Pathian Inrawlhna—Eng Nge Kan Beisei Theih?
Pathian Inrawlhna—Eng Nge Kan Beisei Theih?
KUM 39 mi Juda Lal Hezekia chu B.C.E. kum zabi pariatnaah khân thih ngamin a na vak mai a. Mangang êm êmin, Hezekia chuan amah tidam tûrin Pathian a ngên chiam a ni. Pathian chuan a zâwlnei hmangin heti hian a chhâng a ni: “I ṭawngṭaina ka hria a, i mittuite pawh ka hmu a: ngai teh, i dam chhûng nîte hi kum sâwm leh kum ngain ka tisei ang,” tiin.—Isaia 38:1-5.
Engvângin nge chu mi ṭumah kher chuan Pathian a inrawlh le? A hma kum zabi engemawzât kalta khân, Pathian chuan Lal fel Davida hnênah: “I chhûngkua leh i ram chu chatuana tihngheh tlat a ni ang a, i lalṭhutthlêng chu chatuana tihngheh a ni ang,” tih a lo tiam tawh a. Tin, Mesia pawh Davida thlah aṭanga lo piang tûr a nih thu a hrilh bawk a ni. (2 Samuela 7:16; Sâm 89:20, 26-29; Isaia 11:1) Chutia Hezekia thih ngama a nat lai chuan, fa rêng a la nei lo va. Chuvângin, Davida lalna kal zêl tûr chu a tâwp mai a hlauhawm ta a ni. Hezekia chungchânga Pathian inrawlhna chu Mesia lo pianna tûr chi inthlah chhâwng kal zêl atân a ni.
Kristian hun hma pawhin, a thutiamte tihpuitlin nân Jehova chu vawi tam tak a mite tân a inrawlh ṭhîn a. Mosia chuan Israelte Aigupta sal tânna aṭanga chhan chhuahna chungchângah heti hian a puang chhuak a: “LALPAN a hmangaih che u avâng leh in pi leh pute hnêna chhia a lo chham chu hlen a duh avâng zâwkin asin . . . kut chak takin bâwih ata a tlan chhuah che u ni,” tiin.—Deuteronomy 7:8.
Chutiang bawkin, kum zabi pakhatnaa Pathian inrawlhna chu a thiltumte tihzauh nân a ni a. Entîr nân, Damascus khaw panna kawngah Juda mi Saula chuan Krista zirtîrte a tihduhdah zui zêl lohna tûrin inlârna mak tak mai a dawng a. A hnua tirhkoh Paula lo ni ta, chu pa inlehna chuan hnamte zînga chanchin ṭha tehdarhna kawngah chanvo pawimawh tak a nei a ni.—Tirhkohte 9:1-16; Rom 11:13.
Pathian A Inrawlh Reng Em?
Pathian chu a inrawlh reng nge inrawlh châng a nei chauh? A inrawlh reng lo tih Pathian Lehkha Thu chuan chiang takin a târ lang. Pathian chuan Hebrai tlangvâl pathumte chu rawhtuina mei ata chhan chhuakin, zâwlnei Daniela chu sakeibaknei pûk ata chhan chhuak mah se, zâwlnei dangte chu thihna ata a chhan chhuak chuang lo. (2 Chronicles 24:20, 21; Daniela 3:21-27; 6:16-22; Hebrai 11:37) Petera chu Herod Agrippa I-nain a tântîrna lung in aṭangin mak taka chhan chhuah a ni a. Mahse, chu lal vêk chuan tirhkoh Jakoba chu a tihlum a, chu dân bawhchhiatna lakah chuan Pathian a inrawlh miah lo thung. (Tirhkohte 12:1-11) Pathianin tirhkohte chu damlote tihdam theihna leh mitthi hial pawh kaihthawh theihna pe mah se, taksa dam lohna nia ngaih, tirhkoh Paula tihrehawmtu “tisaa hlîng” chu tih bosak a rem ti lo.—2 Korinth 12:7-9; Tirhkohte 9:32-41; 1 Korinth 12:28.
Rom Lal Neroa’n Krista zirtîrte chunga tihduhdahna nasa tak a thlentîr chu dang tûrin Pathian a inrawlh lo. Kristiante chu nghaisak, a nung chunga hâl, leh ram sakawlhte seh atâna paih an ni a. Mahse, Kristian hmasate chuan chûng tihduhdahna chu mak an ti lo va, Pathian a awm tih an rinna chu a chauh phah lo rêng rêng bawk. Tihah chuan, Isua ngei chuan a zirtîrte chu rorêltute hmaahte hruai an la nih tûr thu leh an rinna avânga tuar a, thih hial pawh an inpeih a ngaih thu a hrilh lâwk diam a ni.—Matthaia 10:17-22.
Tûn hmaa a tih ang bawkin, Tûn laiah pawh Pathian chuan a chhiahhlawhte chu dinhmun hlauhawm ata a chhan chhuak thei chiang mai a; chutianga chhan chhuahna dawnga inhriate chu sawisêl tûr a ni lo. Mahse, chûngahte chuan Pathian a inrawlh tak tak leh tak tak loh chu chiang faka sawi a harsa a ni. Toulouse-a bomb puakah chuan Jehova chhiahhlawh rinawm tam tak an hliam a, Nazi leh Communist camp-ahte emaw, dinhmun lungchhiatthlâk dang dang hnuaiah emaw Kristian rinawm sâng tam tak an thi a, chûngah chuan Pathian a inrawlh lo. Engvângin nge Pathian chu a pawmzâwng mi zawng zawngte hum tûra a inrawlh ziah loh le?—Daniela 3:17, 18.
“Hun leh Khawrêl”
Chhiatna a lo thlenin, tupawhin an tuar thei a, Pathian laka rinawm avâng maia tawh loh tûr tihna a ni kher lo. Toulouse-a bomb a puah ṭum khân, Alain leh Liliane-te chu an dam khawchhuak a, an thil sual tih vâng ni miah si lovin, mi 30 an thi a, za tam tak an hliam bawk. Tin, mi tam tak chuan dân bawhchhiatna avâng te, fîmkhur lo taka lîrthei khalh avâng te, a nih loh leh indo avâng tein an tuar a; chutiang an vânduaina avâng chuan Pathian mawhpuh theih a ni lo. Bible chuan mi zawng zawng chungah “hun leh khawrêl ang angin a thleng” tih min hriattîr a ni.—Thuhriltu 9:11.
Chu bâkah, mihringte chu natna te, tarna te, leh thihna te hnuaia dah kan ni a. Pathianin thil mak tihna hmanga an nun chhanhim nia ngaite emaw, an natna ata rin loh taka an ṭhat chhuah lehna chu Pathian vâng emaw nia ngaitu mi ṭhenkhatte pawhin, a tâwp a tâwpah chuan thihna an hmachhawn a ngai tho tho a ni. Natna te leh thihna te, leh mihringte mit ata ‘mittui zawng zawng hrûkfai’ hun tûr te chu nakina lo la thleng tûr a ni.—Thu Puan 21:1-4.
Chutiang lo thleng tûr chuan, a châng chânga inrawlhna mai aia nasa zâwk leh turu zâwk chu a ṭûl a. Bible chuan “LALPA ni ropui tak” chungchâng a sawi a ni. (Zephania 1:14) He inrawlhna puitham tak chhûng hian, Pathianin suahsualna zawng zawng a ti bo vek dâwn a. Mihringte chu ‘tûn hmaa thilte chu hriat renga a awm tawh lohna, rilruah pawh a luh tawh hek lohna tûr hmuna’ ṭha famkima chatuana nun theihna hun chu pêk an ni ang. (Isaia 65:17) Mitthite pawh kaihthawh leh an ni ang a, chutiang chuan mihringte chhiat tawh zînga râpthlâk ber chu a inthlâk thleng thawk dâwn a ni. (Johana 5:28, 29) Pathian chuan a hmangaihna leh ṭhatna tâwpin tai nei lo hmangin, mihringte buaina zawng zawng chu chatuan atân a ti bo vek tawh ang.
Tûn Laia Pathian Inrawlh Dân
Amaherawhchu, hetianga kan sawi hian Pathian chuan a thil siamte’n lungngaihna nasa tak an tawrh lai chu lainatna nei lovin a lo thlîr liam ve mai mai tihna erawh a ni lo. Tûn laiah hian, Pathian chuan mihring zawng zawngte hnênah, eng mi pawh ni se, eng dinhmun 1 Timothea 2:3, 4) Isua chuan chutiang a nih theih dân chu heti hian a sawi a ni: “Pa mi tîrtuin a hîp loh chuan tumah ka hnênah an lo kal thei lo vang,” tiin. (Johana 6:44) Pathian chuan rilru ṭha pute chu khawvêl pum huapa a chhiahhlawhte Lalram chanchin puan chhuah hmangin a lamah a hîp a ni.
aṭanga lo seilian pawh ni se, amah hriatna neih theihna leh amah nêna inlaichînna neih theihna hun remchâng a pe a. (Chu bâkah, Pathian chuan a kaihhruaia awm duhte nun chu a thunun bawk a. Pathian chuan a thlarau thianghlim hmangin a duhzâwng hre thiam tûr leh a thil phûtte nunpui tûrin chutiang mite ‘thinlung chu a tivâr’ a ni. (Tirhkohte 16:14) Ni e, Pathian chuan amah, a Thu, leh a thiltumte hriat theihna hun remchâng pêkna hmangin, kan vaia min hmangaih a, min ngaihsak vekzia a lantîr a ni.—Johana 17:3.
A tâwp berah chuan, Pathian chuan tûn laia a chhiahhlawhte chu mak taka chhan chhuahna hmang ni lovin, an harsatna tawh apiangte tuar chhuak thei tûra ‘thiltihtheihna nasa tak’ pêkna hmang zâwkin a chhan chhuak a ni. (2 Korinth 4:7) Tirhkoh Paula chuan: “Mi tichaktuah [Pathian Jehovaah] chuan engkim ka ti thei a ni,” tiin a ziak a ni.—Philippi 4:13.
Chuvângin, nunna kan neih avâng leh hrehawm tawrhna zawng zawng awm tawh lohna khawvêla chatuan nun theih beiseina min pêk avâng hian, nî tinin Pathian hnêna lâwmthu sawina tûr chhan ṭha tak kan nei a ni. “Ka chunga a thiltih ṭhat zawng zawng avâng hian LALPA chu eng nge ka pêk ve thung ang?” tiin fakna hla phuahtu chuan zawhna a lo siam a. “Chhandamna no ka la ang a, LALPA hming chu ka lam ang.” (Sâm 116:12, 13) He magazine i chhiar ziahna hian tûna i hlim theihna tûr leh nakin hun atâna beiseina nghet i neih theihna tûra Pathianin thil a lo tih tawhte, a la tihmêk te, leh a la tih tûrte chungchâng hre thiam tûrin a ṭanpui ang che.—1 Timothea 4:8. (w03 10/1)
[Phêk 6-naa thu lâk chhuah]
“Tûn hma thilte chu hriat rengin a awm tawh lo vang a, rilruah pawh a lût tawh hek lo vang.”—Isaia 65:17
[Phêk 5-naa milemte]
Bible hun laiah pawh, Jehova chu Zakaria lunga an denhlum laiin a inrawlh lo va . . .
Heroda’n sualna nei lote a sâmnaah pawh a inrawlh hek lo
[Phêk 7-naa milem]
Tawrhna awm tawh lohna tûr hun; mitthite hial pawh an lo nun lehna tûr hun chu a hnai