Lâwmman Dawng Tûrin Insûmtheihna Nei Rawh!
Lâwmman Dawng Tûrin Insûmtheihna Nei Rawh!
“Intihsiaknaahte chuan a bei ṭâlh ṭâlh apiang chu engkimah an insûm ṭhîn.”—1 KORINTH 9:25.
1. Ephesi 4:22-24 nêna inremin, engtin nge mi maktaduai tam takte chuan Jehova hnênah aw an tih?
JEHOVA Thuhretute zînga pakhat anga baptisma chang tawh i nih chuan, chatuan nunna lâwmman nei tûrin intihsiaknaa tel i duhzia vântlâng hmaah i hriattîr tawh tihna a ni a. Jehova duhzâwng ti tûrin aw i ti a ni. Jehova hnêna inpumpêkna kan neih hmain, kan zînga tam tak chuan kan inpumpêkna chu a tak a, Pathian pawm tlâk a nih theih nân inthlâkthlengna lian tham tak tak kan nei a ni. Paula’n Kristiante a fuihna: “In hmân lai awm dân kawnga mihring hlui, bumna châkna anga chhe deuh deuh kha hlîp thla ula, . . . mihring thar, thutak felna leh thianghlimna Pathian anga siam khân inthuam bawk ula,” tih hi an zui a ni. (Ephesi 4:22-24) Thu danga sawi chuan, Pathian hnêna inpumpêkna kan neih hmain, kan hmân lai nun kawng pawm tlâk loh chu kan hnâwl phawt a ngai a ni.
2, 3. Engtin nge 1 Korinth 6:9-12 chuan Pathian pawm tlâk ni tûra inthlâkthlengna chi hnih neih a ngaihzia a târ lan?
2 Jehova Thuhretu lo ni tûrte’n an hlih thlâk tûr mihring hluite chu Pathian Thuin tlang takin a dem a ni a. Chûngte zînga ṭhenkhat chu Paula’n Korinth mite hnêna a lehkha thawnah heti hian a telh a ni: “Inngaih hmangte emaw, milem betute emaw, uirête emaw, mi hurte emaw, mawngkawhurte emaw, rûk hmangte emaw, mi duhâmte emaw, zu ruih hmangte emaw, mi hau hmangte emaw, hlêprute emawin Pathian ram an luah lo vang,” tiin. Chutah kum zabi pakhatnaa Kristiante chu a ṭul angin an inthlâk danglam a ni tih heti hian a târ lang zawm a: “Nangni ṭhenkhat chutiang mi in nih ṭhin kha,” tiin. Hetah hian in ni a ti lova, in nih ṭhin kha a tih hi chhinchhiah ang che.—1 Korinth 6:9-11.
3 Paula chuan inthlâkthlengna dang pawh a ṭûl thu a râwn a, hetiang hian a sawi: “Thil engkim tih ka tân a thiang a, nimahsela thil engkim tih a ṭha kher lo,” tiin. (1 Korinth 6:12) Chuvângin, tûn laia Jehova Thuhretu nih duh tam takte chuan thil tih thiang pawh ni se, tih atâna ṭha kher lo emaw, sâwtna nei lêm lote emaw tih loh a ṭûlzia an hmu a ni. Chûng thilte chu hun khawhralna mai mai leh thil pawimawh zâwk kan ûmna tibuai thei thil a ni thei a ni.
4. Eng thilah nge Kristian inpumpêkte chuan Paula ngaih dân an ṭâwmpui?
4 Pathian hnêna inpumpêk chu thil tam tak chân ngai ang hrima hreh chung chunga neih a ni lo va, inhuam taka neih a ni. Kristian inpumpêkte chuan Krista hnungzuitu a lo nih hnua Paula sawi: “Isua . . . avângin thil zawng zawng ka chân ta vek a, chûng chu hnâwmhneah lek ka ngai a, Krista ka hmuh theihna . . . tûrin,” tih thu hi an pawmpui a ni. (Philippi 3:8, 9) Paula chuan Pathian hnêna aw a tih zêl theih nân, hlutna nei lêm lo thilte chu lâwm takin a hnâwl a ni.
5. Eng ang intlânsiaknaah nge Paula chu hlawhtling taka a tel a, engtin nge amah ang bawk kan nih ve theih ang?
5 Paula chuan thlarau lam intlânsiaknaah insûmtheihna a lantîr a, a tâwp a tâwpah chuan: “Intihsiakna ṭha chu ka bei zo tawh a, ka tlânsiakna kawng ka hlen tawh a, rinna chu ka vawng reng tawh a ni; tûnah chuan felna lallukhum chu ka tân dahin a awm tawh a, chu chu Lalpa, ngaihtuahtu fel tak chuan chu mi ni-ah chuan mi pe ang; ka hnênah chauh ni lovin, a 2 Timothea 4:7, 8) Keini pawhin, engtikah emaw chuan hetiang hian kan sawi ve thei ang em? Bânsan lova kan Kristian intlânsiaknaah rinna nêna insûmtheihna kan lantîr a, a tâwp thlenga kan tlân phawt chuan kan sawi ve thei ngei ang.
inlârna ngai apiangte hnênah pawh,” tiin a sawi thei a ni. (Thil Ṭha Ti Tûrin Insûmtheihna A Ngai
6. Insûmtheihna chu eng nge ni a, eng kawng chi hnihah nge chu chu kan lantîr ang?
6 Bible-a “insûmtheihna” tia lehlin Hebrai leh Grik thu mal hi a nihna takah chuan, miin ama taksa chungah thuneihna emaw, thununna emaw a nei tihna a ni a. Thil ṭha lo ti lo tûra insûm tih ngaih dân a pe a ni. Mahse, kan taksate hi thil ṭha ti tûra hmang tûr pawhin insûmtheihna engemaw chen kan neih a ngai tih a chiang hle bawk. Mihring ṭha famkim lote chuan thil sual tih châkna an nei a, chuvângin thil chi hnih buan tûr kan nei a ni. (Thuhriltu 7:29; 8:11) Thil ṭha lo kan pumpelh rual rualin, thil ṭha ti tûrin ṭan kan la bawk tûr a ni. A nihna takah chuan, thil ṭha ti tûra kan taksa thunun chu thil ṭha lo pumpelh dân kawng ṭha ber pakhat a ni.
7. (a) Eng atân nge Davida anga kan ṭawngṭai ang? (b) Eng ngaihtuahnain nge insûmtheihna lantîr lehzual tûrin min ṭanpui ang?
7 Chiang takin, Pathian hnêna kan inpumpêkna thutiam hlen chhuak tûr chuan insûmtheihna neih a ṭûl a. Davida tih anga kan ṭawngṭai a ngai a ni: “Aw Pathian, keimahah hian thinlung thianghlim tak siam la; ka kawchhûngah hian thlarau dik tak siam thar leh ang che,” tiin. (Sâm 51:10) Nungchang lama dik lo emaw, tisa lama min tichak lo thei thilte emaw pumpelh a hlâwkzia chu kan ngaihtuah thei a. Chutiang pumpelh lohna avânga thil ṭha lo lo thleng thei chi: hrisêl lohnate, inlaichînna ṭhat lohnate, leh a hun lova thihna hialte pawh ngaihtuah ang che. A lehlamah thung chuan, Jehova’n nunna kawng min kawhhmuh zawh a hlâwkna tam takte han chhût leh ang che. Mahse, a nihna tak thlîrin, kan thinlung hi bumhmang a ni tih hi kan theihnghilh ngai tûr a ni lo. (Jeremia 17:9) Jehova tehnate zawm a pawimawhzia ngainêp tûra kan thinlung thlêmnate chu do kan tum tlat tûr a ni.
8. Thiltawnte’n eng thil nihphung dik tak nge min zirtîr? Entîrna pe rawh.
8 Kan zînga a tam zâwkin tisaa peih lohna chuan duhna rilru ṭhahnemngaihna chu a tikiam fo tih kan thiltawn aṭangin kan hria a. Entîr nân, Lalram thuhrilh chungchâng lo en ta ila. Jehova chuan he nun pe thei rawngbâwlnaa tel tûra mihringte duhna chu a lâwm êm êm a ni. (Sâm 110:3; Matthaia 24:14) Mahse, kan zînga a tam zâwk tân hian, mipui hmaa thuhrilh dân zir chu thil awlsam a ni lo. Chutianga kan tih theih nân, kawng awlsam ber zawh mai lovin kan taksa kan thunun a, kan “tichhel a,” kan ‘thuhnuaia kan dah’ a ngai a—tûn thleng pawhin chutianga kan la tih cheu a ngai mai thei a ni.—1 Korinth 9:16, 27; 1 Thessalonika 2:2.
“Engkimah”
9, 10. ‘Engkima insûmtheihna’ tihah chuan eng nge tel?
9 Bible-in ‘engkima insûmtheihna’ lantîr tûra min fuihna hian, thinchhe lo tûra insûm leh nungchang bawlhhlawh laka inthiarfihlîm mai aia tam a huam tih a târ lang a. Hêng kawngah hian kan insûmthei kan ti mai thei a; kan thei tak tak a nih chuan, kan lâwm hle tûr a ni. Mahse, insûmtheihna lantîr a ṭûlzia lang chiang êm êm lo nun kawng dangahte hian eng nge kan an ve thung? Entîr nân, nun phung sân deuhna hmun, ram hausa taka chêng lo ni ta ila. Ṭûl lo taka sum khawh ral loh hi a finthlâk lâwng maw? Nu leh pate chuan an fate chu lei tûr a awm vâng mai emaw, an duhzâwng a nih vâng mai emaw, a nih loh leh an neihin a tlin vâng mai emawa thil hmuh apiang lei lo tûrin an zirtîr tûr a ni. Mahse, chutiang zirtîrnain kawngro su tûr chuan, nu leh pate’n entawn tûr ṭha an siam tûr a ni.—Luka 10:38-42.
10 Thil nei vek kher lo va khawsak dân zir chuan kan tum ruhna a tichak thei a. Kan thil neih chhunte kan hlutna a tipung thei a; tin, an duh rêng vâng ni lo va, a ṭûl avânga nei lo chunga thil engemaw titute chu min khawngaihtîr lehzual thei a ni. Ni e, tluang mâwl taka nun chu khawvêl rilru put hmang lâr tak “mahni chungah ṭha rawh” tih emaw, “thil ṭha ber i phu” tih emaw nên chuan a inkalh tlat a ni. Thil fakmawina khawvêl chuan lungawina neih nghâl duhna a awmtîr a; mahse, mahni hlâwkna atân liau liauva ti a ni. He dinhmun hian insûmtheihna lantîr kan tumna chu a titlahniam thei a ni. Europe ram hausa tak aṭanga chhuak chanchinbu pakhat chuan, tûn hnai mai khân heti hian a sawi a: “Rilru put hmang dik lo thunun chu rethei leh hrehawm taka awmte tân mah a ngaih chuan, tûn lai ram hausa, khawizû leh hnutetui luanna rama chêngte tân phei chuan a va ngai nasa lehzual dâwn em!” tiin.
11. Engvângin nge thil nei vek kher lo va khawsak dân zir chu a ṭangkai a; mahse, chu chu engin nge tiharsa?
11 Kan thil duh leh kan thil mamawh thliar hran harsa kan tih chuan, âtthlâk taka thil ti lo tûra hma lâk chu a ṭangkai mai thei a ni. Entîr nân, khuahkhirh lova sum khawhral duhna do tûrin a bâa thil lei lo tûr, a nih loh leh kan bazârin pawisa hman khawp lek ken chu kan duh mai thei a ni. Paula’n “Pathian ngaihsakna hi lungawina tel zawngin hlâwkna nasa tak a ni rêng a ni” a tih hi hre chhuak ang che. Heti hian a chhût a ni: “Khawvêlah hian engmah kan luhpui si lo va, engmah kan chhuahpui thei bawk hek lo. Nimahsela ei tûr leh silh tûr 1 Timothea 6:6-8) Kan lungawi em? Eng thil pawh ni se, hlimhlawp bâwlna thil chuangtlaite tel lova tluangmâwl taka nung tûr chuan, tum ruhna leh insûmtheihna a ngai a. Mahse, thil zir manhla tak a ni.
neiin chûngah chuan kan lungawi ang,” tiin. (12, 13. (a) Eng kawngin nge Kristian inkhâwmahte chuan insûmtheihna a tel? (b) Insûmtheihna kan lantîr a ngaihna kawng ṭhenkhat dangte chu eng nge ni?
12 Kristian inkhâwmte, assembly-te, leh inkhâwmpuitea tel tûr pawhin, insûmtheihna engemaw tak lantîr a ngai bawk. Entîr nân, insûmtheihna chu inkhâwm laia kan ngaihtuahna a vahkual vêl loh nân a ṭûl a ni. (Thufingte 1:5) Thusawitu thusawi ngun taka ngaihthlâk aia kan bula ṭhute beng bula hrilhrua kan tihbuai loh nân, insûmtheihna a ngai bawk. A hun taka kan thlen theih nâna kan hun duan insiamrem tûrin insûmtheihna a ngai bawk a. Tin, inkhâwmna atâna inpuahchah nâna hun insiam leh inkhâwmnaa chhân nân, insûmtheihna a ngai thei bawk.
13 Thil tê thama insûmtheihna lantîrna chuan thil lian tham zâwka insûmthei tûrin min ṭanpui a. (Luka 16:10) Chuvângin, Pathian Thu leh Bible thu leh hla chhuahte chhiar ziah a, zirna neia chûng kan zirte chu chhût ngun tûra kan inthunun chu a va ṭha êm! Hna ṭha lote, ṭhian ṭha lote, rilru put hmang ṭha lote, leh mi mal thil chîn ṭha lote laka inthunun, a nih loh leh Pathian rawngbâwlna atâna hman theih hun hlu takte ru bo thei thiltihte hnâwl tûra inthunun chu a va finthlâk êm! Jehova rawngbâwlnaa buai reng chu thlarau lam paradis, khawvêl pum huap Jehova kohhrante zîng ata min la bo thei thilte laka invênhimna ṭha tak a ni.
Insûmtheihna Hmanga Puitlin
14. (a) Engtin nge naupangte’n insûmtheihna lantîr dân an zir ang? (b) Naupangte’n an naupan têt aṭanga insûmtheihna lantîr dân an zir hian eng hlâwkna nge lo awm thei?
14 Naute piangtîr chuan insûmtheihna a nei lo va. Naupang nunphung lama mi thiamte lehkha chhuah chuan: “Insûmtheihna chu amaha lo awm emaw, thâwklehkhata neih theih emaw a ni lo. Nausênte leh naupangte chuan insûmtheihna zir ṭan tûrin nu leh pate kaihhruaina leh ṭanpuina an mamawh a. . . . Nu leh pate ṭanpuinain, insûmtheihna chu an school kal chhûng zawngin an nei chho telh telh ṭhîn a ni,” tiin a sawi. Naupang kum li mite chanchin zirna chuan insûmtheihna lantîr dân zir naupangte chu “tleirâwl a ṭûl anga insiamrem thei mi, mi lâr, mi huaisen, mahni inrintâwkna nei leh innghahna tlâk a rawn ni chho tlângpui ṭhîn,” tih a târ lang a. Insûmtheihna zir ṭan lote chu “mi khawhar thei, thil ning hma leh luhlul tak an ni chho duh bîk a. Lungkhamna hnuaiah an tlâwmin, harsatna an hmachhawn thei lo.” Chiang takin, a ṭûl anga insiamrem thei puitling rawn ni chho tûr chuan, naupang chuan insûmtheihna lantîr dân a zir tûr a ni.
15. Insûmtheihna tlâkchhamna chuan eng nge a lantîr a, chu mi nêna inkalh takin Bible-ah eng thiltum nge târ lan a nih?
15 Chutiang bawkin, Kristian puitling kan lo nih theih nân, insûmtheihna lantîr dân kan zir tûr a ni. Insûmtheihna tlâkchhamna chuan thlarau lamah kan la naupang tih a târ lang. Bible chuan ‘rilru lama puitling’ tûrin min fuih a. (1 Korinth 14:20) Kan tum ber chu “rinna leh Pathian Fapa hriatna kawngah chuan thu khat vua a, puitling a, Krista famkimna lenzia tluka kan zaa kan lo awm” hi a ni. Engvâng nge? “Chutichuan dik lohna ngamthlêmna angin, fing vervêka mihring bum chawpin, zirtîrna thli tinrênga lehlam lehlama vawrh leh len len naupang kan ni tawh lo vang.” (Ephesi 4:13, 14) Chiang takin, insûmtheihna lantîr dân zir chu kan thlarau lam tân a pawimawh a ni.
Insûmtheihna Neiin
16. Engtin nge Jehova’n ṭanpuina min pêk?
16 Insûmtheihna nei tûr chuan Pathian ṭanpuina kan mamawh a, chu chu hmuh theihin a awm bawk. Dârthlalang fiah tak ang Pathian Thu chuan insiam ṭhat kan ngaihna lai min hmuhtîr a, kan insiam ṭhat dân tûr chungchângah pawh zilhna min pe bawk a ni. (Jakoba 1:22-25) Hmangaihna nei kan unaute lah min ṭanpui tûrin an inpeih reng bawk a. Kristian upate chuan mi mal ṭanpuina an pêkin hriatthiamna an lantîr a ni. Amah Jehova ngei chuan ṭawngṭaia kan dîl phawt chuan, a thlarau thianghlim chu phal takin min pe ṭhîn. (Luka 11:13; Rom 8:26) Chuvângin, hêng thilte hi lâwm takin i hmang ang u. A chunga rawtna târ lante hi a ṭangkai mai thei a ni.
17. Thufingte 24:16-in eng fuihna nge min pêk?
17 Jehova chuan amah tihlâwm tuma kan beihnate a hlut hle tih hriat chu a va thlamuanawm êm! Chu chuan insûmtheihna lantîr lehzual tûrin min chêttîr tûr a ni. Vawi tam tak hlawhchham mah ila kan tlâwm ngai tûr a ni lo. “Mi fel chu vawi sarih tlu mah sela, a tho leh zêl ṭhîn.” (Thufingte 24:16) Kan hlawhtlin apiangin, lâwmna tûr chhan kan nei a ni. Jehova pawh kan chungah a lâwm tih kan chiang thei bawk. Thuhretu pakhat chuan Jehova hnêna a inpumpêk hmain, chawlhkâr khat chhûnga mei zûk loh a tumna a hlawhtlin apiangin, insûmtheihna zâra a neih sum chuan thil ṭangkai engemaw leiin lâwmman a inpe ṭhîn tih a sawi a ni.
18. (a) Insûmtheihna neih tuma kan beihnaah eng nge tel? (b) Eng tiamna nge Jehova’n min pêk?
18 Thil dang zawng bâkah, insûmtheihnaah chuan rilru leh thil veite a tel tih kan hre reng tûr a ni. Chu chu Isua thu: “Tupawh ngaih châka hmeichhe melh apiang chu, a thinlungah a uirê tawh reng a ni,” tih aṭangin kan hre thei a ni. (Matthaia 5:28; Jakoba 1:14, 15) A rilru leh rilru vei zâwng thunun thei mi chuan a taksa pum pui thunun chu awlsam a ti sawt ang. Chuvângin, thil sual tih pumpelh tum ringawt ni lovin, a ngaiha ngaihtuah loh kan tumna pawh i tichak ang u. Ngaihtuahna ṭha lo kan neih ṭan chuan, kan hnâwl nghâl vat tûr a ni. Tih tak zeta Isua ngaihtuah tlatna hmangin, thlêmna kan tlânchhiatsan thei a ni. (1 Timothea 6:11; 2 Timothea 2:22; Hebrai 4:15, 16) Chutianga kan theihtâwpa kan tih chuan, Sâm 55:22-a fuihna: “I rit phurh chu LALPA chungah nghat la, tichuan anin a tichak ang che. Mi fel chu engtikah mah tihnghîn a phal lo vang,” tih hi kan zui a ni ang. (w03 10/15)
I Hre Chhuak Em?
• Eng kawng hnihin nge insûmtheihna kan lantîr ang?
• ‘Engkima insûmtheihna’ lantîr chu eng tihna nge?
• Kan zirho chhûng zawng hian, insûmtheihna neih theih dân rawtna eng nge i lo chhinchhiah bîk?
• Insûmtheihna chu khawi aṭanga inṭan nge?
[Zirlai Atâna Zawhnate]
[Phêk 31-naa bâwm/milem]
Insûmtheihna Tihpun Dân
• Thil tê thamah pawh lantîr rawh
• Tûn leh nakin atâna hlâwkna a thlen theihte ngaihtuah rawh
• Pathianin a khap thilte chu a duhzâwngtein thlâkthleng rawh
• Ngaih dân ṭha lote chu hnâwl vat rawh
• I rilru chu mi siam ṭha thei thlarau lam thilin tikhat rawh
• Kristianpui mi puitlingte pêk theih ṭanpuina chu pawm rawh
• Thlêmna ni thei dinhmunte chu pumpelh rawh
• Thlêmna i tawhin Pathian ṭanpuina dîlin ṭawngṭai rawh
[Phêk 29-naa milemte]
Insûmtheihna chuan thil ṭha ti tûrin min chêttîr