Bumna Lakah Invêng Rawh
Bumna Lakah Invêng Rawh
“Fîmkhur rawh u, chutilochuan tupawhin . . . bumna mai maiin râl lâkin an la dah ang che u.”—KOLOSSA 2:8.
1-3. (a) Eng entîrnate hian nge inbumna chu kan nî tin nun zawng zawng deuhthawah a tel tawh tih târ lang? (b) Engvângin nge khawvêla inbumna awmte chu mak kan tih loh vang?
“IN ZINGAH dâwrtute bumna tawng ngai lo mi engzât nge awm che u?” Kum engemaw zât kalta khân, dân lama mi thiam pakhat chuan he zawhna hmang hian ngaih dân a la khâwm a. Engtin nge an chhân lêt? Hetiang hian a sawi: “Ukil sâng tam takte zîngah pakhat chauhvin dâwrtute bum a tawng ngai lo,” tiin. Eng nge a chhan? “Chu ukil chuan company lian tak pakhat tân hna a thawk ṭan a, dâwrtu a la neih loh vang a ni.” He thiltawn hian thudik lungchhiatthlâk tak a târ lang—tûn lai khawvêlah hian dâwt leh inbumna a hluar hle tih chu.
2 Bumna chu kawng chi hrang hrangin a lo kal a, tûn lai nun dân kawng tinrêng deuhthawah a tel tawh a ni. Chanchin thehdarhnaah chuan entîrna tam tak a hmuh theih a ni—tlêm tê han sawi ila, politics khêl mite’n an thiltih chungchânga dâwt an sawi te, sum enkawltute leh ukilte’n an sumdâwnna lama hlâwkna a ni lo bâk bâka an sawi te, thil siamchhuah faktute’n a hmangtu an bum te, thu buai neite’n insurance company an bum angte hi. Chutah sakhaw lama inbumna a awm leh bawk a. Sakhaw hruaitute chuan mipuite chu thurin dik lo, thlarau thi thei lo te, hremhmun mei dîl te, leh Trinity angte zirtîrin an hruai sual a ni.—2 Timothea 4:3, 4.
3 Hêng inbumna zawng zawngte hi mak kan ti tûr a ni em? Ni lo ve. ‘Ni hnuhnûng’ chungchângah Bible chuan: “Mi sual leh tihdertute erawh chu mi bum leh buma awmin an sual zual deuh deuh ang,” tiin min hrilh lâwk a ni. (2 Timothea 3:1, 13) Kristian kan nih angin, thutak ata min hruai bo thei ngaih dân dik lote lakah kan fîmkhur hle a ngai a ni. Zawhna pahnih a chhuak nghâl mai a: Engati nge tûn laiah inbumna a tam êm êm a, engtin nge inbumna lakah kan invên theih ang?
Engvângin Nge Tûn Laiah Inbumna A Tam Êm Êm?
4. Engtin nge Bible-in khawvêla inbumna a hluar êm êm chhan a sawifiah?
4 Bible chuan tûn lai khawvêla inbumna a hluar êm êm chhan chiang takin a sawi a. Tirhkoh Johana chuan “khawvêl pumhlûm hi mi sual thu thuin a awm” tih a ziak a ni. (1 Johana 5:19) Chu “mi sual” chu Diabol-Setana a ni. A chungchângah Isua’n heti hian a sawi: “Thutakah a awm lo, a chhûngah thutak rêng a awm loh avângin. Dâwt thu a sawiin ama tihchhuah a sawi a ni ṭhîn; dawthei a ni si, dâwt pa pawh a ni,” tiin. Chuti a nih chuan, he khawvêlin a hruaitu rilru put hmang, a tehna te, leh mi bum a chînnate a lantîr chu thil mak a ni thei dâwn em ni?—Johana 8:44; 14:30; Ephesi 2:1-3.
5. Engtin nge Setana chuan he tâwpna hunah hian mi bum tuma ṭan a khawh sauh sauh va, tute nge a tum bik zual?
5 He tâwpna hunah hian, Setana chuan ṭan a khawh lehzual a. Ani chu leiah paihthlâkin a awm tawh a. Hun tlêm tê chauh a nei tawh tih a hria a, ‘a thinur êm êm’ a ni. Mihring a tam thei ang ber tihboral tum tlatin, ani chuan ‘khawvêl zawng zawng hi a bum’ a ni. (Thu Puan 12:9, 12) Setana chu a châng chânga mi bum chîng mai a ni lo. Theihtâwp chhuahin mihringte hi bum a tum char char zâwk a ni. * Ring lo mite mit tihdel nân leh Pathian laka lâk hran nân, mi bum theihna a neih zawng zawng—intihderna leh rinawm lohna pawh tiamin—a hmang vek a ni. (2 Korinth 4:4) He inbumna lalber hian “thlarau leh thutaka” Pathian betute tihchhiat tumin ṭan a khawh nasa zual bîk a ni. (Johana 4:24, NW; 1 Petera 5:8) Setana chuan: ‘Tupawh hi Pathian lak ata ka la hrang thei,’ tiin a inchhâl tih theihnghilh ngai rêng rêng suh ang che. (Joba 1:9-12) Tûnah chuan Setana ‘ngamthlêmna’ ṭhenkhat leh chûngte laka kan invên dân tûr i lo en ang u.—Ephesi 6:11.
Kalpêngte Bumna Lakah Invêng Rawh
6, 7. (a) Kalpêngte chu eng angin nge an inchhâl mai theih? (b) Engtin nge Pathian Lehkha Thu chuan kalpêngte tum ber chu chiang taka a târ lan?
6 Setana chuan kalpêngte chu Pathian chhiahhlawhte thlêm thlûk nân hun rei tak chhûng a lo hmang tawh ṭhîn a. (Matthaia 13:36-39) Kalpêngte chu Jehova biaah leh Bible ringah an inchhâl mai thei a; mahse, a inawmpa pâwl hmuh theih chu an hnâwl si a ni. Ṭhenkhat phei chu sakhaw dik lo khawvêl lalram, “Babulon Khaw Ropui” thurin Pathian chawimawi lo lamah chuan an kîr leh hial a ni. (Thu Puan 17:5; 2 Petera 2:19-22) Pathian thâwk khumin, Bible ziaktute chuan kalpêngte rilru put hmang leh thiltih dânte laihlan nân ṭawngkam na tak tak an hmang a ni.
7 Kalpêngte tum ber chu eng nge ni? An zînga a tam zâwkte chuan dik nia an lo ngaih ṭhîn an rinna kalsan mai chu an duh tâwk lo va. An ruala mi dangte hruai ve pawh an duh ṭhîn. Kal chhuah a, anmahnia zirtîr siam aiin, kalpêng tam tak chuan “zirtîrhote [chu chu, Krista zirtîrte an ni] [an] hnêna pakaitîr” chu an tum tlat a ni. (Tirhkohte 20:29, 30) Zirtîrtu derte chungchângah, tirhkoh Paula chuan he vaukhânna thu hmanhmawhthlâk tak hi a sawi a: “Fîmkhur rawh u, chutilochuan tupawhin . . . râl lâkin an la dah ang che u,” tiin. (Kolossa 2:8) Chu chuan kalpêng tam takte tih tum chu a târ lang a ni lâwm ni? Mi rûk hmangte’n mi inrâlring lote chu an chhûngkaw zîng ata an hruai bo angin, kalpêngte chuan kohhran mi kan rin êm êmte chu awh an tum a, berâm rual zîng ata hruai bo chu an tum a ni.
8. Kalpêngte chuan an thiltum tihhlawhtlin nân eng tih dânte nge an hman?
8 Kalpêngte chuan an thiltum tihhlawhtlin nân eng tih dânte nge an hman? Thudik herhkawite, thudik chanve te, leh dâwt hul hualte chu an hmang fo a ni. Isua chuan a hnungzuitute chu “dâwta sual tinrênga . . . hêk” an ni dâwn tih a hre kar a. (Matthaia 5:11) Chutiang dodâltu sual takte chuan mi dangte bum nân thu dik lo chu an sawi ngei dâwn a ni. Tirhkoh Petera chuan mahni thiltum tihhlawhtlin nâna ‘dâwt thu’ hmang a, “inbumna” thehdarh bawk a, ‘Pathian Lehkha Thu ngai kawitu’ kalpêngte chungchângah vaukhânna a pe a ni. (2 Petera 2:3, 13; 3-15) Lungchhiatthlâk takin, kalpêngte chuan “mi ṭhenkhatte rinna an tibo” thei a ni.—2 Timothea 2:18.
9, 10. (a) Engtin nge kalpêngte buma awm lo tûra kan invên theih? (b) Engvângin nge Pathian thiltumte kan hriatthiamna chu siam ṭhat a ngaih hunah pawh kan buai loh vang?
9 Engtin nge kalpêngte bumna lakah kan invên ang? Pathian Thua ngenna: “Zirtîrna thu nangmahni zir loh lama inṭhenna leh tlûkna siamtute chu vêng ṭha tûr leh hawisan tûrin ka ngên a che u,” tih zawmin. (Rom 16:17) An ngaih dânte hnâwl ṭhakin, anni chu kan “hawisan” thei a ni—an ngaih dân chu hmai chhana hrilh kan ni emaw, lehkhabuah a ni emaw, a nih loh leh Internet emawa târ lan emaw ni mah se. Engvângin nge chutianga kan tih? A chhan bul ber chu, Pathian Thuin chutianga ti tûra min tih vâng a ni a; tin, Jehova chuan kan tâna ṭha ber tûr a ngaihtuah a ni tih kan rin tlat vâng a ni bawk.—Isaia 48:17, 18.
10 A chhan pahnihna chu, Babulon Khaw Ropui aṭanga min la hrang a, thutak hlu êm êm mai min zirtîrtu inawpna pâwl kan hmangaih vâng a ni. Chutih rual chuan, Pathian thiltum kan hriatna chu a famkim lo tih kan pawm a; kan hriatthiam dân chu siam ṭhat zêl a ni. Kristian rinawmte chuan chutiang siam ṭhatna zawng zawng atâna Jehova nghah chu an peih a ni. (Thufingte 4:18) Chutih lai chuan, Pathianin duh taka a hman a inawpna pâwl chu kan thlahthlam ngai lo vang; chu pâwl chu Pathianin mal a sâwm tih chiang takin kan hmu si a.—Tirhkohte 6:7; 1 Korinth 3:6.
Mahni Inbumna Lakah Invêng Rawh
11. Engvângin nge mihring ṭha famkim lote’n mahni inbum duhna an neih?
11 Mihring ṭha famkim lote hian Setana hman khawloh theih rilru put hmang kan nei a, chu chu mahni inbumna a ni. “Thinlung hi thil zawng zawng aiin bumhmang ber, chhe lailet dêr a ni,” tiin Jeremia 17:9 chuan a sawi a. Jakoba pawhin: “Mi tin mahni châknaa hruai bo leh hîpa an awm chuan thlêmna an tâwk a ni zâwk e,” tiin a ziak bawk. (Jakoba 1:14) Kan thinlung hi hîpa a awm chuan, chu chuan châkna sual lamah min hîp ang a, duhawm tak leh hlauhawm lo angah a chantîr ang. Chutiang ngaih dân chu inbumna a ni, suala tlûkluhna chuan a tâwpah chhiatna a thlen dâwn avângin.—Rom 8:6.
12. Eng kawngin nge mahni inbumna chuan min awh theih?
12 Mahni inbumna chuan awlsam têin min âwk thei a. Thinlung bum hmang tak hian mize ṭha lo pawi tak takte chu a thiam chawp emaw, sualna nasa takte chungah chhuanlam a siam emaw thei a ni. (1 Samuela 15:13-15, 20, 21) Kan thinlung bum hmang tak chuan rinhlelh kai nungchangte khuh bo dân kawng a zawng thei bawk. Entîr nân, intihhlimna chungchâng hi lo en ta ila. Intihhlimna ṭhenkhat chu a ṭhain a hlimpuiawm êm êm a. Mahse, he khawvêlin cinema-te, television program-te, leh Internet sites-tea a pêk chhuah thil a tam zâwk chu zahmawh lam leh nungchang bawlhhlawhna lam hlîr a ni. Intihhlimna bawlhhlawh tak takte enna hian chhiatna min thlen thei lo tih rin mai chu a awlsam hle. Ṭhenkhat phei chuan, “Ka chhia leh ṭha hriatna a khawih buai hlei nêm, eng nge a pawina awm?” tiin an chhût hial a ni. Mahse, chutiang mite chu “mahni inbum” mai an ni.—Jakoba 1:22.
13, 14. (a) Pathian Lehkha Thua entawn tûr engin nge kan chhia leh ṭha hriatna hi a rin tlâk reng lo tih târ lang? (b) Engtin nge mahni inbumna lakah kan invên theih ang?
13 Engtin nge mahni inbumna lakah kan invên theih? A hmasa berin, mihringte chhia leh ṭha hriatna neih hi a rin tlâk reng lo tih kan hriat reng a ṭûl a. Tirhkoh Paula chungchâng hi lo ngaihtuah ta ila. Ani chuan Kristian a nih hmain, Krista hnungzuitute chu a tiduhdah ṭhîn a. (Tirhkohte 9:1, 2) Chutih lai chuan a chhia leh ṭha hriatna chuan a tibuai miah lo thei. Mahse, dik lo taka kaihhruai a ni tih erawh a chiang hle. ‘Ring lo chung leh hre lova ti ka ni,’ tiin Paula chuan a sawi a ni. (1 Timothea 1:12, 13) Chuvângin, intihhlimna engemaw chu kan chhia leh ṭha hriatnain pawi a tih loh avâng maiin a dik tihna a ni rêng rêng lo. Pathian Thu hmanga ṭha taka sâwizawi chhia leh ṭha hriatna chauh chu kaihruaitu rin tlâk a ni.
14 Mahni inbumna pumpelh tûr chuan, kan hriat reng tûr rawtna ṭangkai tak tak a awm a ni. Ṭawngṭaina nên inenfiah rawh. (Sâm 26:2; 2 Korinth 13:5) Ṭha taka mahni inenfiahna chuan i thil thlîr dân emaw, i nun dân emaw chungchânga insiamrem i ngaihna laite a hriat chhuahtîr mai thei che a ni. Mi dangte thu ngaithla rawh. (Jakoba 1:19) Mahni inenfiah chu mahni ngaih dân hian a thunun ṭhin avângin, kan Kristianpui mi puitlingte ngaih dân tlang tak ngaihthlâk chu a finthlâk a ni. I thu tlûkna emaw, thiltih emaw chu i rinpui thiltawn ngah mi puitlingte tân rinhlelh a kai deuh chuan, ‘Ka chhia leh ṭha hriatna hi ṭha taka sâwizawi loh emaw, ka thinlungin min bum emaw a ni thei ang em?’ tiin inzâwt ang che. Bible leh Bible ṭanchhan thu leh hla chhuah hmangin inchâwm reng rawh. (Sâm 1:2) Chutianga tihna chuan i ngaihtuahna te, i rilru put hmang te, leh i rilru veizâwngte chu Pathian thu bulte nêna inmil tûrin a ṭanpui ang che.
Setana Dâwt Thu Lakah Invêng Rawh
15, 16. (a) Setana’n min bum nân eng dâwt thute nge a hman? (b) Engtin nge chutiang dâwta inbumna chu kan pumpelh theih ang?
15 Satana chuan min bum nân dâwt chi hrang hrang a hmang a. Sum leh pai chuan hlimna leh lungawina min neihtîr tih min rintîr a tum tlat a; mahse, a dik lo fo a ni. (Thuhriltu 5:10-12) Ani chuan he “hun hnuhnûngahte” hian kan awm tawh tih finfiahna chiang tak a awm chung pawhin, he khawvêl suaksual tak hi la awm zêl tûr anga kan rin chu a duh a ni. (2 Timothea 3:1-5) Nawmsip bâwlna ûmtute’n a rah chhuah râpthlâk tak takte an seng reng chung pawhin, Setana chuan bawlhhlawh taka nun a hlauhawm lo tih ngaih dân a theh lâr a ni. (Galatia 6:7) Engtin nge chutiang dâwta inbumna chu kan pumpelh theih ang?
16 Bible-a entawn tûrte hlâwkpui rawh. Bible-ah chuan Setana dâwt thuin a bum mite târ lan entawn tûr vaukhânna a chuang a. Chûng mite chuan khawvêl thil an ngaina a, tâwpna hunah an chêng tih an theihnghilh, a nih loh leh nungchang bawlhhlawhnaah an tlu lût a—a rah chhuah ṭha lo tak takte chu an seng a ni. (Matthaia 19:16-22; 24:36-42; Luka 16:14; 1 Korinth 10:8-11) Tûn laia thiltawnte aṭangin inzir rawh. Lungchhiatthlâk takin, Kristian ṭhenkhat chuan a hmanhmawhthlâkzia an hriatna chu hloh châng an nei a, Pathian rawng an bâwlin thil ṭha engemaw chân nei niin an ring tlat bawk a. Nawmchenna ûm tûrin thutak an kalsan mai thei bawk a ni. Mahse, chutiang mite chu “hmun nâl takahte” an awm a, engtik nîah emaw chuan an Pathian ngaihsak lohna nungchang chuan anmahni a la nangchîng ngei dâwn a ni. (Sâm 73:18, 19) Mi dangte thil tihsual aṭanga inzir chu kan tân a finthlâk a ni.—Thufingte 22:3.
17. Engvângin nge Setana chuan Jehova’n min hmangaih lo va, min hlut hek lo tih dâwt thu a tihdarh?
17 Setana’n a hman ṭangkai êm êm dâwt thu dang a awm leh a ni—Jehova’n min hmangaih lo va, min hlut hek lo tih dâwt thu chu. Setana chuan mihring ṭha famkim lote chanchin chu kum sâng tam tak chhûng a lo zir tawh a. Lunghnualna hian min tichau thei tih a hre êm êm a ni. (Thufingte 24:10) Chuvângin, Pathian mithmuhah hlutna rêng kan nei lo tih dâwt thu chu a awmtîr a ni. ‘Vuak thlûka’ kan awm a, Jehova’n min ngaihsak lo tih kan rin chuan, tlâwm kan duh mai ang. (2 Korinth 4:9) Chu tak mai chu a ni, Bumtu ropuiin a duh chu ni! A nih leh engtin nge he Setana bumna lakah hian kan invên theih ang?
18. Engtin nge Bible chuan Jehova’n min hmangaihzia a târ lan?
18 Pathian min hmangaihzia Bible sawi chu mahniin chhût ngun rawh. Pathian Thu chuan a mi mala min hriatzia leh min hmangaihzia târ lan nân tehkhin thu rilru khawih tak tak ṭhenkhat a hmang a. Jehova chuan i mittuite chu “savun pengah” a khung a, a awmzia chu rinawm tuma ṭan i lâk avânga i mittui tla zawng zawngte chu a hmu a, a hre reng tihna a ni. (Sâm 56:8) Ani chuan ‘thinlunga i lungchhiat’ lai a hria a, chutiang hunah chuan a hnaih ṭhîn che a. (Sâm 34:18) A hre chiang êm êm che a, i “samzaite lam pawh hi” a chhiar vek a ni. (Matthaia 10:29-31) A bul berah, Pathian chuan i tân “a Fapa mal neih chhun a pe” bawk a ni. (Johana 3:16; Galatia 2:20) A châng chuan, chutiang Bible chângte chu i tân a ni tih rin harsa i ti mai thei. Mahse, Jehova thu chu kan ring tûr a ni. Ani chuan a huho mai ni lovin, a mi mal ṭheuhvin min hmangaih a ni tih kan rin chu a duh a ni.
19, 20. (a) Engvângin nge Jehova’n a hmangaih lo che tih Setana dâwt thu chu hriat a, hnâwl a pawimawh? (b) Engtin nge bial kantu pakhatin lunghnualte a ṭanpui?
19 Dâwt chu hria la, hnâwl rawh. Mi tuemawin dâwt a sawi tih i hriat chuan, a buma awm lo tûrin i invêng thei a. Chutiang bawkin, Jehova’n a hmangaih lo che tih dâwt thu Setana’n ring tûra a duh che ringawt pawh chu ṭanpuitu chak tak a ni thei a ni. Setana zeizia laka vaukhânna chungchâng ziakna Vênnainsâng thuziak chhâng lêtin, Kristian pakhat chuan: “Setana chuan ka rilru veizâwng chu mi tihlunghnual nân hman a tum tih ka lo hre ngai lo rêng rêng a. He mi ka hriatna hian chûng ka rilru veizâwngte do tûrin min chêttîr a ni,” tiin a sawi.
20 South America khawmual ram pakhata bial kantu thiltawn hi ngaihtuah teh. Ani chuan a rinpui lunghnualte a tlawhin, ‘Trinity i ring em?’ tiin a zâwt ṭhîn a. Lunghnualtute chuan Setana dâwt thu a ni tih an hriat reng avângin, ‘Ring teh nâng’ tiin an chhâng tlângpui a. Chutah bial kantu chuan ‘Hremhmun meidîl i ring em?’ tiin a zâwt leh a. ‘Ring teh nâng’ tih chu a chhânna a ni leh a! Chutah, bial kantu chuan Setana dâwt thu dang hetianga hriat awlsam si lo a awm thu a hrilh ta a. Jehova’n mi mal tinte min hmangaih lo tih chu dâwt a nihzia laihlanna, Draw Close to Jehovah, * tih lehkhabu phêk 249, paragraph 21-na chu a kawhhmuh hlawm a ni. Bial kantu chuan Setana dâwt thu hria a, hnâwl tûra chûng lunghnualte a ṭanpuinain rah ṭha a chhuah thu a sawi a ni.
Inbumna Lakah Invêng Rawh
21, 22. Engvângin nge Setana mi bum dân kan hriat a, eng nge kan tum tlat tûr?
21 He ni hnuhnûng tâwpna hunah hian, Setana chuan a dâwt thu leh inbumna chu nasa takin a hmang chhunzawm zêl dâwn tih beisei tûr a ni a. Mahse, Jehova chuan Setana mi bum dânte hre lova min awmtîr loh avâng hian kan lâwm a ni. Bible leh “bawi rinawm, fing tak” chhuah Bible ṭanchhan thu leh hla te chuan Diabola thiltih dân suaksual tak takte chu chiang takin a hai lang a ni. (Matthaia 24:45) Chutianga hrilh lâwk vek kan nih avângin, kan lo inrâlring thei a ni.—2 Korinth 2:11.
22 Chuvângin, kalpêngte ngaih dân lakah chuan i invêng tlat ang u. Mahni inbumna thang hriatthiam har tak chu pumpelh i tum tlat ang u. Tin, Setana dâwt thu chu hriain, i hnâwl tlat bawk ang u. Chutianga tiin, inbumna tentu, “thutak Pathian” nêna kan inlaichînna chu kan vênghim ang.—Sâm 31:5; Thufingte 3:32. (w04 2/15)
[Footnote-te]
^ par. 5 Thu Puan 12:9-a ‘bum’ tia lehlin thu mal hi lehkhabu pakhat chuan “thil tih chhunzawm reng, mize nunphung zînga tel a ni” tih a sawi.
^ par. 20 Jehova Thuhretute chhuah.
I Hre Chhuak Em?
• Engvângin nge tûn lai khawvêlah hian inbumna a hluar êm êm?
• Engtin nge kalpêngte bumna laka kan invên theih?
• Engtin nge mahni inbum duhna lakah kan invên theih?
• Engtin nge Setana dâwt thua bumna chu kan pumpelh theih?
[Zirlai Atâna Zawhnate]
[Phêk 25-naa milem]
Intihhlimna chungchângah mahni inbum suh