Dân Bawhchhiatna Awm Lohna Khawvêl A Lo Thleng Ṭêp

DAN bawhchhetu awm lohna khawvêl chu i theih chuan han suangtuah chhin teh! Police-te, tân inte, a nih loh leh dân bawhchhetute chungthu rêlna kalhmang buai tak leh man to takte a awm a ngai hauh lo vang. Mi tinte’n mi dangte nun leh in hmun lo ram an hlutsakna khawvêl a ni ang. Chu chu thil theih lo niin a lang em? A lang i ti mai thei; mahse, he a ṭha lama inthlâkthlengna mak tak hi Bible thutiam a ni tlat. Khawvêla dân bawhchhiatna leh thil sual dangte chungchâng Pathian Lehkha Thuin a sawi lâwkte hi engvângin nge kan ngaihtuah loh vang?

Sâm lehkhabuah chuan: “Thil ṭha lo titute avângin intilungngai duh suh la, fel lo taka tite chu awt hek suh. Hlobet angin ah thlûkin an awm thuai ang a, hnim hring angin an vuai dâwn si a. Thuhnuairawlhte erawh chuan ram hi an luah ang a: remna chênin an hmuingîl ang,” tih kan chhiar a ni. (Sâm 37:​1, 2, 11) He Pathian thutiam leh a thutiam dang phûrawm takte thlen famkimna tûr chu mihring tumahin an dang chat thei lo.

Hêng malsâwmnate thlentîr nâna Pathian hmanrua chu a Lalram hi a ni a. Lal Ṭawngṭainaah chuan, Isua Krista’n a hnungzuitute chu Lalram chu lo thleng tûr leh Pathian duhzâwng ‘vâna an tih anga leia mi’n ti ve tûra’ ṭawngṭai tûrin a zirtîr a ni. (Matthaia 6:​9, 10) Nakin lawka chu Lalram awpna hnuaiah chuan, retheih avâng te, rahbeh avâng te, a nih loh leh mahni hmasial avâng tein tumahin dân an bawhchhe tawh lo vang. Chu aiah, Pathian Thu chuan: “Leiah, tlâng chungahte hian, buh tam tak a awm ang,” a ti. (Sâm 72:16) Pathian Jehova chuan leia mi tinte chu thil ṭha tâwp nei lovin, a vûr dâwn a ni. Chu aia pawimawh zâwk chu, mihringte chu Pathian leh ṭhenawmte hmangaihnaah an nghet tawh ang a, khawvêl chu engtikahmah dân bawhchhiatnaa tihbuaiin a awm leh tawh lo vang. (w03 11/15)