Jehova Ropuizia Chu Chhui Chhuah Rual A Ni Lo
Jehova Ropuizia Chu Chhui Chhuah Rual A Ni Lo
“LALPA chu a ropui a, nasa taka fak tûr a ni; A ropuizia chu chhui chhuah rual a ni lo.”—SAM 145:3.
1, 2. Davida chu eng ang mi nge a nih a, Pathian nêna khaikhinin, engtin nge a inhmuh?
SAM 145-na phuahtu hi, hmân lai mi challang tak a ni a. Tleirâwl a nih laiin, râlthuam pu mi hrawl tak pakhat chu hmachhawnin, a that a ni. Râldo thiam lal a nih angin, fakna hla phuahtu chuan a hmêlma tam takte chu a hneh a. A hming chu Davida a ni a, hmân lai Israel lal pahnihna a ni. A thih hnu thlengin a hming chu a dai lo va, chuvângin tûn laiah pawh mi tam takin an hria a ni.
2 Davida chu a hlawhtling hle nachungin, a inngaitlâwm a ni. Jehova chungchângah heti hian a zai a ni: “I vân, i kut chhuakte, thla leh arsi i ruathote khi, ka ngaihtuah châng chuan, ‘mihring hi eng nge maw a niha, i hriat reng ṭhin ni? Mihring fapa pawh hi eng nge maw a nih a, i kan ṭhin ni?’ ka ti ṭhîn,” tiin. (Sâm 8:3, 4) Ropui taka inngaih ai chuan, Davida chuan Jehova chu a hmêlma zawng zawng laka chhanchhuaktu anga pawmin, Pathian hnênah: “Nangin i chhandamna phaw chu mi pe bawk a: i inngaihtlâwmnain mi siam lian ta,” tiin a sawi a. (2 Samuela 22:1, 2, 36) Jehova chuan thil tisualtute hnêna zahngaihna lantîrna hmangin inngaihtlâwmna a lantîr a, Davida chu Pathian phu loh ngilneihna avângin a lâwm hle a ni.
‘Lalber Ka Pathian Ka Chawimawi Ang’
3. (a) Davida’n Israel lal nihna chungchângah eng thlîr dân nge a neih? (b) Davida’n eng chenin nge Jehova fak a duh?
3 Davida chu Pathian lal ruat mah ni se, Jehova chu Israel Lal dik tak angin a thlîr a. Davida chuan: “LALPA, ram chu i ta a ni a, mi zawng zawnga chungnung ber i ni,” a ti a ni. (1 Chronicles 29:11) Davida chuan Pathian Rorêltu nihna chu a va zah tak êm! “Aw Lalber, ka Pathian, ka chawimawi ang chia: i hming hi kumkhaw tlaitluanin ka fak ang. Ni tin ka fak ang chia; i hming hi kumkhaw tlaitluanin ka fak ang,” tiin a zai a ni. (Sâm 145:1, 2) Pathian Jehova nilêng leh kumkhaw tlaitluana fak chu Davida duhzâwng tak a ni.
4. Sâm 145 hian eng puhna dik lote nge a laih lan?
4 Sâm 145 hi Setana puhna, Pathianin a thil siamte hnêna zalênna pe lovin, hmasial takin ro a rêl tih chhân lêtna thil ti thei tak a ni. (Genesis 3:1-5) He fakna hla hian Setana dâwt sawi, Pathian thuâwihtute chuan Pathian an hmangaih vâng ni lovin, hlâwkna hmuh an tum vânga âwih an ni tih chu a hai lang bawk. (Joba 1:9-11; 2:4, 5) Davida angin, tûn laia Kristian dikte chuan Diabola puhna dik lote chhânna chu an pe a ni. Pathian chu kumkhaw tlaitluana fak an duh avângin, Lalram rorêlna hnuaia an chatuan nun beiseina chu an hlut hle. Maktaduai tam takte chuan Isua tlanna inthawinaa rinna hmangin leh hmangaihna avânga inpumpêka baptisma changa thuâwih taka Jehova rawngbâwlna hmangin, amah chu an fak ṭan dêr tawh a ni.—Rom 5:8; 1 Johana 5:3.
5, 6. Jehova chawimawi leh fak tûrin eng hun remchângte nge awm?
5 A chhiahhlawh kan nih angin, Jehova chawimawi leh fak theihna hun remchâng tam tak kan neihte chu ngaihtuah rawh. A Thu, Bible-a kan thu chhiar engemawin kan rilru a khawih hle hunah, ṭawngṭaiin chutiang chuan kan ti thei a ni. Pathianin a mite a dâwr dânin kan rilru a khawih hunah emaw, a thil siam ropui engemaw tak avânga kan lâwm hunah emaw lâwm taka fak leh lâwm thu sawina kan nei thei a. Kan rinpuite nêna Kristian inkhâwmnaahte emaw, mi mala kan titinaah emaw a thiltumte kan sawiho hian, Pathian kan chawimawi bawk a ni. A nihna takah chuan, Pathian Ram atâna kan “thil tih ṭhatte” chuan Jehova a fak a ni.—Matthaia 5:16.
6 Tûn hnaia thil tih ṭhatahte chuan, ram retheia awm Jehova mite tâna Kingdom Hall sak a tel a ni. Tam tak chu ram danga mi rinpuite sum leh pai ṭanpuina hmanga sak a ni a. Kristian ṭhenkhat chuan mahni inpea Kingdom Hall saknaa telna hmangin ṭanpuina an pe bawk a ni. Tin, thil tih ṭhat zawng zawngte zînga pawimawh ber chu ram chanchin ṭha hrilhna hmanga Jehova fak hi a ni. (Matthaia 24:14) Fakna hla 145-na châng tâwp lamin a târ lan angin, Davida chu Pathian rorêlna avângin a lâwm a, ani chuan a ropuizia chu hriain, A lalna chu a chawimawi a ni. (Sâm 145:11, 12) Davida ang bawkin hmangaih taka Pathian rorêl dân avângin i lâwm em? Mite hnênah A Lalram chanchin i hrilh ziah bawk em?
Pathian Ropuizia Entîrnate
7. Jehova fak nachhan tûr bul ber sawi rawh.
7 Sâm 145:3 hian Jehova fak nachhan tûr bul ber a pe a. Davida chu: “LALPA chu a ropui a, nasa taka fak tûr a ni; a ropuizia chu chhui chhuah rual a ni lo,” tiin a zai a ni. Jehova ropuina chuan ramri a nei lo. Mihringte zawn chhuah rual, hriatthiam rual, a nih loh leh teh theih rual a ni lo. Mahse, Jehova ropuizia chhui chhuah rual loh entîrnate ngaihtuahna chu kan hlâwkpui tak zet dâwn a ni.
8. Vânlâwt chuan Jehova ropuina leh thiltihtheihna chungchâng eng nge a târ lan?
8 Khawpui êng tak chhuahsan a, zân thiang taka vân lam i hawi chhoh lai hriat chhuah han tum teh. Boruak thim taka arsi tam tak hmuh chu mak i ti lo maw? Chûng vân lam thil siam zawng zawng chuan a ropuina avânga Jehova fak tûrin a chêttîr che a ni lâwm ni? Mahse, i hmuh chu lei pawh tiamin arsi hlâwm (galaxy) zînga a them tê chauh a ni. Chu bâkah, arsi hlâwm tlûklehdingâwn za aia tam a awm a, chûng zîngah chuan enhlatna hmang lovin pathum chauh a hmuh theih a. Dik tak chuan, vânlâwt siamtu arsi chhiarsên lohte leh arsi hlâwmte chuan Jehova thiltihtheihna leh a ropuina chhui chhuah rual loh chu a târ lang tak zet a ni.—Isaia 40:26.
9, 10. (a) Isua Krista nêna inkûngkaihin, Jehova ropuina hmêlhmang eng nge târ lan a nih? (b) Engtin nge Isua thawhlehna chuan kan rinna a nghawng ang?
9 Jehova ropuina hmêlhmang dang—Isua Krista chungchâng—chu han ngaihtuah teh. A Fapa siam a, hun rei tak chhûng A “mi themthiam” anga a hmanna chuan, Pathian ropuizia a târ lang a ni. (Thufingte 8:22-31) Jehova hmangaihna ropuizia chu mihringte tâna a Fapa mal neih chhun tlanna inthawina atâna a pêknaah hian a lang chhuak a. (Matthaia 20:28; Johana 3:16; 1 Johana 2:1, 2) Mihringte hriatthiam phâk bâkin, Jehova chuan Isua hnênah thlarau taksa ropui tak leh tihchhiat theih loh chu a thawhleh khân a pe a ni.—1 Petera 3:18.
10 Isua thawhlehnaah chuan Jehova ropuizia chhui chhuah rual loh hmêlhmang mak tam tak a tel a. Pathianin thil siam hmuh theihte leh hmuh theih lohte a siamna kawnga Isua’n hriatna a neih chu a pe kîr ang tih rinhlelh rual a ni lo. (Kolossa 1:15, 16) Hêngah hian, thlarau thil siam dangte, vânlâwt te, lei ram ṭha tak te, leh leilunga nunna nei zawng zawngte a tel vek a ni. Mihring a nih hmaa vân lam leh lei lam nun chanchin a hriatna zawng zawng a pêk kîr bâkah, Jehova chuan mi ṭha famkim anga leia a thiltawnte a hriatna chu Isua hnênah a pe kîr leh bawk a ni. A ni, Jehova ropuizia chhui chhuah rual loh chu Isua thawhlehnaah a lang a ni. Chu bâkah, chu thiltih ropui tak chu mi dangte thawhlehna a theihzia tiamkamtu a ni a. Chu chuan Pathianin a hriatrengna ṭha famkima a dah ṭhat, thi tawh mi maktaduai tam takte chu a tinungleh thei tih kan rinna a tichak tûr a ni.—Johana 5:28, 29; Tirhkohte 17:31.
Thiltih Mak Tak leh Chak Tak
11. C.E. 33 Pentikost nî khân, Jehova’n eng thiltih ropui nge a tih ṭan?
11 Isua thawhlehna aṭangin, Jehova chuan thiltih ropui leh mak dang tam tak a ti tawh a. (Sâm 40:5) C.E. 33 Pentikost nî khân, Jehova chuan thlarauva hriak thih Krista zirtîrte hmanga din hnam thar, “Pathian Israelte” chu a din a. (Galatia 6:16) Ropui tak maiin, chu thlarau lam hnam thar chu a hun laia ram zawng zawngah a darh zau a ni. Isua tirhkohte thih hnua Kristianna ram awmtîrtu kalpênna lo awm mah se, Jehova chuan a thiltumte a thlen famkim theih nân, thiltih makte chu a tih chhunzawm zêl a ni.
12. Khawvêl ṭawng lian tham zawng zawnga Bible hmuh theih a nihna hian eng nge a târ lan?
12 Entîr nân, Bible bu pum chu humhalh a ni a; a tâwpah chuan, tûn lai khawvêla ṭawng lian tham zawng zawnga lehlin chhuah vek a ni. Bible chu dinhmun harsa leh Setana mite kut tawrh hlauhawm tak hnuaia lehlin a ni tlângpui ṭhîn. Ṭawng 2,000 chuanga Bible lehlin hi, a ropuizia chhui chhuah rual loh Pathian Jehova duhzâwng ni lo se chuan, tih theih rual a ni lo ang le!
13. Kum 1914 aṭangin, a Lalram thiltumte nêna inkûngkaihin, Jehova ropuizia chu eng anga tihlan nge a nih?
13 A Lalram thiltum chungchângah pawh Jehova ropuina chu a lang a. Entîr nân, kum 1914 khân, a Fapa, Isua Krista chu vân Lalber a nihtîr a. Chu mi hnu lawk chuan, Isua’n Setana leh a ramhuaite chu a do a ni. Anni chu vân aṭangin leia paih thlâk an ni a; leilâwta khung an nih hun chu an nghâk a ni. (Thu Puan 12:9-12; 20:1-3) Chuta ṭang chuan, Isua hnungzuitu hriak thihte chuan tihduhdahna an tuar nasa lehzual a. Mahse, hmuh theih lohva Krista lo awmlehna hun chhûngin, Jehova chuan anni chu a chhawmdâwl a ni.—Matthaia 24:3; Thu Puan 12:17.
14. Kum 1919 khân, Jehova’n eng thiltih ropui nge a tih, chu chuan eng nge a hlen chhuah?
14 Kum 1919-ah chuan, Jehova chuan a ropuina Thu Puan 11:3-11) Chûng kum aṭang chuan, hriak thihte chuan vâna din tawh Lalram chanchin ṭha chu ṭhahnemngai takin an puang a. Hriak thih dangte chu, mi 144,000 a kim theih nân lâkkhâwm an ni. (Thu Puan 14:1-3) Tin, Isua hnungzuitu hriak thihte hmangin, Jehova chuan mi fel pâwl, “lei thar” lungphum chu a phum ṭan a. (Thu Puan 21:1) Mahse, hriak thih rinawmte chu vâna an kal vek hnuah “lei thar” chu engtin nge a awm ang?
târ langtu thilmak dang a ti leh a. Isua hnungzuitu hriak thihte chu thlarau lama an thihna ata a kai harh a ni. (15. Eng hnaah nge hriak thih Kristiante’n hma an hruai a, eng nge a rah chhuah?
15 Kum 1935, August 1 leh August 15-a chhuak he chanchinbua thuziak pawimawhahte chuan, Thu Puan bung 7-a târ lan, “mipui tam tak” chungchâng chu a tel a. Hriak thih Kristiante chuan, hêng hnam tin zînga mi te, chi tin zînga mi te, mi tin zînga mi te, ṭawng tin zînga mi te chu zawng chhuakin, an ṭhian Pathian chibai an bûkpuite lo ni tûrin ṭhahnemngai takin an zawng ṭan a ni. He “mi pui tam tak” chuan “lei thar” khua leh tui mi hlun anga Paradis-a chatuana nun beiseina neiin, “hrehawm nasa tak” lo thleng tûrah an dam khawchhuak ang. (Thu Puan 7:9-14) Hriak thih Kristiante’n Lalram thuhrilhna leh zirtîr siamna kawnga hma an hruai avângin, mi maktaduai 6 chuang chuan lei lam paradis-a tâwp nei lo nun beiseina an nei tawh a ni. Setana leh a khawvêl chhe tak dodâlna hnuaia chutianga punna avângin tuin nge kan fak phu? (1 Johana 5:19) Hêng zawng zawng hi Jehova chauhvin, a thlarau thianghlim hmangin a ti thei a ni.—Isaia 60:22; Zakaria 4:6.
Jehova Chawimawina Ropui Tak
16. Engvângin nge mihringte’n ‘Jehova chawimawina ropui tak’ chu a ngial a ngana an hmuh theih loh?
16 An “thiltih mak” leh “chak tak” te chu engpawh ni se, Jehova’n a theihnghilh ngai dawn lo. Davida chuan: “Chhuan khatin chhuan dang hnênah i thiltihte chu an fak chhâwng zêl ang a. I thiltih ropui takte chu an hriattîr ang. Nangmah chawimawina ropui tak leh, I thilmak tihte chu ka ngaihtuah ang. Miten i thiltih râpthlâk takte chakzia chu an sawi ang a; kei pawhin i ropuizia ka hriattîr bawk ang,” tiin a ziak a ni. (Sâm 145:4-6) A nih leh, “Pathian chu Thlarau” a ni a, mihring mita hmuh theih a nih loh avângin, Davida’n Jehova chawimawina ropui tak chungchâng chu eng chen nge a hriat theih ang?—Johana 1:18; 4:24.
17, 18. Engtin nge Davida chuan ‘Jehova chawimawina ropui tak’ ngaihhlutna a neih theih?
17 Pathian chu hmu thei lo mah se, Davida tân chuan Jehova ropuina hlut chhan tûr a awm a. Entîr nân, Pathian Lehkha Thu-a chhinchhiah Pathian thiltih chak tak, khawvêl pum pui tui tihlêtna hmanga khawvêl suaksual a tih boralna ang chite chu a chhiar thei a. Davida chuan Pathianin Aigupta sal tânna aṭanga Israel-te chhuahtîrin, Aigupta pathian dik lote a tihmualpho dân pawh a zir ngei ang. Chûng thilthlengte chuan Jehova ropuina a târ lang a ni.
18 Davida’n Pathian ropuina a hlutna chu Pathian Lehkha Thu a chhiarna mai ni lovin, chûngte rilrua a chhût ngunna aṭanga a neih a ni tih chu rinhlelh rual a ni lo. Entîr nân, Jehova’n Israelte Dân a pêk laia thilthlengte chu a chhût mai thei a. Khawpuite a ri a, kâwlte a phe a, chhûm a zîng chhah mup a, tawtawrâwt ring takin a ri bawk a ni. Sinai Tlang chu a khuin a nghîng dur dur a. Tlâng bula awmkhâwm Israelte chuan Jehova’n vântirhkoh pakhat hmanga mei leh chhûm zîng ata an hnêna “Thu Sâwm Pêk” a sawi chu an hre hial a nih kha. (Deuteronomy 4:32-36; 5:22-24; 10:4; Exodus 19:16-20; Tirhkohte 7:38, 53) Jehova ropuina lan chhuahna a va ni tak êm! Hêng thute rilrua chhûttu, Pathian Thu hmangaihtute chu ‘Jehova chu ropui taka chawimawi’ tûra chêttîrin an awm ngei ang. Tûn laiah hian, Jehova ropuizia kan thinlunga nemkaitu, inlârna ropui takte telna Bible chu a bu pumin kan nei a ni.—Ezekiela 1:26-28; Daniela 7:9, 10; Thu Puan, bung 4.
19. Engin nge Jehova ropuina kan hlutna chu tipung ang?
19 Pathian ropuina Davida rilrua nemkaitu dang leh chu, Israelte hnêna Pathian dân a pêkte a zirna hi a ni. (Deuteronomy 17:18-20; Sâm 19:7-11) Jehova Dânte zawmna chuan Israel hnamte chu a chawimawiin, mi dang zawng zawng zîng ata a tihrang nalh a. (Deuteronomy 4:6-8) Davida chunga a thlen angin, Pathian Lehkha Thu kan chhiar ziah a, chûng thute rilrua kan chhût ngûn bawk a; tin, taima taka kan zirna chuan Jehova ropuina kan ngaihhlutna chu a tipung ang.
Pathian Miziate Chu A Va Ropui Em!
20, 21. (a) Sâm 145:7-9 hian eng mizia nên nge Jehova ropuizia a târ lan? (b) Heta Pathian mize târ lante hian amah hmangaihtu zawng zawngte chungah eng nghawng nge a neih?
20 Kan lo hmuh tawh angin, Sâm 145 a châng hmasa parukte chuan a ropuina chhui chhuah rual loh nêna inkûngkaih thilte avânga Jehova kan fak chhan tûrte min pe a. Châng 7-na aṭanga châng 9-na chuan a miziate avânga Pathian ropuizia a târ lang a ni. Davida chu: “I ṭhatna ropui tak an hriat reng chu an sawi ang a, i felna thu hi hlim takin hlaah an sa ang. LALPA chu mi khawngaih thei, lainatnaa khat; thinnel, ngilneihna nasa tak nei a ni. LALPA chu engkim chungah pawh a ṭha a ni; a lainatnate chu a thil siam zawng zawng chungah a awm a,” tiin a zai a ni.
21 Hetah hian Davida chuan Jehova ṭhatna leh felna—Diabol-Setana’n a cho miziate chu a târ lang hmasa phawt a. Hêng miziate hian Pathian hmangaihtute leh a rorêlna hnuaia intulût zawng zawngte chungah eng nghawng nge a neih? Awle, Jehova ṭhatna leh fel taka a rorêlna chuan amah be tute chungah hlimna nasa tak a thlen avângin, an fak tâwp thei lo a ni. Chu bâkah, Jehova chu “engkim chungah” a ṭha a ni. Hei hian mi tam tak chu inlamlêt a, a tlai luat hmaa Pathian dik betu lo ni tûra a ṭanpui chu kan beisei a ni.—Tirhkohte 14:15-17.
22. Engtin nge Jehova’n a chhiahhlawhte a cheibâwl?
22 Davida pawhin Pathianin “[Mosia] hma lamah chuan a kal pêl a, ‘LALPA chu, LALPA chu, Pathian lainatnaa khat, mi khawngaih thei tak, thin nel tak, ngilneihna leh thu tak ngah,’” a nihzia amah ngeiin a sawi chu a hlut bawk a ni. (Exodus 34:6) Chuvângin Davida chuan: “LALPA chu mi khawngaih thei, lainatnaa khat; thinnel, ngilneihna nasa tak nei a ni,” tiin a puang chhuak thei a ni. Jehova ropuizia chu chhui chuah rual ni lo mah se, ani chuan a chhiahhlawh mihringte chu ngilnei taka cheibâwlna hmangin a chawimawi a ni. Khawngaihnaa khat a ni a, thil sual titu inchhîrte chu Isua tlanna inthawina zâra ngaih dam chu a peih a ni. Jehova chu a thinnel bawk a ni, a felna khawvêl thara an luhna tûr dang thei an chak lohnate hneh theihna hun remchâng a pêk avângin.—2 Petera 3:9, 13, 14.
23. Eng mize hlu tak nge a dawta thuziakah kan ngaihtuah dâwn?
23 Davida chuan Pathian hmangaih-ngilneihna, a nih loh leh hmangaihna rinawm chu nasa takin a fak bawk a ni. Dik takin, Sâm 145 châng la bângte chuan Jehova’n he mizia a lantîr dân leh a chhiahhlawh rinawmte’n a hmangaih-ngilneihna an chhân lêt dân a târ lang a ni. He thu hi a dawta thuziakah sawiho a ni ang. (w04 1/15)
Engtin Nge I Chhân Ang?
• “Ni tin” Jehova chawimawi nân eng hun remchângte nge awm?
• Jehova ropuizia chu chhui chhuah rual loh a nihzia târ langtu eng entîrnate nge awm?
• Jehova chawimawina ropui tak kan hlutna engtin nge kan tihpun theih?
[Zirlai Atâna Zawhnate]
[Phêk 18-naa milem]
Vânlâwta arsi hlâwm zawng zawngte chuan Jehova ropuizia an târ lang
[Milem Hawhtîrtu]
Courtesy of Anglo-Australian Observatory, photograph by David Malin
[Phêk 20-naa milem]
Engtin nge Isua Krista-ah Jehova ropuina a lan chhuah?