‘Pathian Thu Fel Takin Hmang Rawh’
‘Pathian Thu Fel Takin Hmang Rawh’
“Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh.”—2 TIMOTHEA 2:15.
1, 2. (a) Engvângin nge hnathawktute’n hmanrua an mamawh? (b) Eng hnaah nge Kristiante an tel a, engtin nge Lalram an zawng hmasa tih an lantîr?
HNATHAWKTUTE chuan an hna an thawh theih nân hmanrua an mamawh a. Mahse, hmanrua engpawh neih ringawt chu a tâwk lo. Hnathawktu chuan hmanraw dik a neih a ngai a, a hman dân tûr dik takin a hmang tûr a ni bawk. Entîr nân, thil chhêkkhâwlna tûr intê i sak laiin thing phêk pahnih kilhbeh i duh chuan, perek leh tuboh neih mai a tâwk lo vang. Perek tikawi si lova thinga khen luh dân i hriat a ngai a. Tuboh hman dân hre si lo va thinga perek khenluh tum chu a harsa hle thei a, a beidawnthlâk hial thei a ni. Mahse, hmanrua a hman dân tûr dik taka hman chuan hna chu ṭha takin min thawh zawhtîr thei a ni.
2 Kristian kan nih angin, hna thawh tûr kan nei a. Chu chu hna azawnga hna pawimawh ber a ni. Isua Krista chuan a hnungzuitute chu ‘ram zawng hmasa’ tûrin a fuih a. (Matthaia 6:33) Engtin nge kan zawn hmasak theih? Kan tih theih dân kawng khat chu taima taka Lalram thu hrilhna leh zirtîr siamnaa tel hi a ni. A kawng dang leh chu kan rawngbâwlna Pathian Thua nghah ngheh tlat hi a ni thung. Kawng pathumna chu nungchang ṭha a ni thung a ni. (Matthaia 24:14; 28:19, 20; Tirhkohte 8:25; 1 Petera 2:12) He Kristian hnaa hlawhtling tûr leh hlimna hmu tûr chuan, hmanraw inâwm tak leh a hman dân tûr hriatna kan neih a ngai a ni. He mi chungchângah hian, tirhkoh Paula chuan Kristian hna thawk rim tak a nih angin entawn tûr ṭha tak a siam a, a rinpuite chu amah entawn tûrin a fuih bawk a ni. (1 Korinth 11:1; 15:10) Chuti a nih chuan, kan hnathawhpui Paula hnên aṭangin eng nge kan zir theih?
Paula—Ṭhahnemngai Taka Lalram Chanchin Puangtu
3. Engvângin nge tirhkoh Paula chu Lalram hnathawktu ṭhahnemngai tak a ni kan tih theih?
3 Paula chu hnathawktu mi eng ang nge a nih? Mi ṭhahnemngai tak a ni. Paula chuan Mediterranean huam chhûng vêl zawng zawngah chuan chanchin ṭha a thehdarh hrâm hrâm a ni. Lalram thuchah phûr taka a puan chhan sawiin, he tirhkoh chau thei lova hian: “Chanchin ṭha hril mah ila, chhuan tûr rêng rêng ka nei si lo, tih mâkmawh ka chungah a innghat a ni si a, chanchin ṭha hril suh ila, ka chung a pik dâwn si a,” a ti. (1 Korinth 9:16) Paula vei ber chu a nun chhanhim hi a ni em? Ni lo. Ani chu mahni hmasial mi a ni lo. Chutih a hnêkin, mi dangte pawhin chanchin ṭha chu hlâwkpui ve se a duh a ni. Hetiang hian a ziak a: “Chanchin ṭha avângin engkim ka ti ṭhîn,” tiin.—1 Korinth 9:23.
4. Eng hmanrua nge Kristian hnathawktute’n an hlut ber?
4 Tirhkoh Paula chu ama thiamna chauhva innghat thei a nih lohzia hre chiangtu hnathawktu inngaitlâwm tak a ni a. Thil siamtuin tuboh a mamawh ang bawkin, Paula chuan a thu ngaithlatute thinlunga Pathian thutak a tuh theih nân hmanraw inâwm tak a mamawh a ni. Eng hmanrua nge a hman ber? Pathian Thu Thianghlim, Bible hi a ni. Chutiang bawkin, Bible bu pum pui hi zirtîr siam nâna min ṭanpuitu kan hmanraw hman ber a ni.
5. Rawngbâwltu hlawhtling tak ni tûr chuan, Pathian Lehkha Thu lâk chhuah mai bâkah eng nge kan tih ngai?
5 Paula chuan Pathian Thu fel taka hmannaah chuan a thu lâk chhuah mai bâk a tel tih a hria a. Mite chu a “thlêm” ṭhîn a ni. (Tirhkohte 28:23) Engtin nge a thlêm ṭhîn? Paula chuan Pathian Thu ziah chhuah chu mi tam takte’n Lalram thutak an pawm nân hlawhtling takin a hmang a, a chhûtpui ṭhîn a. Ephesi khuaa inkhâwmna inah Paula chuan thla thum lai “Pathian ram kawng thu-ah chuan mi a hnial a, mi a thlêmthlu ṭhîn a. . . . A ṭhen an tihmawh a, an âwih duh loh va,” a ṭhen erawh chuan an ngaithla thung a ni. Ephesi khuaa a rawngbâwlna avângin, “Lalpa thu chu a darh a, a hneh ta zêl a.”—Tirhkohte 19:8, 9, 20.
6, 7. Engtin nge Paula’n a rawngbâwlna a chawimawi a, engtin nge kan chawimawi ve theih?
6 Ṭhahnemngai taka Lalram chanchin puangtu a nih angin, Paula chuan a ‘rawngbâwlna a chawimawi’ a ni. (Rom 11:13, 14) Engtin nge a chawimawi? Mahni intihlâr a ngaihven lo va, vântlâng hriata Pathian hnathawhpui anga hmingthan lah a zahpui hek lo. Chutih a hnêkin, a rawngbâwlna chu chawimawina sâng ber angin a ngai zâwk a ni. Paula chuan Pathian Thu chu thiam tak leh hlawhtling takin a hmang a. A rawngbâwlna hlawhtling tak chuan mi dangte a chawk tho va, an rawngbâwlnaa inhmang lehzual tûrin a tur a ni. Hetiang zâwng pawh hian, a rawngbâwlna chu chawimawiin a awm a ni.
7 Paula ang bawkin keini pawhin kan rawngbâwlna chu Pathian Thu hlawhtling taka hmang ziahin kan chawimawi ve thei a. Kan thlawhhma rawngbâwlna kawng engkimah hian, kan tum ber chu a theih anga tam mite hnêna Pathian Lehkha Thu hrilh a ni tûr a ni. Engtin nge chu chu thlêm chunga kan tih theih? Hêng kawng pawimawh tak tak pathumte hi ngaihtuah teh: (1) Zahna neihtîr thei tûr zâwnga Pathian Thu lama ngaihsakna kawih pên. (2) Bible-in a sawite thiam taka hrilhfiah leh i thusawi lai nêna a inkûngkaih dân kawhhmuh. (3) Mi hmin thei tûr zâwnga Pathian Lehkha Thu chhûtpui, tihte hi.
8. Tûn laiah Lalram thuhrilna hmanrua engte nge kan neih a, chûngte chu engtin nge i hman hlawm?
8 Tûn laia Lalram chanchin puangtute chuan Paula’n a rawngbâwl laia a neih phâk loh hmanruate an nei a. Chûng zîngah chuan lehkhabute, magazine-te, brochure-te, handbill-te, tract-te, leh audio leh video cassatte-te a tel a ni. Kum zabi liamta tîr lamah chuan, thuziak târ lanna lehkhate, thingremzaitheite, aurinna invuah motorte, leh radio station-te hman a ni bawk. Mahse, kan hmanraw neih ṭhat ber chu Bible hi a ni a, he hmanraw pawimawh tak hi a nihna tûr ang taka kan hman ṭangkai a ngai a ni.
Kan Rawngbâwlna Chu Pathian Thuah A Innghat Tûr A Ni
9, 10. Pathian Thu hman dân chungchângah, Paula’n Timothea a fuihna aṭangin eng nge kan zir theih?
9 Engtin nge Pathian Thu chu hmanraw ṭangkai tak anga kan hman theih ang? Paula’n a thawhpui Timothea hnêna a hrilh: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tih thu zâwmin. (2 Timothea 2:15) “Thutak thu fel taka hmang” tihah chuan engte nge tel?
10 “Fel taka hmang” tih sawi nâna hman Grik thu mal awmzia tak chu “ngîl taka tan” emaw, “kawng ngîl taka tan” emaw tihna a ni a. Paula’n Timothea a fuihna he thu mal hi Thuthlung Thar bua a lanna awmchhun a ni. He mi thu vêk hi lo neituin ngîl taka a lo a leh dân sawi nân pawh a hman theih bawk. Hnuhma ngîl lo taka lei leh chu lo nei mi tân thil zahthlâk a ni ngei ang. ‘Hnathawktu zak lo’ ni tûrin, Timothea chu Pathian Thu zirtîrna dik pênsan lo tûra hriattîr a ni a. A zirtîrna chu ama ngaih dân a thununtîr tûr a ni lo. A thu hrilh leh zirtîrte chu Pathian Lehkha Thuah a innghat tlat tûr a ni. (2 Timothea 4:2-4) Chutiang kawng chuan, mi rilru ṭha pute chu khawvêl lam finna pawm lo va, Jehova ngaih dân la zâwk tûra zirtîr an ni ang. (Kolossa 2:4, 8) Tûn laiah pawh chutiang tho chu a ni.
Kan Nungchang A Ṭha Tûr A Ni
11, 12. Pathian Thu fel taka kan hman chungchângah kan nungchangin eng nghawng nge a neih theih?
11 A thutak puanchhuahna hmanga Pathian Thu dik taka kan hman mai bâkah, kan nungchang nên pawh a inrem tûr a ni. “Pathian hnathawhpuite kan ni si a,” hnathawktu vervêk tak kan ni tûr a ni lo. (1 Korinth 3:9) Pathian thu chuan heti hian a sawi a ni: “Nang, mi dangte zirtîrtu, nangmah i inzirtîr lo maw? Nang, mi rûk ru lo tûra hrilhtu, nangin i ru ṭhîn maw? Nang, mi uirê lo tûra hrilhtu, nangin i uirê ṭhîn maw? Nang, milem hawtu, nangin milem biak ina thilte i ru ṭhîn maw?” tiin. (Rom 2:21, 22) Chuvângin, tûn laia Pathian hnathawktute kan nih angin, Pathian Thu fel taka kan hman dân kawng khat chu he fuihna: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” tih zawm hi a ni.—Thufingte 3:5, 6.
12 Pathian Thu fel taka hmanna aṭangin a rah chhuah eng nge kan beisei theih? Mi thinlung ṭhate nuna Pathian Thu-in thil a tihtheihzia hi ngaihtuah rawh.
Pathian Thuin Mi Thlâk Danglam Theihna A Nei
13. Pathian Thu nunpuina chuan mi nunah eng nge a rah chhuah theih?
13 Thuneitua pawm a nih phawt chuan, Pathian Thu chuan mite nun thlâk danglam tûrin thiltihtheihna nasa tak a nei a. Paula chuan Pathian thu thiltihtheihna chu a hmuin, hmân lai Thessalonika khuaa Kristian lo ni tate chunga nghawng ṭha a neih dânte a hmu a ni. Chuvângin, an hnênah heti hian a sawi: “Bâng lovin Pathian hnênah lâwmthu kan hrilh bawk ṭhîn, Pathian thu kan hnên ata in hriat, in pawm lai khân, mihring thu pawmin in pawm lo va, Pathian thu pawmin in pawm zâwk avâng khân; chu chu Pathian thu a ni rêng a, nangni a ringtute chhûnga thawk bawk ṭhîna chu a ni,” tiin. (1 Thessalonika 2:13) Chûng Kristiante—Krista hnungzuitu dik zawng zawngte—tân chuan mihringte finna chu Pathian finna chungnung ber nêna khaikhin theih a ni lo. (Isaia 55:9) Thessalonika mite chuan “thu chu hrehawm tuar chungin, thlarau thianghlim lâwmin” an pawm a, ringtu dangte tân entawn tûr an lo nih phah a ni.—1 Thessalonika 1:5-7.
14, 15. Engti fakauvin nge Pathian Thua thu inziakte chuan thil a tih theih a, engvâng nge?
14 Pathian Thu chuan a lo Chhuahna, Jehova ang bawkin thil a tithei êm êm a ni. Chu chu a thupêk hmanga ‘vânte siamtu,’ “Pathian nung” hnên aṭanga lo kal a ni a, chu thupêk chu ‘a tirhnaah a hlawhtling’ ṭhîn. (Sâm 33:6; Hebrai 3:12; Isaia 55:11) Bible lama mi thiam pakhat chuan: “Pathian chu a Thu aṭangin a inla hrang lo va. Amah nêna inzawmna nei lo thil ang hrimin a hnâwl lo. . . . Chuvângin, a thu chu thil engmah tih nei lovin a awm ngai lo va, a sawi tawh chuan nghawng nei lovin a awm ngai hek lo; Pathian nung nên a inzawm tlat avângin,” tiin a ziak a ni.
15 A nih leh, Pathian Thu aṭanga lo chhuak thute chu engti fakauva thiltithei nge ni? A thiltihtheihzia chu nasa tak a ni. Chuvângin, Paula chuan inhmeh takin: “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni,” tiin a ziak a ni.—Hebrai 4:12.
16. Eng angin nge Pathian Thuin mi a thlâk danglam ṭhak theih?
16 Pathian Thua thu inziakte chu “khandaih hriam tawn eng ang ai pawhin a hriam” a. Chuvângin, mihring siam hmanraw engpawh aiin nasa takin thil a chhun tlang thei a ni. Pathian Thu chuan mihring chhûngril ber pawh a chhunin, chhûngrilah a inthlâk danglamtîr thei a, a thil ngaihtuah dân leh a ngainat zâwngte a nghawngin, Pathian pawm zâwng hnathawktuah a siam thei a ni. Hmanraw thiltithei chu a va ni tehlul êm!
17. Pathian Thuin mi a thlâk danglam theih dân hrilhfiah rawh.
17 Pathian Thu chuan mi mahni a inngaih dân emaw, mi dangte hmuha a inlantîr chin emaw piah lama chhûngrila a nihna tak tak chu a hai lang a ni. (1 Samuela 16:7) Mi suaksual takngial pawhin a châng chuan a nihna dik tak chu thupin, hmangaihna ngah hmêl tak emaw, sakhaw mi tak emawah a inlantîr thei a. Mi sualte chu tum ṭha lo tak neiin an inthup ṭhîn. Mi chapote pawh mite ngaihsân hlawh nân a derin an inngaitlâwm ṭhîn bawk. Nimahsela, Pathian Thu chuan thinlunga nihna tak tak chu hai langin, mi inngaitlâwmte chu mihring hlui hlîp a, “mihring thar, thutak felna leh thianghlimna Pathian anga siam khân inthuam” tûrin a chêttîr thei a ni. (Ephesi 4:22-24) Pathian Thu zirtîrna chuan mi zakzum tak pawh Jehova Thuhretu huaisen tak leh ṭhahnemngai taka Lalram chanchin puangtuah a siam thei bawk a ni.—Jeremia 1:6-9.
18, 19. Hêng paragraph-te emaw, thlawhhma rawngbâwlnaa i thiltawn emaw ṭanchhanin, Pathian Lehkha Thu thutakin mi rilru put hmang a tihdanglam theih dân sawi rawh.
18 Pathian Thuin mi a thlâk danglam theihna chuan hmun tina mite chungah nghawng ṭha a nei a. Entîr nân, Cambodia ram Phnom Penh khuaa Lalram chanchin puangtute chuan Kompong Cham bialah thla tin vawi hnih zêl thu an hril a. Pastor dangte’n Jehova Thuhretute an sawichhiat thu a hriatin, tualchhûng pastor pakhat chuan an biala Thuhretute an lo kal leh huna lo kawm chu a tum ta a. Ni serh chungchâng zawhna tam tak zâwtin, Pathian Lehkha Thu aṭanga a chhânna an pêkte chu ngun takin a lo ngaithla kar a. Chutah: “Tûnah chuan ka pastor nihpuite’n in chanchin an sawi hi a dik lo tih ka hre ta! Bible in hmang lo an ti a; mahse, tukina in hmanraw hman chhun chu Bible chauh a ni si!” tiin a sawi chhuak a ni.
19 Chu hmeichhe pastor chuan Thuhretute nêna Bible sawihona chu a chhunzawm zêl a, pastor nihna aṭanga bâna an vauna pawh a pawisa lo. Chûng Pathian thu an sawihote chu a ṭhiannu hnênah a hrilh chhâwng a, chu nu pawh chuan Thuhretute nên Bible an zir ta bawk a ni. Ani chu a thil zirah chuan a phûr khawp mai a, ṭum khat biak ina a inkhâwm laiin, “Ti r’u, Jehova Thuhretute nên Bible zir ve rawh u!” a ti chhuak hial a ni. A hnu lawkah chuan, tûn hmaa pastor lo ni ṭhîn leh mi dangte chuan Jehova Thuhretute nên Bible an zir ṭan ta a ni.
20. Engtin nge Ghana rama hmeichhe pakhat thiltawn chuan Pathian Thuin thiltihtheihna a neihzia a târ lan?
20 Pathian Thuin thil a tihtheihzia chu Ghana rama hmeichhe pakhat, Paulina-i chungah pawh hian a lang a. Ani chu hun bikima Lalram chanchin puangtu pakhatin Chatuan Nunnaa Hruaitu Hriatna tih lehkhabu hmangin Bible a zirpui a. * Paulina-i chuan mi pasal a ṭawmpui kha a ni a, tûnah chuan a insiamṭhat a ngai tih a hre ta a; mahse, a pasal leh a chhûngte zawng zawng chuan do tak têin an do a ni. A pu, high court rorêltu leh an kohhrana upa ni bawk chuan Matthaia 19:4-6 thu hi dik lo taka hmang kualin tihbeidawn a tum a. Rorêltu chu a dik viau niin a lang a; mahse, Paulina-i chuan Setana’n Isua Krista a thlêm laia Pathian Lehkha Thu a kawih her ang chiah niin a hre nghâl thuai a. (Matthaia 4:5-7) Chutah inneihna chungchânga Isua thusawi chiang tak mai, Pathianin mipa pakhat leh hmeichhiate siam lovin, mipa leh hmeichhia a siam tih te, an pathum ni lovin an pahnihin tisa pumkhat an lo ni ang a tihte chu a hre chhuak bawk a. Tichuan, a thutâwp siamah chuan a ding nghet tlat a, a tâwpah chuan nupui pakhat aia tam neih theihna dân hnuaiah inṭhen phalna a hmu ta nge nge a ni. Tichuan, Lalram chanchin puangtu baptisma chang a lo ni ta thuai a ni.
Pathian Thu Fel Takin Hmang Zêl Rawh
21, 22. (a) Lalram chanchin puangtu kan nih angin, eng nge tih kan tum tlat duh? (b) A dawta thuziakah eng nge kan zir dâwn?
21 Pathian Thu chu mi dangte’n Jehova an hnaih theih nâna an nun thlâktleng tûra kan ṭanpui nân, hmanraw thiltithei tak a ni tak zet a ni. (Jakoba 4:8) Hnathawktu themthiam takin hna ṭha taka a thawh theih nâna hmanrua a hmang ang bawkin, Pathian hna min tuk Lalram thu puannaah Pathian Thu, Bible hi thiam taka kan hman theih nân, theihtâwp chhuah i tum tlat ang u.
22 Engtin nge Bible hi zirtîr siam rawngbâwlnaah thiam lehzualin kan hman theih ang? Kan hman theih dân kawng khat chu, zirtîrtu mi rilru hneh theihna neih a ni. A dawta thuziak hian mi dangte’n Lalram thuchah an pawm theih nâna zirtîr leh ṭanpui dân tûr a kawhhmuh avângin, i lo ngaihven dâwn nia. (w03 11/15)
[Footnote]
^ par. 20 Jehova Thuhretute chhuah.
I Hre Chhuak Thei Em?
• Lalram chanchin puangtute tân eng hmanruate nge hmuh theiha awm?
• Eng kawngin nge Paula chu Lalram rawngbâwltu entawn tlâk tak a nih?
• Pathian Thu fel taka hmannaah hian eng nge tel?
• Jehova Thu hi engti kauva hmanraw thiltithei nge ni?
[Zirlai Atâna Zawhnate]
[Phêk 20-naa milemte]
Lalram chanchin puanchhuahnaa Kristiante hmanraw hman ṭhenkhat