Jehova Thu Chu A Nung

Genesis Bu Aṭanga Thu Pawimawh Hrilhfiahna​—⁠I

“GENESIS” tih chu “a bul” emaw, “piang” emaw tihna a ni a. He hming hi lei leh vân awm ṭan dân te, he leilung mihringte luah tûra buaisaih a nih dân te, mihringte chuta an awm ṭan dân te nêna inkûngkaih lehkhabu atân a inhmeh hle a ni. Mosia’n he lehkhabu hi Sinai thlalêrah a ziak a, B.C.E. 1513-ah a zofel a nih a rinawm hle.

Genesis bu hian Tuilêt hma khawvêl chanchin te, Tuilêt hnu lam hun inṭan laia thilthleng te, leh Pathian Jehova’n Abrahama te, Isaaka te, Jakoba te, leh Josefa te a dâwr dân min hrilh a. He thuziak hian Genesis 1:​1–11:9 chhûnga thu pawimawhte a hril dâwn a, a tlângpui thuin Jehova’n hnam thlahtu Abrahama a dâwr ṭan thlengin a ni ang.

TUILET HMA KHAWVEL

(Genesis 1:​1–7:24)

Genesis châng bul inṭanna, “atîrin,” tih chuan kum kalta kum tlûklehdingâwn sâng tam tak, kan chhiarsên loh chu a kâwk a ni. Thil siam “ni” ruk chhûnga thilthleng, thil siam hun chhûng bîkte chu, mihringte thlîr dân tûr aṭanga hrilhfiah a ni a. A ni rukna tâwp dâwnah, Pathianin mihring a siam a ni. Mihring thuâwih lohna avângin Paradis chu hloh thuai ni mah se, Jehova’n beiseina a pe a. Bible-a hrilh lâwkna hmasa ber chuan sualna rah chhuahte rawn sût a, Setana lu rawn tithitlingtu tûr “thlah” chungchâng a sawi a ni.

Chu mi hnu kum 1600 chhûng chu, Setana chuan Abela te, Enoka te, leh Nova te ang mi rinawn tlêm tê tih loh mihring zawng zawng chu Pathian aṭangin a kal pêntîr thei a. Entîr nân, Kaina chuan a unaupa mi fel tak Abela chu a that a. Zah pah lo takin, “LALPA hming [Jehova] chu an lo lam ṭan ta” niin a lang a ni. Chûng laia tharum thawhna rilru put hmang tilangin, Lameka chuan mahni invên nêna tlangvâl a thah dân hla thu a phuah a. Pathian fapa vântirhkoh thuâwih lote chuan leia hmeichhiate nupui anga rawn neiin, Milianho (Nephilim) tia koh tharum thawh chîngte an hrin avângin dinhmun chu a chhe tawlh tawlh a ni. Mahse, mi rinawm Nova chuan lawng a tuk a, mi dangte hnênah Tuilêt lo thleng tûr chanchin chu huaisen takin a hrilh a, chu chhiatna lakah chuan an chhûngkuain an him a ni.

Bible Chungchâng Zawhnate Chhânna:

1:​16​—⁠Pathianin ni li nîah êntute a siam chauh a nih si chuan, engtin nge ni khat nî khân êng a siam theih? Genesis bung 1, châng 16-a Hebrai ṭawng ʽa·sahʹ aṭanga lehlin “siam” (make) tih hi châng 1, 21, leh 27-a Hebrai ṭawng ba·raʼʹ aṭanga lehlin “siam” (create) tih nên a inang lo va. “Vân” pawh tiamin êntute chu “ni khatna” inṭan hma daih hun rei taka siam a ni tawh a. Mahse, an êng chuan lei hi a chhun pha lo va. Ni khat nîa “êng a lo awm” chhan chu êng nêm tak chuan chhûm a chhun tlang avângin, lei aṭangin a hmuh theih ta a ni. Lei a inher avângin chhûn leh zân inkârthlâkin a lo awm ta a ni. (Genesis 1:​1-3, 5) Lei aṭangin êng lo chhuahna chu a la hmuh theih loh ta cheu va. Amaherawhchu, thil siam ni linaah chuan, inthlâkthlengna langsâr tak a lo awm ta a. Nî te, thla te, leh arsite chu “lei chung ên” tûra siam an lo ni ta a. (Genesis 1:17)  Chûng chu lei aṭanga hmuh theih tûrin “Pathianin . . . a siam” a ni.

3:8​—⁠Pathian Jehova’n Adama chu hmaichhanah a bia em? Bible chuan Pathianin mihringte a biak hian, vântirhkoh kal tlangin a be ṭhîn tih a târ lang a. (Genesis 16:​7-11; 18:​1-3, 22-26; 19:1; Rorêltute 2:​1-4; 6:​11-16, 22; 13:​15-22) A fapa neih chhun, “Thu” tia koh chu, Pathian tâna thusawitu ber a ni. (Johana 1:⁠1) Pathian chuan Adama leh Evi chu “Thu” kal tlanga a biak a rinawm hle.​—⁠Genesis 1:​26-28; 2:16; 3:​8-13.

3:​17—Eng kawngin nge lei hian ânchhia a dawn a, eng chen nge a dawn? Lei hian ânchhia a dawng tih awmzia chu thlai chîn a harsa hle dâwn tihna a ni a. Lei hian ânchhia a dawn avângin, leia ṭo hlîng leh buarte chuan Adama thlah, Nova pa, Lameka chu a nghawng nasa hle a, ani chuan ‘Lalpa ânchhe lawh lei avânga kan hna thawhna leh kuta kan thawh rimna’ chungchâng a sawi a ni. (Genesis 5:29) Tuilêt hnu chuan, Jehova chuan Nova leh a fapate chu mal sâwmin, lei luahkhat tûra A thiltum chu a sawi leh a ni. (Genesis 9:⁠1) Pathianin lei ânchhia a lawh chu a tâwp ta ni berin a lang a ni.​—⁠Genesis 13:10.

4:​15​—⁠Engtin nge Jehova’n Kaina chu “a chhinchhiah”? Bible-in Kaina taksa khawi laiah mah a chhinchhiah thu a sawi lo va. Chu chhinchhiahna chu phuba laa an thah loh nâna mi dangte’n an hriat tûr leh an zawm tûr, thupêk khun tak a nih a rinawm hle.

4:​17​—⁠Kaina nupui chu khawia mi nge? Adama chuan “fanu leh fapate a nei” a. (Genesis 5:⁠4) Chuvângin, Kaina chuan a farnu emaw, a vahnu pakhat khat emaw chu nupuiah a nei a ni. A hnuah, Pathian Dân chuan Israel-te chu pianpui unaunu leh unaupate innei lo tûrin a khap a ni.​—⁠Leviticus 18:⁠9.

5:​24​—⁠Eng kawngin nge Pathianin ‘Enoka chu a lâk bo’? Enoka chu mi kut tuara thih mai hlauhawm dinhmunah a ding niin a lang a; mahse, Pathian chuan a hmêlmate kut tawrhtîr chu a phal lo. Tirhkoh Paula chuan “Enoka kha thihna hre lo tûra lâk bovin a awm a,” tiin a ziak a. (Hebrai 11:⁠5) Hei hi Pathianin nung reng tûrin vânah a hruai tihna a ni lo. Isua chu vâna lâwn hmasa ber a ni. (Johana 3:13; Hebrai 6:​19, 20) Enoka chu “thihna hre lo tûra lâk bovin a awm” tih thu chuan Pathianin Enoka chu inlârnaa a rilru zawng zawng a pêktîr laiin, a nunna a tihtâwpsak tihna a ni thei ang. Chutiang dinhmunah chuan, Enoka chuan a hmêlmate kut a tuar lo va, “thihna [a] hre” hek lo.

6:6​—⁠Eng kawngin nge Jehova chu mihring a siam avângin “a inchhîr” tih theih a nih? “Inchhîr” tia lehlin Hebrai thu mal hian rilru put hmang emaw, thiltum emaw inthlâkthlengna a kâwk a. Jehova chu ṭha famkim a nih avângin, mihring a siamnaah thil tihsual palh a nei lo va. Amaherawhchu, Tuilêt hmaa chhuante suahsualna chungchângah a rilru put hmang a thlâk a ni. An suahsualna a duh loh avângin, Pathianin a rilru chu mihringte Siamtu nihna ata tiborâltuah a thlâk a ni. Mihring ṭhenkhat a humhimna chuan a inchhîrna chu mi sualte chungah chauh a ni tih a lang a ni.​—⁠2 Petera 2:​5, 9.

7:​2, 3​—⁠Eng ṭanchhanin nge sa thiang leh thiang lo thliar a nih? A ṭanchhan ber chu ei tlâk leh tlâk loh lam ni lovin, inthâwi nâna hman tlâk leh tlâk lovah niin a lang. Tuilêt hma khân, mihringte’n sa an ei ngai lo va. Sa ei “thiang” leh “thiang lo” thliarna chu Mosia Dân aṭang chauhvin a lo awm ṭan a chu dân chu tihbo a nih khân chûng khapnate pawh chu a tâwp ve nghâl a ni. (Tirhkohte 10:​9-16; Ephesi 2:15) Nova chuan Jehova biaknaa hman tlâk tûr chu a hria niin a lang a. Lawng ata a chhuah veleh, “Lalpa tân maichâm a siam a; tin, sa thiang tinrêng zînga mi leh sava thiang tinrêng zînga mi a la a, maichâmah chuan hâlral thilhlante a hlân ta a.”​—⁠Genesis 8:20.

 7:​11. Khawia tui hian nge khawvêl pum huapa Tuilêt thlentîr? Thil siam hun hnihna emaw, “nî” hnihna emaw chhûnga “boruak zau tak” siam a nih khân, ‘boruak zau tak hnuaiah’ leh ‘boruak zau tak chungah’ tui a lo awm a. (Genesis 1:​6, 7) A “hnuaia” tui awmte chu leia tui awmte a ni a. A “chunga” tuite chu lei chunga lêng tui hu tam tak, “tui thûk zau tak” siamtu hi a ni. Chûng tuite chu Nova hun laiin leiah a rawn tla thla a ni.

Kan Zir Tûrte:

1:​26. Pathian anpuia siam an nih avângin, mihringte chuan Pathian miziate lantîr theihna an nei a. Min siamtu Pathian chu ngaihtuahin, hêng mizia hmangaihna te, zahngaihna te, ngilneihna te, ṭhatna te, leh dawhtheihnate chu neih kan tum tlat tûr a ni.

2:​22-​24. Inneihna chu Pathian ruahman a ni a. Pasal chhûngkaw lû a nihna nupa inphuarna chu nghet tak leh thianghlim tak a ni.

3:​1-5, 16-23. Hlimna chu kan mi mal nuna Jehova lalchungnunna kan hriatnaah a innghat a ni.

3:​18, 19; 5:5; 6:7; 7:23. Jehova thu chu a thleng dik fo.

4:​3-7. Abela chu rinna nei mi fel a nih avângin, Jehova chu a thil hlanah a lâwm a ni. (Hebrai 11:⁠4) Kawng leh lamah chuan, a thiltihin a târ lan angin, Kaina chuan rinna a tlachham thung. Itsîkna te, huatna te, leh tualthahna te’n a târ lan angin, a thiltihte chu a sual a ni. (1 Johana 3:12) Chu bâkah, a thil hlan chu rilru tak taka ti lêm lovin, a hming maiin a hlân a ni thei bawk ang. Jehova hnêna fakna inthawina kan hlan chu rilrua tih tak zetna leh rilru put hmang leh nungchang ṭha hian a thlâwp tûr a ni lâwm ni?

6:​22. Lawng tuk zawh nân kum tam tak ral mah se, Nova chuan Pathianin thu a pêk ang chiah chiahin a ti a. Chuvângin, Nova leh a chhûngte chu Tuilêt ata chhandam an ni. Jehova chuan a Thu ziak hmangin mi a bia a, a inawpna pâwl hmangin min kaihhruai a. A thu ngaihthlâk leh awih chu kan ṭhatna tûr a ni.

7:​21-​24. Jehova chuan mi felte chu mi suaksualte rualin a tiboral lo.

MIHRINGTE HUN THARAH AN LUT

(Genesis 8:1–​11:9)

Tuilêt hmaa awm khawvêl a tâwp khân, mihringte chu hun tharah an lût a. Mihringte chu sa ei phalna pêk an ni a; mahse, thisen laka inthiar fihlîm tûra tih an ni. Jehova chuan tualthatte thahlêt chu a pawm a, Tuilêt dang a thlentîr tawh dâwn lo tih tiam nân, chhimbâl thuthlung a siam a ni. Nova fate pathum chu mihring hnam zawng zawng thlahtute an lo ni a; mahse, a tupaa tupa Nimroda chu “LALPA hmaah chuan sa pêl mi chak tak” a lo ni a. Leiah mipuite awm darh ai chuan, mite chuan an hmingthan nân Babel in sâng chu sak an tum a. Jehova’n an ṭawng a tihhransak a, khawvêl puma a tihdarh khân, an thiltumte chu a hlawhchham ta a ni.

Bible Chungchâng Zâwhnate Chhânna:

8:​11​—⁠Tuilêt avânga thingkûngte a mang vek si chuan,  khawi aṭangin nge ṭhuroin oliv hnah a hmuh? Thil ni thei pahnih a awm a. Oliv chu thing tlo tak a nih avângin, Tuilêt chhûng khân tui hnuaiah thla engemaw zât damin a awm reng a ni thei a. Tuilêt tui a kiam khân, tuiin a chîmpil oliv thing chu lei chârah lo awm lehin, a hnahte a rawn chhawr leh thei a ni. Nova hnêna oliv hnah lo thiartu ṭhuro chuan tuilêt tui a kiam hnua olive ṭiak hnah no chu a rawn la a ni thei bawk ang.

9:​20-​25​—⁠Engvângin nge Nova’n Kanaana chu ânchhia a lawh? Kanaana chuan a pu Nova chungah thiam lohna engemaw a nei a nih a rinawm hle. Chu chu Kanaana pa, Hama chuan hmu mah se, inrawlh a hnêkin a thehdarh ta zâwk a ni. Amaherawhchu, Nova fapa dang pahnih, Sema leh Japhetha chuan an pa chu an khuh a. Chuvângin, anni chu malsâwmin a awm a, Kanaana erawh chu ânchhia lawhin a awm a, a fapa chunga thilthleng zahthlâk tak chu Hama pawhin a tuar ve a ni.

10:​25​—⁠Engtin nge Pelega dam laiin lei hi ‘ṭhena’ a awm? Pelega chu B.C.E. 2269 aṭangin 2030 thlengin a dam a. Pelega “dam lai” chuan a ni, Jehova’n Babel satute ṭawng tihhransak a, lei chung zawng zawnga ṭhendarha inṭhenna ropui tak a awmtîr ni. (Genesis 11:⁠9) Chuvângin, Pelega hun lai chuan “lei [a nih loh leh, leia mipuite] hi ṭhenin” an awm a ni.

Kan Zir Tûrte:

9:1; 11:⁠9. Tu ma ruahmanna emaw, thawhrimna emawin Jehova thiltumte a dang chat thei lo.

10:​1-​32. Bible-a Tuilêt hma leh hnua thlahtute chhuina pahnih​—⁠bung 5 leh 10​—⁠chuan mihring zawng zawng chu mi hmasa ber Adama nên, Nova fate pathum kal tlangin a thlunzawm a ni. Assuria te, Kaldai te, Suria te, Arab hnam te chu Sema thlahte an ni a. Ethihopia te, Aigupta te, Kanaan te, Africa leh Arab hnam ṭhenkhatte chu Hama tlahte an ni a. Indo-European te chu Japhetha thlahte an ni. Mihring zawng zawng chu an inchhûng vek a, Pathian hmaah an inang tlâng vek a ni. (Tirhkohte 17:26) He thudik hian, mi dangte kan thlîr dân leh kan cheibâwl dân a nghawng tûr a ni.

Pathian Thu Chuan Thil A Ti Thei

Genesis bu hmasa lamah hian, mihring awm ṭantirh lam chanchin dik awmchhun chu a chuang a. Hêng aṭang hian, Pathianin leia mihringte a dah chhan, a tum chu kan hre thiam a ni. Chu a thiltum thlen famkimna chu Nimroda ang mi, mihring tumahin an dang chat thei lo tih hriat chu a va thlamuanthlâk tak êm!

Theocratic Rawngbâwlna School-a zir tûr inpuahchah nâna chawlhkâr tin Bible chhiar tûrte i chhiar hian, “Bible Chungchâng Zawhnate Chhânna” tih thupui hnuaia târ lante ngaihtuahna chuan Bible thu khirh ṭhenkhat hrethiam tûrin a ṭanpui ang che. “Kan Zir Tûrte” tih hnuaia thute chuan chawlhkâr tin Bible chhiarte i hlâwkpui theih dân a kawhhmuh ang che. A remchân hunah chuan, Rawngbâwlna Inkhâwma tualchhûng mamawhte sawi hunah thusawi ṭanchhan tûr a ni thei bawk. Jehova Thu chu a nung tak meuhvin, kan nunah thil a ti thei tak zet a ni.​—⁠Hebrai 4:⁠12. (w04 1/01)