Chhia Leh Ṭha Hriatna Thiang Tak

NI KHAT chu Kenya ram university pakhata hna thawk Charles-a chuan a haw kawngah a cellular phone a tibo hlauh mai a. Chûng thil chu Kenya ramah chuan mi hausa neih chi a la ni a.

Charles-a chuan, “Ka hmuh leh ka inbeisei lo rêng rêng,” a ti a. Amaherawhchu, chu mi hnu ni engemaw zât lekah, Kenya rama Jehova Thuhretute branch office aṭangin phone a dawng tlat mai a, mak a ti hle a ni. A cell phone rawn lam tûra hrilh a ni chu awih harsa a ti hle! Chu phone chu motor-a a chuanpui, Jehova Thuhretute zînga hun kima rawngbâwltu pakhatin a lo chhar niin. A neitu zawn a tumna lamah, chu rawngbâwltu chuan branch office-ah a rawn keng a, chuta rawngbâwlte chuan a tâwpah chuan phone-a a neitu number chuang aṭangin an zawng hmu thei ta a ni.

“Harsa chung chunga min zawn chhuah avângin ka lâwm ngawt mai. In pâwl zînga mi, ka cell phone lo chhar a, a neitu zawng chhuaka min pe kîrlehtu chungah ka lâwm tak meuh meuh a ni. Tûn laiah mi rinawm tak hmuh an harsat tehrêng nên, Pathian Jehova Thuhretu dik tak anga langsâr bîk, mi rinawm tlêm tê kan nei chu a thlamuanthlâk hle,” tiin branch office-a lehkha a thawnah a ziak tel a ni.

Jehova Thuhretute chuan khawi hmunah pawh an rinawmna avângin hriat an hlawh a. Anni chuan: “Chhia leh ṭha hriatna thiang tak kan nei tih dik takin kan inhre si a,” titu tirhkoh Paula chu an entawn a ni. (Hebrai 13:18; 1 Korinth 11:⁠1) Isua’n: “In êng chu mi mit hmuhin êng rawh se, chutichuan in thil tih ṭhatte an hmu ang a, in Pa vâna mi an chawimawi thei ang,” tia a sawi angin, chutiang nungchang chuan Pathian Jehova a chawimawi tih an hre chiang hle.​—⁠Matthaia 5:16. (w04 2/01)