“Rual Lo Taka Nghâwngkawl Bât Dûnin Awm Suh U”
“Rual Lo Taka Nghâwngkawl Bât Dûnin Awm Suh U”
HETA i hmuh angin, sanghâwngsei leh bâwngpa lei leh duntîr chu a hrehawm hmêl hle a. Lenzâwng leh chakzâwng inang ran pahnih tâna siam nghâwngkawl chuan a thlunzawm a, a pahnihin a tuar a ni. Hêng thil hnûk chi ran chhawrte hmakhua ngaihtuahin, Pathian chuan Israelte hnênah: “Bâwngpa leh sabengtung lei in leh duntîr tûr a ni lo,” a ti. (Deuteronomy 22:10) A thu bul chu bâwngpa leh sanghâwngsei-ah pawh a hman theih ngei ang.
A tlângpui thuin, lo nei mi chuan a rante chu chutiang hrehawm a tawrhtîr lo vang. Mahse, bâwngpa pahnih a neih lo chuan, a neih ang ran pahnih chu nghâwngkawl a bah duntîr mai thei a. Chu chu milema târ lan, kum zabi 19-naa lo neitu chuan a ti niin a lang. An lenzâwng leh a rihzâwng a inan loh avângin, ran chak lo zâwk chuan pên rualpui tûrin a beih ngar ngar a ngai a, a chak zâwk chuan a phurh rih zâwk a ngai thung a ni.
Tirhkoh Paula chuan nghâwngkawl rual lo chu entîr nâna hmangin, thu pawimawh min zirtîr a. “Ring lo mite nên rual lo taka nghâwngkawl bât dûnin awm suh u; suahsualna leh felnain engnge inṭâwmna an neih? A nih loh leh thim leh êngin engnge inpâwlna an neih?” tiin a ziak a ni. (2 Korinth 6:14) Engtin nge Kristian chuan nghâwngkawl rual lo tak a bah theih?
A bah theih dân kawng khat chu Kristianin kawppui atâna a rinna ṭawmpui lo a thlan hunah a ni. Chutiang inneihna chuan an pahnih tân harsatna a thlen a, nupa tuakte chu thu pawimawh tak takah an inrem thei lo a ni.
Inneihna bul a ṭan khân, Jehova chuan nupui chu “ṭanpuitu tûr” atân a pe a. (Genesis 2:18) Chutiang bawkin, zâwlnei Malakia hmangin, Pathian chuan nupui chu “kawppui” angin a sawi a ni. (Malakia 2:14) Siamtu chuan nupate chu thlarau lama inrem taka thawk tlâng a, rit phur tlâng tûr leh a hlâwkna seng ve ve tûrin a duh a ni.
“Lalpaa awm mi” chauh neihna hmangin, Kristiante chuan kan Pa vâna mi zilhna thu kan zahzia kan lantîr a. (1 Korinth 7:39) Hei hian “nghâwngkawl bahpui tak tak” anga rawng an bâwl dun avânga Pathian hnêna chawimawina leh fakna thlentu, nupa lungrual tak tak ni tûrin lungphûm a phûm a ni.—Philippi 4:3. (w03 10/15)
[Phêk 32-naa Thlalâk Hawhtîrtu]
Sanghâwngsei leh bâwngpa: From the book La Tierra Santa, Volume 1, 1830