Jehova Chuan “A Ngaidam Nasa” Ṭhîn

NGAIHDAMNA chu mi tinatu ngaihhnathiamna a ni a; min tihnat avânga amah huatna neih lohna leh phuba lâk tumna neih lohna a ni.

Israel hnam hnêna Pathian dân pêkah chuan, Pathian emaw, a mihringpui emaw laka thil sual titu sualna ngaihdam ni tûr chuan, Dânin a hrilh anga thil dik lo chu tihfel phawt a, chutah thisen inthâwina Jehova hnêna hlan tûr a ni. (Leviticus 5:​5–6:⁠7) Chuvângin, Paula chuan hetiang hian a thu bul a sawi a ni: “Dân thu zawngin engkim thaw mai hi thisena tihthianghlimin a awm ṭhîn a, thisen chhuah lohvin ngaihdamna rêng a awm lo,” tiin. (Hebrai 9:22) Mahse, ran thisena inthawina chuan sualna chu a la bo tak tak thei lo va, mi chu chhia leh ṭha hriatna thiang hlak a pe thei lo a ni. (Hebrai 10:​1-4; 9:​9, 13, 14) Chu mi ang lo takin, thuthlung thar lo awm tûra hrilh lâwk chuan Isua Krista tlanna inthâwina ṭanchhanin ngaihdamna dik tak a pe thei a ni. (Jeremia 31:​33, 34; Matthaia 26:28; 1 Korinth 11:25; Ephesi 1:⁠7) Leia a awm lai pawh khân, Isua chuan zeng a tihdamnaah sual ngaidam tûra thuneihna a neihzia a lantîr a ni.​—⁠Matthaia 9:​2-7.

Fapa tlân bo chungchâng leh bâwi pakhat lal berin tallent 10,000 (60,000,000 denarii, a nih loh leh $40,000,000 vêl) a ngaihdam laia a bâwihpuiin duli 100 a bat  ngaidam duh lo tehkhin thu Isua sawiin a târ lan angin, Jehova chuan a ngaihdam “nasa” a ni. (Isaia 55:7; Luka 15:11-32; Matthaia 18:23-35) Mahse, Jehova chuan thiltih sual tak chu hrem lohva a chhuah ngai loh avângin, mi a ngaihdamna chu rilrua veirûkna thil vâng a ni mai lo. (Sâm 99:⁠8) Josua chuan Jehova’n kalpêngte chu a ngaihdam mai mai dâwn lo tih Israelte a hrilh a ni.​—⁠Josua 24:​19, 20; Isaia 2:6-9 nên khaikhin rawh.

Peathian chuan a ngaihdamna zawn dân leh dawn dân kawngah phût a nei a. Thil tisualtu chuan thil a tisual a, Pathian laka thil tisual a ni tih a pawm tûr a ni a, a inpuang vêk tûr a ni a, a thil sualtih avâng chuan inchhîrna nasa tak a nei tûr a ni a, chutiang nun kawng emaw, chîn dân emaw chu kalsan a tum nghet tlat tûr a ni bawk. (Sâm 32:5; 51:4; 1 Johana 1:​8, 9; 2 Korinth 7:8-11) A thil tih sual emaw, tihchhiat emaw chu siam ṭha tûrin a tihtheih apiang a ti tûr a ni. (Matthaia 5:​23, 24) Tichuan, Pathian hnênah ṭawngṭaiin, Krista tlanna inthawina zârah ngaihdamna a dîl tûr a ni.​—⁠Ephesi 1:⁠7.

Chu bâkah, eng anga tam pawh ni se, mi mal intihnatna chungchânga mi dangte ngaihdamna pawh chu Kristiante tih atâna phût a ni. (Luka 17:​3, 4; Ephesi 4:32; Kolossa 3:13) Pathian ngaihdamna chu mi dangte ngaidam duh lotu tân beisei theih a ni lo. (Matthaia 6:​14, 15) Nimahsela, thil sual khûnkhân tak avângin “mi sual” chu kohhran aṭanga hnawhchhuah hial ngai mah se, chu mi chu a inchhir tak zet chuan ngaihdam hun a awm leh thei a ni. Chutih hunah chuan kohhrana mi zawng zawngin amah an hmangaihna chu an lantîr thei a ni. (1 Korinth 5:13; 2 Korinth 2:​6-11) Nimahsela, Kristiante chu inchhîrna rêng nei lo va, duhthu rênga thil sual tite ngaihdam tûra phût an ni lo. Chutiang mite chu Pathian hmêlmate an lo ni.​—⁠Hebrai 10:​26-31; Sâm 139:​21, 22.

Mi dangte sual ngaidam tûra Pathian hnêna ṭawngṭai chu a inâwm a, kohhran mi zawng zawngte sual ngaidam tûra ṭawngṭai pawh a inâwm a ni. Mosia pawh Israel hnam pum tân a ṭawngṭai a, a hnam puma an sualna puangin, ngaihdamna a dîlsak a, Pathianin a ngaihthlâksak a ni. (Number 14:​19, 20) Solomona pawh, biak in a hlan ṭumin Jehova chuan a mite an lo sual hunah leh an kawng sualte kalsana a lam an lo hawi leh huna lo ngaidam tûrin a ṭawngṭai bawk a ni. (1 Lalte 8:​30, 33-40, 46-52) Ezra chuan Juda kîr lehte aiawhin vântlâng hmaah an sual a puang a. Tih tak zeta a ṭawngṭaina leh a fuihna avângin mite chuan Jehova ngaihdamna dawn nân hma an la a ni. (Ezra 9:​13–10:​4, 10-19, 44) Jakoba pawhin thlarau lama bawrhsâwmte chu a chunga ṭawngṭai tûra kohhran upa ko tûrin a fuih a, “thil a lo tihsual tawh chuan ngaihdamsak a ni ang,” a ti. (Jakoba 5:​14-16) Mahse, “thihna khawp sual a awm a,” chu chu thlarau thianghlim chunga sual, ngaihdamna awm lo duhthu rênga sual tih tlat hi a ni. Chutiang zâwnga sual titute tân chuan Kristian tumah an ṭawngṭai tûr a ni lo.​—⁠1 Johana 5:16; Matthaia 12:31; Hebrai 10:​26, 27. (w03 3/1)