Jehova Hmangaihna Rinawm Nasa Tak Chu
Jehova Hmangaihna Rinawm Nasa Tak Chu
“LALPA chu . . . ngilneihna nasa tak nei a ni.”—SAM 145:8.
1. Pathian hmangaihna chuan eng chen nge a huap?
“PATHIAN chu hmangaihna a ni.” (1 Johana 4:8) He thu thlamuanthlâk tak hian Jehova rorêl dân chu hmangaihnaa innghat a ni tih a târ lang a ni. Tihah chuan, a thuâwih lote pawhin hmangaih taka a pêk nî leh ruah chu an hlâwkpui vek si a! (Matthaia 5:44, 45) Pathianin khawvêl mihringte a hmangaih avângin, a hmêlmate pawh an inlamlêtin, a lam an hawi thei a, nunna an chang thei a ni. (Johana 3:16) Amaherawhchu, nakin lawkah amah hmangaihtute’n felna khawvêl thara chatuan nunna an neih theih nân, Jehova chuan mi suaksual siam ṭhat rual loh chu a tiboral hlen dâwn a ni.—Sâm 37:9-11, 29; 2 Petera 3:13.
2. Jehova’n a hnêna inpumpêk inlaichînna neite tân eng ang hmangaihna ṭha bîk nge a lantîr?
2 Amah betu dikte tâna Jehova lantîr hmangaihna chu a hluin, a daihrei a. Chûng hmangaihna chu Hebrai thu mal “hmangaih-ngilneihna” emaw, “hmangaihna rinawm” emawa lehlin hmanga sawifiah a ni a. Hmân lai Israel Lal Davida chuan Pathian hmangaih-ngilneihna chu a hlut tak zet a ni. A thiltawn leh Pathianin mi dangte a cheibâwl dân a chhûtna avângin, Davida chu ringngam takin: “LALPA chu . . . ngilneihna [“hmangaih-ngilneihna/hmangaihna rinawm,” NW] nasa tak nei a ni,” tiin a zai thei a ni.—Sâm 145:8.
Pathian Mi Rinawmte Hmuchhuakin
3, 4. (a) Engtin nge Sâm 145 chuan Jehova mi rinawmte hre hrang tûra min ṭanpui? (b) Engtin nge Pathian mi rinawmte’n amah an “fak”?
3 Pathian Jehova chungchângah, zâwlnei Samuela nu, Hani chuan: “A mi thianghlimte [“mi rinawmte,” NW] ke chu a vêng ang,” tiin a sawi a ni. (1 Samuela 2:9) Tute nge chûng “mi rinawmte” chu? Lal Davida’n a chhâng a ni. Jehova mize ropui tak takte a chawimawi zawh hnuah: “Mi thianghlimte [“mi rinawmte,” NW] pawhin an fak ang che,” tiin a sawi a. (Sâm 145:10) Mihringte’n Pathian an fak theih dân chu amah chawimawina hmangin a ni.
4 An hmuite amah chawimawi nâna an hman avângin, Jehova mi rinawmte chu hriat hran theih an ni. Khawtlâng inkawmna leh Kristian inkhâwmnaa an sawi ber chu eng nge ni? Dik takin, Jehova Lalram chanchin hi a ni! Pathian chhiahhlawh rinawmte chuan: “[Jehova] ram ropuizia thu sawiin, i thiltihtheihna thu chu tîtîah an la hmang ang,” tih hla satu Davida rilru chu an ṭâwmpui ve a ni.—Sâm 145:11.
5. Engtin nge a mi rinawmte’n amah an chawimawina chu Jehova’n a ngaithla tih kan hriat theih?
5 A mi rinawmte fakna chu Jehova’n a ngaithla em? Ngaithla e, an thusawi chu a ngaihsak a ni. Kan huna biakna dik chungchâng hrilh lâwkin, Malakia chuan: “Tichuan, LALPA ṭihtute chu an inbe tlânga: LALPA chuan a lo ngaithla a, a lo hria a, LALPA ṭihtute leh a hming ngaihsaktute tân hriat rengna lehkhabu chu a hmâah ziak a ni ta a,” tiin a ziak a ni. (Malakia 3:16) A mi rinawmte’n amah an chawimawiin, Jehova chu a lâwm a, anni chu a hre reng a ni.
6. Eng thiltihin nge Jehova mi rinawmte hre hrang tûra min ṭanpui?
6 Jehova chhiahhlawh rinawmte chu an huaisenna leh Pathian dik be lote hnêna thu an hrilh ṭan avânga hriat hran theih an ni bawk. Dik takin, Pathian mi rinawmte chuan “mihring fate hnênah a thiltih ropui takte leh, a ram mawina ropuizia [an] hriattîr” a ni. (Sâm 145:12) Mi dangte hnêna Pathian lalna chungchâng sawi nân hun remchâng apiang i hmang em? Boral mai tûr mihring sawrkâr ang lo takin, a lalna chu chatuan daih a ni. (1 Timothea 1:17) Mite’n Jehova chatuan lalna chungchâng an zir leh an thlâwp chu a hmanhmawhthlâk hle a. Davida chu: “I ram chu chatuan ram tûr a ni a, i thu neihna chu chhuan awm chhûng zawng zawngin a awm reng ang,” tiin a zai a ni.—Sâm 145:13.
7, 8. Kum 1914-ah eng nge thleng a, engin nge a Fapa Lalram hmangin Pathianin ro a rêl mêk tih finfiah?
7 Kum 1914 aṭangin, Jehova lalna chungchâng sawi lehzual chhan tûr a awm a. Chu mi kum chuan, Pathianin Davida Fapa, Isua Krista chu Lalah siamin, vân lam Messia Lalram chu a din a. Chutiang chuan, Jehova’n Davida lalna chu chatuan atâna tinghetin, a thutiam a hlen ta a ni.—2 Samuela 7:12; Luka 1:32, 33.
8 Tûnah, a Fapa Isua Krista Lalram hmangin Jehova’n ro a rêl tih chu Isua lo awm leh chhinchhiahna lo thleng famkim zêlte aṭang hian a hmuh theih a ni. Chu chhinchhiahna langsâr ber chu, Isua’n Pathian mi rinawm zawng zawngte tâna a sawi lâwk hna: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih hi a ni. (Matthaia 24:3-14) Pathian mi rinawmte chuan ṭha hnemngai taka chu hrilh lâwkna an tihfamkim avângin, a hmei a pate, leh a pui a pang mi maktaduai ruk chuangte chuan engtikahmah thawhnawn leh ngai tawh loh tûr he hna hi an thawk mêk a. Jehova Lalram dodâltu zawng zawngte tân tâwpna chu a lo thleng thuai ang.—Thu Puan 11:15, 18.
Jehova Lalchungnunna Hlâwkpuina
9, 10. Jehova leh mihring rorêltute inkârah eng danglamna nge awm?
9 Kristian inpumpêk kan nih chuan, Lal Chungnungber Jehova nêna kan inlaichînna chuan hlâwkna tam tak min pe a. (Sâm 71:5, 116:12) Entîr nân, Pathian kan ṭih a, fel taka thil kan tih avângin, a pawm tlâk kan niin, thlarau lamah amah kan hnaih a ni. (Tirhkohte 10:34, 35; Jakoba 4:8) Inkalh tak maiin, mihring rorêltute chu mi challangte nên an inkawp tih kan hmu fo va, chûngte chu sipai hotute, sumdâwngtu mi hausate, a nih loh leh infiamna leh intihhlimna lama mi hmingthangte an ni. Africa ram Sowetan chanchinbuin a sawi dânin, sawrkâr mi lian pakhat chuan a rama mi retheite awmna vêng chungchâng chu heti hian a sawi a: “Chutiang hmuna kan kal duh loh chhan ka hria. Chutiang dinhmun a awm tih theihhngilh kan duh vâng a ni. Chu chuan kan chhia leh ṭha hriatna a tibuai a, kan motor khalh man to tak takte chuan inthiam lohna min neihtîr a ni,” tiin.
10 Dik takin, mihring rorêltu ṭhenkhatte chuan an khua leh tuite ṭhatna tûr chu an ngaihtuah tak zet a. Mahse, chutianga rorêltu fakawm tak takte pawhin an khua leh tuite chu an hre chiang tak tak lo. Heti hian kan zâwt mai thei: A khua leh tui zawng zawngte’n buaina an tawh huna ṭanpui vattu tûr rorêltu tuemaw an awm em? tiin. Awm e. Davida chuan: “LALPA chuan tlute zawng zawng chu a chelh reng ṭhîn a, kun ngawih ngawiha awm zawng zawngte chu a kaitho ṭhîn,” tiin a ziak a ni.—Sâm 145:14.
11. Eng fiahna nge Pathian mi rinawmte’n an tawh a, eng ṭanpuina nge an neih?
11 An ṭhat famkim loh avâng leh Setana, “mi sual” thu thua awm he khawvêla an awm avângin, Pathian Jehova mi rinawmte chuan fiahna leh hrehawmna tam tak an tawng a ni. (1 Johana 5:19; Sâm 34:19) Kristiante chuan tihduhdahna an tâwk a. Ṭhenkhat chuan natna benvawn an vei emaw, lu an sûn emaw a. A châng chuan, Jehova mi rinawmte chu an thil tihsual avânga lunghnualin an ‘kûn ngawih ngawih’ mai thei a. Amaherawhchu, eng ang fiahna pawh tâwk mah se, Jehova chu a mite hnêm tûrin leh thlarau lam chakna pe tûrin a inpeih reng a ni. Lal Isua Krista pawhin a khua leh tui rinawmte chungah chutiang bawk ngaihsakna chu a nei a ni.—Sâm 72:12-14.
A Hun Taka Chaw Lungawithlâk Tak
12, 13. Engtiang khawpa ṭhain nge Jehova’n “thil nung zawng zawng” mamawh chu a pêk?
12 A hmangaih-ngilneihna nasa tak avângin, Jehova chuan a chhiahhlawhte mamawh zawng zawng chu a phuhrûksak a. Chutah chuan chaw ṭha hmanga tihtlai pawh a tel a ni. Lal Davida chuan: “[Jehova] thil siam zawng zawng mitte chuan an nghâk ṭhîn che a ni; nangin a hun takah an chaw i pe ṭhîn. I kut i phar a, thil nung zawng zawng châkna chu i tihrehsak ṭhîn,” tiin a ziak a ni. (Sâm 145:15, 16) Hun harsa tak kârah pawh, Jehova chuan a mi rinawmte’n ‘ni tin ei khawp chaw’ an neih theih nân thil awm dân a her kawi thei a ni.—Luka 11:3; 12:29, 30.
13 Davida chuan nungchate pawh tiamin “thil nung zawng zawng” te châkna chu tihrehsak a ni dâwn tih a târ lang a. Leiah leh thufinriatah thlai tam tak ṭotîr lo se chuan, tui chhûnga thil nungte, savate, leh leia nungchate chuan hîp luh tûr oxygen emaw, ei tûr chaw emaw an nei dawn lo a ni. (Sâm 104:14) Mahse, Jehova chuan an mamawh zawng zawng a phuhrûk a ni.
14, 15. Engtin nge tûn laiah thlarau lam chaw chu pêk chhuah a nih?
14 Nungchate ang lo takin, mihringte chuan thlarau lam mamawh an nei a. Jehova’n a mi rinawmte thlarau lam mamawh a phuhrûk dân chu a va ropui êm! Isua’n a thih hmain “bawi rinawm, fing tak” chuan a hnungzuitute tân thlarau lam chaw “a hun apianga” a pêk tûr thu a tiam a. (Matthaia 24:45) Tûn laiah, hriak thih mi 144,000 la bângte hmangin bawi pâwl chu din a ni a. Anmahni kal tlangin, Jehova’n thlarau lam chaw hnianghnâr takin min pe tak zet a ni.
15 Entîr nân, Jehova mite zînga a tam zâwk chuan anmahni ṭawng ngeiin Bible lehlin thar leh dik tak chu an hlâwkpui a ni. New World Translation of the Holy Scriptures chu malsâwmna ropui a va ni êm! Chu bâkah, Bible zirna ṭanpuitu maktaduai têl chu ṭawng 300 aia tamin chhut chhuah zêl a ni a. Hêng thlarau lam chaw zozaite hi khawvêl puma Pathian betu dikte tân malsâwm a ni. Hêng zawng zawng avâng hian tuin nge chawimawi phu? Pathian Jehova’n a phu a ni. A hmangaih-ngilneihna ropui tak avângin, bawi pâwl chu ‘a hun taka chaw’ a pêk theihtîr a ni. Chûng chawte hmangin, tûn lai thlarau lam paradis-a “thil nung zawng zawng châkna” chu tihrehsak an ni. Tin, Jehova chhiahhlawhte chu he leia paradis tak tak lo thleng tûr beiseina avângin an va hlim tak êm!—Luka 23:42, 43.
16, 17. (a) A hun taka thlarau lam chaw a lo thleng tih entîrna eng nge awm? (b) Engtin nge Sâm 145-na chuan Setana siam chhuah thu buai pawimawh ber chungchânga Pathian mi rinawmte rilru chu a târ lan?
16 A hun taka thlarau lam chaw kan dawnzia entîrna lang sâr tak hi han ngaihtuah teh. Kum 1939 chhûngin Europe khawmualah Indopui II-na chu a inṭan a. Chu mi kum vêk, November 1 Vênnainsâng-ah chuan a thupui “Tualdâwihna” tih chu chhuah a ni a. Chu hriattîrna chiang tak avângin, khawvêl puma Jehova Thuhretute chuan hnamte indonaah tualdâwih a ṭûl tih an hriat phah a ni. Chuvângin, kum ruk chhûng indonaa sawrkâr lehlam ve vete chu an chungah an thinur phah a. Khapbeh leh tihduhdah an ni chung pawhin, Jehova mi rinawmte chuan Lalram chanchin ṭha chu an hril zawm zêl a ni. Kum 1939 aṭanga 1946 chhûngin, za zêla 157-a pungin, mak takin malsâwmna an dawng a. Chu bâkah, chu indo hun chhûnga an rinawm tlatna chuan mite chu sakhaw dik hre hrang tûrin a ṭanpui bawk a ni.—Isaia 2:2-4.
17 Jehova thlarau lam chaw pêk chhuah chu a hun taka pêk a nih mai bâkah, a lungawithlâk hle bawk a ni. Indopui II chhûnga ram leh ram nasa taka an indo laiin, Jehova mite chu anmahni mi mal chhandamna aia pawimawh zâwk daih thil engemaw ngaihsak tûra ṭanpui an ni a. Jehova chuan thu buai pawimawh ber, lei leh vân zawng zawng kaihhnawih Jehova Lalchungnunna chungchâng chu hre thiam tûrin a ṭanpui a ni. Jehova thuhretu mi mal tinte chuan Jehova lalchungnunna thiam chantîrna leh Diabola chu dâwt pa a nihzia finfiahnaah chanvo engemaw an nei ṭheuh tih hriat hi a va lungâwithlâk tak êm! (Thufingte 27:11) Jehova leh a rorêlna sawi chhetu Setana ang lo takin, Jehova mi rinawmte chuan vântlâng hmaah: ‘Jehova chu a awm dân zawng zawngah a fel,’ tiin an puang chhunzawm zêl a ni.—Sâm 145:17.
18. Thlarau lam chaw chu a hun tak leh lungawithlâk tak a nihzia tûn hnaiah eng entîrna nge awm?
18 A hun taka thlarau lam chaw lungawithlâk tak entîrna dang leh chu, kum 2002/03 chhûng khawvêl puma neih “Ṭhahnemngai Taka Lalram Chanchin Puangtute” District Inkhâwmpui hmun za tam taka tlâng zarh Draw Close to Jehovah tih lehkhabu hi a ni. He lehkhabu hian, Sâm 145-a târ lante pawh tiamin, Pathian Jehova mize ropui takte a thlûr a, “bawi rinawm, fing tak” buatsaih, Jehova Thuhretute chhuah a ni. He lehkhabu ṭha tak hian Pathian mi rinawmte chu amah hnaih lehzual tûra ṭanpuina kawngah kawngro a su ngei ang.
Jehova Hnaih Lehzual Hun
19. Eng hun pawimawh tak nge lo thleng ṭêp tawh a, chu chu engtin nge kan hmachhawn theih ang?
19 Jehova lalchungnunna thu buai chinfel hun pawimawh tak chu a hnai tawh hle a. Ezekiela bung 38-a hrilh lâwk angin, nakin lawkah Setana chuan “Magog rama mi . . . Goga” nihna chu a rawn chelh pumhlûm ang a. Chutah chuan khawvêl zawng zawnga Jehova mite beihna chu a tel ang. Chu chu Setana’n Pathian mi rinawmte rinawmna tihchhiat tuma theihtâwp chhuaha a ṭanna a ni bawk ang. Tûn hma zawng aiin, Jehova betute chuan a hming tih tak zeta an lam a, a ṭanpuina dîla an auh hial a ngai dâwn a ni. Jehova an zahna leh amah an hmangaihna chu a thlâwn mai dâwn em ni? Hnai lo ve, Sâm 145 chuan: “LALPA chuan a kotu zawng zawngte chu a hnaih ṭhîn a. Tih tak zeta amah kotu zawng zawngte chu. Amah ṭihtute duh chu a hlawhtlintîr ang a; an au thâwm a hria ang a, anni chu a chhandam ang. LALPA chuan amah hmangaihtute zawng zawng chu a vawng ṭha ṭhîn a; mi suaksual erawh chu a tiboral vek ang,” tia a sawi avângin.—Sâm 145:18, 20.
20. Engtin nge Sâm 145:18-20 thute chu nakin lâwkah a lo thlen dik dâwn?
20 Jehova hnaih theihna leh mi suaksual zawng zawng a tihboral huna a chhanchhuah theihna kan tawn chu a va phûrawm dâwn êm! Chu hun pawimawh takah chuan, Jehova chuan “tih tak zeta amah kotu” te chauh chu a ngaithla ang. Mi vervêkte chu a ngaithla dâwn lo a ni. Pathian Thu chuan mi suaksualte’n hun tâwp dâwn hnaiha Pathian hming an lam chu a thlâwn ṭhîn tih chiang takin a târ lang a ni.—Thufingte 1:28, 29; Mika 3:4; Luka 13:24, 25.
21. Engtin nge Jehova mi rinawnte chuan a hming thianghlim hman chu nuam an tihzia an târ lan?
21 Tûn hma zawng aiin, tûn hi Jehova ṭihtute’n ‘tih tak zeta amah an koh’ hun a ni a. A mi rinawmte chuan an ṭawngṭainaah leh inkhâwmnaa chhânna an pêk hunah a hming lam chu nuam an ti a ni. Pathian thianghlim chu mi mal titinaah an hmang a. An vântlâng rawngbâwlnaah Jehova hming chu huaisen takin an puang bawk a ni.—Rom 10:10, 13-15.
22. Engvângin nge khawvêl rilru put hmang leh châknate do reng chu a pawimawh?
22 Pathian Jehova nêna kan inlaichînna ṭangkaipui zêl tûr chuan, thlarau lam thil tichhe thei hausak âtchilhna te, intihlimna ṭha lo te, ngaihdam duh lohna te, a nih loh leh tlachhamte ngaihsaklohna te kan do reng a pawimawh bawk a ni. (1 Johana 2:15-17; 3:15-17) Siam ṭhat a nih loh chuan, chûng thil ûmnate leh miziate chuan sual lian tak tihna a thlen thei a, a tâwpah Jehova pawmna pawh min hlohtîr thei a ni. (1 Johana 2:1, 2; 3:6) A chunga kan rinawm reng chauhvin, Jehova’n hmangaih-ngilneihna, a nih loh leh hmangaihna rinawm chu kan chungah a lantîr zêl dâwn tih hriat chu a finthlâk a ni.—2 Samuela 22:26.
23. Eng beiseina ropui takin nge Pathian mi rinawm zawng zawng chu nghâk reng?
23 Chuvângin, Jehova mi rinawm zawng zawngte chan tûr, beiseina ropui tak chu i ngaihtuah reng ang u. Chutianga kan tih chuan, Jehova chu “ni tin” leh ‘kumkhaw tlaitluana’ lâwm a, fak a, chawimawitute zîngah kan tel thei ang. (Sâm 145:1, 2) Chuvângin, ‘chatuan nunna neihtîrna khawp Pathian hmangaihnaah chuan i invawng ṭha ang u.’ (Juda 20, 21) Amah hmangaihtute chunga a lantîr a hmangaih-ngilneihna ropui tak pawh tiamin, kan Pa vâna mi mize ropui takte kan hlâwkpui zêl rualin, kan ngaihtuahna chu Davida’n Sâm 145-a a târ lan hnukhârna thute ang i nihtîr reng ang u: “Ka kâ hian LALPA fakna thu a sawi ang; tin, tîsa zawng zawng hian i hming thianghlim chu kumkhaw tlaitluanin fak rawh se.” (w04 1/15)
Engtin Nge I Chhân Ang?
• Engtin nge Sâm 145 hian Pathian mi rinawmte hre hrang tûra min ṭanpui?
• Engtin nge Jehova’n ‘thil nung zawng zawng châkna chu a tihrehsak’?
• Engvângin nge Jehova kan hnaih lehzual a ṭûl?
[Zirlai Atâna Zawhnate]
[Phêk 25-naa milem]
Jehova chhiahhlawhte chuan an hmêlhriat lohte chu huaisen takin a lalna ropui tak chungchâng zir tûrin an ṭanpui
[Phêk 26-naa milemte]
Jehova’n “thil nung zawng zawng” tân chaw a pe
[Milem Hawhtîrtu]
Nungchate: Parque de la Naturaleza de Cabárceno