‘Tam Takin Rah Rawh U’
‘Tam Takin Rah Rawh U’
“Tam taka in rah hian . . . ka zirtîrte in ni ang.”—JOHANA 15:8.
1. (a) Isua’n a tirhkohte hnênah zirtîr ni tûra thil phût eng nge a hrilh? (b) Eng zawhna nge kan inzawh tûr?
ISUA thih hma chiah zân a ni a. Isua chuan a zirtîrte tih tak zeta fuih nân hun tam tâwk a hmang a ni. Zanlai a pêl tawh hial mai thei a, Isua chuan a ṭhian bulte chu a hmangaih êm avângin a la kâwm zêl a. Chutia an titi kâr lakah chuan, a zirtîr ni reng tûra an tlin ngai dang pakhat hetiang hian a hrilh leh a ni: “He mi avângin ka Pa chu chawimawiin a awm ṭhîn, tam taka in rah hian; chutichuan ka zirtîrte in ni ang,” tiin. (Johana 15:8) Vawiinah hian he zirtîr nihna thil phût hi kan tlin em? ‘Tam taka rah’ tih awmzia chu eng nge ni? A awmzia hriat nân, chu mi tlaia an titiah chuan lo kîr leh ta ila.
2. Isua’n a thih hma zân khân thei rah chungchâng tehkhin thu eng nge a sawi?
2 Rah chhuah tûra fuihna hi Isua’n a zirtîrte hnêna a sawi tehkhin thu pêng pakhat a ni a. Hetiang hian a sawi: “Kei grêp hrui taktak ka ni, ka Pa a huan enkawltu a ni. Ka zawmpui pêng rah lo apiang a paih ṭhîn a; a rah apiang a tithianghlim ṭhîn, a rah tam lehzual nân. In hnêna ka thusawi avâng chuan tûnah pawh in thianghlim tawh pang a ni. Keimahah awm reng rawh u, kei pawh nangmahniah ka awm reng ang. Pêng chu grêp hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang. Kei grêp hrui chu ka ni, nangni a pêngte chu in ni . . . He mi avângin ka Pa chu chawimawiin a awm ṭhîn, tam taka in rah hian; chutichuan ka zirtîrte in ni ang. Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u. Nangnin ka thupêkte in zawm chuan ka hmangaihin in awm reng ang,” tiin.—Johana 15:1-10.
3. Isua hnungzuitute’n rah an chhuah theih nân eng nge an tih ngai?
3 He tehkhin thuah hian Jehova chu huan Enkawltu a ni a, Isua chu grêp hrui a ni a, Isua’n a biak a tirhkohte chu a pêngte an ni. Tirhkohte Isuaa an “awm reng” chhûng chu, rah an chhuah dâwn a. Chutah Isua chuan chu inzawmna chu hlawhtling taka an neih reng theih dân hetiangin tirhkohte chu a hrilh leh a: “Nangnin ka thupêkte in zawm chuan ka hmangaihin in awm reng ang,” tiin. Chu mi hnuah tirhkoh Johana pawhin a Kristianpuite hnênah chutiang thu bawk chu a ziak a ni: “[Isua] thupêkte zâwm chu amahah a awm reng,” tiin. * (1 Johana 2:24; 3:24) Chuvângin, Krista thupêkte vawng rengin, a hnungzuitute chu amahah an awm reng thei a; chu inzawmna chuan rah a chhuahtîr thei a ni. A thei rah nihphung chu eng nge ni?
Ṭhan Nâna Hun Ṭha
4. Jehova’n pêng rah lo apiang “a paih” aṭang hian eng nge kan zir theih?
4 Grêp hrui tehkhin thuah chuan, a pêng rah chhuah lo apiang chu Jehova’n “a paih,” a nih loh leh a thian ṭhîn. Chu chuan eng nge min hrilh? Zirtîr zawng zawngte chuan rah an chhuah a ngai tih min hriattîr bâkah, eng dinhmun hnuaiah pawh rah an chhuah thei vek tih min hriattîr bawk a ni. Dik tak chuan, Krista zirtîrin a tih theih piah lam emaw, a tlin tâwk piah lam a tihpuitlin theih loh avânga “paih,” a nih loh leh bân mai chu Jehova hmangaihna nên a inkalh tlat ang.—Sâm 103:14; Kolossa 3:23; 1 Johana 5:3.
5. (a) Engtin nge Isua tehkhin thu chuan rah kan chhuah tam lehzual thei tih a târ lan? (b) Eng rah chi hnih nge kan ngaihtuah dâwn?
5 Grêp hrui chungchânga Isua tehkhin thu chuan kan theih chin tâwkah zirtîr kan nih anga kan rawngbâwlnaah hma sâwn theih dân kan zawng tûr a ni tih a târ lang bawk. Isua sawi dân hi han en teh: “Ka zawmpui pêng rah lo apiang a paih ṭhîn; a rah apiang a tithianghlim ṭhîn, a rah tam lehzual nân,” tih hi. (Johana 15:2) A tehkhin thu tâwp dâwn lamah Isua chuan a hnungzuitute chu ‘tam taka rah’ tûrin a ti a ni. (Châng 8) Hei hian eng nge a sawi tum? Zirtîr kan nih avângin, kan thlen chinah kan lungawiin, kan duhtâwk mai tûr a ni lo. (Thu Puan 3:14, 15, 19) Chutih ahnêkin, rah chhuah tam lehzual dân kawng kan zawng reng zâwk tûr a ni. Eng ang rah nge tam lehuzuala rah kan tum ang? Chi hnih a awm, chûngte chu (1) “thlarau rah” leh (2) Lalram rah te a ni.—Galatia 5:22, 23; Matthaia 24:14.
Kristian Mize Rah
6. Engtin nge Krista’n thlarau rah târ lante zînga hmasa ber hlutzia a sawi uar?
6 “Thlarau rah” zînga târ lan hmasak ber chu hmangaihna a ni a. Kristiante chuan grêp hrui rah ṭha tak chungchâng tehkhin thu a sawi hma lawka Isua thupêk chu an zawm avângin, Pathian thlarau thianghlim chuan anmahniah hmangaihna rah a chhuah a ni. Isua’n a tirhkohte hnênah: “Thupêk thar ka pêk che u hi, inhmangaih ula,” a ti. (Johana 13:34) Dik takin, a hringnun a tâwpna zâna a titi rêng rêngah Isua chuan a tirhkohte chu hmangaihna lantîr a ṭûlzia a hriatnawntîr fo a ni.—Johana 14:15, 21, 23, 24; 15:12, 13, 17.
7. Engtin nge tirhkoh Petera’n rah chhuah leh Krista neih ang miziate lantîr inkungkaih dân a târ lan?
7 Chu mi zâna tel ve Petera chuan Krista neih ang hmangaihna leh a kungkaih miziate chu Krista zirtîr dik takte zîngah a lang tûr a ni tih a hre chiang hle a. Kum tam tak a liam hnuah, Petera chuan Kristiante chu chutiang mizia insûmtheihna te, unau inngainatna te, leh hmangaihna chu nei tûrin a fuih a ni. Tin, chutianga tihna chuan “thatchhe lo leh rah lo lovin” min siam dâwn a ti bawk. (2 Petera 1:5-8) Kan dinhmun chu eng ang pawh ni se, thlarau rah lantîr chu kan zaa tih theih a ni. Chuvângin, hmangaihna te, ngilneihna te, thuhnuairawlhna te, leh Krista neih ang mize dangte chu lantîr lehzual i tum hrâm hrâm ang u; “chutiang kalhzâwngin Dân thupêk rêng a awm lo.” (Galatia 5:23) Ni e, i ‘rah tam lehzual’ ang u.
Lalram Rah Chu Rah Chhuakin
8. (a) Thlarau rah leh Lalram rah inzawmna eng nge ni? (b) Eng zawhnain nge kan ngaihtuah phû?
8 Thei rah hmin nalh tak leh tui ngah hmêl tak mai chuan a thing a timawi a. Nimahsela, chutiang thei rah hlutna chuan a mawina chu a khum vek a ni. Thei kung thlahpun nân thei rah chu a pawimawh bawk. Chutiang bawkin, thlarau rah chuan kan Kristian mizia cheimawi mai piah lam pawh a thlen a ni. Hmangaihna leh rinna ang chi miziate chuan thei rah chi ang mai Lalram thuchah Pathian Thua mi chu theh darh tûrin min chêttîr bawk a ni. He mi inzawm dân pawimawh tak tirhkoh Paula sawi uar dân hi lo chhinchhiah teh. Heti hian a sawi: “Chu mi rinna [thlarau rah pêng pakhat] rilru ngei puin keini pawhin kan ring ve a, chuvângin thu kan sawi bawk a,” tiin. (2 Korinth 4:13) Hetiang hian, Paula chuan, ‘faka inthawina, a hming ṭanna hmuite rah chu kan hlân fo’ tiin a sawifiah belh a ni. Chu chu kan lantîr ngai rah pahnihna chu a ni. (Hebrai 13:15) Pathian Lalram puangchhuaktu kan nih angin, kan nunah hian ‘tam taka rah’ lehzual theihna hun ṭha a awm em?
9. Rah chhuah tih hi zirtîr siam nên a inang em? Hrilhfiah rawh.
9 Dik taka kan chhân theih nân, Lalram rah siamtute chu kan hriat thiam phawt a ngai a. Rah chhuah tih awmzia chu zirtîr siam tihna a ni ti ila, a dik ang em? (Matthaia 28:19) Kan rah chhuah chu Jehova rawngbâwltu lo ni tûra baptisma chang tûra kan ṭanpuite sawina a ni em? A ni thei lo. Chutiang ni se chuan, bial rah ṭha lo taka kum tam tak chhûng Lalram thuchah rinawm taka puangchhuaktu Thuhretu duhawm takte tân a lunghnualthlâk hle ang. A ni, Lalram rah kan rah chu zirtîr tharte chauh tihna a nih chuan, chûng Thuhretu thawk rim tak takte chu Isua tehkhin thua pêng rah nei lote an ni mai dâwn zuk nia! Chuvângin, chutiang chu thil awm dân a ni lo. A nih leh, kan rawngbâwlnaa Lalram rah bul berte chu eng nge ni ta ang le?
Lalram Chi Thehdarhna Hmanga Rah Ṭha Chhuah
10. Engtin nge buh chi thehtu leh lei chi hrang hrang chungchânga Isua tehkhin thu chuan Lalram rah chu eng nge ni a, eng nge ni lo tih a târ lan?
10 Buh chi thehtu leh lei chi hrang hrang chungchânga Isua tehkhin thu chuan a chhânna min hrilh a—rah chhuah harsatna biala thu hrilte tâna chhânna duhawm tak chu. Isua chuan buh chi chu Lalram thuchah Pathian Thua hmuh hi a ni a, lei chuan mihringte entîr nei thinlung a kâwk tih a sawi a. Buh chi ṭhenkhat chu “lei ṭhaah a tla a, a lo ṭo va, . . . a rah ta a.” (Luka 8:8) Eng rah nge? Buh chi hi a lo ṭiah a, a lo puitlin hian, buh kûng ni lovin, buh chi thar a rah chhuak ṭhîn. Chutiang bawkin, Kristian pawhin, zirtîr thar kher ni lovin, Lalram chi thar a rah chhuak ṭhîn a ni.
11. Engtin nge Lalram rah chu hrilhfiah a nih theih?
11 Chuvângin, he mi chungchânga rah a tih hi zirtîr thar tihna a ni lo va, Kristian mize ṭhate tihna lah a ni hek lo. Buh chi theh chu Lalram thu a nih avângin, a rah chu a lêt tam taka pung buh chi bawk a ni tûr a ni. He mi chungchânga rah chhuah tih chu Lalram chungchâng sawi tam tihna a ni. (Matthaia 24:14) Chutianga Lalram rah chhuah—Lalram chanchin ṭha puan darh—chu eng dinhmun hnuaiah pawh kan tih theih thil a ni em? Ni chiang e! A nih chhan chu, chu tehkhin thuah vêk Isua’n a hrilhfiah a ni.
Pathian Ropui Nâna Theihtâwp Chhuahin
12. Lalram rah rah chhuah chu Kristian zawng zawngte tih theih a ni em? Sawifiah rawh.
12 Isua chuan: “Lei ṭha chunga theh chu . . . a rah ngei a, ṭhenkhat a leh za te, ṭhenkhat a leh sawmruk te, ṭhenkhat a leh sawmthum tein a pung ṭhîn,” a ti. (Matthaia 13:23) Lova buh chi theh chu, dinhmun azirin seng luh zât a inang lo mai thei a. Chutiang bawkin, chanchin ṭha thehdarhnaa kan tih theih zât chu kan dinhmun azirin a inang lo thei a, Isua ngei pawhin a hriatthiamzia chu a târ lang a ni. Ṭhenkhat chuan hun remchâng an ngah zâwk thei a, ṭhenkhat chu mi dangte aiin an hrisêlin, an chak zâwk thei bawk. Chuvângin, kan tih theih zât chu mi dangte aiin a tam zâwk emaw, a tlêm zâwk emaw pawh a ni thei; engpawh ni se, kan theih tâwka tih a nih phawt chuan Jehova chu a lâwm a ni. (Galatia 6:4) Kum upatna emaw, natna khirh tak emaw avânga thuhrilhnaah kan tel tam thei lo a nih pawhin, kan Pa mi khawngaih thei tak Jehova chuan ‘rah tam tak chhuah’ angin min ngai tho tho a ni. Engvâng nge? A chhan chu ‘kan neih chhun tak’ kan pêk vâng a ni—rilru zawng zawnga a rawng kan bâwlna chu. *—Marka 12:43, 44; Luka 10:27.
13. (a) Lalram rah kan rah chhuah “reng” a ngaih chhan bul ber chu eng nge ni? (b) Ngaithla duh an tlêmna bialah pawh rah chhuak reng tûrin engin nge min ṭanpui ang? (Phêk 21-naa bâwm en rawh.)
13 Lalram rah kan chhuah theih chin apiangah, kan tih chhan kan hriat reng chuan, ‘rah tûr leh rah reng tûra’ hma lâk chu kan duh ngei ang. (Johana 15:16) Isua chuan a chhan bul ber heti hian min hrilh a: “Ka pa chu chawimawiin a awm ṭhîn, tam taka in rah hian,” tiin. (Johana 15:8) Ni e, kan thu hrilh rawngbâwlna hian mi zawng zawng hmaah Jehova hming chu a tithianghlim a ni. (Sâm 109:30) Kum 70 chho bâwr vêl mi, Thuhretu rinawm tak pakhat Honori chuan: “Bial rah ṭha lo takah pawh, Chungnungbera ai awh chu chanvo ropui tak a ni,” tiin a sawi. Kum 1974 aṭanga Thuhretu ṭhahnemngai tak la ni reng, Claudioa chu a thawhna biala mi tlêm tê chuahvin an ngaithla duh chung pawh thu a hrilh chhunzawm zêl chhan zawh a nih chuan, Johana 4:34-a Isua ṭawngkam: “Mitîrtu duhzâwng tih leh, a hna thawh zawh tûr hi ka chaw a ni,” tih hi a la chhuak a ni. Tin, “Isua angin, Lalram thu puangchhuaktu ka nih anga ka hna ṭan mai hi ka duh tâwk lo va, tih zawh ka duh bawk a ni,” a tih zawm bawk. (Johana 17:4) A thusawi hi khawvêl pum puia Jehova Thuhretute chuan an pawmpui a ni.—A chunga “‘Chhel Taka Rah’ Theih Dân” tih chungchâng awmna bâwm en rawh.
Zirtîr leh Thu Hril Tûrin
14. (a) Eng thiltum pahnih inkawp nge Baptistu Johana leh Isua rawngbâwlna hian a neih? (b) Tûn laia Kristiante rawngbâwlna hi engtin nge i hrilhfiah ang?
14 Chanchin Ṭha ziaka chhinchhiah Lalram thu puangchuaktu hmasa ber chu Baptistu Johana hi a ni a. (Matthaia 3:1, 2; Luka 3:18) A tum hmasa ber chu ‘thu hriattîr’ a ni a, chu chu rinna thûk tak nei chung leh ‘mi zawng zawngin an rin’ beisei chungin a thawk a ni. (Johana 1:6, 7) A rin ang ngeiin, a thu hrilh ṭhenkhatte chu Krista zirtîrte an lo ni a. (Johana 1:35-37) Chuvângin, Johana chu thu hriltu leh zirtîr siamtu a ni. Isua pawh thu hriltu leh zirtîrtu a ni bawk. (Matthaia 4:23; 11:1) Chuti a nih chuan, Isua’n a hnungzuitute chu Lalram thu hrilh tûr mai ni lo va, chûng thu pawmte zirtîr lo ni tûra ṭanpui bawk tûra a ti pawh hi thil mak a ni lo. (Matthaia 28:19, 20) Tichuan, tûn laia kan rawngbâwlna pawh hi thu hrilh leh zirtîr siamna hna inkawp a ni.
15. C.E. kum zabi pakhatnaa thu hrilh rawngbâwlna mite chhân lêtna leh tûn laia mite chhân lêtnaah eng inanna nge awm?
15 C.E. kum zabi pakhatnaa Paula thu hrilh leh zirtîrna dawngte zîngah “aṭhenin a thusawi chu an ring a, a ṭhenin an ring lo va.” (Tirhkohte 28:24) Tûn laiah pawh chutiang bawk a ni. Lungchhiatthlâk takin, Lalram buh chi tam zâwk chu lei ṭha lovah a tla a. Chutichung chuan, Isua sawi lâwk angin buh chi ṭhenkhat chu lei ṭhaah a tla a, zung a kaih a, a ṭiak ta tho a ni. Dik tak chuan, khawvêl pum puiah hian kum khat chhûnga chawlhkâr khat zêlah mi 5,000 chuang chu Krista zirtîr dik tak an lo ni asin! Mi dang tam zâwkin ring lo mah sela, hêng zirtîr tharte hian “thusawi chu an ring” a ni. Engin nge Lalram thu an thinlunga pawm tûra ṭanpui? Thuhretute’n an chunga mi mal ngaihsakna an lantîr—buh chi tuh thar tuia chawm tih theih tûr—chuan kawngro a su fo a ni. (1 Korinth 3:6) Entîrna tam takte zînga pahnih chauh hi lo ngaihtuah ta ila.
Mi Mal Ngaihsakna Lantîr Hian Kawngro A Sû
16, 17. Engvângin nge kan rawngbâwlnaa kan mi tawhte chunga mi mal ngaihsakna lantîr chu a pawimawh?
16 Belgium rama Thuhretu tleirâwl pakhat Karolieni chu Lalram thuchah ngaihven lo tak nu târ lam tawh hnênah a va lênglût a. Chu nu bân chu a intuam bur avângin, Karolieni leh a ṭhiannu chuan ṭanpui an tum a; mahse, a hnial a. A hnu ni hnihah chuan, an va tlawh nawn leh a, eng nge a an zêl tih an zâwt a. “Chu chuan kawngro a su khawp mai,” Karolieni chuan a ti. “Kan ngaihsak tak zet tih a hriat chuan mak a ti lutuk a. A inah min sâwm lût a, Bible zirna kan ṭan nghâl bawk a ni,” a ti.
17 United States rama Thuhretu pakhat Sandii pawhin, a thu hrilhte chungah ngaihsakna a lantîr bawk a. Tualchhûng chanchinbua naupiang puanna târ lante chu a en a, chutah nu leh pa tharte chu Ka Bible Thawnthu Lehkhabu tih kengin a va tlawh a. * Naute nu chu ina an awm tlângpui avâng leh in lêngte hnêna an fa thar hmuhtîr chu nuam an tih tlângpui ṭhin avângin, titipui chu an awl ṭhîn. Sandii chuan: “Naute nu leh pa chu lehkha chhiarna hmanga an fa sên nêna inzawmna neih a pawimawhzia ka sawi pui a. Chutah tûn lai huna fa enkawl a hautakzia ka sawipui leh bawk a,” a ti. Chutianga a tlawh avâng chuan, tûn hnai mai khân, nu pakhat leh a fa parukte chuan Jehova rawng an bâwl ṭan tawh a ni. Kan rawngbâwlnaa mite biak ṭanna leh mi mal ngaihsakna lantîrna chuan chutiang bawk rah hlimawm tak chu a chhuah thei a ni.
18. (a) Engvângin nge ‘tam taka rah’ chu kan zaa kan tih theih thil a nih? (b) Chanchin Ṭha Johana ziaka chhinchhiah zirtîr nihna tûra thil phût pathum tlin i tumte chu engte nge ni?
18 ‘Tam taka rah reng’ nâna thil phûtte chu kan tlin ṭheuh a ni tih hriat chu a va thlamuanthlâk tak êm! Kan naupang emaw, upa emaw; kan hrisêlna a ṭha emaw, ṭha lo emaw; mite chhân lêt ṭhatna bialah kan thawk emaw, thawk lo emaw pawh ni se, kan za hian tam takin kan rah ṭheuh thei a ni. Engtin nge? A theih ang tâwka nasaa thlarau rah lantîrna hmangin leh kan theih tâwka Pathian Lalram thuchah thehdarhna hmangin. Chutih rual chuan, ‘Isua thua awm reng’ leh ‘inhmangaih tawn’ chu kan tum tlat bawk a ni. Ni e, zirtîr nihna tûra hêng thil phût pawimawh tak pathum, Chanchin Ṭha Johana ziaka chhinchhiah hi kan tlin phawt chuan, ‘[Krista] zirtîrte kan ni tak tak ang.’—Johana 8:31; 13:35.[22](w03 2/1)
[Footnote-te]
^ par. 3 Tehkhin thua grêp hrui pêngte chuan Isua tirhkohte leh Pathian vân lam Lalrama hmun chang tûrte kâwk mah se, tehkhin thu chuan tûn laia Krista hnungzuitu zawng zawngte hlâwkpui theih thutak a fûn tel a ni.—Johana 3:16; 10:16.
^ par. 12 Kum upat vâng emaw, natna vâng emawa ina inkhung tlat ngaite chuan lehkha thawn emaw, a theihna hmunah chuan telephone emaw, a nih loh leh anmahni kantute hnênah emaw thuhrilhna an nei thei a ni.
^ par. 17 Jehova Thuhretute chhuah a ni.
Ennawn Nâna Zawhnate
• Eng ang chi rah nge tam taka kan rah chhuah ngai?
• Engvângin nge ‘tam taka rah’ chu kan zaa kan tih theih thil a nih?
• Chanchin Ṭha Johana ziaka chhinchhiah zirtîr nih nâna thil phût pawimawh pathumte kan ngaihtuah tâkte kha engte nge ni?
[Zirlai Atâna Zawhnate]
[Phêk 21-naa bâwm/milem]
‘Chhel Taka Rah’ Theih Dan
MITE ngaihthlâk duh mang lohna hmuna Lalram thuchah rinawm taka hril zêl thei tûrin engin nge ṭanpui che? Heta hi a chhânna ṭangkai tak tak ṭhenkhat kan rawn târ lang e.
“Kan thawhna hmuna mite chhân lêtna chu eng ang pawh ni se, Isua ṭanpuina kan nei a ni tih hriatna chuan beiseina leh chhelna nei tûrin min ṭanpui a ni.”—Harrya, kum 72; 1946-a baptisma chang.
“2 Korinth 2:17 thu hian min tichak reng ṭhîn. Chu chuan “Pathian mithmuhin Kristaah chuan” rawng kan bâwl tih a sawi a. Rawngbâwlnaa ka tel rêng rêngin, ka ṭhian ṭha berte nêna inkawm chu ka hlimpui êm êm a ni.”—Claudioa, kum 43; 1974-a baptisma chang.
“Tlang taka sawi chuan, thu hrilh rawngbâwlna hi ka tân chuan beih fê a ngai a. Mahse, Sâm 18:19 thu: ‘Ka Pathian ṭanpui bawkin kulh bang ka zuan khûm a ni,’ tih thu dikzia hi ka tawng a ni.”—Gerarda, kum 79; 1955-a baptisma chang.
“Rawngbâwlnaa Pathian Lehkha Thu châng khat tal ka chhiar theih chuan, tuemawin a thinlung chu Bible hmanga a endik tih ka hriatna chuan lungawina min pe a ni.”—Eleanori, kum 26; 1989-a baptisma chang.
“Thusawi dân chi hrang hrang ka hmang reng a. Chi hrang hrang a tam lutuk a, ka dam chhûng pawhin ka hmang zo thei lo vang.”—Paula, kum 79; 1940-a baptisma chang.
“Mite’n min chhân lêt ṭhat loh pawhin ka la na lo. Nêlawm taka thu sawi ka tum a, mite titipui leh an thlîr dân ngaihthlâksakte ka tum ṭhîn.”—Daniela, kum 75; 1946-a baptisma chang.
“An baptisma chan chungthuah ka thu hrilhnain telna a neih ve thu min hrilhtu, Baptisma chang thar mi engemaw zât ka hmu a. Ka hriat lovin mi dangin Bible an lo zirpui a, hma sâwn tûrin an lo ṭanpui niin. Kan rawngbâwlna hi pâwlho khat hnathawh ang a ni tih hriatna chuan hlimna min pe a ni.”—Joani, kum 66; 1954-a baptisma chang.
Engin nge ‘chhel taka rah’ thei tûra ṭanpui che?—Luka 8:15
[Phêk 19-naa milem]
Isua’n a zirtîrte hnêna: ‘Tam takin rah rawh u,’ a tih hian eng a tihna nge?