Kristian Hmeichhe Rinawmte—Pathian Betu Hlu Takte
Kristian Hmeichhe Rinawmte—Pathian Betu Hlu Takte
“Duhsakna hi bumna a ni a, hmêl ṭhatna chu engmah lo a ni, LALPA ṭihtu hmeichhia erawh chu fak a ni ang.”—THUFINGTE 31:30.
1. Engtin nge Jehova hmêl ṭhatna thlîr dân chu khawvêl thlîr dân nên a inan loh?
KHAWVEL hian pâwn lam lan dân hi a dah pawimawh hle a, a bîk takin hmeichhe chungchângah a ni lehzual a ni. Mahse, Jehova chuan mihring chhûngrîl hi a dah pawimawh zâwk a, chu chu upat rualin a duhawm zual deuh deuh thei a ni. Chuvângin, Bible chuan hmeichhiate chu: “In incheina chu pawn lam incheina—sam phiar te, rangkachak ṭhi awrh te, silhfên inthuam te—ni lovin, thinlunga mihring thurûk chu, rilru thuhnuairawlh leh nunnêm, silhfên chhe thei lova inthuam ni zâwk rawh se, chu chu Pathian mithmuhin a hlu êm êm a ni,” tiin a fuih a ni.—1 Petera 3:3, 4.
2, 3. Engtin nge hmeichhiate chuan kum zabi pakhatnaa chanchin ṭha thehdarhna kawngah telvena an neih a, chu chu eng anga hrilh lâwk nge a nih?
2 Chutiang rilru put hmang fak tlâk tak chu Bible-a hmeichhe tam takte hian an lantîr a. Kum zabi pakhatnaah chuan, chutiang hmeichhe ṭhenkhatte chuan Isua leh a tirhkohte rawngbâwlsakna chanvo hlu chu an nei a ni. (Luka 8:1-3) Chu mi hnuah, Kristian hmeichhiate chu chanchin ṭha hriltu ṭhahnemngai takte an lo ni a; a dangte chuan Kristian mipa hmahruaitute chu an ṭanpui a, chûng mipate zîngah chuan tirhkoh Paula pawh a tel a; ṭhenkhat chuan khual chhawn thiamna namên lo an lantîr a, an inte chu kohhran inkhâwmna atânte an hmang hial a ni.
3 Jehova’n a thiltumte tihpuitlin nâna hmeichhiate nasa taka a hman tûr thu chu Pathian Lehkha Thuah hrilh lâwk vek a ni a. Entîr nân, Joela 2:28, 29 chuan mipa leh hmeichhia, a pui a pangin thlarau thianghlim an dawn tûr thu leh Lalram chanchin ṭha thehdarhnaa an tel tûr thu a sawi lâwk a ni. Chu hrilh lâwk thu chu C.E. 33 Pentikost nî aṭang khân a thleng famkim ṭan a. (Tirhkohte 2:1-4, 16-18) Thlarauva hriak thih hmeichhe ṭhenkhat chu thu hrilh lâwk theihna ang chi thilmak tih theihna pêk an ni. (Tirhkohte 21:8, 9) Rawngbâwlnaa ṭhahnem an ngaihna avângin, hêng thlarau lam sipai rual unaunu rinawmte hian kum zabi pakhatnaa Kristianna theh darhna kawngah thawh an nei ve a ni. C.E. 60 vêlah chuan, tirhkoh Paula chuan chanchin ṭha chu “vân hnuaia thil siam zawng zawngte zînga tlângaupui a nih” thu a ziak a ni.—Kolossa 1:23.
An Huaisenna, Taihmâkna, leh Khual Chhawn Thiamna Avânga Fak
4. Engvângin nge Paula chuan kum zabi pakhatna Kristian kohhrana hmeichhe tam takte fakna tûr chhan ṭha a neih?
4 Entîr nân, tirhkoh Paula chuan hmeichhe ṭhenkhatte rawngbâwlna chu a hlut hle a ni—tûn laia enkawltu Kristiante’n hmeichhe ṭhahnemngaite rawngbâwlna an hlut ang chiah hian. Paula’n an hming hmerha a târ lante zîngah chuan “Truphaini leh Truphosi, Lalpaa thawk rim ṭhînte” leh “duh tak Persi, Lalpaa thawk rim êm êm tawh” te an tel a ni. (Rom 16:12) Paula chuan Euodii leh Suntuki chu “chanchin ṭhaah chuan [amah] an beihpui” tih a ziak bawk. (Philippi 4:1-3) Priskilli pawhin a pasal Akuila rualin Paula rawng a bâwlpui ve a. Amah leh Akuila, Puala nun chhanhim nâna an “nghâwng dawhte” chuan Paula chu hetianga ziak tûr hian a chêttîr a ni: “Kei chang ni lovin, Jentail kohhranho pâwl zawng zawngin anni hnênah chuan lâwmthu an sawi a ni,” tiin.—Rom 16:3, 4; Tirhkohte 18:2.
5, 6. Eng kawngin nge Priskilli chuan tûn laia unaunute tân entawn tûr ṭha a siam?
5 Engin nge Priskilli chu ṭhahnemngaihna leh huaisenna neihtîr? A chhânna chu Tirhkohte -ah kan hmu a, chutah chuan thusawi thiam tak Appolova chu thutak thu hriatthiamna dik tûn lai ber berte hre tûra ṭanpuina kawngah a pasal a ṭanpui tih kan chhiar a ni. Chuti a nih chuan, Priskilli chu Pathian Thu leh tirhkohte zirtîrna thu zirtu ṭha tak a ni ngei tih a chiang hle. Chûngte avâng chuan, ani chuan Pathian, a pasal, leh hmân lai kohhran zînga mite tâna ṭangkai tak nihtîrtu mize ṭhate chu a neih phah a ni. Chutiang bawkin, tûn laia Bible taima taka zir Kristian hmeichhia, Jehova’n “sum enkawltu rinawm” tak hmanga thlarau lam chaw min pêkte ei ṭhîntute chu an hlu êm êm a ni.— 18:24-26Luka 12:42.
6 Akuila leh Priskilli chuan khual chhawn an thiam êm êm a. Korinth khuaa puan in a siampui lai khân Paula chu an inah a chêng a ni. (Tirhkohte 18:1-3) Chutah chu mite nupa chu Ephesi khua leh Rom khuaa an pêm hnuah pawh, Kristian khual chhawn thiamna chu an la lantîr chhunzawm zêl a, an in pawh kohhran inkhâwm nân an hmang hial a ni. (Tirhkohte 18:18, 19; 1 Korinth 16:8, 19) Johana, Marka an tih bawka nu, Mari pawhin a in chu kohhran inkhâwm nân a hawng bawk.—Tirhkohte 12:12.
Tûn Laia Ṭangkai Tak
7, 8. Tûn laia Kristian hmeichhe tam takin eng rawngbâwlna thianghlim fak tlâk tak nge an neih a, anni chuan eng nge an chian theih?
7 Kum zabi pakhatna ang bawkin, tûn laia Kristian hmeichhe rinawmte pawhin Pathian thiltum hlen chhuahna kawngah chanvo pawimawh tak an chang a, a bîk takin chanchin ṭha hrilhna kawngah an chang a ni. Hêng unaunute hian an va ti ṭha tak êm! Kum 2002-a a thih thlenga kum 50 chuang rinawm taka Jehova rawng lo bâwl tawh Gwen-i chanchin hi han ngaihtuah teh. “Chanchin ṭha hrilhna kawnga Gwen-i ṭhahnemngaihna chuan kan khawpuiah hriat a hlawh khawp mai. Atân chuan mi tinte hi Jehova hmangaihna leh thutiamte dawngtu tûr an ni tlat a. Kan lunghnual laia hmangaih taka min tihchak dânte chu sawi loh, Pathian, a inawpna pâwl, leh kan chhûngkaw chunga a rinawm nghehna chu hlim taka kan awm dun chhûng zawnga keimah leh kan fate tân min ṭanpuitu ropui tak a ni a. Kan ui khawp mai,” tiin a pasal chuan a sawi. Gwen-i leh a pasal chu kum 61 chuang an innei a ni.
8 Kristian hmeichhe sâng tam tak, nupui pasal nei leh nei lote chuan pioneer leh missionary angtein rawng an bâwl a, khawpui lûn tak aṭanga ram fian rial tak tak thlenga Lalram thuchah thehdarhin, an mamawh bulpui an neihte chungah an lungawi a ni. (Tirhkohte 1:8) Tam tak chuan Jehova rawngbâwl tam lehzual an duh avângin, mahnia in leh lo neih emaw, fa neih emaw chu an thlang lo va. Unaunu sâng tam takte chuan khawvêl puma Bethel ina rawng an bâwl laiin, a dangte chuan an pasalte bial kana an zin kualnaah rinawm takin an ṭawiâwm bawk a ni. Rinhlelh rual lovin, hêng mahni hmasial lo hmeichhiate hi ropuina nêna Jehova in tikhattu, “hnam tinrêng thil duhzâwngte” zînga mi an ni tak meuh a ni.—Hagaia 2:7.
9, 10. Engtin nge chhûngkuaa mi ṭhenkhatte’n Kristian nupui leh nute entawn tûr ṭha siamte chu an ngaihhlutzia an sawi?
9 Hêng Kristian hmeichhia tam takte hian chhûngkuaah mawhphurhna an nei a; mahse, lalram hmakhua chu an dah hmasa ber a ni. (Matthaia 6:33) Pioneer thawk nula pakhat chuan: “Regular pioneer ka thawh chhan pakhat chu ka nu rinna nghet tak leh entawn tûr ṭha tak a siam vâng a ni. A nihna takah phei chuan, ani chu ka pioneer thawhpui ṭha ber berte zînga mi a ni,” tiin a ziak. Fanu puitling ṭhiau panga nei pa pakhat chuan a nupui chanchin chu heti hian a sawi: “Kan in chu a felin, a fai thlap reng a. Kan chhûngkuaa thlarau lam thil kan ngaih pawimawh ber theih nân, Bonnie-i chuan in chu tluangmâwl tak bungruaa hnawk nuai lovin a dah a ni. Kan sum hman chungchânga a fîmkhur thiamna chuan kum 32 chhûng hun bi neia hna thawk a, kan chhûngkaw tân leh thlarau lam thila inhmang tam theiin min siam a ni. Ka nupui chuan naupangte pawh taihmâk a hlutzia a zirtîr bawk a. Fak lo thei ka ni lo,” tiin. Tûnah chuan an nupain Jehova Thuhretute khawvêl pum huap hmunpuiah rawng an bâwl a ni.
10 Fate puitling tawh pa pakhat chuan, a nupui chungchâng heti hian a ziak a: “Susan-i mizia ka Thufingte 31:28, 30.
ngaihsân ber chu Pathian leh mite hmangaihna a neih leh mi a hriatthiamna te, mi a khawngaihna te, leh a rinawmnate hi a ni a. Jehova chuan kan pêk theihte zînga a ṭha ber a phû tih ngaih dân a nei reng a ni—Pathian chhiahhlawh a nih ang leh nu ber a nih anga a nunpui thu bul chu,” tiin. A nupui ṭanpuina avângin, a pasal hian kohhranah chanvo tam tak a chan theih phah a, chûng zîngah chuan upa nihna te, pioneer thawh theihna te, bial kantu aiawha ṭan theihna te, leh Hospital Liaison Committee rawngbâwlnaa tel theihna te a tel a ni. Chûng hmeichhiate chu an pasalte, an Kristianpuite, leh eng dang zawng aiin Jehova tân an va hlu tak êm!—Pasal Nei Lo Hmeichhe Hlu Takte
11. (a) Engtin nge Jehova chuan hmeichhe rinawm, a bîk takin hmeithaite a ngaihsakzia a lantîr? (b) Kristian hmeithaite leh pasal nei lo unaunu dangte chuan eng nge an rin tlat theih?
11 Jehova chuan hmeithaite hamṭhatna tûr a ngaihtuahzia pawh a sawi fo va. (Deuteronomy 27:19; Sâm 68:5; Isaia 10:1, 2) Tûnah pawh a inthlâk danglam lo a ni. Hmeithaite chauh ni lo, pasal tel lo va fa enkawlte leh mahni duhthlanna emaw, Kristian kawppui tûr âwm hmuh zawh loh vâng emawa pasal nei lote pawh a la ngaihtuah zawm zêl a ni. (Malakia 3:6; Jakoba 1:27) Kristian kawppui ṭanpuina tel lo va Jehova rawng rinawm taka bâwltute zînga mi i nih chuan, Pathian mithmuhah i hlu hle tih i ring tlat thei a ni.
12. (a) Engtin nge Kristian unaunu ṭhenkhatin Jehova chunga an rinawm nghehna chu an lantîr? (b) Kan unaunu ṭhenkhatin eng rilru hrehawmna nge an tawrh?
12 Entîr nân, kan Kristian unaunu, “Lalpaa awm mi” chauh nei tûra Jehova fuihna rinawm taka an zawm avânga pasal nei lova awmte hi ngaihtuah teh. (1 Korinth 7:39; Thufingte 3:1) Mi rinawm tak chungah chuan Jehova’n rinawm takin thil a ti ang tih Pathian Thu chuan min tiam a ni. Chutiang ni mah se, mi tam tak tân chuan pasal nei lova awm chu thil harsa tak a ni a. Unaunu pakhat chuan: “Lalpaa awm mi chauh neih ka tum tlat a; mahse, neih tûr âwm ka hmuh loh laia ka ṭhiante’n Kristian unaupa ṭha tak tak an nei ka hmuh hian ka ṭap ru zawih zawih ṭhîn,” tiin a sawi. Unaunu dang pakhat pawhin: “Kum 25 chhûng Jehova rawng ka bâwl tawh a. A laka rinawm tlat ka tum nghet a; mahse, mal intihna hian mi tilungchhe ṭhîn. Keimah ang unaunute hian fuihna an thlahlel ngawih ngawih a ni,” a ti bawk. Engtin nge chutianga mi rinawmte chu kan ṭanpui ang?
13. (a) Jeptha fanu va tlawhtute entawn tûr siam aṭangin eng nge kan zir theih? (b) Eng kawng dangtein nge kan kohhrana unaunu pasal nei lote kan ngaihsakzia kan lantîr theih?
13 Kan ṭanpui theih dân kawng khat chu hmân laia entawn tûr pakhat aṭangin a hmuh theih a. Jeptha fanuin pasal nei lo va awm a tihtlûk khân, mite chuan a inpêkna an hria a. Amah fuih tûrin eng nge an tih? “Israel fanute chuan Gilead mi Jeptha fanu fak tûrin kum tin ni li chhûng zêl a hnênah an kal ṭhîn.” (Rorêltute 11:30-40, NW) Chutiang bawkin, Pathian dân rinawm taka zâwmtu kan unaunu pasal nei lote chu tih tak zetin kan fak ṭhîn tûr a ni. * Anmahni kan ngaihsakzia kan lantîr theihna kawng dang chu eng nge ni? Kan ṭawngṭainaah chutiang kan unaunu duh tak leh rinawm takte chu rinawm taka a rawng bâwl zêl tûra ṭanpui tûrin Jehova hnênah kan dîlsak tûr a ni. Anni chuan Jehova leh Kristian kohhran pum puiin an hmangaihin an ngaisâng hle tih hriattîr chu an phu a ni.—Sâm 37:28.
Hmeithai Chhûngkuate Hlawhtlin Dân
14, 15. (a) Engvângin nge pasal tel lova fa enkawl ngai hmeithaite chuan Jehova ṭanpuina an dîl ang? (b) Engtin nge hmeithaite chu an ṭawngṭaina nêna inmila an nun theih?
14 Kristian unaunu hmeithaite pawhin harsatna tam tak an tâwk a. Mahse, Bible dân bulte mila an fate an enkawlnaah Jehova ṭanpuina dîlin an ṭawngṭai thei a ni. Hmeithai i nih chuan, kawng engkimah nu leh pa i ni kawp reng thei lo ngei ang. Nimahsela, amah ring chunga Jehova ṭanpuina i dîl chuan ani chuan i mawhphurhna tam tak hlen thei tûrin a ṭanpui ang che. Entîr nân: I chênna in chhâwng sâng takah ei tûra khat bag rit tak ken chhoh ngai ta se. Electric hmanga lâwn chhohna (lift) hman tûr a awm reng laiin, kailâwn aṭanga phurh chhoh hrâm i tum ang em? Tum hauh lo vang! Chutiang bawkin, nangmah ṭanpui tûr chea Jehova i ngen theih reng laiin, rilru lama i phur rit tak chu nangmahin phurh tum tlat suh. A nihna takah chuan, ani chuan a ṭanpuina dîl tûrin a sâwm zâwk che a ni. Sâm 68:19 chuan: “Lalpa, kan phur ni tina min phurhsaktu . . . chu, fakin awm rawh se,” a ti. Chutiang bawkin 1 Petera 5:7 pawhin Jehova’n “a ngaihsak ṭhin che u avângin” in manganna zawng zawng ama chunga nghat vek tûrin a sâwm che u a ni. Chuvângin, buaina leh mangannain a tlâk buak che a nih chuan, i Pa vâna mi hnênah chuan i phur chu nghat la, “bâng lovin” nghat ziah ang che u.—1 Thessalonika 5:17; Sâm 18:6; 55:22.
15 Entîr nân, fa nei i nih chuan, school-a an ṭhiante’n an chunga thununna an neih dân tûr emaw, an rinawmna fiahna an tawn theih tûrte chungchâng emaw chu i lungkham ngei ang. (1 Korinth 15:33) Chûng chu lungngaih chhan tûr a tling a ni. Mahse, chûngte chu ṭawngṭainaa telh chi a ni bawk. Engvângin nge i fate’n school lam pana an kal hmain, nî châng in chhiar zawha ṭawngṭainaah chûng thilte chu i telh loh vang? Tih tak zeta thil engemaw bîk chungthua ṭawngṭaina chuan naupangte rilru a hneh thei hle a ni. Chu bâkah, i fate thinlunga a Thu tuh tuma dawhthei taka i beihna chuan Jehova malsâwmna a dawntîr ang che. (Deuteronomy 6:6, 7; Thufingte 22:6) “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn” tih hi hre reng ang che.—1 Petera 3:12; Philippi 4:6, 7.
16, 17. (a) A nuin hmangaihna a lantîr dân chungchâng fapa pakhatin eng nge a sawi? (b) Engtin nge a nu thlarau lam thil thlîr dân chuan a fate a nghawng?
16 Fa paruk nei, nu pakhat Olivia-i chungchâng ngaihtuah teh. A pasal ring lo mi chuan an fa naupang ber a pian vêleh a chhuahsan a; mahse, ani chuan a fate chu Pathian kawnga enkawl tûrin mawhphurhna a la nghâl a. Olivia-i fapa Darren-a, chutih laia kum 5 mi lek chu tûnah kum 31 mi niin, Kristian upa a nih rualin pioneer a thawk bawk a ni. Olivia-i manganna tizual tûrin, Darren-a chuan natna khirh tak mai a nei zui a, chu chuan tûn thlengin a la tibuai reng a ni. A naupan lai hun chhui lêtin Darren-a chuan: “Damdâwi in khuma nghâk hlel taka ka nu nghâka ka ṭhut lai ka la hre reng a. Ka nu chuan ka bulah ṭhuin, nî tin Bible min chhiarsak ṭhîn a ni. Chutah ‘Kan Lâwm E, Jehova’ tih Lalram hla chu a sa ṭhîn. * Chu hla chu tûn thleng hian Lalram hlate zînga ka hla duh ber a la ni,” tiin a ziak a ni.
17 Olivia-i’n Jehova a rinna leh a hmangaihna chuan, hmeithai chhûngkaw hlawhtling tak a nihtîr a. (Thufingte 3:5, 6) A rilru put hmang ṭha tak chu a fate tâna thiltum a siamsakah hian a lang a ni. “Ka nu chuan hun bikima rawngbâwl hi thiltuma nei tûrin min fuih reng ṭhin a. Chuvângin, kei leh ka unaunu pangate zînga palite chuan hun bikima rawngbâwl chu kan thlang ta a ni. Mahse, ka nu chu a insawithei ngai lo. A mize ropui tak chu entawn tumin theihtâwp ka chhuah a ni,” tiin Darren-a chuan a sawi a ni. Ni e, Olivia-i fate angin, naupang zawng zawng chuan Pathian rawng an bâwl duh vek kher lo va. Mahse, nuin Bible dân bulte nunpuia theihtâwp a chhuah chuan, Jehova kaihhruaina leh hmangaih taka ṭanpuina a ring tlat thei a ni.—Sâm 32:8.
18. Engtin nge Jehova min pêk Kristian kohhran kan ngaihhlutzia kan lantîr theih?
18 Pathian ṭanpuina tam tak chu Kristian kohhran a ṭanga hmuh theih a ni a, chuta thlarau lam châwmna kal zêl te, chuta Kristian inunauna te, leh chuta thlarau lama puitling ‘mihringte hnêna thilpêkte’ hmanga hmuh theih a ni. (Ephesi 4:8) Upa rinawm takte chu kohhrana mi zawng zawngte tung ding tûrin an thawk rim a, “fahrah leh hmeithaite an hrehawm laia” an mamawhte chu an ngaihtuah êm êm a ni. (Jakoba 1:27) Chuvângin, Pathian mite bêl reng la, nangmahin inkulh hrang ngai suh ang che.—Thufingte 18:1; Rom 14:7.
Intukluh A Duhawmna
19. Engvângin nge nupui intukluhna chu hniam zâwk nihna a nih loh va, chu chu eng Bible entîrnain nge thlâwp?
19 Jehova chuan hmeichhia hi mipa kawppui tûra a siam a ni a. (Genesis 2:18) Chuvângin, nupui chu a pasal laka a intukluh hian a hniam zâwk tihna a ni rêng rêng lo. Chutih ahnêkin, intukluhna chuan hmeichhia chu a tizahawm a, thilpêk leh thiamna a dawn tam takte chu Pathian duhzâwng nêna inmilin a hmantîr thei a ni. Thufingte bung 31 chuan hmân lai Israel hun laia hmeichhe felte thiltih chi hrang hrang a târ lang a. Ṭanpui ngaite a ṭanpui a, grêp huan a siam a, huan tûr ram a lei bawk a ni. Ni e, “a pasal thinlung chuan a ring a, chhawrna a hmai lo vang.”—Châng 11, 16, 20.
20. (a) Engtin nge Kristian hmeichhiain Pathian pêk a thiamna, a nih loh leh thilpêkte chu a ngaih ang? (b) Eng mize ṭha tak nge Estheri’n a lantîr a, chu a mize ṭha avâng chuan Jehova’n eng atân nge a hman tâk?
20 Pathian ṭih mi, hmeichhe inngaitlâwm chu a inlasângin emaw, a pasal elin emaw a awm ngai lo va. (Thufingte 16:18) Pathian pêk a thiamna neihte chu pâwn lama hna thawka mahni lungawina ûm nân chauh a hmang lo va, mi dangte—a chhûngkaw mite, a Kristianpuite, ṭhenawmte, leh Jehova rawngbâwl nân te a hmang ber zâwk a ni. (Galatia 6:10; Tita 2:3-5) Lalnu Estheri entawn tûr siam hi ngaihtuah teh. A hmêlṭha hle chung pawhin, a inngaitlâwmin, a intulût hle a ni. (Estheri 2:13, 15) Pasal a neih chuan, a pasal Lal Ahasuera zahna thûk tak a lantîr a, lal nupui hmasa Vasti ang a ni ve lo. (Estheri 1:10-12; 2:16, 17) Estheri chuan a patea fapa, a unaupa Mordekaia thu chu a âwm hun apiangah a ngaithla bawk a—lalnu a nih hnuah pawh a thu a ngaithla reng a ni. Mahse, chu chu a chak loh vâng a ni hauh lo! Ani chuan mi thiltithei leh nunrâwng tak, Judaho tihmang vek tuma ruahmanna siamtu, Hamana thiltumte chu huaisen takin a hailang a ni. Jehova chuan Estheri chu a mite chhamhim nân ropui tak leh chak takin a hmang a ni.—Estheri 3:8–4:17; 7:1-10; 9:13.
21. Engtin nge Kristian hmeichhia chu Jehova tân a hlut lehzual theih ang?
21 Chiang takin, hun kaltaah leh tûn laiah pawh Pathian ngaihsak hmeichhiate chuan Jehova leh amah biaknaa an inpumpêkzia an lantîr a. Chuvângin, Pathian ṭih hmeichhiate chu Jehova mithmuhah an hlu êm êm a ni. Kristian unaunute u, a thlarau thianghlim hmanga Jehova’n “hnathawh ṭha tinrênga inpeih sa,” “bungbêl,” ṭangkai lehzual ni zêl tûra zawi zawia a thuam che u chu phal ang che u. (2 Timothea 2:21; Rom 12:2) Chutianga amah betu hlu takte chungchângah, Pathian Thu chuan heti hian a sawi: “A kutkawih chhuah pe la, a thiltihin kulh kawngkâah chuan fak rawh se,” tiin. (Thufingte 31:31) In chungah pawh chu chu lo thleng dik ṭheuh rawh se. (w03 11/1)
[Footnote-te]
^ par. 13 Chutianga fak dân tûr chungchângah chuan Vênnainsâng, (English) March 15, 2002, phêk 26-8 en rawh.
^ par. 16 Jehova Fakin Zai Rawh U, tih hla bu, Jehova Thuhretute chhuah hla No. 212-na.
I Hre Chhuak Em?
• Engtin nge kum zabi pakhatnaa Kristian hmeichhe ṭhenkhatte chu Jehova mit hmuha hlu tak an nih?
• Engtin nge kan hun laia unaunu tam takte chu Pathian tâna hlu tak an nih?
• Eng kawngin nge Jehova chuan hmeithai chhûngte leh pasal nei lo unaunute a chhawmdâwl?
• Engtin nge hmeichhiain lû nihna ruahmanna a zahzia a lantîr theih?
[Zirlai Atâna Zawhnate]
[Phêk 17-naa bâwm]
Ngaihtuah Tur Entirnate
Hmeichhe rinawm entawn tlâk ṭhenkhat dang Bible-a târ lante chanchin chu i ngaihtuah duh em? I duh chuan, a hnuaia Bible châng târ lante hi chhiar ang che. Mi mal tinte chanchin i ngaihtuah hian, nunpui lehzual i duh tûr thu bulte chu hmuh chhuah tum ang che.—Rom 15:4.
◆ Sari: Genesis 12:1, 5; 21:9-12; Hebrai 11:9; 1 Petera 3:5, 6.
◆ Israel hmeichhe thilphalte: Exodus 35:5, 22, 25, 26; 36:3-7; Luka 21:1-4.
◆ Debori: Rorêltute 4:1–5:31.
◆ Ruthi: Ruthi 1:4, 5, 16, 17; 2:2, 3, 11-13; 4:15.
◆ Sunem Nu: 2 Lalte 4:8-37.
◆ Kanaan hmeichhia: Matthaia 15:22-28.
◆ Marthi leh Mari: Marka 14:3-9. Luka 10:38-42; Johana 11:17-29; 12:1-8.
◆ Tabithi: Tirhkohte 9:36-41.
◆ Philipa fanu palite: Tirhkohte 21:9.
◆ Phoibi: Rom 16:1, 2.
[Phêk 15-naa milem]
Pathian dân rinawm taka zâwmtu unaunu pasal nei lova awmte chu i fak em?