ngaih dân lâkkhâwmna chuan, Pathian chu “thiltithei zâwk emaw, sawifiah theih loh thurûk” emaw nia rinna chu a lâr hle tih a târ lang. A bîk takin ṭhalaite zîngah​—⁠amah ringtute zîngah tak ngial pawh​—⁠Pathian chu hriatthiam theih loh a ni tlat.

Pathian I Hre Chiang Em?

Tuemaw hriat leh hriat chian inkâr chu a inthlau hle. Tuemaw​—⁠tlawhpawh theih loh lal te, infiam mi lâr tak te, film changtu te​—⁠hriat chu an awm a ni tih hriat mai hi a ni. Amaherawhchu, tuemaw hriat chian chuan a huapzau zâwk a. A nungchang te, chêtzia te, rilru vei zâwng te, a duhzâwng leh duh loh zâwng te, a hma lam hun a ruahman dân te hriat pawh a tel a ni. Tuemaw hriat chianna chuan amah nêna inlaichînna duhawm tak neih theihna kawng a sial a ni.

Mi tam takte chuan Pathian chungchânga ngaih dân chiang lo tak neih ringawt​—⁠a nih loh leh amah hriat ringawt​—⁠chu a tâwk lo tih an hria a. Pathian hre chiang lehzualin chu aia nasa chu an ti a ni. Chutianga tih chu manhla an ti em? Tûn hmaa Pathian rinna satliah lo nei ṭhîn, German hmâr lama pa pakhat, Paula an tih chuan Pathian hriat chian lehzual chu a tum a. Paula chuan heti hian a sawi: “Pathian hre chiang tûr chuan hun pêk leh thawh rim a ngai a; mahse, a lâwmman chu a sâng hle. Siamtu nêna inlaichînna ṭha tak neih chuan, nî tin nun chu a tiṭha zual a ni,” tiin.

Pathian hriat chian nâna hun pêk leh tha sên chu a manhla em? Khawngaihin, thuziak dawtleh hi chhiar ang che. (w03 2/15)

[Phêk 3-naa thu lâk chhuah]

Tuemaw hriat leh hriat chian inkâr chu a inthlau hle