‘Chak Tak Leh Huai Takin Awm Rawh!’
‘Chak Tak Leh Huai Takin Awm Rawh!’
“Huai takin awm rawh u! Keiin khawvêl ka ngam ta.”—JOHANA 16:33, NW.
1. Kanaan rama hmêlma chak takte avângin, Israelho chuan eng fuihna nge an dawn?
ISRAEL mite’n Ram Tiam luh nâna Jordan Lui an kân hma lawk khân, Mosia chuan an hnênah: “Chhel [“chak,” NW] tak leh huai takin awm ula, ṭih suh ula, anni chu hlau hek suh u; in hnêna kala chu LALPA in Pathian a ni si a,” tiin a hrilh a ni. Tin, Mosia chuan Israelte Kanaan rama hruaitu tûra thlan Josua chu kovin, huaisen taka awm tûrin a fuihnawn leh a ni. (Deuteronomy 31:6, 7) Chu mi hnuah Jehova ngei chuan Josua chu: “Chak tak leh huai takin awm rawh . . . Chak tak leh huai takin awm phawt mai rawh,” tiin a fuih leh a ni. (Josua 1:6, 7, 9) Chu fuihna pêk chu a hun hle a ni. Jordan lui râla awm an hmêlma chak takte hmachhawn tûr chuan Israelho chu an huaisen a ngai a ni.
2. Tûn laiah hian eng dinhmunah nge kan din a, eng nge kan mamawh?
2 Tûn laiah pawh, Kristian dikte hi ram tiam khawvêl thara lût mai tûr an ni a, Josua anga an huaisen a ngai a ni. (2 Petera 3:13; Thu Puan 7:14) Mahse, kan dinhmun chu Josua dinhmun nên a inang lo. Josua chuan khandaih leh feiin a bei a. Keini erawh chuan thlarau lam râl kan bei a, hriamhrei tak tak kan hmang lo thung a ni. (Isaia 2:2-4; Ephesi 6:11-17) Chu bâkah, Josua chuan Ram Tiam an luh hnuah pawh indona râpthlâk tam tak a beih a ngai bawk a ni. Mahse, keini chuan indona râpthlâk ber chu tûnah—khawvêl thar kan luh hma—hian kan bei a ni. Tûnah chuan, huaisen a ṭûlna dinhmun ṭhenkhat lo en ta i la.
Engvângin Nge Kan Beih A Ngaih?
3. Min dodâltu lian ber chungchâng eng nge Bible-in a târ lan?
3 Tirhkoh Johana chuan heti hian a ziak: “Pathian laka mi kan nih leh khawvêl pumhlûm hi mi sual thu thuin a awm tih kan hria e,” tiin. (1 Johana 5:19) Hêng thute hian Kristiante’n an rinna atâna an beih a ngaih chhan bulpui chu a târ lang a ni. Kristianin a rinawmna a vawn tlat hian, Diabol-Setana tân chuan engemaw chena tlâwmna a ni a. Chuvângin, Satana chu “sakeibaknei rûm ṭhîn” angin, Kristian rinawmte tihlau tûr leh ei tûrin a vâk vêl ruai a ni. (1 Petera 5:8) Ni e, hriak thih Kristiante leh an ṭhiante chu a do reng a ni. (Thu Puan 12:7) He indonaah hian, duh rêng vâng emaw, hre lo chung emawa a duhzâwng tipuitlingtu mihringte chu a hmang a. Setana leh a pâwl zawng zawngte dodâla ding nghet tlat tûr chuan huaisen a ngai a ni.
4. Eng vâukhânna nge Isua’n a pêk a, Kristian dikte’n eng ang mizia nge an lantîr?
4 Isua chuan Setana leh a pâwlte’n chanchin ṭha an do tlat dâwn tih a hriat avângin, a hnungzuitute chu heti hian A vaukhân a: “Hrehawm tuar tûrin an mantîr ang che u a, an tihlum ang che u; ka hming avângin hnam zawng zawng huat in ni ang,” tiin. (Matthaia 24:9) Chûng thute chu kum zabi pakhatnaah a thleng dik vek a, kan hunah pawh a thleng dik mêk a ni. Dik tak chuan, tûn laia Jehova Thuhretu ṭhenkhatte tawrh tihduhdahna chu mihring chanchina tihduhdahna râwng ber berte a ni. Mahse, Kristian dikte chuan chûng nêksâwrnate chu huaisen takin an tuar a. Anni chuan “midang ngaih dân pawisak luat a hlauhawm” tih an hria a, chu thanga awh chu an duh lo a ni.—Thufingte 29:25.
5, 6. (a) Eng ang dinhmunah nge kan huaisen ngai? (b) Engtin nge Kristian rinawmte chuan an huaisenna fiah a nih hunah an chhân lêt?
5 Tihduhdahna bâkah, huaisen a ngaih chhan dang pawh a la awm a. Ṭhenkhat tân chuan, hriat ngai loh hnêna chanchin ṭha hrilh chu chona a tling a. Ram emaw, hnam puanzâr emaw chunga rinawmna thutiam chhamtîrna hian school kal naupang ṭhenkhatte huaisenna chu a fiah a ni. Chutiang intiamna thu chhamte chu sakhaw lam kaihhnawih a nih avângin, Kristian naupangte chuan huaisen takin Pathian tilâwm zâwnga awm chu an tum tlat a, an awm dân chuan min tihlim hle a ni.
6 Tin, dodâltute’n Pathian chhiahhlawhte chungchâng thu ṭha lo an chhuah darh hunah emaw, “dâna thil tihsualna” hmanga biakna dik khuahkhirh an tum hunah emaw kan huaisen a ngai bawk. (Sâm 94:20) Entîr nân, chanchinbuah te, radio-ah te, a nih loh leh television-ah te Jehova Thuhretute chungchâng thudik ṭhenkhat hmanga thu veiherh emaw, dâwt hulhual emaw an chhuah hunah engtin nge kan awm ang? Mak kan ti tûr em ni? Ni lo ve. Chûng thilte chu kan beisei a ni. (Sâm 109:2) Tin, ‘mi mâwl chuan thu tin a rin ṭhin’ avângin, mi ṭhenkhatin dâwt leh thudik hmanga thu veiherh an chhuahte an lo ring pawh hi mak kan ti lo. (Thufingte 14:15) Mahse, Kristian rinawm nghette chuan an unaute chungchâng mi sawi an hriat apiang chu an ring mai ngai lo va, thu chhuah ṭha lote avânga an Kristian inkhâwmna ṭhulh emaw, thlawhhma rawngbâwlnaa hnufûm emaw, a nih loh leh an rinna tihnghîn emaw chu an phal lo a ni. Chutih a hnêkin, “Pathian rawngbâwltute angin . . . ropuina leh chawimawi lohnain, hming sawichhiat leh hming sawiṭhatin; [hmêlmate hmuha] tihdertu angin, mi dik tak ni siin,” an awm zâwk a ni.—2 Korinth 6:4, 8.
7. Eng ang mahni inenfiahna zawhnate nge kan inzawh theih?
7 Paula chuan Timothea hnêna a lehkha thawnah heti hian a ziak a: “Pathianin hlauhna thlarau min pe lo va, thiltihtheihna . . . thlarau min pe zâwk si a. Chutichuan kan Lalpa thu hriattîrna chu zahpui suh,” tiin. (2 Timothea 1:7, 8; Marka 8:38) Hêng thute kan chhiar hian: ‘Ka rinna ka zahpui nge ka huaisen zâwk? Ka hna thawhna hmunah (emaw, ka school-ah emaw) Jehova Thuhretu ka nihzia ka bula mite chu ka hriattîr nge thup ka tum ṭâng ṭâng zâwk? Mi dangte laka danglam nih chu ka zak nge Jehova nêna ka inlaichînna avânga danglam nih chu ka chhuang zâwk?’ tih zawhnate hi kan inzâwt thei a ni. Tupawh chanchin ṭha hrilhna zahpuina emaw, kan rinna dangdai tak zahpuina emaw nei rêng rêng chuan Jehova’n Josua a fuihna thu: “Chak tak leh huai takin awm rawh,” tih hi hre reng rawh se. Kan hnathawhpuite emaw, kan school kalpuite emaw thlîr dân chu a pawimawh lo va, Jehova leh Isua Krista thlîr dân chu a pawimawh a ni tih theihnghilh ngai suh.—Galatia 1:10.
Huaisenna Neih Theih Dân
8, 9. (a) Ṭum khat chu, engtin nge Kristian hmasate huaisenna chu fiah a nih? (b) Engtin nge Petera leh Johana chuan vauna chu an chhân lêt a, anmahni leh an unaute’n eng nge an tawn?
8 Engtin nge hêng hun khirh takte kâra rinawm nghehna vawng tlat tûra min ṭanpui thei chi huaisenna chu kan neih theih ang? Engtin nge Kristian hmasate khân huaisenna an neih? Jerusalema Puithiam hotu leh upate’n Petera leh Johana hnêna Isua hminga thu sawi tawh lo tûra an tih ṭuma thilthleng kha ngaihtuah teh. Zirtîrte chuan an thuhrilh chu an tâwp duh lo va, chutah an vau va, an chhuah leh a ni. Chutah, an unaute chu an zawm leh a, a huhovin hetiang hian an ṭawngṭai a ni: “Lalpa, an mi vauziate hi ngai teh; i bawite hi huai takin i thu hriltîr la,” tiin. (Tirhkohte 4:13-29) Chu an ṭawngṭaina chu chhâng lêtin, Jehova chuan thlarau thianghlim hmangin a tichak a, a hnua Juda hruaitute’n an sawi angin, an thu zirtîrin ‘Jerusalem khua an tikhat’ a ni.—Tirhkohte 5:28.
9 Chu mi ṭuma thilthleng chu lo chhût ngun ta ila. Zirtîrte chu Juda hruaitute’n an vau khân, chûng an vaunate avânga an thu hrilh tihtâwp chu an tum awzâwng lo. Chutih ahnêkin, an hrilh zawm zêl theih nân huaisenna dîlin an ṭawngṭai zâwk a ni. Tichuan, an ṭawngṭaina nêna inmilin an thawk a, Jehova chuan a thlarauvin a tichak a ni. An thiltawn chuan, chu mi hnu kum engemaw zâta Paula’n thu danga a ziah chu tihduhdahna tuar Kristiante tân a chhawr tlâk a ni tih a târ lang a ni. Paula chuan: “Mi tichaktuah chuan engkim ka ti thei a ni,” a ti.—Philippi 4:13.
10. Engtin nge Jeremia thiltawn chuan mi zakzumte a ṭanpui?
10 A nih leh, mi chu mi zakzum tak ni ta se. Dodâlna hnuaiah pawh huaisen takin Jehova rawng a bâwl thei ang em? Teh rêng mai! Jehova’n zâwlnei ni tûra a thlan ṭuma Jeremia chhân lêt dân kha hre reng ang che. Chu tleirâwl chuan: “Ka naupang si,” a ti a. A insit hle tih a chhân dânah a lang a ni. Mahse, Jehova chuan: “Ka naupang ti suh, ka tirhna che apiang hnênah i kal ang a, thu ka pêk che apiang i sawi tûr a ni. Anmahni avângin hlau suh la, chhan chhuak tûr chein i hnênah ka awm e,” tiin a fuih a ni. (Jeremia 1:6-10) Jeremia chuan Jehova a rinchhan tlat a; chuvângin, Jehova chakna hmangin, thuhrilh a hrehna pawh a hneh thei a, Israel rama thuhriltu huaisen hmingthang tak a ni ta hial a ni.
11. Tûn laia Kristiante chu Jeremia ang ni tûrin engin nge ṭanpui?
11 Tûn laia hriak thih Kristiante pawh hian Jeremia thuchah puan ang tho chu an puang a, “berâm dang,” “mipui tam tak” ṭanpuinain Jehova thiltumte chu huatna te, nuihzat bûrna te, leh tihduhdahna te hnuaiah pawh an puang chhuak chhunzawm zêl a ni. (Johana 10:16; Thu Puan 7:9) Jeremia hnêna Jehova thu: “Hlau suh” tih hian anmahni chu a tichak a ni. Anni chuan Pathian tirh an ni tih leh a thuchah chu an puang a ni tih an theihnghilh ngai lo.—2 Korinth 2:17.
Entawn Tlâk Huaisenna
12. Huaisenna chungchângah Isua’n eng entawn tûr ṭha chungchuang nge a siam a, engtin nge a hnungzuitute chu a fuih?
12 Mi huaisen tak Jeremia leh mi dangte entawn tûr siamte ngaihtuahna chuan huaisenna min pe thei a ni. (Sâm 77:12) Entîr nân, Isua rawngbâwlna kan bih chian chuan, Setana thlêmna a tawh lai leh Juda hruaitute dodâlna a hmachhawn laia a huaisenzia chu mak kan ti hle a ni. (Luka 4:1-3; 20:19-47) Jehova chakna a rinchhan avângin, Isua chu tihchêt rual a ni lo va, a thih hma lawk khân, a zirtîrte hnênah: “Khawvêlah hian hrehawmin in awm ṭhîn; mahse, huai takin awm rawh u, keiin khawvêl ka ngam ta,” a ti a ni. (Johana 16:33; 17:16) Isua zirtîrte pawhin a entawn tûr siam chu an zui chuan, khawvêl an ngam ve ang. (1 Johana 2:6; Thu Puan 2:7, 11, 17, 26) Mahse, an “huai” a ngai a ni.
13. Eng fuihna nge Paula’n Philippi mite a pêk?
13 Isua thih hnu kum engemaw zâtah, Paula leh Sila chu Philippi-a tân inah khung an ni a. A hnuah, Paula chuan Philippi kohhran mite chu “thlarau hmunkhata ding nghetin, rilru hmunkhata chanchin ṭha rinna thu ṭana bei tlângin, dotute eng kawngah mah hlau” lova awm tûrin a fuih a ni. He mi kawnga anmahni tihchak nân Paula chuan: “Chu [Kristiante tihduhdahna] chu anmahni [tiduhdahtute] tân boral tûr an nih hriattîrna fiah tak a ni, nangni tân erah chu chhandam tûr in nih hriattîrna fiah tak a ni zâwk e, chu pawh chu Pathian laka mi a ni. Krista avânga amah in rin chauh ni lovin, amah avânga in tuar pawh phal a ni si a,” tiin a hrilh bawk a ni.—Philippi 1:27-29.
14. Paula huaisenna chuan Rom khuaah eng rah nge a chhuah?
14 Paula’n Philippi kohhran mite hnêna lehkha thawn a ziah lai hian, tân inah a tâng leh tawh a, tûn ṭumah hi chuan Rom khuaah a tâng thung a. Mahse, mi dangte hnênah huaisen takin thu a hrilh chhunzawm zêl tho a ni. Chu chuan eng nge a rah chhuah? Heti hian a ziak: “Ka kawlbunnate hi Praitorian sipai pâwl zawng zawng zîngah leh mi dang zawng zawng hnênah chuan Krista avâng a ni tih a lang chhuak ta: Lalpaa unau tam zâwkte pawh chuan ka kawlbunte avânga lo ring tlatin, hlau lovin Pathian thu hrilh kawngah an huai nasa lehzual a ni,” tiin.—Philippi 1:13, 14.
15. Huaisen taka kan awm theih nâna min tichak thei rinna lama entawn tûr ṭha tak takte chu khawi aṭangin nge kan hmuh theih?
15 Paula entawn tûr siam chuan min tihuaisen a ni. Chutiang bawkin, tûn laia Kristiante, mi mal rorêlna ram emaw, sakhaw hruaitute awpna ram emawa tihduhdahna chhel taka tuar chhuaktute entawn tûr siam ṭha tak takte pawhin min tihuaisen bawk. Chûng mite thiltawn tam tak chu Vênnainsâng leh Awake! magazine leh Jehova Thuhretute Yearbook-ah târ lan a ni tawh hlawm a. Chûng chanchinte i chhiar hian, anni chu keimahni ang bawka mi narân an ni tih hria la; mahse, dinhmun harsa taka an din chuan, Jehova’n thiltihtheihna nasa tak a pe a, an tuar chhuak thei a ni. Chuvângin, chutiang dinhmuna din a ngaih phawt chuan, thiltihtheihna min pe ve dâwn tih kan ring tlat thei a ni.
Kan Huaisennain Jehova Lâwmna leh Chawimawina A Thlen
16, 17. Engtin nge tûn laiah huaisenna kan neih theih?
16 Mi chu thutak leh felna atâna a dinngheh tlat chuan, chu chu huaisenna a ni. Mi chu chhûngrila hlauhna nei chunga a din ngheh tlat phei chuan, mi huaisen a ni lehzual a ni. Dik tak chuan, Kristian tupawh hi, Jehova duhzâwng tih a duh tak zet a, rinawm reng a duh tak zet a, Pathiana a innghah reng a, amah ang mi chhiarsên lohte chu Jehova’n a lo tichak tawh ṭhîn tih a hriat reng phawt chuan, a huaisen thei a ni. Chu bâkah, kan huaisenna chuan Jehova a tilâwm tih leh a chawimawi tih kan hriat chuan, huaisen chu kan tum zual sauh vang. Amah kan hmangaihna a nasat êm avângin, nuihsawh emaw, chu aia nasa emaw pawh tuar tûrin kan inpeih reng a ni.—1 Johana 2:5; 4:18.
17 Kan rinna avânga kan tawrh hian, thil dik lo engemaw kan tih vâng a ni lo tih hi hre reng ang che. (1 Petera 3:17) Chutiang ni lovin, Jehova lal chungnunna kan thlâwp avâng te, thil ṭha kan tih avâng te, leh khawvêla mi kan nih loh avâng tea tuar kan ni zâwk a ni. He mi chungchângah hian, tirhkoh Petera chuan heti hian a sawi: “Thil in tih ṭhat a, in tuarin chhel taka in tuar chuan chu chu Pathian lâwmzâwng a ni,” a ti a. Tin, “Pathian remtihzâwng anga tuarte chuan thil ṭha tiin an thlaraute chu Siamtu rinawm tak hnênah kawltîr rawh se,” a ti bawk a ni. (1 Petera 2:20; 4:19) Ni e, kan rinna chuan hmangaihnaa khat kan Pathian, Jehova a tilâwm a, amah a chawimawi a ni. Huaisenna tûr chhan ṭha a va ni êm!
Thuneitute Kan Biakin
18, 19. Rorêltu hmaa huaisen taka kan din hian, a nihna takah chuan eng thu nge anmahni kan hrilh?
18 Isua chuan a hnungzuitute chu tihduhdah an nih tûr thu a hrilh a; tin, hetiang hian a hrilh bawk: “[Mite chuan] rorêltuhote an mantîr dâwn si che u a, inkhâwmna inahte an vua ang che u a; a ni, keimah avângin hotute leh lalte hmaah anmahni leh Jentailte hriattîrna tûrin an la hruai ang che u,” tiin. (Matthaia 10:17, 18) Puhna dik lo avânga lal leh hotute hmaa kal chu huaisen a ngai hle ang. Mahse, chûng hunte chu huaisen taka an hnêna thu hriattîr nâna kan hman chuan, dinhmun harsa tak chu kan hmang ṭangkai tihna a ni ang. Dik tak chuan, kan ro min rêlsaktute hnênah chuan, Jehova thu Sâm 2-naa chhinchhiah: “Aw lalte u, fing tawh ula: leia rorêltute u, thununin awm tawh rawh u. Ṭih chungin LALPA rawng bâwl . . . rawh u,” tih hi kan hrilh tihna a ni. (Sâm 2:10, 11) Jehova Thuhretute dik lo taka court-a khin an nih hian, rorêltute chuan zalên taka Pathian biak theihna min pe fo va, kan lâwm hle. Mahse, rorêltu ṭhenkhat chu dodâltute’n an thunun a. Chutiang mite hnênah Pathian Thu chuan: “Thununin awm tawh rawh u,” a ti a ni.
19 Rorêltute chuan dân chungnung ber chu Pathian Jehova dân a ni tih an hre tûr a ni a. Rorêltute pawh tiamin, mihring zawng zawng hian Pathian Jehova leh Isua Krista laka chanchin sawi kan ba vek tih hi an hre tûr a ni. (Rom 14:10) Kan tân chuan, mihring rorêltute kut aṭangin dikna kan dawng emaw, dawng lo emaw pawh ni se, Jehova’n min ṭanpui tlat avângin huaisen nachhan tûr kan nei a ni. Bible chuan: “Amaha an rinna nghat zawng zawngte chu an eng a thâwl e,” a ti.—Sâm 2:12.
20. Tihduhdahna leh sawichhiatna kan tawrh hunah engvângin nge kan hlim theih?
20 Tlâng chunga a Thusawiah Isua chuan: “Miin keimah avânga an hau che u a, an tihduhdah che u a, dâwta sual tinrênga an hêk hunah che u, in eng a la thâwl ang. Lâwm ulangin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha,” tiin a sawi. (Matthaia 5:11, 12) Tihduhdahna hrim hrim chu thil tawrh nuam a ni lo; mahse, dâwta insawichhiatna pawh tiama tihduhdahna tuar chung pawha kan din ngheh tlatna chu a ni, kan hlim chhan tûr chu ni. Jehova kan tilâwm a, lâwmman kan la dawng dâwn si a. Kan huaisenna chuan rinna dik tak kan nei tih a târ lang a, Pathian pawm kan nihzia min hriattîr bawk a ni. Ni e, Jehova rinna pumhlûm kan nei tih a târ lang a ni. Chutiang rinna chu a dawtleha thuziakin a târ lan tûr angin, Kristiante tân a pawimawh hle a ni. (w03 3/1)
Eng Nge I Zir?
• Eng dinhmun hnuaiah nge tûn laiah huaisen ngai?
• Engtin nge huaisenna hi kan neih theih?
• Huaisenna lama entawn tlâk ṭhenkhatte chu tute nge ni?
• Engvângin nge huaisen taka chêt kan duh?
[Zirlai Atâna Zawhnate]
[Phêk 9-naa milemte]
Germany rama Simone Arnold-i (tûna Liebster-i ni ta), Malawi rama Widdas Madona-i, leh Ukraine rama Lydia-i leh Oleksii Kurdas-a te chuan huaisenna an lantîr a, mi sual an do
[Phêk 10-naa milemte]
Chanchin Ṭha chu kan zahpui lo
[Phêk 11-naa milem]
Tân in chhûnga Paula huaisenna chuan chanchin ṭha a theh darh
[Phêk 12-naa milem]
Rorêltu hmaa kan Pathian Thu ṭanchhan dinhmunte huaisen taka kan hrilhfiah hian, thuchah pawimawh tak kan hrilh a ni